ཤ་མུ་ཨེལ་གཉིས་པ། 10 - Tibetan Old Testament 2011

དཱ་བིད་ཀྱིས་ཨམ་མོན་པ་དང་སི་རི་ཡ་པ་རྣམས་ལས་རྒྱལ་ཁ་ཐོབ་པ།

¹ ནམ་ཞིག་རྗེས་སུ་ཨམ་མོན་གྱི་རྒྱལ་པོ་ན་ཧཤེ་གྲོངས་ནས་ཁོའི་བུ་ཧ་ནུན་རྒྱལ་པོར་འཁོད་ཅིང་།

² རྒྱལ་པོ་དཱ་བིད་ཀྱིས། སྔར་ཁོའི་ཕ་ན་ཧཤེ་ཀྱིས་ང་ལ་ཇི་ལྟར་མཐུན་འབྲེལ་བཟང་པོ་བྱས་པ་བཞིན། ངས་ཀྱང་ཧ་ནུན་ལ་དེ་བཞིན་འབྲེལ་བ་བྱེད་དགོས་བསམ་ནས། དཱ་བིད་ཀྱིས་ཐུགས་གསོའི་འཚམས་འདྲི་དང་བཅས་རང་གི་བང་ཆེན་རྣམས་བཏང་ངོ་། དེ་ཚོ་ཨམ་མོན་དུ་འབྱོར་སྐབས།

³ ཨམ་མོན་པའི་འགོ་དཔོན་ཚོས་རྒྱལ་པོ་ལ། དཱ་བིད་ཀྱིས་ཁྱེད་ཀྱི་ཡབ་ལ་གུས་བཏུད་ཞུ་ཕྱིར་ཁྱེད་ལ་ཐུགས་གསོའི་འཚམས་འདྲི་ཞུ་བར་མི་འདི་ཚོ་བཏང་བ་རེད་ཅེས་ཁྱེད་ཀྱིས་དགོངས་སམ། དེ་ལྟར་ནམ་ཡང་མ་ཡིན་ནོ། ཁོས་ང་ཚོར་དབང་བསྒྱུར་བྱེད་ཕྱིར་མི་འདི་ཚོ་གྲོང་ཁྱེར་འདིར་བལྟ་ཉུལ་དུ་བཏང་བ་ཡིན་ཞེས་སྨྲས་སོ།

⁴ དེ་ནས་ཧ་ནུན་གྱིས་དཱ་བིད་ཀྱི་བང་ཆེན་རྣམས་འཛིན་བཟུང་བྱས་ཏེ། དེ་ཚོའི་རྨ་རའི་གཞོགས་གཅིག་བྲེགས་ཏེ་རྐེད་པའི་དཔྱིང་འགོ་ནས་གྱོན་གོས་མར་གཤགས་ནས་འགྲོར་བཅུག་གོ

⁵ དེ་ཚོ་ནང་དུ་ཕྱིར་ལོག་བྱེད་པར་ཧ་ཅང་ངོ་ཚ་བ་དང་། དཱ་བིད་ཀྱིས་གནས་ཚུལ་དེ་ཐོས་ཏེ། དེ་ཚོའི་གདོང་གི་རྨ་ར་སླར་ཡང་མ་སྐྱེས་བར་དུ་ཡེ་རི་ཀོ་རང་དུ་སྒུག་སྡོད་བྱོས་ཤིག་ཅེས་ལོན་བཏང་ངོ་།

⁶ ཨམ་མོན་པ་ཚོའི་སེམས་ལ། ད་ནི་དཱ་བིད་ང་ཚོའི་དགྲ་བོར་འགྱུར་བ་རེད་ཅེས་བསམ་ནས། དེ་ཚོས་བྷེད་རེ་ཧོབ་དང་ཛོ་བཱ་ནས་སི་རི་ཡ་པའི་དམག་མི་ ༢༠,༠༠༠ དང་ཏོབ་ནས་མི་ ༡༢,༠༠༠ དང་། མ་ཀཱའི་རྒྱལ་པོ་དང་མི་ ༡,༠༠༠ བཅས་མི་ལག་སྒྲིགས་སོ།

⁷ དེ་ནས་དཱ་བིད་ཀྱིས་གནས་ཚུལ་དེ་ཐོས་ནས། ཡོ་ཨབ་དང་མཉམ་དུ་རང་གི་དམག་མི་ཡོངས་རྫོགས་བཏང་ནས་དེ་ཚོའི་ཐོག་ཏུ་འཐབ་རྒོལ་བྱེད་ཕྱིར་བཏང་ངོ་།

⁸ ཨམ་མོན་པ་རྣམས་མདུན་བསྐྱོད་བྱས་ཏེ་རང་གི་རྒྱལ་ས་རབ་བཱ་རུ་འགྲོ་བའི་གཞུང་ལམ་ལྟེ་བར་སྒར་རྒྱབ་ནས་བསྡད་པ་དང་། དེ་བཞིན་སི་རི་ཡ་པ་དང་ཏོབ་དང་མ་ཀཱ་ནས་ཡིན་པའི་མི་རྣམས་ཐང་སྟོང་དུ་དམག་སྒར་རྒྱབ་ནས་བསྡད་དོ།

⁹ དགྲ་བོའི་དམག་མི་རྣམས་ཀྱི་རྒྱབ་མདུན་གཉིས་ཀ་ནས་དམག་འཐབ་བྱེད་ཉེན་ཡོད་པ་མཐོང་ནས། ཡོ་ཨབ་ཀྱིས་ཨིསི་རཱཨེལ་གྱི་དམག་མི་ལེགས་ཤོས་རྣམས་སི་རི་ཡ་པ་རྣམས་དང་གདོང་ལེན་བྱེད་ཕྱིར་དེ་ཚོའི་ཕྱོགས་སུ་རུ་སྒྲིག་ནས་བཞག་གོ

¹⁰ དེ་འཕྲོས་དམག་མི་རྣམས་རང་གི་སྤུན་ཨ་བྷི་ཤེའི་ཁོངས་སུ་རྩིས་སྤྲད་པས། ཨ་བི་ཤཱས་དེ་ཚོ་ཨམ་མོན་པ་རྣམས་ཀྱི་ཕྱོགས་སུ་ཁ་སྤྲོད་བྱས་ནས་བཞག་གོ

¹¹ ཡོ་ཨབ་ཀྱིས་ཨ་བི་ཤཱ་ལ་སྨྲས་པ། སི་རི་ཡ་པ་ཚོས་ང་དང་འཐབ་དུས། ཁྱོད་ཀྱིས་ང་འཕམ་བཞིན་པ་མཐོང་ན་ང་ལ་རོགས་བྱེད་པར་ཡོང་དགོས། དེ་བཞིན་ཨམ་མོན་པ་ཚོས་ཁྱོད་ལ་འཕམ་པར་བྱེད་པ་མཐོང་ན་ང་ཡོང་ནས་ཁྱོད་ལ་རོགས་བྱེད་རྒྱུ་ཡིན།

¹² ཁྱོད་ཚོ་སྙིང་སྟོབས་བསྐྱེད་ཅིང་། སེམས་ཤུགས་མ་ཉམས་པར་བྱོས་ཤིག ང་ཚོའི་མི་མང་དང་ང་ཚོའི་དཀོན་མཆོག་གི་གྲོང་ཁྱེར་ཁག་གི་ཆེད་དུ་དཔུང་ཤུགས་ཆེན་པོས་དམག་འཐབ་བྱེད་དགོས། འོན་ཀྱང་གཙོ་བོ་དཀོན་མཆོག་གི་ཐུགས་དགོངས་གང་ཡིན་པ་དེ་སྒྲུབ་པར་ཤོག་ཅིག

¹³ ཡོ་ཨབ་དང་ཁོའི་མི་རྣམས་འཐབ་རྒོལ་བྱེད་ཕྱིར་མདུན་དུ་ཕྱིན་པ་དང་སི་རི་ཡ་པ་རྣམས་བྲོས་ཕྱིན་ནོ།

¹⁴ ཨམ་མོན་པ་རྣམས་ཀྱིས་སི་རི་ཡ་པ་རྣམས་བྲོས་འགྲོ་གིན་ཡོད་པ་མཐོང་ནས། དེ་ཚོའང་ཨ་བྷི་ཤའི་མདུན་ནས་བྲོས་ཏེ། གྲོང་ཁྱེར་ནང་དུ་འཛུལ་བ་དང་། ཡོ་ཨབ་ནི་ཨམ་མོན་པ་རྣམས་དང་དམག་རྒྱབ་རྒྱུ་བཞག་ནས་ཡེ་རུ་ཤ་ལེམ་གྱི་ཕྱོགས་སུ་ལོག་ཕྱིན་ནོ།

¹⁵ དེ་ནས་སི་རི་ཡ་པ་ཚོའི་སེམས་ལ། ད་ང་ཚོ་ཨིསི་རཱཨེལ་པ་རྣམས་དང་དམག་ཤོར་བཞག་བསམ་ནས་རང་གི་དམག་མི་ཡོངས་རྫོགས་ཕྱོགས་གཅིག་ཏུ་བཀོངས་སོ།

¹⁶ རྒྱལ་པོ་ཧ་དྷད་ཨེ་ཟེར་གྱིས་གཙང་པོ་ཡུབ་རད་ཀྱི་ཤར་ཕྱོགས་སུ་ཡོད་པའི་སི་རི་ཡ་པ་རྣམས་བོས་ཏེ། ཛོ་བཱའི་རྒྱལ་པོ་ཧ་དྷད་ཨེ་ཟེར་གྱི་དམག་དཔོན་ཤོ་བྷག་གི་འགོ་འཁྲིད་འོག་ཏུ་ཧེ་ལཱམ་དུ་ཡོང་ངོ་།

¹⁷ དེ་ནས་དཱ་བིད་ཀྱིས་གནས་ཚུལ་དེ་ཐོས་པ་དང་ཨིསི་རཱཨེལ་དམག་མི་རྣམས་བསྡུ་བཀོང་བྱས་ཏེ། གཙང་པོ་ཡོར་དན་རྒལ་ནས་ཧེ་ལཱམ་གྱི་ཕྱོགས་སུ་ཕྱིན་ནོ། དེར་སི་རི་ཡ་པ་རྣམས་དཱ་བིད་ལ་གདོང་ལེན་བྱེད་ཕྱིར་དམག་མི་གྲ་སྒྲིགས་ནས་བསྡད་ཡོད་དོ། དེ་རྗེས་དམག་འཐབ་འགོ་ཚུགས་སོ།

¹⁸ ཨིསི་རཱཨེལ་པ་ཚོས་སི་རི་ཡ་པའི་དམག་མི་རྣམས་ཕྱིར་འདེད་བྱས་ཏེ། དཱ་བིད་དང་ཁོང་གི་དམག་མི་ཚོས་སི་རི་ཡ་པའི་ཤིང་རྟའི་ཁ་ལོ་པ་ ༧༠༠ དང་རྟ་དམག་ ༤༠,༠༠༠ བསད་པ་མ་ཟད། དགྲ་བོའི་དམག་དཔོན་ཤོ་བྷག་ལའང་རྨས་སྐྱོན་བཏང་ནས། རྗེས་སུ་ཁོ་དམག་སར་ཤི་བ་ཡིན་ནོ།

¹⁹ ཧ་དྷད་ཨེ་ཟེར་གྱི་མངའ་འོག་ཏུ་ཡོད་པའི་རྒྱལ་ཕྲན་ཚོས་རང་ཉིད་ཨིསི་རཱཨེལ་པའི་ལག་ཏུ་འཕམ་པར་བྱས་པ་དེ་ཤེས་ནས། དེ་ཚོས་ཁོ་ཚོ་དང་མཉམ་དུ་ཞི་བའི་འཆིང་སྒྲིག་བཞག་སྟེ། ཁོ་ཚོའི་མངའ་ཁོངས་སུ་བསྡད་དོ། དེའི་རྗེས་སུ་སི་རི་ཡ་པ་ཚོས་ཨམ་མོན་པ་རྣམས་ལ་རོགས་རམ་བྱེད་རྒྱུ་འཇིགས་སོ༎