རྒྱལ་རབས་གཉིས་པ། 9 - Tibetan Old Testament 2011

ཡེ་ཧུ་ལ་ཨིསི་རཱཨེལ་གྱི་རྒྱལ་པོར་བསྔོ་འབུལ་བྱས་པ།

¹ སྐབས་དེར་ལུང་སྟོན་པ་ཨེ་ལི་ཤས། ལུང་སྟོན་པའི་ནང་ནས་ན་གཞོན་ཞིག་བོས་གནང་ནས། ཁྱོད་གྲ་སྒྲིགས་བྱས་ནས་སྐྱུ་རུའི་སྣུམ་གྱི་བུམ་པ་འདི་མཉམ་དུ་འཁྱེར་ནས་གྷིལ་ཨད་དུ་ཡོད་པའི་ར་མོད་དུ་སོང་ཞིག

² ཁྱོད་དེར་སླེབས་པ་དང་། ཡེ་ཧོ་ཤ་ཕད་ཀྱི་བུ་ནིམ་ཤིའི་ཚ་བོ་ཡེ་ཧུ་ལ། ཁོ་གྲོགས་པོ་ཆོའི་ཁྲོད་ནས་སྒེར་གྱི་ཁང་མིག་ཞིག་གི་ནང་འཁྲིད་ཅིག

³ ཁོའི་མགོ་ལ་སྐྱུ་རུའི་སྣུམ་འདི་བླུགས་ནས། གཙོ་བོ་དཀོན་མཆོག་གིས་གསལ་སྒྲགས་གནང་བ་ལྟར། ཁོང་གིས་ཁྱོད་ལ་ཨིསི་རཱཨེལ་གྱི་རྒྱལ་པོར་བསྔོ་འབུལ་གནང་བ་ཡིན་ཞེས་སྨྲས་ནས། དེ་ནས་གང་མགྱོགས་ཐོན་ཞིག་གསུངས་སོ།

⁴ དེ་འདྲ་སོང་ཙང་ལུང་སྟོན་པ་ན་གཞོན་དེ་ར་མོད་དུ་ཕྱིན་ནོ།

⁵ དེར་ཁོང་གིས་དམག་མིའི་འགོ་འཛིན་རྣམས་ཚོགས་འདུ་ཚོགས་ནས་ཡོད་པ་དང་འཕྲད་པས། ཁོང་གི་སྐུ་ཞབས་ལགས། ང་ལ་ཁྱེད་ཀྱི་ཕྱིར་ཕྲིན་ཞིག་ཡོད་གསུངས་པས། ཡེ་ཧུས། ཁྱེད་ཀྱིས་ང་ཚོའི་ནང་ནས་སུ་ལ་གསུངས་ཀྱི་ཡོད་ཅེས་དྲིས་པས། ཁོང་གིས། ངས་ཁྱེད་ལ་ཞུ་གི་ཡོད་ཅེས་གསུངས་སོ།

⁶ དེ་ནས་ཁོ་ཚོ་གཉིས་ཁང་པའི་ནང་དུ་ཕེབས་པ་དང་། ལུང་སྟོན་པ་ན་གཞོན་གྱིས། ཡེ་ཧུའི་མགོ་ལ་སྐྱུ་རུའི་སྣུམ་དེ་བླུགས་ནས། གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་གསལ་སྒྲགས་གནང་བ་ལྟར། ངས་ཁྱོད་ལ་ཨིསི་རཱཨེལ་གྱི་རྒྱལ་པོར་བསྔོ་འབུལ་བྱས་པ་ཡིན།

⁷ ཁྱོད་ཀྱི་སྦྱིན་བདག་ཨ་ཧབ་ཀྱི་བུ་ལ་ཁྱོད་ཀྱིས་གསོད་དགོས། དེ་ལྟར་ཡེ་ཛི་བྷེལ་གྱིས་ངའི་ལུང་སྟོན་པ་ཚོ་དང་ཞབས་ཕྱི་ཚོ་བསད་པར་ངས་ཆད་པ་གཏོང་བར་བྱ།

⁸ ཨ་ཧབ་ཀྱི་ནང་མིའི་བརྒྱུད་པ་རྣམས་འཆི་དགོས། ངས་ཁོའི་ནང་མིའི་ནང་ནས་ཕོ་རྒན་གཞོན་ཚང་མ་མེད་པར་བྱ་རྒྱུ་ཡོན་ནོ།

⁹ ངས་ཁོའི་ནང་མི་རྣམས་ཨིསི་རཱཨེལ་གྱི་རྒྱལ་པོ་ཡེ་རོ་བྷམ་དང་ཨིསི་རཱཨེལ་གྱི་བྷ་ཤའི་ནང་མི་ལྟར་བྱེད་རྒྱུ་ཡིན།

¹⁰ ཡེ་ཛི་བྷེལ་གྱི་ཕུང་པོ་དེ་སྦས་པར་མི་བྱ་ཞིང་། མོའི་ལུས་དེ་ཡེཛ་རིལ་གྱི་ས་ཁུལ་དུ་ཁྱིས་ཟ་བར་འགྱུར་རོ་ཅེས་གསུངས་པའི་རྗེས་ལ་ལུང་སྟོན་པ་ན་གཞོན་དེ་ཁང་མིག་ནས་ཐོན་ཏེ་བྲོས་སོ།

¹¹ ཡེ་ཧུ་རང་གི་འགོ་འཛིན་གྱི་ལས་རོགས་ཚོའི་སར་ཕེབས་པ་དང་། ཁོ་ཚོས་ཚང་མ་ལེགས་པོ་ཡོད་དམ། མི་སྨྱོན་པ་དེས་ཁྱོད་ལ་ག་རེ་དགོས་ལབ་ཀྱི་འདུག་གམ་ཞེས་དྲིས་པས། ལན་དུ་ཡེ་ཧུས། ཁྱོད་ཚོས་ཁོ་ལ་ག་རེ་དགོས་པ་ཤེས་ཀྱི་ཡོད་དམ།

¹² དེ་ཚོས། ང་ཚོས་ཤེས་ཀྱི་མེད། ཁོས་ཁྱོད་ལ་ཇི་བཤད་པ་ང་ཚོར་སྨྲོས་ཤིག་སྨྲས་པས། ཁོས་ང་ལ། གཙོ་བོ་དཀོན་མཆོག་གིས་ང་ཨིསི་རཱཨེལ་གྱི་རྒྱལ་པོར་བསྔོ་འབུལ་གནང་བ་ཡིན་ཞེས་ཁོས་སྨྲས་བྱུང་།

¹³ དེ་མ་ཐག་ཏུ་ཡེ་ཧུའི་ལས་རོགས་འགོ་འཛིན་ཚོས་སྐས་འཛེག་གི་མགོར་ཡེ་ཧུ་དེའི་སྟེང་དུ་ལངས་པའི་ཕྱིར་རང་རང་གི་གོས་བཀྲམ་ནས་དུང་འབུད་ནས་ཡེ་ཧུ་རྒྱལ་པོ་ཡིན་ཞེས་སྐད་རྒྱབ་བོ༎

ཨིསི་རཱཨེལ་གྱི་རྒྱལ་པོ་ཡོ་རམ་བསད་པ།

^14-15 དེ་ནས་ཡེ་ཧུས། རྒྱལ་པོ་ཡོ་རམ་གྱི་ཐོག་ཏུ་འཆར་གཞི་གཏིང་ངོ། དེ་དུས་ཡོ་རམ་རང་ཉིད་ལ་རྨས་ཡོད་པ་དེ་གསོ་བའི་ཕྱིར་ཡེཛ་རིལ་དུ་བསྡད་ཡོད་དོ། རྨ་དེ་ར་མོད་ཀྱི་དམག་སར་སི་རི་ཡའི་རྒྱལ་པོ་ཧ་ཛ་ཨེལ་དང་མཉམ་དུ་དམག་འཐབ་སྐབས་བྱུང་བ་ཡིན་ནོ། དེར་བརྟེན་ཡེ་ཧུས་རང་གི་ལས་རོགས་འགོ་འཛིན་ཚོར་ཁྱོད་ཚོ་ངའི་ཕྱོགས་སུ་ཡོད་ན་ར་མོད་ནས་སུ་ཞིགམཐར་ནས་ཡེཛ་རིལ་དུ་མི་མང་ལ་ཉེན་བརྡ་གཏོང་བར་འགྲོ་མ་བཅུག་པར་ངེས་གཏན་བྱེད་དགོས་ཅེས་སྨྲས་སོ།

¹⁶ དེ་ནས་ཁོང་རང་གི་ཤིང་རྟ་འཁོར་ལོའི་ནང་བཞུགས་ནས་ཡེཛ་རིལ་དུ་ཕྱིན་ནོ། ཡོ་རམ་ད་དུང་ཡང་རྨ་གསོས་མེད་པ་དང་ཡ་ཧུ་དཱ་པའི་རྒྱལ་པོ་ཨ་ཧ་ཛ་ཡཱ་དེར་ཁོང་ལ་ཐུག་འཕྲད་བྱེད་པར་ཕེབས་སོ།

¹⁷ ཡེཛ་རིལ་གྱི་མཁར་གྱི་རྩེ་མོར་སྲུང་བྱ་བ་དེས་ཡེ་ཧུ་དང་ཁོང་གི་མི་རྣམས་ཡོང་བཞིན་པ་མཐོང་ངོ་། ངས་མི་འགའ་ཤས་རྟར་ཞོན་ནས་ཡོང་བ་མཐོང་གི་འདུག་ཅེས་ཁོས་སྐད་རྒྱབ་བོ། ཡོ་རམ་གྱིས་དེ་ཚོ་དགྲ་གཉེན་ཇི་ཡིན་རྟགས་དཔྱད་བྱེད་པར་རྟ་པ་ཞིག་གཏོང་ཞིག་གསུངས་སོ།

¹⁸ བང་ཆེན་དེས་ཡེ་ཧུའི་སར་རྟ་ཞོན་ནས་ཕྱིན་ཏེ་རྒྱལ་པོས་ཁྱེད་གྲོགས་པོ་བཞིན་ཕེབས་ཡོད་མེད་མཁྱེན་འདོད་གནང་གི་འདུག་ཅེས་ཞུས་པས། ལན་དུ་ཡེ་ཧུས། དེའི་སྐོར་ཁྱོད་ལ་བྱུས་གཏོགས་མེད། ངའི་རྒྱབ་ལ་འབྲངས་ཤིག་གསུངས་སོ། མཁར་གྱི་སྲུང་བྱ་བ་དེས། བང་ཆེན་དེ་ཚོ་དང་འཕྲད་ན་ཡང་ཕྱིར་ལོག་ཡོང་གི་མི་འདུག་ཅེས་སྙན་གསེང་ཞུས་སོ།

¹⁹ བང་ཆེན་གཞན་ཞིག་བཏང་བ་དེས། ཡེ་ཧུ་ལ་དྲི་བ་དེ་རང་དྲིས་པས། ཡེ་ཧུས་ལན་དུ། ཡང་སྐྱར་དེའི་སྐོར་ཁྱོད་ལ་བྱུས་གཏོགས་མེད། ངའི་རྒྱབ་ལ་གྲངས་ཤིག་གསུངས་སོ།

²⁰ ཡང་སྐྱར་ཐེངས་གཅིག་སྲུང་བྱ་བ་དེས། བང་ཆེན་དེ་ཚོ་དང་འཕྲད་ན་ཡང་ཕྱིར་ལོག་ཡོང་གི་མིན་འདུག་ཅེས་སྙན་གསེང་ཞུས་པས། ཁོས་དེ་ཚོའི་འགོ་པ་དེའི་ཡེ་ཧུས་ཤིང་རྟ་འཁོར་ལོ་བཏང་བ་བཞིན་སྨྱོན་པ་ལྟར་བཏང་བཞིན་འདུག་ཞུས་སོ།

²¹ རྒྱལ་པོ་ཡོ་རམ་གྱིས་ངའི་ཤིང་རྟ་འཁོར་ལོ་གྲ་སྒྲིགས་བྱོས་ཤིག་ཅེས་བཀའ་གནང་ངོ་། དེ་ལྟར་བྱས་པ་དང་ཁོང་དང་རྒྱལ་པོ་ཨ་ཧ་ཛ་ཡཱ་རང་རང་སོ་སོའི་ཤིང་རྟ་འཁོར་ལོར་བཞུགས་ནས་ཡེ་ཧུ་ལ་འཕྲད་ཕྱིར་ཕེབས་བ་དང་ཁོང་ཚོས་ཁོ་ལ་ན་བོད་ཀྱི་ཞིང་ཁར་འཕྲད་དོ།

²² ཡོ་རམ་གྱིས་ཁྱོད་ཞི་བདེའི་ངང་ཡོང་བ་ཡིན་ནམ་ཅེས་དྲིས་པས། ལན་དུ་ཡེ་ཧུས། ཞི་བདེ་ཇི་ལྟར་ཡོང་ངམ། ང་ཚོ་ད་དུང་ཡང་ཁྱོད་ཀྱི་ཡུམ་ཡེ་ཛི་བྷེལ་གྱིས་འགོ་བཙུགས་པའི་ངན་སྔགས་དང་ལྷ་སྐུར་མཆོད་སྲོལ་ཡོད་ཟེར་རོ།

²³ ཡོ་རམ་གྱིས། ཨ་ཧ་ཛ་ཡཱ་དེ་བསླུ་འཁྲིད་མཁན་རེད་ཅེས་སྐད་རྒྱབ་ནས་ཁོང་གི་ཤིང་རྟ་འཁོར་ལོ་ཁ་བསྐོར་ནས་བྲོས་སོ།

²⁴ ཡེ་ཧུས་རང་གི་གཞུ་དེ་ཤུགས་གང་ཡོད་ཀྱིས་འཐེན་ནས་མདའ་ཞིག་རྒྱབ་ལ་ཕོག་སྟེ་ཁོའི་སྙིང་ལ་ཨི་ཁུང་འབིགས་པས། ཡོ་རམ་རང་གི་ཤིང་རྟ་འཁོར་ལོའི་ནང་འགྱེལ་ནས་ཤི་བོ།

²⁵ ཡེ་ཧུས། རང་གི་རོགས་པ་བྷིཌ་ཀར་ལ། ཁོའི་ལུས་པོ་བླངས་ནས་ན་བོད་ཀྱི་ཞིང་ཁར་དབྱུགས་ཤིག ཁྱོད་དང་ང་གཉིས་མཉམ་དུ་རྟ་ཞོན་ནས་རྒྱལ་པོ་ཡོ་རམ་གྱི་ཡབ་ཨ་ཧབ་ཀྱི་རྒྱབ་ནས་འགྲོ་སྐབས་གཙོ་བོ་དཀོན་མཆོག་གིས་ཨ་ཧབ་ཀྱི་སྐོར་བཀའ་གང་གནང་བ་དྲན་པར་བྱོས་ཤིག

²⁶ ངས་ན་བོད་དང་ཁོའི་བུ་ཚོ་ཁ་སང་བསད་པ་མཐོང་བྱུང་བས། ཁྱོད་ལ་ཞིང་ཁ་དེ་རང་ལ་ཉེས་པ་གཏོང་རྒྱུའི་དམ་བཅའ་བྱེད་པ་ཡིན་ཞེས་གསུངས་ཡོད། དེ་ནས་ཡེ་ཧུས་རང་གི་རོགས་པར་ཡོ་རམ་གྱི་ལུས་པོ་དེ་བླངས་ནས་གཙོ་བོ་དཀོན་མཆོག་གི་དམ་བཅའ་སྒྲུབ་པའི་ཕྱིར་ན་བོད་ཀྱི་ཞིང་ཁར་དབྱུགས་ཤིག་ཅེས་བཀའ་གནང་ངོ་༎

ཡ་ཧུ་དཱ་པའི་རྒྱལ་པོ་ཨ་ཧ་ཛ་ཡཱ་བསད་པ།

²⁷ རྒྱལ་པོ་ཨ་ཧ་ཛ་ཡཱས་གང་བྱུང་བ་མཐོང་བ་དང་རང་གི་ཤིང་རྟ་འཁོར་ལོའི་ནང་གྲོང་ཁྱེར་བྷེད་ཧ་གན་ཟེར་བའི་ཕྱོགས་སུ་བྲོས་པ་དང་། ཡེ་ཧུས་ཁོ་ལ་བསད་པའི་ཕྱིར་དེད་ནས་རང་གི་མི་ཚོ་ལ་ཁོ་ཡང་གསོད་ཅིག་ཅེས་བཀའ་གནང་བ་དང་། དེ་ཚོས་ཁོང་གྲོང་ཁྱེར་ཨིབ་ལཱིམ་གྱི་ཉེ་འགྲམ་དུ་གྷུར་གྱི་ལམ་དུ་ཤིང་རྟ་འཁོར་ལོའི་ནང་འགྲོ་སྐབས་ཁོང་ལ་རྨས་སོ། འོན་ཀྱང་ཁོང་གྲོང་ཁྱེར་མེ་གི་དྷོ་བར་བྲོས་ཐུབ་པ་དང་དེར་ཁོང་གྲོངས་སོ།

²⁸ ཁོང་གི་ལས་བྱེད་པ་ཚོས་ཁོང་གི་སྐུ་ལུས་དེ་ཤིང་རྟ་འཁོར་ལོ་ཞིག་གི་ནང་ཡེ་རུ་ཤ་ལེམ་དུ་འཁྱེར་ནས། དེར་དཱ་བིད་ཀྱི་གྲོང་ཁྱེར་གྱི་རྒྱལ་པོའི་སྤུར་ཁང་དུ་སྦས་སོ།

²⁹ ཨ་ཧབ་ཀྱི་སྲས་ཡོ་རམ་གྱིས་ཨིསི་རཱཨེལ་གྱི་རྒྱལ་སྲིད་བཟུང་བའི་ལོ་བཅུ་གཅིག་པའི་སྐབས་སུ་ཨ་ཧ་ཛི་ཡས་ཡ་ཧུ་དཱ་པའི་རྒྱལ་པོར་འགྱུར་རོ༎

བཙུན་མོ་ཡེ་ཛི་བྷེལ་བསད་པ།

³⁰ ཡེ་ཧུ་ཡེཛ་རིལ་དུ་སླེབས་ནས། ཡེ་ཛི་བྷེལ་གྱིས་གང་བྱུང་བ་ཐོས་པ་དང་། མིག་ལ་ཚོན་བྱུགས་ནས་རང་གི་སྐྲ་བཤད་ཅིང་ཕོ་བྲང་གི་སྒེ་ཁུང་ཞིག་ནས་ཁྲོམ་ལམ་དུ་བལྟ་ཕྱིར་ལངས་སོ།

³¹ ཡེ་ཧུ་རྒྱལ་སྒོའི་ནང་འཛུལ་བ་དང་། མོས། ཛིམ་རི་མི་གསོད་མཁན་ཁྱོད་གང་གི་དོན་དུ་འདིར་ཡོང་བ་ཡིན་ནམ་ཅེས་སྐད་རྒྱབ་བོ།

³² ཡེ་ཧུས་ཡར་བལྟས་ནས། ངའི་ཕྱོགས་སུ་སུ་ཡོད་དམ་ཅེས་སྐད་རྒྱབ་པ་དང་། ཕོ་བྲང་གི་ལས་བྱེད་པ་གཉིས་གསུམ་ནས་ཁོང་ལ་སྒེ་ཁུང་ནས་མར་བལྟས་པ་དང་།

³³ ཡེ་ཧུས་དེ་ཚོ་ལ། མོ་མར་དབྱུགས་པ་དང་རྟ་སོགས་ལ་མོའི་ཁྲག་འཐོར་རོ། ཡེ་ཧུས་རང་གི་རྟ་དང་ཤིང་རྟ་འཁོར་ལོ་མོའི་ལུས་ཀྱི་སྟེང་དུ་བཏང་ངོ་།

³⁴ དེ་ནས་ཁོང་ཕོ་བྲང་ནང་འཛུལ་ནས་ཞལ་ལག་བཞེས་སོ། དེའི་རྗེས་སུ་ཁོང་གིས། མོའི་ཕུང་པོ་དེ་འཁྱེར་ནས་སྦས་ཤིག། གང་ལ་ཟེར་ན། མོ་ནི་རྒྱལ་པོའི་བུ་མོ་ཡིན་ནོ།

³⁵ འོན་ཀྱང་མོའི་ལུས་པོ་སྦས་སར་འགྲོ་མཁན་མི་ཚོས་མོའི་ཐོད་པ་དང་རྐང་ལག་གི་རུས་པ་མ་གཏོགས་མ་རྙེད་པས།

³⁶ དེ་ཚོས་དེ་བཞིན་ཡེ་ཧུ་ལ་སྙན་གསེང་ཞུས་པ་དང་། ཁོང་གི་དེ་ནི་གཙོ་བོ་དཀོན་མཆོག་གི་ཞབས་ཕྱི་ཨེ་ལི་ཡཱའི་བརྒྱུད་ཨིསི་རཱཨེལ་གྱི་ས་ཁུལ་དུ་ཡེ་ཛི་བྷེལ་གྱི་ལུས་དེ་ཁྱི་ཚོས་ཟ་བར་འགྱུར།

³⁷ མོའི་གཟུགས་ལྷག་མ་དེ་ལུད་ལྟར་འགྱུར་ནས་སུས་ཀྱང་དེ་ཚོ་དབྱེ་བ་བྱེད་མི་ཐུབ་པར་འཐོར་བར་འགྱུར་ཞེས་གསུངས་པ་ལྟར་བྱུང་བ་ཡིན་གསུངས་སོ༎