རྒྱལ་རབས་གཉིས་པ། 8 - Tibetan Old Testament 2011

ཤུ་ནེམ་གྱི་བུད་མེད་ཕྱིར་ལོག་ཡོང་བ།

¹ ཨེ་ལི་ཤས། བུ་གསོན་པོར་བསླངས་གནང་བའི་ཤུ་ནེམ་གྱི་བུད་མད་དེ་ལ། གཙོ་བོ་དཀོན་མཆོག་གིས་ཡུལ་དེར་མུ་གེ་གཏོང་གནང་བ་དེ་ལོ་བདུན་གྱི་བར་དུ་གནས་པས། མོ་རང་གི་ནང་མི་དང་བཅས་པ་ས་གནས་གཞན་ཞིག་ཏུ་གནས་སྡོད་བྱེད་པར་འགྲོ་དགོས་གསུངས་པས།

² མོས་ཁོང་གིས་སློབ་སྟོན་གནང་བར་ཉན་ནས་མོ་རང་གི་ནང་མི་དང་བཅས་པ་ཕེ་ལེ་ཤེད་དུ་ལོ་བདུན་རིང་གནས་སྡོད་བྱས་སོ།

³ ལོ་བདུན་གྱི་གཞུག་ལ་མོ་ཨིསི་རཱཨེལ་དུ་ཕྱིར་ལོག་པ་དང་། རྒྱལ་པོའི་སར་ཕྱིན་ནས། མོའི་རང་གི་ཁྱིམ་དང་ས་ཆ་བཅས་སླར་ཕྱིར་སློག་གནང་དགོས་ཞུས་སོ།

⁴ མོས་རྒྱལ་པོ་ཨེ་ལི་ཤའི་ཞབས་ཕྱི་གྷེ་ཧ་ཛི་མཉམ་དུ་ཨེ་ལི་ཤའི་རྫུ་འཕྲུལ་གྱི་སྐོར་བཀའ་མོལ་གནང་གི་ཡོད་པ་འཕྲད་དོ།

⁵ གྷེ་ཧ་ཛིས་རྒྱལ་པོར། ཨེ་ལི་ཤས་མི་འཆི་ཟིན་པ་ཞིག་ལ་གསོན་པོར་བསླང་བའི་སྐོར་ཞུ་སྐབས་སུ། བུད་མེད་དེས་རྒྱལ་པོར་ཞུ་བ་ཕུལ་བ་དང་། གྷེ་ཧ་ཛིས། ཁོང་ལ་མི་དབང་ཆེན་པོ་བུད་མེད་འདིའི་བུ་དེ་ཨེ་ལི་ཤས་གསོན་པོར་བསླང་གནང་བ་ཡིན་ཞུས་པས།

⁶ རྒྱལ་པོ་ལ། མོས་གྷེ་ཧ་ཛིའི་ལོ་རྒྱུས་དེ་བདེན་པ་ཡིན་པར་ཞུས་པ་དང་། རྒྱལ་པོས་ལས་བྱེད་པ་ཞིག་བོས་གནང་ནས། མོ་ལ་བདག་པའི་དངོས་པོ་དང་མོ་ལོ་བདུན་གྱི་རིང་མེད་པའི་ཞིང་གི་སྟོན་ཐོག་སྐྱེས་ཀྱི་རིན་བབ་རྣམས་ཕྱིར་སྤྱོད་བྱེད་དགོས་པའི་བཀའ་གནང་ངོ་༎

ཨེ་ལི་ཤ་དང་སི་རི་ཡའི་རྒྱལ་པོ་བྷེན་ཧ་དྷད།

⁷ སི་རི་ཡའི་རྒྱལ་པོ་བྷེན་ཧ་དྷད་ན་བའི་སྐབས་སུ་ཨེ་ལི་ཤ་དྷ་མསེ་ཀསེ་སུ་ཕེབས་པ་དང་། རྒྱལ་པོ་ལ་ཨེ་ལི་ཤ་དེར་ཕེབས་ཡོད་པའི་སྐོར་ཞུས་སོ།

⁸ ཁོང་གིས་ལས་བྱེད་པ་ཧ་ཛ་ཨེལ་ལ་ལུང་སྟོན་པར་འབུལ་བ་ཞིག་འཁྱེར་ནས་ཁོང་ལ་ང་ནད་འདི་ནས་དྲག་ཡོང་མིན་གཙོ་བོ་དཀོན་མཆོག་ལ་བཀའ་བསྡུར་ཞུ་རོགས་གནང་ཞུས་ཤིག་གསུངས་པས།

⁹ དེར་བརྟེན་ཧ་ཛ་ཨེལ་གྱིས་དྷ་མསེ་ཀསེ་གི་ཐོན་སྐྱེས་ལེགས་པོ་སྣ་ཚོགས་རྔ་མོང་ ༤༠ ལ་བཀལ་ནས་ཨེ་ལི་ཤའི་དྲུང་དུ་ཕྱིན་ཏེ། ཧ་ཛ་ཨེལ་གྱིས་ཁོང་མཇལ་བ་དང་། ཁོས་ཁྱེད་ཀྱི་ཞབས་ཕྱི་རྒྱལ་པོ་བྷེན་ཧ་དྷད་ཀྱིས་ཁོང་ནད་འདི་ལས་དྲག་ཡོང་མིན་ཁྱེད་ལ་བཀའ་འདྲི་ཞུ་བར་ང་བཏང་གནང་བྱུང་ཞུས་པས།

¹⁰ ཨེ་ལི་ཤས་གཙོ་བོ་དཀོན་མཆོག་གིས་ང་ལ་ཁོང་འཆི་རྒྱུ་ཡིན་པ་དེ་གསལ་པོར་སྟོན་གནང་བྱུང་བས། འོན་ཀྱང་ཁྱོད་སོང་ལ་ཁོང་དྲག་གི་རེད་ཅེས་ཞུས་ཤིག་གསུངས་སོ།

¹¹ དེ་ནས་ཨེ་ལི་ཤས། ཧ་ཛ་ཨེལ་ལ་ངོ་མཚར་དུ་ཞལ་རས་འཇིགས་སྣང་གིས་སྤྱན་སྡིར་ཞིང་གཟིགས་ནས་གློ་བུར་དུ་ཨེ་ལི་ཤ་བཤུམས་སོ།

¹² ཧ་ཛ་ཨེལ་གྱིས་སྐུ་ཞབས་ལགས་ཁྱེད་རང་ཅིའི་ཕྱིར་བཤུམས་ཀྱི་ཡོད་དམ་ཞུས་པས། ཨེ་ལི་ཤས་ལན་དུ། ངས་ཁྱོད་ཀྱིས་ཨིསི་རཱཨེལ་གྱི་མི་མང་རྣམས་ཀྱི་ཐོག་ཏུ་བྱ་བ་ངན་པ་སྣ་ཚོགས་བྱེད་རྒྱུ་ཡིན་པ་དེ་ཤེས་ཀྱི་ཡོད། ཁྱོད་ཀྱིས་ཁོ་ཚོའི་འཛིང་རག་མེར་སྲེགས་གཏོང་བ་དང་། ཕོ་གཞོན་རྣམས་བསད་པ་དང་། ཕྲུ་གུ་རྣམས་མ་ཤི་བར་ཚོད་མེད་བརྡུངས་བ་དང་། དེ་ཚོའི་བུད་མེད་སྦྲུམ་མ་རྣམས་ཀྱི་གྲོད་པ་གཤགས་ཡོང་གསུངས་སོ།

¹³ ཧ་ཛ་ཨེལ་གྱིས། ང་ལ་དབང་ཆ་དེ་ལྟར་ནམ་བྱུང་ཡོང་ངམ། ང་ནི་གང་ཡང་མིན་ཞེས་ཞུས་པས། ལན་དུ་ཨེ་ལི་ཤས། གཙོ་བོ་དཀོན་མཆོག་གིས་ཁྱོད་རང་སི་རི་ཡའི་རྒྱལ་པོར་བསྒྱུར་བ་ང་ལ་སྟོན་གནང་བྱུང་གསུངས་སོ།

¹⁴ ཧ་ཛ་ཨེལ་བྷེན་ཧ་དྷད་ཀྱི་སར་ཕྱིར་ལོག་པ་དང་ཁོང་གིས་ཨེ་ལི་ཤས་ཁོང་ལ་ག་རེ་བཤད་བྱུང་ངམ་ཅེས་དྲིས་པས། ཧ་ཛ་ཨེལ་གྱིས། ཁོང་གིས་ཁྱེད་ངེས་པར་དུ་དྲག་གི་རེད་གསུངས་བྱུང་།

¹⁵ འོན་ཀྱང་ཉིན་རྗེས་མར་ཧ་ཛ་ཨེལ་གྱི་ཉལ་ཟན་ཞིག་བླངས་ནས་དེ་ཆུ་ལ་སྦང་སྟེ། དེ་ནས་རྒྱལ་པོ་གྲོངས་སོ། དེའི་རྗེས་སུ་ཧ་ཛ་ཨེལ་བྷེན་ཧ་དྷད་ཀྱི་ཤུལ་འཛིན་དུ་སི་རི་ཡའི་རྒྱལ་པོར་འགྱུར་རོ།

ཡ་ཧུ་དཱ་པའི་རྒྱལ་པོ་ཡེ་ཧོ་རམ།

¹⁶ དེ་ནས་ཨ་ཧབ་ཀྱི་བུ་ཡོ་རམ་གྱིས་ཨིསི་རཱཨེལ་གྱི་རྒྱལ་སྲིད་སྐྱོངས་པའི་ལོ་ལྔ་པར། ཡེ་ཧོ་ཤ་ཕད་ཀྱི་བུ་ཡེ་ཧོ་རམ་ཡ་ཧུ་དཱ་པའི་རྒྱལ་པོར་འགྱུར་རོ།

¹⁷ ཁོང་གིས་ཡེ་རུ་ཤ་ལེམ་དུ་ལོ་ངོ་བརྒྱད་རིང་རྒྱལ་སྲིད་བསྐྱངས་དུས། ཁོང་དགུང་ལོ་ སུམ་ཅུ་སོ་གཉིས་ཡིན་ནོ།

¹⁸ ཁོང་གི་བཟའ་ཟླ་ཨ་ཧབ་ཀྱི་བུ་མོ་ཡིན་པ་དང་། ཨ་ཧབ་ཀྱི་ནང་མི་བཞིན་ཁོང་གིས་ཨིསི་རཱཨེལ་གྱི་རྒྱལ་པོའི་ལམ་ངན་པར་བཞུགས་སོ། ཁོང་གིས་གཙོ་བོ་དཀོན་མཆོག་གི་སྤྱན་སྔར་སྡིག་པ་གྱིས་ཡོད་དོ།

¹⁹ འོན་ཀྱང་གཙོ་བོ་དཀོན་མཆོག་གིས་ཡ་ཧུ་དཱ་མེད་པར་བཟོ་བའི་ཐུགས་འདོད་མེད་དོ། གང་ལགས་ཟེར་ན། ཁོང་གི་ཞབས་ཕྱི་དཱ་བིད་ལ་ཁོའི་བུ་བརྒྱུད་ཀྱིས་རྟག་ཏུ་མུ་མཐུད་ནས་རྒྱལ་སྲིད་སྐྱོངས་བའི་ཞལ་བཞེས་གནང་ཡོད་དོ།

²⁰ ཡེ་ཧོ་རམ་གྱི་དུས་སྐབས་ལ་ཨེ་དྷོམ་པ་རྣམས་ནས་ཡ་ཧུ་དཱ་པར་ངོ་ལོག་བྱས་ནས་རང་དབང་གི་རྒྱལ་སྲིད་ཞིག་ཏུ་འགྱུར་རོ།

²¹ དེ་འདྲ་སོང་ཙང་ཡེ་ཧོ་རམ་གྱིས་ཁོང་གི་ཤིང་རྟ་འཁོར་ལོ་དང་བཅས་པ་ཛ་ཨིར་དུ་ཐོན་པ་དང་། དེར་ཨེ་དྷོམ་པ་ཚོའི་དམག་མིས་ཁོང་ལ་མཐའ་བསྐོར་རོ། མཚན་མོའི་སྐབས་སུ་ཁོང་དང་ཁོང་གི་ཤིང་རྟ་འཁོར་ལོའི་དམག་སྤྱི་རྣམས་བྲོས་ཐར་བ་དང་ཁོང་གི་དམག་མི་རྣམས་ནས་རང་རང་སོ་སོའི་ཁྱིམ་དུ་ལོག་ཕྱིན་ནོ།

²² དེ་ནས་བཟུང་ཨེ་དྷོམ་ཡུལ་དེ་ཡ་ཧུ་དཱ་ནས་རང་དབང་བྱུང་བ་ཡིན་ནོ། དུས་སྐབས་དེ་རང་ལ་ལིབ་ནཱའི་གྲོངཁྱེར་གྱིས་ཀྱང་ངོ་ལོག་བྱས་སོ།

²³ ཡེ་ཧོ་རམ་གྱིས་མཛད་པ་རྣམས་ཡ་ཧུ་དཱ་པའི་རྒྱལ་པོ་རྣམས་ཀྱི་རྒྱལ་རབས་ནང་བཀོད་ཡོད་དོ།

²⁴ ཡེ་ཧོ་རམ་གྲོང་པ་དང་དཱ་བིད་ཀྱི་གྲོང་ཁྱེར་གྱི་རྒྱལ་པོའི་སྤུར་ཁང་ནང་སྦས་ནས་ཁོང་གི་སྲས་ཨ་ཧ་ཛི་ཧས་ཤུལ་འཛིན་དུ་རྒྱལ་པོར་འགྱུར་རོ༎

ཡ་ཧུ་དཱ་པའི་རྒྱལ་པོ་ཨ་ཧ་ཛ་ཡཱ།

²⁵ ཨ་ཧབ་ཀྱི་བུ་ཡོ་རམ་གྱིས་ཨིསི་རཱཨེལ་གྱི་རྒྱལ་པོ་གནང་བའི་ལོ་བཅུ་གཉིས་པར་ཡེ་ཧོ་རམ་གྱི་བུ་ཨ་ཧ་ཛ་ཡཱ་ཡ་ཧུ་དཱ་པའི་རྒྱལ་པོར་འགྱུར་རོ།

²⁶ ཁོང་ལོ་ཉི་ཤུ་རྩ་གཉིས་ཀྱི་སྐབས་སུ་ཁོང་གིས་ལོ་གཅིག་རིང་ཡེ་རུ་ཤ་ལེམ་དུ་རྒྱལ་སྲིད་སྐྱངས་སོ། ཁོང་གི་ཡུམ་ཨ་ཐལ་ཡཱ་བྱ་བ་དེ་ཨ་ཧབ་ཀྱི་བུ་མོ་དང་ཨིསི་རཱཨེལ་གྱི་རྒྱལ་པོ་ཨོམ་རིའི་ཚ་མོ་ཡིན་པ་དང་།

²⁷ ཨ་ཧ་ཛ་ཡཱ་རང་གི་ཆང་སའི་རྒྱུད་ནས་རྒྱལ་པོ་ཨ་ཧབ་དང་འབྲེལ་བ་ཡོད་པ་ཙང། ཨ་ཧབ་ཀྱི་ནང་མི་ནས་གྱིས་པ་ལྟར་ཁོང་གིས་གཙོ་བོ་དཀོན་མཆོག་གི་སྤྱན་སྔར་སྡིག་པ་གྱིས་ཡོད་དོ།

²⁸ རྒྱལ་པོ་ཨ་ཧ་ཛ་ཡཱས་ཨིསི་རཱཨེལ་གྱི་རྒྱལ་པོ་ཡོ་རམ་དང་མཉམ་དུ་སི་རི་ཡའི་རྒྱལ་པོ་ཧ་ཛ་ཨེལ་དང་དམག་འཐབ་ནང་བཞུགས་སོ། དམག་མི་ཚོ་གྷིལ་ཨད་ཀྱི་ར་མད་རུ་འཐབ་པ་དང་དམག་སར་ཡོ་རམ་ལ་རྨས་སོ།

²⁹ ཁོང་གི་རྨ་གསོ་བའི་ཕྱིར་ཡེཛ་རིལ་གྲོང་ཁྱེར་དུ་ཕྱིར་ལོག་པ་དང་ཨ་ཧ་ཛ་ཡཱ་ཁོང་ལ་གཟིགས་པར་དེར་ཕེབས་སོ༎