རྒྱལ་རབས་གཉིས་པ། 7 - Tibetan Old Testament 2011

¹ ལན་དུ་ཨེ་ལི་ཤས། གཙོ་བོ་དཀོན་མཆོག་གིས་གསུངས་པར་ཁྱོད་ཉོན་ཞིག སང་ཉིན་དུས་ཚོད་འདི་རང་ལ་ཁྱོད་ཀྱིས་ས་མར་ཡར་དངུལ་དུམ་བུ་ཞིག་ལ་གྲོ་ལེགས་ཤོས་ཀི་ལོ་གྷ་རམ་གསུམ་ཡང་ན་ནས་ཀི་ལོ་གྷ་རམ་དྲུག་ཉོ་ཐུབ་ཡོང་གསུངས་སོ།

² རྒྱལ་པོའི་སྐུ་སྒེར་དཔོན་པོ་ཞིག་གིས་ཨེ་ལི་ཤ་ལ་དེ་ལྟར་རྩ་བ་ནས་མི་སྲིད། གཙོ་བོ་དཀོན་མཆོག་སྐུ་ཉིད་ཀྱིས་མཐོ་རིས་ཀྱི་སྒེ་ཁུང་རྣམས་ཕྱེ་བ་གནང་ན་ཡང་དེ་ལྟར་ཡོང་མི་སྲིད་ཅེས་སྨྲས་སོ། ཨེ་ལི་ཤས། དེ་ལྟར་བྱུང་བ་ཁྱོད་ཚོས་མཐོང་ཡོང་། འོན་ཀྱང་ཁྱོད་ཚོས་ཁ་ཟས་དེ་ནམ་ཡང་ཟ་རྒྱུ་ཐོབ་མི་ཡོང་གསུངས་སོ།

སི་རི་ཡ་པའི་དམག་མི་བྲོས་པ།

³ ས་མར་ཡའི་རྒྱལ་སྒོའི་ཕྱི་རོལ་དུ་ཡོད་པའི་མཛེ་ནད་དྲག་པོས་མནར་བའི་མི་བཞིས་ཕན་ཚུན་གཅིག་གིས་གཅིག་ལ་ང་ཚོ་མ་ཤི་བར་དུ་ཅིའི་ཕྱིར་འདིར་སྒུག་དགོས་སམ།

⁴ ད་ང་ཚོ་གྲོང་ཁྱེར་དུ་ཕྱིན་ནའང་ཕན་ཐོག་གང་ཡང་མེད་དོ། གང་ལ་ཟེར་ན། ང་ཚོ་དེར་ལྟོགས་ནས་ཤི་རྒྱུ་དང་། འདིར་བསྡད་ན་ཡང་ཤི་བར་ངེས་སོ། དེ་འདྲ་སོང་ཙང་ང་ཚོ་སི་རི་ཡ་པའི་སྡོད་སྒར་དུ་འགྲོ་བ་ཡིན་ན། གལ་སྲིད་ཁོ་ཚོས་ང་ཚོ་གསོད་པའམ། ཡང་ན་དེ་ཚོས་ང་ཚོར་ཚེ་ཐར་གཏོང་སྲིད་ཅེས་སྨྲས་སོ།

⁵ དེ་འདྲ་སོང་ཙང་ས་རུབ་པ་དང་དེ་ཚོ་སི་རི་ཡ་པའི་སྡོད་སྒར་དུ་ཕྱིན་ནས་དེར་སླེབས་པ་དང་། དེར་སུ་ཡང་མེད་པ་མཐོང་ངོ་།

⁶ གཙོ་བོ་དཀོན་མཆོག་གིས་སིརི་པ་ཚོར་དམག་དཔུང་ཁྱོན་ཆེ་ཞིག་རྟ་དང་ཤིང་རྟ་འཁོར་ལོ་དང་བཅས་པ་ཡོང་བཞིན་པའི་སྒྲ་ཐོས་འཇུག་གནང་བ་དང་། སི་རི་ཡ་པ་ཚོའི་བསམ་པར། ཨིསི་རཱཨེལ་གྱི་རྒྱལ་པོས། ང་ཚོའི་ཐོག་ཏུ་དམག་རྒྱབ་པའི་ཆེད་དུ་ཧི་ཏི་པ་དང་ཨི་ཇིབ་གྱི་རྒྱལ་པོའི་དམག་མི་རྣམས་ལ་གླ་སྤྲ་ནས་སྐད་བཏང་འདུག

⁷ དེ་འདྲ་སོང་ཙང་དགོང་དྲོ་དེར་སི་རི་ཡ་པ་ཚོས་གུར་དང་རྟ་དང་བོང་བུ་དང་སྡོད་སྒར་ནང་ཇི་ཡོད་པ་རྣམས་བཞག་ནས་རང་གི་སྲོག་ཐར་བའི་ཕྱིར་བྲོས་སོ།

⁸ དེ་ནས་མི་བཞི་པོ་དེ་སྡོད་སྒར་གྱི་ཟུར་དུ་སླེབས་པ་དང་། དེ་ཚོ་གུར་ཞིག་གི་ནང་འཛུལ་ནས་དེར་ཡོད་པའི་ཁ་ཟས་རྣམས་ཟ་འཐུང་བྱས་པ་མ་ཟད། དེར་རྙེད་པའི་གསེར་དངུལ་དང་གྱོན་ཆས་རྣམས་འཁྱེར་ནས་དེ་ཚོས་སྦས་སོ། ཡང་སྐྱར་ལོག་ཡོང་ནས་གུར་གཞན་ཞིག་གི་ནང་འཛུལ་ནས་སྔོན་ལྟར་བྱས་སོ།

⁹ དེ་ནས་དེ་ཚོ་གཅིག་གིས་གཅིག་ལ་ང་ཚོའི་ལས་ཀ་འདི་ལྟར་བྱེད་མི་རུང་། ང་ཚོར་གནས་ཚུལ་བཟང་པོ་ཡོད་པས་ང་ཚོ་གཅིག་པུས་ཉར་མི་རུང་། ང་ཚོས་སང་ཞོགས་བར་སྒུག་ནས་མ་བཤད་པ་ཡིན་ན་ཏན་ཏན་ང་ཚོས་ངེས་པར་ཉེས་ཆད་ཐོབ་ཡོང་། ད་རྒྱལ་པོའི་འགོ་འཛིན་ཚོར་ཞུ་བར་འཕྲལ་དུ་ཐོན་འགྲོ་ཅེས་སྨྲས་སོ།

¹⁰ དེ་འདྲ་སོང་ཙང་དེ་ཚོ་སི་རི་ཡ་པའི་སྡོད་སྒར་ནས་ཐོན་ཏེ་ས་མར་ཡ་རུ་ལོག་ཕྱིན་ནས་རྒྱལ་སྒོའི་སྐུ་སྲུང་པ་ཚོ་བོས་ནས་ང་ཚོ་སི་རི་ཡ་པའི་སྡོད་སྒར་དུ་ཕྱིན་པ་ཡིན། དེར་སུ་ཡང་མཐོང་བ་ཡང་ན་ཐོས་མ་བྱུང་བ་དང་། རྟ་དང་བོང་བུ་ཚོ་བཀྲོལ་མེད་པ་དང་གུར་རྣམས་ཇི་ལྟར་ཡོད་པ་ལྟར་བཞག་ནས་ཐོན་འདུག་ཅེས་སྨྲས་སོ།

¹¹ སྐུ་སྲུང་པ་ཚོས་གཏམ་དེ་གསལ་སྒྲགས་བྱས་ནས་ཕོ་བྲང་དུ་སྙན་གསང་ཞུས་སོ།

¹² དེ་དུས་མཚན་མོ་ཡིན་པས་རྒྱལ་པོ་གཟིམ་ས་ནས་བཞེངས་ཏེ་ལས་བྱེད་པ་ཚོར། ངས་ཁྱོད་ཚོར་སི་རི་ཡ་པ་ཚོའི་འཆར་གཞི་གང་ཡིན་པ་དེ་ཤོད་ཀྱི་ཡིན། དེ་ཚོས་འདིར་མུ་གེ་ཡོད་པ་ཤེས་ཀྱི་ཡོད་པས། དེ་ཚོས་རང་གི་སྡོད་སྒར་བཞག་ནས་ཐང་དུ་ཡིབ་ནས་བསྡད་ཡོད་དོ། ཁོ་ཚོའི་བསམ་པར་ང་ཚོས་ཁ་ཟས་འཚོལ་བར་གྲོང་ཁྱེར་སྤངས་ནས་འགྲོ་རྒྱུ་ཡིན་པ་དང། དེའི་རྗེས་སུ་ཁོ་ཚོས་ང་ཚོ་གསོན་པོར་བཟུང་ནས་གྲོང་ཁྱེར་ལེན་གི་རེད་ཅེས་གསུངས་སོ།

¹³ ལས་བྱེད་པ་ཞིག་གིས་གྲོང་ཁྱེར་དུ་འདིར་ཡོད་པའི་མི་མང་རྣམས་སྔོན་དུ་འཆི་ཟིན་པ་ལྟར་མེད་པར་འགྱུར། དེ་འདྲ་སོང་ཙང་ལྷག་ཕྲོས་ལུས་པའི་རྟ་ལྔ་མཉམ་དུ་མི་འགའ་ཤས་དེར་གཏོང་དགོས། དེ་ནས་ག་རེ་བྱུང་ཡོད་མེད་ཤེས་ཀྱི་རེད་ཅེས་ཞུས་སོ།

¹⁴ དེ་ཚོས་མི་འགའ་ཤས་འདམས་པ་དང་རྒྱལ་པོས་དེ་ཚོ་དང་མཉམ་དུ་ཤིང་རྟ་འཁོར་ལོ་གཉིས་བཏང་ནས་སི་རི་ཡ་པའི་དམག་མི་ཚོར་ག་རེ་བྱུང་ཡོད་མེད་རྟོག་ཞིབ་བྱེད་དགོས་པའི་བཀའ་གནང་ངོ་།

¹⁵ མི་དེ་ཚོ་ཡོར་དན་བར་དུ་ཕྱིན་པ་དང་ལམ་ལ་སི་རི་ཡ་པ་ཚོ་བྲེལ་ཚུབ་ངང་བྲོས་སྐབས་ཕངས་པའི་གོས་དང་དངོས་པོ་རྣམས་མཐོང་ནས། དེ་ཚོ་ཕྱིར་ལོག་ཡོང་ནས་རྒྱལ་པོར་སྙན་གསེང་ཞུས་སོ།

¹⁶ ས་མར་ཡའི་མི་མང་རྣམས་བྲེལ་ཚུབ་བྱས་ཏེ་ཕྱིར་ཐོན་ནས་སི་རི་ཡ་པའི་སྡོད་སྒར་བཅོམ་སོ། གཙོ་བོ་དཀོན་མཆོག་གིས་བཀའ་གནང་བ་ལྟར་དངུལ་དུམ་བུ་གཅིག་ལ་གྲོ་ལེགས་ཤོས་ཀི་ལོ་གྷ་རམ་གསུམ་ཡང་ན་ནས་ཀི་ལོ་གྷ་རམ་དྲུག་བཙོང་ངོ་།

¹⁷ ཨིསི་རཱཨེལ་གྱི་རྒྱལ་པོས། གྲོང་ཁྱེར་གྱི་རྒྱལ་སྒོ་དེ་ཁོང་གི་སྐུ་སྒེར་གྱི་དཔོན་པོ་དེ་ལ་དབང་ཆར་བཞག་གོ འོན་ཀྱང་རྒྱལ་པོས་ཨེ་ལི་ཤ་མཇལ་བར་ཕེབས་སྐབས་ཁོང་གིས་སྔོན་ཤེས་གསུངས་པ་ལྟར། སྐུ་སྒེར་གྱི་དཔོན་པོ་དེ་མི་མང་གིས་རྡོག་རྫིས་བཏང་ནས་ཤི་བ་ཡིན་ནོ།

¹⁸ ཨེ་ལི་ཤས་རྒྱལ་པོ་ལ་ཉིན་རྗེས་མར་དུས་ཚོད་དེ་རང་ལ་ས་མར་ཡ་རུ་དངུལ་དུམ་བུ་གཅིག་ལ་གྲོ་ལེགས་ཤོས་ཀི་ལོ་གྷ་རམ་གསུམ་ཡང་ན་ནས་ཀི་ལོ་གྷ་རམ་དྲུག་ཚོང་གི་རེད་ཅེས་གསུངས་སྐབས།

¹⁹ དེར་སྐུ་སྒེར་གྱི་དཔོན་པོ་དེས། དེ་ལྟར་རྩ་བ་ནས་ཡོང་མི་སྲིད་དོ། གཙོ་བོ་དཀོན་མཆོག་སྐུ་ཉིད་ཀྱིས་མཐོ་རིས་ཀྱི་སྒེ་ཁུང་རྣམས་ཕྱེ་བ་གནང་ན་ཡང་དེ་ལྟར་ཡོང་མི་སྲིད་ཅེས་ཞུས་པས། ལན་དུ་ཨེ་ལི་ཤས། ཁྱོད་ཀྱིས་དེ་ལྟར་ཡོང་བ་མཐོང་ཡོང་། འོན་ཀྱང་ཁྱོད་ཀྱིས་ཁ་ཟས་དེ་ཟ་ལོང་ཡོང་གི་མ་རེད་གསུངས་ཡོད་པ་བཞིན།

²⁰ ཁོ་ལ་དེ་ལྟར་བྱུང་ནས། གྲོང་ཁྱེར་གྱི་རྒྱལ་སྒོར་མི་མང་གིས་ཁོ་ལ་རྡོག་རྫིས་བཏང་ནས་འཆིའོ༎