རྒྱལ་རབས་གཉིས་པ། 6 - Tibetan Old Testament 2011

སྟ་རེའི་མགོ་ཡང་སྐྱར་རྙེད་པ།

¹ ཉིན་ཞིག་ཨེ་ལི་ཤའི་མངའ་འོག་ཏུ་ཡོད་པའི་ལུང་སྟོན་པ་ཚོ་ཞིག་གིས། ཁོང་ལ། ང་ཚོ་སྡོད་པའི་ས་གནས་འདི་ཧ་ཅང་ཆུང་དྲག་འདུག་པས།

² ང་ཚོར་སྡོད་ཁང་ཞིག་བཟོ་བའི་ཆེད་ང་ཚོ་ཡོར་དན་དུ་ཤིང་བཅད་པར་འགྲོ་ཆོག་པའི་བཀའ་འཁྲོལ་གནང་རོགས་ཞུས་པས། ཨེ་ལི་ཤས། དེ་ལྟ་འགྲོ་ཆོག་གི་རེད་གསུངས་སོ།

³ དེ་ཚོའི་ནང་ནས་གཅིག་གིས། ཁྱེད་རང་ཡང་ཕེབས་རོགས་ཞུས་པར་ཁོང་གིས་ཞལ་བཞེས་གནང་ངོ་།

⁴ དེ་ནས་ཁོང་ཚོ་མཉམ་དུ་ཕེབས་ནས། ཁོང་ཚོ་ཡོར་དན་དུ་འབྱོར་བ་དང་ཤིང་བཅད་འགོ་ཚུགས་པས།

⁵ ཁོང་ཚོའི་ནང་ནས་གཅིག་གིས། ཤིང་གཅོད་སྐབས་གློ་བུར་དུ་ཁོའི་རྟ་རེའི་མགོ་དེ་ཚུའི་ནང་དུ་ལྷུངས་པས། ཁོས་ཨེ་ལི་ཤ་ལ། སྐུ་ཞབས་ལགས། ད་ངས་ག་རེ་བྱེད་དགོས་སམ། སྟ་རེ་དེ་གཡར་པ་ཡིན་ཞུས་པས།

⁶ ཨེ་ལི་ཤས། དེ་གང་དུ་ལྷུངས་སོང་ངམ་ཅེས་བཀའ་འདྲི་གནང་བས། ཁོས་ས་ཆ་དེ་བསྟན་པ་དང་ཨེ་ལི་ཤས་དབྱུག་པ་ཞིག་བཅད་ནས་ཆུའི་ནང་དུ་དབྱུག་ནས་སྟ་རེའི་མགོ་དེ་ཆུའི་ཁར་ལྡིང་བས།

⁷ ཁོང་གིས་མི་དེ་ལ། ད་སྟ་རེ་དེ་ཡར་ལེན་ཞིག་ཅེས་བཀའ་གནང་བ་དང་མི་དེས་མར་སྒུར་ནས་དེ་ཡར་ལེན་ནོ༎

སི་རི་ཡ་པའི་དམག་མི་འཕམ་པར་བྱས་པ།

⁸ སི་རི་ཡའི་རྒྱལ་པོ་ཨིསི་རཱཨེལ་དང་མཉམ་དུ་དམག་འཐབ་སྐབས། ཁོ་རང་གི་དམག་མི་ཚོ་དང་གོ་བསྡུར་བྱས་ནས་སྡོད་སྒར་རྒྱབ་པའི་ས་གནས་ཤིག་འདམས་སོ།

⁹ ཨེ་ལི་ཤས། ཨིསི་རཱཨེལ་གྱི་རྒྱལ་པོར་ལོན་བཏང་གསལ། ས་ཁུལ་དེའི་ཉེ་འགྲམ་དུ་མི་འགྲོ་བའི་ཉེན་བརྡ་གཏོང་དགོས་སོ། གང་ལ་ཟེར་ན། སི་རི་ཡ་པ་ཚོ་དེར་འཇབ་ནས་བསྡད་ཡོད་དོ།

¹⁰ དེ་འདྲ་སོང་ཙང་ཨིསི་རཱཨེལ་གྱི་རྒྱལ་པོས། ས་ཁུལ་དེར་ཡོད་པའི་རང་གི་མི་རྣམས་ལ་ཉེན་བརྡ་བཏང་བ་དང་། དེ་ཚོས་སྲུང་སྐྱོབ་བྱེད་བཞིན་ཡོད་པ་དེ་ལྟར་ཐེངས་མང་པོ་བྱུང་ངོ་།

¹¹ དེའི་སྐོར་ལ་སི་རི་ཡ་པའི་རྒྱལ་པོ་ཧ་ཅང་བློ་ཚབ་ཆེན་པོ་བྱུང་བ་དང་། རང་གི་དམག་དཔོན་རྣམས་བོས་ནས། ཁྱོད་ཚོའི་ནང་ནས་་སུ་ཞིག་ཨིསི་རཱཨེལ་གྱི་རྒྱལ་པོའི་ཕྱོགས་བྱེད་དམ་ཞེས་དྲིས་པས།

¹² དེ་ཚོའི་ནང་ནས་གཅིག་གིས། མི་དབང་ཆེན་པོ་ང་ཚོའི་ནང་ནས་དེ་ལྟར་སུ་ཡང་མེད། ཁྱེད་ཀྱིས་གཟིམ་ཆུང་ནང་དུ་གསང་བར་གང་གསུངས་པའི་གཏམ་དེ་ཨེ་ལི་ཤས་ཨིསི་རཱཨེལ་གྱི་རྒྱལ་པོར་བཤད་ཀྱི་ཡོད་དོ་ཅེས་ཞུས་སོ།

¹³ རྒྱལ་པོས་ཁོ་གང་དུ་ཡོད་མེད་འཚོལ་ཞིག་ངས་ཁོ་བཟུང་རྒྱུ་ཡིན་གསུངས་པས། དེ་ཚོས་ཁོ་ལ་ཨེ་ལི་ཤ་དོ་ཐན་དུ་ཡོད་ལུགས་སྐོར་ཞུས་པ་དང་།

¹⁴ ཁོང་གིས། དེར་དམག་མི་ཁྱོན་ཆེ་ཞིག་རྟ་དང་ཤིང་རྟ་འཁོར་ལོ་བཅས་བཏང་ནས། དེ་ཚོ་དེར་མཚན་མོར་སླེབས་པ་དང་གྲོང་ཁྱེར་དེ་མཐའ་བསྐོར་རོ།

¹⁵ སང་ཞོག་སྔ་པོ་ཨེ་ལི་ཤའི་ཞབས་ཕྱི་ཡར་ལངས་ནས་ཁྱིམ་གྱི་ཕྱི་ལོག་ཏུ་ཕྱིན་པ་དང་སི་རི་ཡ་པའི་དམག་དཔུང་ཁྱོན་ཆེ་ཞིག་དང་དེ་ཚོའི་རྟ་དང་ཤིང་རྟ་འཁོར་ལོ་དང་བཅས་པར་གྲོང་ཁྱེར་དེ་མཐའ་བསྐོར་བཞིན་ཡོད་པ་མཐོང་བ་དང་། ཁོ་ཨེ་ལི་ཤའི་སར་ཕྱིན་ནས་སྐུ་ཞབས་ལགས་ང་ཚོ་མེད་པར་འགྲོ་སོང་། ང་ཚོ་ག་རེ་གནང་གི་ཡིན་ནམ་ཞུས་པས།

¹⁶ ཨེ་ལི་ཤས་མ་འཇིགས་ཤིག། ཁོ་ཚོ་ལ་ཡོད་པ་ལས་ང་ཚོའི་ཕྱོགས་སུ་མང་བ་ཡོད་ཅེས་གསུངས་སོ།

¹⁷ དེ་ནས་ཁོང་གིས། ཀྱེ་གཙོ་བོ་དཀོན་མཆོག་ཁོའི་མིག་ཕྱེས་བ་གནང་ནས་ཁོ་ལ་མཐོང་བཅུག་རོགས་གནང་ཞེས་སྨོན་ལམ་འདེབས་པ་གནང་ངོ་། གཙོ་བོ་དཀོན་མཆོག་གིས་ཁོང་གི་སྨོན་ལམ་ལ་གསན་པ་དང་། ཨེ་ལི་ཤའི་ཞབས་ཕྱིས་བལྟ་སྐབས། རི་དེར་ཨེ་ལི་ཤའི་མཐའ་འཁོར་དུ་མེའི་རྟ་དང་ཤིང་རྟ་འཁོར་ལོའི་ཁེངས་ནས་ཡོད་པ་མཐོང་ངོ་།

¹⁸ སི་རི་ཡ་པས་དམག་རྒྱབ་སྐབས། ཨེ་ལི་ཤས་གཙོ་བོ་དཀོན་མཆོག་མི་འདི་ཚོ་ལོང་བར་བཟོས་གནང་རོགས་གནང་ཞེས་སྨོན་འདེབས་གནང་བ་དང་། གཙོ་བོ་དཀོན་མཆོག་གིས་སྨོན་ལམ་དེ་གསན་ནས་དེ་ཚོ་ལོང་བ་བཟོས་གནང་ངོ་།

¹⁹ དེ་ནས་ཨེ་ལི་ཤ་དེ་ཚོའི་སར་ཕེབས་ནས་ཁྱོད་ཚོ་ལམ་ནོར་འདུག ཁྱོད་ཚོས་འཚོལ་བའི་གྲོང་ཁྱེར་དེ་འདི་མ་རེད། ངའི་རྗེས་སུ་ཤོག་དང་ངས་ཁྱོད་ཚོས་འཚོལ་བའི་མི་དེའི་སར་འཁྲིད་ཀྱི་ཡིན་གསུངས་ནས། ཁོང་གིས་དེ་ཚོར་ས་མར་ཡ་རུ་འཁྲིད་གནང་ངོ་།

²⁰ དེ་ཚོ་གྲོང་ཁྱེར་ནང་འཛུལ་མ་ཐག་ཏུ་ཨེ་ལི་ཤས་གཙོ་བོ་དཀོན་མཆོག་དེ་ཚོའི་མིག་ཕྱེས་རོགས་གནང་། དེ་ཚོ་ལ་མཐོང་དུ་བཅུག་རོགས་གནང་ཞེས་སྨོན་འདེབས་གནང་བ་དང་། གཙོ་བོ་དཀོན་མཆོག་གིས་ཁོང་གི་སྨོན་ལམ་དེ་ལ་གསན་ནས་དེ་ཚོའི་མིག་ཕྱེས་གནང་བ་དང་དེ་ཚོ་ས་མར་ཡའི་ནང་དུ་ཡོད་པ་མཐོང་ངོ་།

²¹ ཨིསི་རཱཨེལ་གྱི་རྒྱལ་པོས་སི་རི་ཡ་པ་ཚོར་མཐོང་བ་དང་། ཁོང་གིས་ཨེ་ལི་ཤ་ལ། ངའི་ཡབ་ལགས་ངས་དེ་ཚོ་བསད་དམ་ཞེས་བཀའ་འདྲི་ཞུས་པས།

²² ཁོང་གིས་ལན་དུ། མ་གསོད་ཅིག། ཁྱེད་ཀྱིས་དམག་རྒྱབ་སྐབས་བཟུང་བའི་དམག་མི་ཚོ་ཡང་གསོད་པར་མི་བྱའོ། དེ་ཚོ་ལ་བཟའ་འཐུང་ཕྲན་བུ་སྤྲོད་ལ་དེ་ཚོ་རང་གི་རྒྱལ་པོའི་སར་ཕྱིར་ལོག་བཅུག་ཅིག་གསུངས་སོ།

²³ ཨིསི་རཱཨེལ་གྱི་རྒྱལ་པོས་དེ་ཚོ་ལ་གསོལ་སྟོན་རྒྱ་ཆེ་ཞིག་བཤམས་པ་དང་། དེ་ཚོས་བཟའ་འཐུང་བྱས་པའི་རྗེས་ལ་ཁོང་གིས་དེ་ཚོར་སི་རི་ཡའི་རྒྱལ་པོའི་སར་ཕྱིར་ལོག་བཏང་ངོ་། དེ་ནས་བཟུང་སི་རི་ཡའི་རྒྱལ་པོས་ཨིསི་རཱཨེལ་གྱི་ཡུལ་དུ་དམག་རྒྱབ་རྒྱུ་འཚམས་འཇོགས་བྱེད་པ་རེད༎

ས་མར་ཡ་ལ་མཐའ་སྐོར་བ།

²⁴ དུས་འགའ་ཤས་ཀྱི་རྗེས་ལ་སི་རི་ཡའི་རྒྱལ་པོ་བྷིན་ཧ་དྷད་ཀྱི་ཁོང་རང་གི་དམག་མི་ཡོངས་རྫོགས་ཨིསི་རཱཨེལ་དུ་འཁྲིད་ནས་ས་མར་ཡ་གྲོང་ཁྱེར་མཐའ་སྐོར་རོ།

²⁵ དེ་ལྟར་བྱུང་དུས་གྲོང་ཁྱེར་ནང་ཁ་ཟས་ཧ་ཅང་དཀོན་པོ་བྱུང་བ་དང་བོང་བུའི་མགོ་ལ་དངུལ་དུམ་བུ་བརྒྱད་ཅུ་གནས་ཀྱི་ཡོད་པ་དང་། ཕུག་རོན་གྱི་སྐྱག་པ་གྷ་རམ་ཉིས་བརྒྱ་ལ་དངུལ་དུམ་བུ་ལྔ་གནས་ཀྱི་ཡོད་དོ།

²⁶ ཉིན་ཅིག་ཨིསི་རཱཨེལ་གྱི་རྒྱལ་པོ་གྲོང་ཁྱེར་གྱི་ལྕགས་རིའི་སྟེང་དུ་གོམ་སྤོས་གནང་ནས་ཕེབས་ཀྱི་ཡོད་པ་དང་། བུད་མེད་ཅིག་གིས་ཁོང་ལ་མི་དབང་ཆེན་པོ་ང་ལ་རོགས་གནང་རོགས་གནང་ཞེས་སྐད་རྒྱབ་བོ།

²⁷ ཁོང་གིས། གཙོ་བོ་དཀོན་མཆོག་གི་ཁྱོད་ལ་རོགས་པ་མ་གནང་ན་ངས་ཁྱོད་ལ་གང་རོགས་བྱེད་ཐུབ་བམ། ང་ལ་གྲོ་དང་རྒུན་ཆང་ཡོད་དམ།

²⁸ ཁྱོད་ཀྱི་དཀའ་ངལ་ཅི་ཡིན་ཞེས་དྲིས་པས། མོས་ལན་དུ། བུད་མེད་འདིས་ཉིན་སྔོན་མར་ངའི་ཕྲུ་གུ་ཟ་རྒྱུ་དང་ཉིན་རྗེས་མར་མོའི་ཕྲུ་གུ་ཟ་རྒྱུའི་གྲོས་མོལ་བྱས་ཡོད།

²⁹ དེ་འདྲ་སོང་ཙང་ང་ཚོས་ངའི་བུ་བཙོས་ནས་བཟས་པ་ཡིན། ཉིན་རྗེས་མར་ངས་མོ་ལ་མོའི་ཕྲུ་གུ་ཟ་དགོས་ཞེས་ལབ་པ་ཡིན་པས་མོས་མོའི་ཕྲུ་གུ་སྦས་བཞག་འདུག་ཅེས་ཞུས་པ་དང་།

³⁰ རྒྱལ་པོས་དེ་ལྟར་གསན་པ་དང་། ཐུགས་འཕམ་གྱིས་རང་གི་གོས་ཧྲལ་བ་དང་ལྕགས་རིའི་ཉེ་འཁྲིས་སུ་ཡོད་པའི་མི་མང་ཚོས་ཁོང་གི་ན་བཟའི་འོག་ཏུ་ཕད་གོག་གི་གོས་གྱོན་ཡོད་པ་མཐོང་བ་དང་།

³¹ ཁོང་གིས་ཉི་མ་འདི་མ་རྫོགས་པའི་སྔོན་ལ་ངས་ཨེ་ལི་ཤའི་རྐེ་བཅད་མ་ཐུབ་ན་དཀོན་མཆོག་གི་ངའི་སྲོག་གཅོད་གནང་བར་ཤོག་ཅེས་གྲགས་སོ།

³² ཁོང་གིས་ཨེ་ལི་ཤ་ལ་འཁྲིད་ཡོང་བའི་ཕྱིར་བང་ཆེན་བཏང་ངོ་། སྐབས་དེར་ཨེ་ལི་ཤའི་ཁྱིམ་དུ་ཁོང་འཕྲད་དུ་ཕེབས་པའི་རྒན་པོ་ཚོ་དང་མཉམ་དུ་བཞུགས་ཡོད་སྐབས། རྒྱལ་པོའི་བང་ཆེན་མ་ཡོང་བའི་སྔོན་ལ་ཨེ་ལི་ཤས་རྒན་པོ་ཚོར་སྲོག་གཅོད་པ་དེས་ང་གསོད་པའི་ཕྱིར་མི་བཏང་འདུག ད་ཁོ་འདིར་སླེབས་པ་དང་སྒོ་རྒྱབ་ནས་ཁོ་ནང་དུ་འཛུལ་མ་བཅུག་ཅིག ཁོའི་རྒྱབ་ལ་རྒྱལ་པོ་རང་ཉིད་ཡོང་གི་རེད་ཅེས་གསུངས་སོ།

³³ ཁོང་གིས་དེ་ལྟར་གཏམ་གླེང་གསུང་མ་འགྲུབ་པའི་སྔོན་དུ་རྒྱལ་པོ་རང་ཉིད་ཕེབས་ནས། ང་ཚོའི་དཀའ་ངལ་འདི་ཚོ་གཙོ་བོ་དཀོན་མཆོག་ནས་བཏང་གནང་བ་ཡིན་ནོ། ཁོང་གིས་ང་ཚོར་སྐྱབས་གནང་བར་ངས་ཅིའི་ཕྱིར་སྒུག་དགོས་སམ་ཅེས་སྨྲས་སོ༎