རྒྱལ་རབས་གཉིས་པ། 5 - Tibetan Old Testament 2011

ན་མན་ནད་ལས་དྲག་གསོས་བ།

¹ ན་མན་བྱ་བ་ནི་སི་རི་ཡའི་རྒྱལ་པོས་བརྩེ་མཐོང་ཆེན་པོ་བྱེད་བཞིན་པ་སི་རི་ཡ་པའི་དམག་དཔྱིད་ཞིག་ཡིན་ནོ། གང་ལགས་ཟེར་ན། ན་མན་གྱི་སྒོ་ནས་གཙོ་བོ་དཀོན་མཆོག་གིས་སི་རི་ཡ་པའི་དམག་མིར་རྒྱལ་ཁ་གནང་ཡོད་དོ། ཁོང་དམག་མི་དཔའ་རྩལ་ཅན་ཞིག་ཡིན་ན་ཡང་མཛེ་ནད་དྲག་པོ་ཞིག་གིས་མནར་བཞིན་ཡོད་པས།

² དེ་ཚོས་ཨིསི་རཱཨེལ་དང་མཉམ་དུ་བཙན་རྒོལ་བྱེད་ཐེངས་གཅིག་ལ་ཁོ་ཚོས་ཨིསི་རཱཨེལ་གྱི་བུ་མོ་ཆུང་ཆུང་ཞིག་བཟུང་སྟེ་འཁྱེར་ཡོང་ནས། རྗེས་སུ་མོ་ན་མན་གྱི་ལྕམ་གྱི་གཡོག་མོར་འགྱུར་རོ།

³ ཉིན་ཞིག་མོས། རང་གི་སྦྱིན་བདག་གི་ལྕམ་ལ། གལ་ཏེ་ངའི་སྦྱིན་བདག། ས་མར་ཡ་རུ་བཞུགས་པའི་ལུང་སྟོན་པའི་སར་ཕེབས་པ་ཡིན་ན། ཁོང་གིས་མཛེ་ནད་དེ་དྲག་པ་བཟོ་བ་གནང་གཡོང་ཞེས་ཞུས་སོ།

⁴ ན་མན་གྱིས་དེ་ཐོས་པ་དང་རྒྱལ་པོའི་སར་ཕྱིན་ནས་བུ་མོ་དེས་གང་སྨྲས་པ་རྣམས་ཞུས་པས།

⁵ རྒྱལ་པོས། ཁྱོད་རང་ཕྱིན་ནས། ཨིསི་རཱཨེལ་གྱི་རྒྱལ་པོ་ལ་ཕྱག་བྲིས་འདི་འཁྱེར་ཞིག་གསུངས་སོ། དེ་ལྟར་ན་མན་གྱིས་དངུལ་དུམ་བུ་ ༣༠,༠༠༠ དང་གསེར་དུམ་བུ་ ༦,༠༠༠ དང་གོས་བརྗེས་ལེན་ལེགས་པ་གྲངས་བཅུ་བཅས་འཁྱེར་ནས་ཐོན་ནོ།

⁶ ཁོང་གིས་འཁྱེར་བའི་ཡི་གེ་དེ་ཨིསི་རཱཨེལ་གྱི་རྒྱལ་པོར་ཕུལ་ལོ། ཡི་གེ་དིའི་ནང་དུ་ངའི་འགོ་འཛིན་ན་མན་ལ་ངོ་སྤྲོད་ཞུ་གི་ཡོད། ངའི་འདོད་པར་ཁྱེད་ཀྱིས་ཁོ་མཛེ་ནད་ལས་དྲག་པ་བཟོ་གནང་རོགས་ཞེས་བྲིས་ཡོད་དོ།

⁷ ཨིསི་རཱཨེལ་གྱི་རྒྱལ་པོས་ཡི་གེ་དེ་ཀློག་པ་དང་སེམས་ཚབ་ངང་རང་གི་གོས་ཧྲལ་ནས་སི་རི་ཡའི་རྒྱལ་པོས་ངས་མི་འདི་ནས་ལས་དྲག་པའི་རེ་བ་ཇི་ལྟར་བྱེད་ཀྱི་ཡོད་དམ། ཁོང་གི་བསམ་པར་ང་ནི་འཆི་གསོན་སྦྱིན་པའི་མཐུ་སྟོབས་ཡོད་མཁན་དཀོན་མཆོག་རེད་བསམ་གྱི་ཡོད་དམ། ཁོང་གིས་ང་ལ་འཁྲུགས་པ་སློང་བའི་འཆར་གཞི་ཡོད་པ་གསལ་པོ་རེད་ཅེས་གསུང་སྐད་སྐྱོན་ནོ།

⁸ ལུང་སྟོན་པ་ཨེ་ལི་ཤས་དེའི་སྐོར་གསན་པ་དང་། ཁོང་གིས་རྒྱལ་པོར་ཁྱེད་རང་ཐུགས་འཁྲལ་ཅིའི་ཕྱིར་གནང་གི་ཡོད་དམ། མི་དེ་ངའི་སར་གཏོང་ཤོག་དང་ངས་ཁོ་ལ་ཨིསི་རཱཨེལ་ནང་ལ་ལུང་སྟོན་པ་ཞིག་ཡོད་པ་བསྟན་གྱི་ཡིན་ཞེས་པའི་འཕྲིན་བསྐུར་རོ།

⁹ དེ་ལྟར་ན་མན་རང་གི་རྟ་དང་ཤིང་རྟ་འཁོར་ལོ་དང་བཅས་པ་ཐོན་ནས། ཨེ་ལི་ཤའི་ཁང་པའི་སྒོའི་རྩར་བསྡད་དོ།

¹⁰ ཨེ་ལི་ཤས་ཞབས་ཕྱི་ལ་། ཕྱིར་སོང་ནས། ཁོ་ལ་ཡོར་དན་གྱི་གཙང་པོར་ཕྱིན་ནས་ལན་བདུན་འཁྲུས་རྒྱབ་ན་ཁྱོད་ཀྱི་མཛེ་ནད་དེ་ཆ་ཚང་དྲག་གི་རེད་ཅེས་སྨྲས་པར་བཏང་ངོ་།

¹¹ འོན་ཀྱང་ན་མན་ཁོང་ཁྲོ་ལངས་ནས་ངའི་བསམ་པར་ཁོང་ཕྱིར་ཕེབས་ནས། ཁོང་གིས་གཙོ་བོ་དཀོན་མཆོག་ཁོང་གི་དཀོན་མཆོག་ལ་གསོལ་བ་བཏབ་ནས་ཁོང་གི་ཕྱག་ངའི་མཛེ་ནད་ཀྱི་རྟགས་ཡོད་སར་རེག་ནས་དྲག་པ་བཟོ་བ་གནང་གི་རེད་བསམ་བྱུང་ཞེས་སྨྲས་སོ།

¹² དེ་མིན་ཨིསི་རཱཨེལ་གྱི་གཙང་པོ་ལས་ལྷག་པ་དྷ་མསེ་ཀསེ་ཏུ་གཙང་པོ་ཨ་བྷ་ན་དང་ཕར་པར་སོགས་ཡོད་པ་མ་ཡིན་ནམ། ངས་དེ་ཚོར་འཁྲུས་ནས་ནད་དྲག་པ་བཟོས་ཐུབ་ཀྱི་རེད་ཅེས་སྨྲས་སོ།

¹³ ན་མན་གྱི་ཞབས་ཕྱི་ཚོ་ཁོང་གིི་སར་ཕྱིན་ནས་སྐུ་ཞབས་ལགས། ལུང་སྟོན་པས་ཁྱེད་ལ་བྱ་བ་དཀའ་བ་ཞིག་བྱེད་དགོས་པའི་བཀའ་གནང་ན་ཁྱེད་ཀྱིས་དེ་ལྟར་གནང་ཡོང་། ཁྱེད་ཀྱིས་ཁོང་གིས་གསུངས་པ་ལྟར་ཁྲུས་པ་གནང་ནས་དྲག་གསོ་བ་ཅི་ཕྱིར་མི་གནང་ངམ།

¹⁴ དེ་ལྟར་ན་མན་ཡོར་དན་དུ་ཕེབས་ནས་ཨེ་ལི་ཤས་སློབ་སྟོན་གནང་བ་ལྟར། ཐེངས་བདུན་ཆུའི་ནང་འཛུལ་བ་དང་ཁོང་གི་ནད་དེ་ཆ་ཚང་དྲག་པ་དང་། ཁོང་གི་ཤ་ཕྲུ་གུའི་ཤ་ལྟར་འཇམ་པོ་དང་ཐང་པོ་ཆགས་སོ།

¹⁵ ཁོང་གི་འཁོར་གཡོག་ཚོ་དང་མཉམ་དུ་ཨེ་ལི་ཤའི་དྲུང་དུ་ཕྱིར་ལོག་ནས། ད་ངས་ཨིསི་རཱཨེལ་གྱི་དཀོན་མཆོག་མ་གཏོགས་པའི་དཀོན་མཆོག་གཞན་མེད་པ་ཧ་གོ་བྱུང་། དེ་འདྲ་སོང་ཙང་ང་ནས་འབུལ་བ་ཞིག་བཞེས་རོགས་གནང་ཞུས་པས།

¹⁶ ཨེ་ལི་ཤས། ངས་ཞབས་ཕྱི་ཞུས་པའི་གསོན་པོའི་གཙོ་བོ་དཀོན་མཆོག་དཔང་པོ་བཙུག་ནས་ངས་སྨྲ་བཞིན་ཡོད་ངས་འབུལ་བ་གང་ཡང་ལེན་གྱི་མིན་ཞེས་གསུངས་སོ། ན་མན་གྱིས་ཨུ་ཚུག་རྒྱབ་ན་ཡང་ཁོང་གིས་འབུལ་བ་མ་བཞེས་སོ།

¹⁷ དེར་བརྟེན་ན་མན་གྱིས། ཁྱེད་ཀྱི་འབུལ་བ་གང་ཡང་མ་བཞེས་པ་ཡིན་ན་ངས་ང་དང་མཉམ་དུ་ཁྱིམ་དུ་དྲེལ་རྒྱབ་གཉིས་ལས་འཁྱེར་ཆོག་པའི་བཀའ་གནང་བར་མཛོད། གང་ལགས་ཟེར་ན། ད་ནས་བཟུང་ངས་དམར་མཆོད་རྣམས་དང་སྦྱིན་སྲེག་གི་མཆོད་པ་སོགས་གཙོ་བོ་དཀོན་མཆོག་ལ་མ་གཏོགས་ལྷ་གཞན་སུ་ལའང་འབུལ་གྱི་མིན་ནོ།

¹⁸ ངས་སི་རི་ཡའི་ལྷ་རིམ་མོན་གྱི་ལྷ་ཁང་དུ་རྒྱལ་པོ་མཉམ་དུ་མཆོད་འབུལ་བྱེད་པ་དེ་ཚོར་གཙོ་བོ་དཀོན་མཆོག་གིས་ང་ལ་བཤགས་པ་གནང་བའི་ཡིད་ཆེས་ཏན་ཏན་ཡོད་དོ་ཅེས་ཞུས་སོ།

¹⁹ ཨེ་ལི་ཤས། ད་ཁྱོད་ཞི་བདེའི་ངང་སོང་ཞིག་གསུངས་པ་དང་། དེ་ནས་ན་མན་ཕྱིར་ལོག་གོ། ཁོང་ཅུང་ཟད་ཕར་ཙམ་སོང་བའི་རྗེས་ལ།

²⁰ ཨེ་ལི་ཤའི་ཞབས་ཕྱི་གྷེ་ཧ་ཛིས་རང་གི་སེམས་ལ་སྨྲས་པ། ངའི་སྦྱིན་བདག་གིས་ན་མན་ནས་ཕུལ་བའི་འབུལ་བ་གང་ཡང་མ་བཞེས་པར་འགྲོར་བཅུག་སོང་། ཁོང་གིས་སི་རི་ཡ་པ་དེས་ཕུལ་བའི་འབུལ་བ་དེ་ཏན་ཏན་བཞེས་གནང་དགོས་སོ། གསོན་པོའི་གཙོ་བོ་དཀོན་མཆོག་ལ་དཔང་པོ་བཙུགས་ནས་ངས་འདི་བྱེད་རྒྱུ་ཡིན། ཁོང་གི་རྗེས་སུ་སོང་ནས་འབུལ་བ་དེ་ནས་ཕྲན་བུ་ངས་ལེན་གྱི་ཡིན།

²¹ དེར་བརྟེན་ཁོ་ན་ཨ་མིན་གྱི་རྗེས་སུ་རྒྱུགས་སོ། ན་མན་གྱིས་མི་དེ་ཁོའི་རྗེས་སུ་རྒྱུགས་ནས་ཡོང་གི་ཡོད་པ་མཐོང་བ་དང་ཁོ་དང་འཕྲད་པའི་ཆེད་རང་གི་ཤིང་རྟ་འཁོར་ལོ་ནས་མར་བབས་ཏེ་ནོར་འཁྲུལ་གང་ཡང་བྱུང་སོང་ངམ་ཞེས་དྲི་བ་དྲིས་པས།

²² གྷེ་ཧ་ཛིས། ནོར་འཁྲུལ་གང་ཡང་བྱུང་མ་སོང་། འོན་ཀྱང་ངའི་སྦྱིན་བདག་གིས་ཁྱོད་ལ་ད་ལྟ་རང་རི་བརྒྱུད་ཀྱི་ཡུལ་ཨེཕ་ར་ཡིམ་གྱི་ལུང་སྟོན་པ་གཉིས་སླེབས་ནས། ཁོང་གིས་ཁྱོད་ལ་ཁོ་ཚོར་དངུལ་དུམ་བུ་གྲངས་ ༣,༠༠༠ དང་གོས་བརྗེས་ལེན་ལེགས་པ་ཚ་ཚང་གཉིས་འབུལ་དགོས་ཞེས་ང་ལ་བཏང་གནང་བྱུང་ཞེས་སྨྲས་པས།

²³ ན་མན་གྱིས། དངུལ་དུམ་བུ་ ༦,༠༠༠ དེ་རྐྱལ་པ་གཉིས་ནང་བླུགས་པ་དང་གོས་བརྗེས་ལེན་སྤུས་ལེགས་ཆ་ཚང་གཉིས་བཅས་རང་གི་གཡོག་པོ་གཉིས་ལ་བསྐུར་ནས་གྷེ་ཧ་ཛིའིི་སྔོན་དུ་བཏང་ངོ་།

²⁴ དེ་ནས་ཁོ་ཚོ་ཨེ་ལི་ཤ་བཞུགས་པའི་རི་བོར་སླེབས་པ་དང་། གྷེ་ཧ་ཛིས་རྐྱལ་པ་གཉིས་པོ་དེ་ཕྱིར་ལེན་ནས་ནང་དུ་འཁུར་ནས། ན་མན་གི་གཡོག་པོ་གཉིས་ཕྱིར་ལོག་བཏང་ངོ་།

²⁵ ཁོ་ཡང་སྐྱར་ནང་དུ་ཕྱིན་པ་དང་ཨེ་ལི་ཤས་ཁྱོད་གང་དུ་ཕྱིན་པ་ཡིན་ནམ་ཞེས་བཀའ་འདྲི་གནང་བས། ཁོས་སྐུ་ཞབས་ང་གང་དུ་ཡང་ཕྱིན་མེད་ཞུས་པས།

²⁶ འོན་ཀྱང་ཨེ་ལི་ཤས། མི་དེ་ཤིང་རྟ་འཁོར་ལོ་ནས་ཁྱོད་འཕྲད་པར་བབས་སྐབས་ངའི་སེམས་ཉིད་དེར་མེད་དམ། དངུལ་འདི་དང་གོས་དང་ཁ་སྐྱུར་པོའི་ཚལ་དང་རྒུན་ཚལ་དང་ལུག་དང་བ་ཕྱུགས་དང་གཡོག་པོ་སོགས་ལེན་པའི་དུས་སྐབས་ད་ལྟ་མ་ཡིན་ནོ།

²⁷ ད་ན་མན་གྱི་མཛེ་ནད་དེ་ཁྱོད་ལ་འཕོག་ནས་དེ་ཁྱོད་དང་ཁྱོད་ཀྱི་བརྒྱུད་པར་རྟག་ཏུ་གནས་པར་འགྱུར་གསུངས་སོ། གྷེ་ཧ་ཛི་དེ་ནས་ཐོན་པ་དང་ཁོ་ལ་ནད་དེ་འཕོག་ནས་ཁོའི་ལྤག་པ་ཁ་བ་ལྟར་དཀར་པོར་འགྱུར་རོོོ༎