རྒྱལ་རབས་གཉིས་པ། 4 - Tibetan Old Testament 2011

ཨེ་ལི་ཤས་ཡུག་མོ་དབུལ་པོ་ཞིག་ལ་རོགས་བྱས་པ།

¹ ལུང་སྟོན་པ་ཚོ་ཞིག་གི་ནང་ནས་ཡུག་མོ་ཅིག་ཨེ་ལི་ཤའི་དྲུང་དུ་ཕྱིན་ནས། སྐུ་ཞབས་ལགས། ངའི་ཁྱོ་ཤི་སོང་། ཁྱོད་ཀྱིས་མཁྱེན་གསལ་ལྟར་ཁོ་ནི་དཀོན་མཆོག་ལ་འཇིགས་མཁན་ཞིག་ཡིན་ན་ཡང་། ད་ཆ་མི་ཞིག་ལ་བུ་ལོན་འཇལ་རྒྱུ་ཡོད་པས། དེའི་ཕྱིར་དུ་ངའི་བུ་གཉིས་ཚེ་གཡོག་བྱེད་ཕྱིར་ལེན་པར་སླེབས་བྱུང་ཞེས་ཞུས་པས།

² ཁོང་གིས་ངས་ཁྱོད་ཀྱི་དོན་ལ་ཅི་བྱེད་དགོས་སམ། ཁྱོད་ཀྱི་ཁྱིམ་དུ་ག་རེ་ཡོད་པ་དེ་ཚོ་ང་ལ་ཤོད་དང་གསུངས་པས། མོས་བུམ་པ་ཆུང་ཆུང་ཞིག་ནང་སྐྱུ་རུའི་སྣུམ་མ་གཏོགས་གཞན་གང་ཡང་མེད་ཞུས་པས།

³ ཨེ་ལི་ཤས་མོ་ལ། ཁྱིམ་མཚེས་ཚོའི་རྩར་ཕྱིན་ནས་བུམ་པ་སྟོངས་པ་རྣམས་གང་ཐུབ་ཐུབ་གཡར་ཞིག

⁴ དེ་ནས་ཁྱོད་དང་ཁྱོད་ཀྱི་བུ་གཉིས་ཁྱིམ་དུ་ཕྱིན་ནས་སྒོ་རྒྱབ་ནས་བུམ་པ་རྣམས་སྣུམ་གྱི་བཀང་ཞིག བུམ་པ་རེ་རེར་ཁེངས་མ་ཐག་ཏུ་དེ་རྣམས་སོ་སོར་འཇོག་ཅིག་ཅེས་གསུངས་སོ།

⁵ དེ་ནས་བུ་མེད་དེ་བུ་གཉིས་དང་མཉམ་དུ་རང་གི་ཁྱིམ་དུ་འཛུལ་ནས། སྒོ་རྒྱབ་སྟེ་སྐྱུ་རུའི་སྣུམ་བུམ་པ་ཆུང་ཆུང་དེ་བླངས་ནས་རང་གི་བུ་ཚོས་མོའི་སར་འཁྱེར་ཡོང་བའི་བུམ་པ་དེ་ཚོའི་ནང་བཀང་བ་རེད།

⁶ དེ་ཚོའི་བུམ་པ་ཚང་མ་བཀང་ཟིན་པ་དང་མོས་ད་དུང་བུམ་པ་ཡོད་མེད་དྲིས་པས། བུ་ཞིག་གིས་བུམ་པ་དེ་མཐའ་མ་རེད་ཅེས་སྨྲས་མ་ཐག་ཏུ། སྐྱུ་རུའི་སྣུམ་དེ་ཆད་དོ།

⁷ དེ་ནས་མོས་ལུང་སྟོན་པ་ཨེ་ལི་ཤའི་དྲུང་དུ་ཕྱིན་པ་དང་། ཁོང་གིས་མོ་ལ་སྐྱུ་རུའི་སྣུམ་དེ་རྣམས་བཙོང་ནས་བུ་ལོན་ཡོད་པ་ཚང་མ་འཇལ་ཞིག དེའི་ལྷག་འཕྲོས་རྣམས་ཁྱོད་དང་ཁྱོད་རང་གི་བུ་ཚོའི་འཚོ་རྟེན་འདང་ངེས་ཡོང་གི་རེད་ཅེས་བཀའ་གནང་ངོ༎

ཨེ་ལི་ཤ་དང་ཤུ་ནེམ་གྱི་བུད་མེད་ཕྱུག་པོ་ཞིག།

⁸ ཉིན་ཞིག་ཨེ་ལི་ཤ་ཤུ་ནེམ་དུ་བུད་མེད་ཕྱུུག་པོ་ཞིག་ཡོད་སར་ཕེབས་པ་དང་། མོས་ཁོང་ལ་གསོལ་ཚིག་གི་ཆེད་དུ་གདན་འདྲེན་ཞུས་པ་དང་། དེ་ནས་བཟུང་ཁོང་ཤུ་ནེམ་དུ་ཕེབས་རིམ་བཞིན་མོའི་ཁྱིམ་དུ་གསོལ་ཚིག་བཞེས་ཀྱི་ཡོད་པས།

⁹ མོས་རང་གི་ཁྱོ་ལ། ངའི་བསམ་པར་ང་ཚོའི་སར་ཡང་ཡང་ཕེབས་མཁན་དེ་སྐྱེ་བུ་དམ་པ་ཞིག་ཡིན་པས།

¹⁰ ང་ཆོའི་རྩེ་ཐོག་ཏུ་ཁང་མིག་ཆུང་ཆུང་ཞིག་བཟོས་ནས། ཉལ་ཁྲི་ཞིག་དང་ལྕོག་རྩེ་གཅིག་དང་རྐུུབ་ཀྱག་གཅིག་དང་བཞུ་མར་བཅས་འཇོག་པར་བྱ། དེ་ནས་ཁོང་ང་ཚོའི་སར་ཕེབས་རིམ་བཞིན་དེར་ཞུགས་ཆོག་གི་རེད་ཅེས་སྨྲས་སོ།

¹¹ ཉིན་ཞིག་ཨེ་ལི་ཤ་ཤུ་ནེམ་དུ་ཕེབས་པ་དང་། རང་གི་ཁང་མིག་ནང་སྐུ་ངལ་གསོ་བར་ཕེབས་ནས།

¹² ཁོང་གིས། རང་གི་ཞབས་ཕྱི་གྷེ་ཧ་ཛི་ལ་བུད་མེད་དེ་བོས་པར་སོང་ཞིག་གསུངས་པས། མོ་ཡོང་བ་དང་།

¹³ ཁོང་གིས། གྷེ་ཧ་ཛི་ལ། མོས་ང་ཚོའི་དགོས་མཁོ་ཚང་མ་སྒྲུབ་ཀྱི་ཡོད་པས་ངས་མོ་ལ་ཅི་བྱེད་དགོས། ཕལ་ཆེར་མོའི་འདོད་པར་ང་རྒྱལ་པོའམ་དམག་སྤྱིའི་སར་ཕྱིན་ནས་མོའི་སྐོར་གཏམ་བཟང་པོ་ཞིག་ཞུ་དགོས་ཀྱི་ཡོད་དམ་སྐད་ཆ་དྲིས་ཤིག་ཅེས་གསུངས་པས། མོས་ངའི་རང་གི་མི་མང་གི་ཁྲོད་དུ་ང་ལ་དགོས་མཁོ་རྣམས་ཆ་ཚང་ཡོད་ཞུས་པས།

¹⁴ ཨེ་ལི་ཤས་གྷེ་ཧ་ཛི་ལ། དེ་ནས་ངས་མོའི་ཆེད་དུ་ག་རེད་བྱེད་ཐུབ་ཀྱི་རེད་དམ་ཅེས་བཀའ་འདྲི་གནང་བས། ཁོས་ལན་དུ། མོ་ལ་ཕྲུ་གུ་མེད་པ་མ་ཟད་མོའི་ཁྱོ་དེ་ལོ་ན་མཐོ་པོ་རེད་ཅེས་ཞུས་པས།

¹⁵ ཨེ་ལི་ཤས་ཁོ་ལ། མོ་ལ་འདིར་ཤོག་ལབ་ཅིག་གསུངས་པས། མོ་ཡོང་ནས་སྒོའི་འགྲམ་དུ་ལངས་བསྡད་དོ།

¹⁶ ཨེ་ལི་ཤས་མོ་ལ། ལོ་རྗེས་མ་ལ་དུས་ཚོད་འདིའི་སྐབས་ལ་ཁྱོད་ཀྱི་པང་དུ་བུ་ཞིག་འཁྱེར་རྒྱུ་ཡོང་གསུངས་པས། མོ་སྐད་ཤོར་ནས། ཀྱེ་སྐུ་ཞབས་ལགས། ང་ལ་རྫུན་མ་གསུང་རོགས་གནང་། ཁྱེད་ནི་དཀོན་མཆོག་གི་སྐྱེ་བུ་ཞིག་རེད་ཅེས་ཞུས་སོ།

¹⁷ འོན་ཀྱང་ཨེ་ལི་ཤས་གསུངས་པ་ལྟར་ལོ་རྗེས་མ་དེ་ལ་དུས་ཚོད་དེ་རང་ལ་མོ་ལ་བུ་ཞིག་སྐྱེས་སོ།

¹⁸ ལོ་ཤས་རྗེས་ལ་ཞིང་རྔ་བའི་དུས་སུ་བུ་དེ་སྔ་དྲོ་ཞིག་རང་གི་ཕ་དེ་ཞིང་རྔ་མཁན་མི་ཚོ་མཉམ་དུ་ཡོད་སར་ཕྱིན་ནོ།

¹⁹ གློ་བུར་དུ་བུ་དེས་རང་གི་ཕ་ལ་ང་མགོ་ན་གི་འདུག མགོ་ན་གི་འདུག་ཅེས་སྐད་རྒྱབ་པ་དང་། ཕས་གཡོག་པོ་ཞིག་ལ་བུ་དེ་ཨ་མ་ཡོད་སར་འཁུར་ཞིག་ཅེས་སྨྲས་པས།

²⁰ གཡོག་པོས་བུ་དེ་ཨ་མ་ཡོད་སར་རྒྱབ་ལ་འཁུར་ནས་སྐྱེལ་ལོ། ཨ་མས་བུ་དེ་ཉིན་གུང་བར་དུ་རང་གི་པང་དུ་བཞག་ཡོད་པའི་སྐབས་སུ་བུ་དེ་འཆི་བ་རེད།

²¹ མོས་ཁོ་ཨེ་ལི་ཤའི་ཁང་མིག་ནང་འཁུར་ནས་ཁོང་གི་ཉལ་ཁྲིའི་སྟེང་དུ་བཞག་ནས་ཕྱི་ནས་སྒོ་རྒྱབ་བོ།

²² དེ་ནས་མོས་རང་གི་ཁྱོ་བོས་ནས་ཁྱོ་ལ་འདིར་གཡོག་པོ་ཞིག་བོང་བུ་དང་མཉམ་དུ་གཏོང་ཤོག། ང་ལུང་སྟོན་པ་ཨེ་ལི་ཤའི་སར་འགྲོ་དགོས་ཀྱི་འདུག ང་གང་མགྱོགས་མགྱོགས་ཕྱིར་ལོག་ཡོང་གི་ཡིན་ཞེས་སྨྲས་པས།

²³ ཁྱོ་དེས། མོ་ལ་དེ་རིང་ཁྱོད་རང་གང་གི་དོན་དུ་འགྲོ་དགོས་ཀྱི་ཡོད་དམ། དེ་རིང་ངལ་གསོ་བའི་ཞག་གམ་ཡང་ན་ཟླ་བ་གསར་པའི་དུས་སྟོན་གང་ཡང་མ་རེད་ཅེས་སྨྲས་པས། མོས་གའི་བྱེད་ཀྱི་མ་རེད་ཅེས་སྨྲས་སོ།

²⁴ དེ་ནས་མོའི་བོང་བུར་སྒ་རྒྱབ་ཡོད་པ་དང་། གཡོག་པོར་བོང་བུ་དེ་གང་མགྱོགས་མགྱོགས་འགྲོ་ཐུབ་པ་བྱོས་ཤིག ངས་མ་སྨྲས་བར་དུ་དལ་འགྲོད་བྱེད་མ་བཅུག་ཅེས་སྨྲས་པ་དང་།

²⁵ དེ་ལྟར་མོ་རི་བོ་ཀར་མེལ་དུ་ཨེ་ལི་ཤ་ཡོད་སར་ཐོན་ནོ། ཨེ་ལི་ཤས་ཐག་རིང་པོ་ནས་མོ་ཡོང་གི་ཡོད་པ་གཟིགས་ནས་ཞབས་ཕྱི་གྷེ་ཧ་ཛི་ལ། ལྟོས་དང་ཤུ་ནེམ་པའི་བུད་མེད་དེ་ཡོང་གི་འདུག

²⁶ མོའི་སར་མགྱོགས་པོར་སོང་ལ། མོའི་ཁྱོ་དང་བུ་བཅས་པ་བདེ་པོ་ཡོད་མེད་དྲིས་ཤིག་གསུངས་པས། མོས། གྷེ་ཧ་ཛི་ལ་ཚང་མ་བདེ་པོ་ཡོད་སྨྲས་པ་དང་།

²⁷ མོ་ཨེ་ལི་ཤའི་སར་སླེབས་ནས། མོས་ཁོང་ལ་ཕྱག་འཚལ་ཞིང་ཁོང་གི་ཞབས་ནས་འཇུས་པས། གྷེ་ཧ་ཛིས། མོ་ཕར་འགྲོ་གྲབ་བྱེད་སྐབས། ཨེ་ལི་ཤས་མོ་ལ་གང་ཡང་མ་བྱེད་ཅིག། མོ་སེམས་ཧ་ཅང་འཁྲུགས་ཡོད་པ་ཁྱོད་ཀྱིས་མཐོང་གི་མི་འདུག་གམ། གཙོ་བོ་དཀོན་མཆོག་གིས་ང་ལ་གསང་ནས་དེའི་སྐོར་གང་ཡང་བཀའ་གནང་མ་བྱུང་ཅེས་གསུངས་སོ།

²⁸ བུད་མེད་དེས། སྐུ་ཞབས་ལགས། ངས་ཁྱེད་ལ་བུ་གཅིག་གནང་རོགས་ཞུས་བྱུང་ངམ། ངས་ཁྱེད་ལ་ང་ལ་རེ་འདོད་ཆེན་པོ་མ་བཟོད་རོགས་གནང་ཞུས་མ་བྱུང་ངམ་ཅེས་ཞུས་པས།

²⁹ ཨེ་ལི་ཤས། གྷེ་ཧ་ཛི་ལ་ཞལ་བསྒྱུར་ནས་ངའི་དབྱུག་པ་དེ་འཁྱེར་ནས་མགྱོགས་པོ་རྒྱུགས་ཤིག ཁྱོད་ཀྱིས་མི་སུ་ཞིག་ལའང་ཐུགས་ན་ཡང་ཁོ་ལ་འཚམས་འདྲི་མ་བྱེད་པར། ཚུར་འཚམས་འདྲི་བྱེད་མཁན་བྱུང་ན་ལན་རྒྱབ་ནས་མ་སྡོད་ཅིག ཁྱིམ་དེར་ཐད་ཀར་སོང་ལ་བུ་དེའི་མདོང་གི་སྟེང་དུ་དབྱུག་པ་འདི་འཇོག་ཅིག་གསུངས་པས།

³⁰ བུ་མེད་དེས། ཨེ་ལི་ཤ་ལ་ངས་གསོན་པོའི་གཙོ་བོ་དཀོན་མཆོག་དང་ཁྱེད་ཀྱི་ཚེ་སྲོག་དཔང་པོ་བཙུག་ནས་ངས་སྨྲ་བཞིན་ཡོད་པས་ངས་ཁྱེད་ལ་སྤང་ནས་འགྲོ་གི་མིན་ཞུས་སོ། དེ་འདྲ་སོང་ཙང་ཁོང་གཉིས་མཉམ་དུ་ཕྱིར་ལོག་ཕེབས་སོ།

³¹ གྷེ་ཧ་ཛི་སྔོན་དུ་ཕྱིན་ནས་ཨེ་ལི་ཤའི་དབྱུག་པ་དེ་བུའི་སྟེང་དུ་བཞག་ན་ཡང་སྐད་སྒྲ་དང་སྲོག་ཡོད་པའི་རྟགས་གང་ཡང་མ་བྱུང་ངོ། དེ་འདྲ་སོང་ཙང་ཁོ་ཨེ་ལི་ཤ་ཐུག་པར་ལོག་ནས་བུ་དེ་གསོན་མ་སོང་ཅེས་ཞུས་སོ།

³² ཨེ་ལི་ཤ་འབྱོར་པ་དང་ཁོང་གཅིག་པོ་ཁང་མིག་དེར་ཕེབས་པ་དང་བུ་དེ་ཉལ་ཁྲིའི་སྟེང་འཆི་ཡོད་པ་གཟིགས་པས།

³³ ཁོང་གིས་སྒོ་རྒྱབ་ནས་གཙོ་བོ་དཀོན་མཆོག་ལ་སྨོན་ལམ་བཏབ་བོ།

³⁴ དེ་ནས་ཁོང་བུ་དེའི་སྟེང་དུ་རང་གི་གཟུགས་བཀབ་ནས་ཁོང་གི་ཞལ་དང་སྤྱན་དང་ཕྱག་རྣམས་བུ་དེའི་ཁ་དང་མིག་དང་ལག་པ་རྣམས་ཀྱི་སྟེང་བཞག་གནང་ངོ། ཁོང་བུ་དེའི་སྟེང་དུ་བཀབ་ནས་བཞུགས་ཡོད་པ་དང་བུ་དེའི་གཟུགས་པོར་དྲོད་ཁུག་གོ

³⁵ ཨེ་ལི་ཤ་ཡར་བཞེངས་ནས་ཁང་མིག་དེའི་ནང་དུ་ཕར་ཚུར་ཕེབས་པ་དང་དེའི་རྗེས་སུ་ཡང་སྐྱར་བུ་དེའི་སྟེང་དུ་བཀབ་ནས་བཞུགས་པས། བུ་དེས་ཐེངས་བདུན་དུ་ཧབ་དྲི་རྒྱབ་པ་དང་དེ་ནས་ཁོས་མིག་གདངས་སོ།

³⁶ ཨེ་ལི་ཤས། གྷེ་ཧ་ཛི་ལ་བུ་དེའི་ཨ་མ་དེ་བོས་ཤོག་གསུངས་པ་དང་། མོ་ནང་དུ་ཡོང་བ་དང་ཁོང་གིས་མོ་ལ། ཁྱོད་ཀྱི་བུ་འདིར་ཡོད་གསུངས་པས།

³⁷ མོས་ཨེ་ལི་ཤའི་ཞབས་ལ་ཕྱག་འཚལ་ཞིང་མདོང་ས་ལ་རེག་གོ དེ་ནས་རང་གི་བུ་འཁྲིད་ནས་སོང་ངོ་༎

མཛད་པ་ཡ་མཚན་གཉིས།

³⁸ དུས་ཞིག་ལ་ཡུལ་ཚང་མར་མུ་གེ་བྱུང་ནས་ཨེ་ལི་ཤ་གྷིལ་གཱལ་དུ་ཕྱིར་ལོག་ཕེབས་སོ། ཁོང་གིས་ལུང་སྟོན་པ་ཚོ་ཞིག་ལ་སློབ་འཁྲིད་གནང་བཞིན་ཡོད་སྐབས། ཁོང་གིས་ཞབས་ཕྱི་ལ་སྣོད་ཆེན་པོ་ཞིག་མེའི་སྟེང་དུ་བཀབ་ནས་ཁོ་ཚོར་ཐུག་པ་ཕན་བུ་བསྐོལ་ཞིག་གསུངས་པས།

³⁹ དེ་ཚོའི་ནང་ནས་གཅིག་ཞིང་ནས་སྔོ་ཚལ་སྒྲུག་པར་ཕྱིན་པ་དང་། ཁོ་ལ་ནགས་ཀྱི་རྒུན་ཤིང་ཞིག་རྙེད་ནས་འབྲས་བུ་གང་འཁུར་ཐུབ་ཐུབ་སྒྲུགས་སོ། ཁོས་དེ་ཚོ་ཇི་ཡིན་མ་ཤེས་པར་འཁྱེར་ཡོང་ཞིང་གཏུབ་ནས་ཐུག་པར་བླུགས་སོ།

⁴⁰ མི་ཚོར་ཐུག་པ་བླུག་པ་དང་དེ་ཚོས་བྲོ་བ་མྱང་མ་ཐག་ཏུ་ཨེ་ལི་ཤ་ལ་ཐུག་པའི་ནང་ལ་དུག་རྒྱབ་འདུག་ཅེས་སྐད་རྒྱབ་ནས་དེ་ཚོས་མ་འཐུང་ངོ་།

⁴¹ ཨེ་ལི་ཤས། ཁ་ཟས་ཕྲན་བུ་ཞིག་འཁྱེར་ཡོང་ནས་སྣོད་དེའི་ནང་བླུགས་ནས་དེ་ཚོ་ལ་ད་དུང་ཐུག་པ་དྲོངས་ཤིག་གསུངས་པ་དང་། ཐུག་པ་འཐུང་ནས་དེ་ཚོར་གང་ཡང་མ་བྱུང་ངོ་།

⁴² དུས་སྐབས་གཅིག་ལ་མི་ཞིག་བྷལ་ཤ་ལི་ཤ་ནས་ཨེ་ལི་ཤ་ལ་ལོ་དེའི་ནང་ཐོག་མར་རྔས་པའི་ནས་ལས་བཟོས་པའི་བག་ལེབ་ཉི་ཤུ་དང་འབྲུས་ཁེངས་པའི་སྲུས་གསོས་པ་ཕྲན་བུ་འཁྱེར་ཡོང་ནས། ཨེ་ལི་ཤས། རང་གི་ཞབས་ཕྱི་ལ་དེ་ཚོ་ལུང་སྟོན་པ་ཚོ་ལ་དྲོངས་ཤིག་གསུངས་སོ།

⁴³ འོན་ཀྱང་ཁོས་ལན་དུ། ཁྱེད་རང་གི་སེམས་ལ་མི་ ༡༠༠ ལ་འདིས་འདང་གི་རེད་བསམ་གི་འདུག་གམ་ཞུས་པས། ཨེ་ལི་ཤས་སྨྲས་པ། ཁོ་ཚོས་བཞེས་པའི་ཕྱིར་དེ་ཚོ་ཕུལ་ཞིག། གང་ལ་ཟེར་ན། གཙོ་བོ་དཀོན་མཆོག་གིས་དེ་ཚོས་ཟས་པའི་རྗེས་ལ་ད་དུང་ལྷག་གི་རེད་ཅེས་གསུངས་ཡོད།

⁴⁴ དེ་འདྲ་སོང་ཙང་ཞབས་ཕྱི་དེས། ཁོང་ཚོའི་མདུན་དུ་ཁ་ཟས་བཞག་པ་དང་གཙོ་བོ་དཀོན་མཆོག་གིས་བཀའ་གནང་བ་ལྟར་དེ་ཚོས་ཟས་ནས་ད་དུང་ཕྲན་བུའི་ལྷག་གོ།