རྒྱལ་རབས་གཉིས་པ། 3 - Tibetan Old Testament 2011

ཨིསི་རཱཨེལ་དང་མོ་ཨབ་དབར་དམག་འཁྲུགས།

¹ ཡ་ཧུ་དཱ་པའི་རྒྱལ་པོ་ཡེ་ཧོ་ཤ་ཕད་ཀྱིས་རྒྱལ་སྲིད་སྐྱོངས་ནས་ལོ་ཅོ་བརྒྱད་སོང་བའི་སྐབས་ཨ་ཧབ་ཀྱི་བུ་ཡོ་རམ་ནི་ཨིསི་རཱཨེལ་གྱི་རྒྱལ་པོར་འགྱུར་བ་དང་ཁོང་གིས་ས་མར་ཡ་རུ་ལོ་བཅུ་གཉིས་རིང་རྒྱལ་སྲིད་བསྐྱངས་སོ།

² ཁོང་གིས་གཅོ་བོ་དཀོན་མཆོག་གི་སྤྱན་སྔར་སྡིག་པ་གྱིས་ཡོད་རུང་ཁོང་རང་གི་ཡབ་དང་ཡུམ་ཡེ་ཛི་བྷེལ་ལྟར་ངན་པ་གནང་མེད་དོ། ཁོང་གིས་རང་གི་ཡབ་ཀྱིས་བྷལ་ལ་མཆོད་པའི་ཕྱིར་འདྲ་སྐུ་བཟོས་པ་རྣམས་སྟོར་རོ།

³ འོན་ཀྱང་ཁོང་གི་ནེ་བྷད་ཀྱི་སྲས་རྒྱལ་པོ་ཡེ་རོ་བྷམ་བཞིན་ཁོང་གིས་ཨིསི་རཱཨེལ་པ་ཚོ་སྡིག་པར་སྣེ་འཁྲིད་བྱས་པ་དེ་མཚམས་འཇོགས་བྱེད་མ་ཐུབ་བོ།

⁴ མོ་ཨབ་ཀྱི་རྒྱལ་པོ་མེ་ཤེ་ཀྱིས་ལུག་གསོ་སྐྱོངས་བྱེད་པ་དང་ལོ་ལྟར་ཨིསི་རཱཨེལ་གྱི་རྒྱལ་པོར་ལུ་གུ་ ༡༠༠,༠༠༠ དང་ལུག་ ༡༠༠,༠༠༠ གི་བལ་དཔྱ་ཁྲལ་དུ་འབུལ་བཞིན་ཡོད་ན་ཡང་།

⁵ ཨིསི་རཱཨེལ་གྱི་རྒྱལ་པོ་ཨ་ཧབ་འདས་པའི་རྗེས་སུ་མེ་ཤས་ཨིསི་རཱཨེལ་ལ་ངོ་ལོག་བྱས་སོ།

⁶ དེ་མ་ཐག་རྒྱལ་པོ་ཡོ་རམ་ས་མར་ཡ་ནས་ཐོན་སྟེ། རང་གི་དམག་མི་རྣམས་བསྡུས་ནས།

⁷ ཁོང་གིས་ཡ་ཧུ་དཱ་པའི་རྒྱལ་པོ་ཡེ་ཧོ་ཤ་ཕད་ལ་མོ་ཨབ་ཀྱི་རྒྱལ་པོས་ང་ལ་ངོ་ལོག་བྱས་བྱུང་བས། ཁྱེད་ང་དང་མཉམ་དུ་ཁོ་ལ་དམག་འཐབ་པར་རོགས་གནང་བར་ཕེབས་ཐུབ་བམ་ཞེས་པའི་ལོན་བཏང་ངོ་། ཡེ་ཧོ་ཤ་ཕད་ཀྱིས་ང་ཁྱེད་ཀྱི་ཆེད་དུ་གྲ་སྒྲིག་ཡོད་པ་མ་ཟད། ངའི་མི་དང་རྟ་རྣམས་ཀྱང་གྲ་སྒྲིག་ཡོད་དོ།

⁸ ང་ཚོས་ཕྱོགས་གང་ས་ནས་དམག་འཐབ་གནང་ངམ་ཞེས་ཞུས་སོ། ཡོ་རམ་གྱིས་ང་ཚོ་ཨེ་དྷོམ་གྱི་མི་མེད་ལུང་སྟོང་གི་ལམ་རིང་པོ་ནས་འགྲོ་རྒྱུ་ཡིན་ཞེས་གསུངས་སོ།

⁹ དེ་ལྟར་རྒྱལ་པོ་ཡོ་རམ་ནི་ཡ་ཧུ་དཱ་དང་ཨེ་དྷོམ་གྱི་རྒྱལ་པོ་རྣམས་མཉམ་དུ་ཐོན་ནོ། ཉིན་བདུན་རིང་གོམ་འགྲོས་བྱས་པའི་རྗེས་ལ་ཁོ་ཚོའི་འཐུང་ཆུ་རྫོགས་པ་དང་མི་དང་སེམས་ཅན་རྣམས་ལ་ཆུ་གང་ཡང་མ་ལྷག་གོ

¹⁰ རྒྱལ་པོ་ཡོ་རམ་གྱིས་ད་ང་ཚོ་ཡག་པོ་བྱུང་མ་སོང་། གཙོ་བོ་དཀོན་མཆོག་གིས་ང་ཚོ་གསུམ་ལ་མོ་ཨབ་ཀྱི་རྒྱལ་པོའི་སྙིང་རྗེའི་འོག་འཇོག་གནང་ངོ་ཞེས་སྐད་བརྒྱབ་བོ།

¹¹ རྒྱལ་པོ་ཡེ་ཧོ་ཤ་ཕཏ་ཀྱིས་འདིར་ང་ཚོ་གཙོ་བོ་དཀོན་མཆོག་ལ་བཀའ་བསྡུར་ཞུ་བར་ལུང་སྟོན་པ་ཡོད་དམ་ཞེས་དྲིས་པས། རྒྱལ་པོ་ཡོ་རམ་གྱི་འགོ་འཛིན་ཞིག་གིས་འདིར་ཤ་ཕད་ཀྱི་བུ་ཨེ་ལི་ཤ་ཟེར་བ་ཞིག་ཡོད། ཁོང་ཨེ་ལི་ཡཱའི་ལས་རོགས་རེད་ཅེས་ཞུས་སོ།

¹² རྒྱལ་པོ་ཡེ་ཧོ་ཤ་ཕད་ཀྱིས་ཁོང་ལུང་སྟོན་པ་བདེན་པ་རེད་ཞུས་ནས། རྒྱལ་པོ་གསུམ་པོ་ཨེ་ལི་ཤའི་དྲུང་དུ་ཕེབས་སོ།

¹³ ཨེ་ལི་ཤས་ཨིསི་རཱཨེལ་གྱི་རྒྱལ་པོར། ངས་ཁྱོད་ལ་ཅིའི་ཕྱིར་རོགས་བྱེད་དགོས་སམ། ཁྱོད་ཀྱི་ཕ་མ་གཉིས་ནས་བཀའ་བསྡུར་ཞུ་སའི་ལུང་སྟོན་པ་དེ་ཚོའི་སར་སོང་ཞིག་གསུངས་པས། ཡོ་རམ་གྱིས། དེ་ལྟར་བྱེད་ཀྱི་མིན། གང་ལགས་ཟེར་ན། གཙོ་བོ་དཀོན་མཆོག་གིས་ང་ཚོ་རྒྱལ་པོ་གསུམ་ལ་མོ་ཨབ་ཀྱི་རྒྱལ་པོའི་སྙིང་རྗེའི་འོག་འཇོག་གནང་མཛད་ཡོད་ཞུས་པས།

¹⁴ ལན་དུ་ཨེ་ལི་ཤས། ངས་ཞབས་ཕྱི་ཞུས་པའི་གསོན་པོའི་གཙོ་བོ་དཀོན་མཆོག་ལ་དཔང་དུ་བཅུག་ནས་ངས་བདེན་པར་སྨྲ་རྒྱུར། གལ་ཏེ་ཁྱོད་ཚོའི་མཐུན་ཕྱོགས་ཡ་ཧུ་དཱ་པའི་རྒྱལ་པོ་ཡེ་ཧོ་ཤ་ཕད་ལ་ངས་གུས་ཞབས་མེད་པ་ཡིན་ན། ངས་ཁྱེད་ལ་དོ་སྣང་གང་ཡང་བྱེད་པ་མེད།

¹⁵ ད་ང་ལ་རོལ་ཆ་མཁན་ཞིག་འཁྲིད་ཤོག་ཅེས་གསུངས་པས། རོལ་ཆ་མཁན་གྱིས་སྒྲ་སྙན་དཀྲོགས་པ་དང་གཙོ་བོ་དཀོན་མཆོག་གི་མཐུ་སྟོབས་ཨེ་ལི་ཤའི་སྟེང་ལ་བབས་སོ།

¹⁶ ཁོང་གིས་སྨྲས་པ། གཙོ་བོ་དཀོན་མཆོག་གིས་བཀའ་གནང་བ་ནི་འདི་ལྟར་ཡིན། ཆུ་མིག་སྐམ་པོའི་མཐའ་འཁོར་ཡོངས་ལ་ཡུར་བ་བྲུས་ཤིག

¹⁷ ཁྱོད་ཚོས་ཆར་པའམ་རླུང་མ་མཐོང་ན་ཡང་ཆུ་མིག་སྐམ་པོའི་མཐའ་འཁོར་ཡོངས་སུ་ཆུ་ཡིས་ཁེངས་པར་འགྱུར་བ་དང་ཁྱོད་ཚོ་དང་ཁྱོད་ཚོའི་ཕྱུགས་དང་སེམས་ཅན་རྣམས་ལ་འཐུང་ཆུ་ཧ་ཅང་འབོལ་པོ་ཡོང་།

¹⁸ ཨེ་ལི་ཤས་མུ་མཐུད་ནས་གཅོ་བོ་དཀོན་མཆོག་གིས་བྱ་བ་དེ་ལྟར་གནང་རྒྱུ་ལས་སླ་པོ་ཡིན་པ་མ་ཟད། ཁོང་གིས་ཁྱོད་ཚོར་མོ་ཨབ་པ་ཚོའི་ཐོག་ཏུ་ཡང་རྒྱལ་ཁ་གནང་གི་ཡོད།

¹⁹ ཁྱོད་ཚོས་དེ་ཚོས་འཛིང་ར་བསྐོར་བའི་གྲོང་ཁྱེར་མཛེས་སྡུག་ཅན་རྣམས་དབང་བ་དང་། ཁྱོད་ཆོས་དེ་ཚོའི་འབྲས་བུ་ཡོད་པའི་ཤིང་སྡོང་རྣམས་བཅད་པར་བྱ། དེ་ཚོའི་ཆུ་མིག་རྣམས་བཀག་པ་དང་ས་ལུད་འཛོམས་པོའི་ཞིང་ཁ་རྣམས་རྡོས་བཀབ་ནས་མེད་པར་བཟོའོ་ཞེས་གསུངས་སོ།

²⁰ ཉིན་རྗེས་མ་ཉིན་ལྟར་གྱི་ཞོག་པ་དམར་མཆོད་ཕུལ་བའི་དུས་སྐབས་སུ་ཨེ་དྷོམ་གྱི་ཕྱོགས་ནས་ཆུ་རྒྱུགས་ནས་ས་གནས་དེ་ཚོ་ཁེངས་སོ།

²¹ མོ་ཨབ་པ་ཚོས་རྒྱལ་པོ་གསུམ་གྱིས་ཁོ་ཚོར་བཙན་འཛུལ་བྱེད་པར་ཡོང་གི་ཡོད་པ་ཐོས་པ་དང་གོ་ལག་འཁྱེར་ཐུབ་མཁན་ཀྱི་མི་རྒན་གཞོན་ཚང་མ་བཀོང་ནས་ས་མཚམས་སུ་བཞག་གོ

²² ཉིན་རྗེས་མ་དེར་ཁོ་ཚོ་ཡར་ལངས་སྐབས་ཉི་མ་ཆུའི་སྟེང་དུ་ཤར་བས་དེ་ཁྲག་ལྟར་དམར་པོ་མཐོང་ངོ།

²³ དེ་ཚོས་དེ་ཁྲག་རེད། དགྲ་བོ་གསུམ་གྱི་དམག་མི་རྣམས་ནང་འཁྲུགས་བྱུང་ནས་གཅིག་གིས་གཅིག་ལ་བསད་པས། ང་ཚོས་དེ་ཚོའི་སྒར་བཅོམ་པར་འགྲོའོ་ཞེས་སྐད་རྒྱབ་བོ།

²⁴ འོན་ཀྱང་དེ་ཚོ་སྒར་དུ་སླེབས་སྐབས་ཨིསི་རཱཨེལ་པ་ཚོས་བཙན་རྒོལ་བྱས་ནས་ཁོ་ཚོ་ཕྱིར་འབུད་བྱས་པས། ཨིསི་རཱཨེལ་པ་ཚོས་མུ་མཐུད་དེད་ནས་མོ་ཨབ་པ་ཚོ་བསད་པ་དང་།

²⁵ དེ་ཚོའི་གྲོང་ཁྱེར་བཤིགས་སོ། དེ་ཚོའི་ས་ལུད་འཛོམས་པོའི་ཞིང་ཁར་སླེབས་པ་དང་ཨིསི་རཱཨེལ་པ་རེ་རེས་རྡོ་རེར་དབྱུགས་པས་ཞིང་ཚང་མ་རྡོའི་ཁེངས་པ་མ་ཟད། དེ་ཚོས་ཆུ་མིག་ཚང་མ་བཀག་པ་དང་། འབྲས་བུ་ཡོད་པའི་ཤིང་སྡོང་ཚང་མ་བཅད་དོ། མཐའ་མར་རྒྱལ་སའི་གྲོང་ཁྱེར་ཀིར་ཧེ་རེསེ་གཅིག་པུ་ལྷག་པ་དང་འུར་རྡོ་བ་རྣམས་ནས་གྲོང་ཁྱེར་དེ་ལ་མཐའ་བསྐོར་ནས་བཙན་རྒོལ་བྱས་སོ།

²⁶ མ་ཨབ་ཀྱི་རྒྱལ་པོས་དམག་ཤོར་གྱི་ཡོད་པ་ཤེས་པ་དང་ཁོང་གིས་རལ་གྲི་འཁུར་བའི་དམག་མི་ ༧༠༠ འཁྲིད་ནས་དགྲ་བོར་གསང་སྟེ་སི་རི་ཡའི་རྒྱལ་པོའི་སར་བྲོས་ཐབས་བྱས་ཀྱང་མ་ཐུབ་བོ།

²⁷ དེ་འདྲ་སོང་ཙང་ཁོང་གིས་རང་གི་སྲས་ཆེ་ཤོས་ཁོང་གི་ཤུལ་འཛིན་དུ་རྒྱལ་པོ་བྱེད་འོས་པ་དེ་འཁྲིད་ནས་གྲོང་ཁྱེར་གྱི་ལྕགས་རིའི་སྟེང་མོ་ཨབ་ཀྱི་ལྷ་ལ་དམར་མཆོད་ཕུལ་ལོ། དེ་མཐོང་ནས་ཨིསི་རཱཨེལ་པ་ཚོ་ཧ་ཅང་འཇིགས་པས་གྲོང་ཁྱེར་ནས་ཐོན་ནས་དེ་ཚོ་རང་ཡུལ་དུ་ཕྱིར་ལོག་གོ།