རྒྱལ་རབས་གཉིས་པ། 25 - Tibetan Old Testament 2011

ཡེ་རུ་ཤ་ལེམ་སྟོངས་པ།

¹ ཛེ་དེ་ཀི་ཡཱས་བྷེ་བྷི་ལོ་ནི་ཡ་གྱི་རྒྱལ་པོ་ནེ་བུ་ཀད་ནེ་ཛར་ལ་ངོ་རྒོལ་བྱས་པའི་རྐྱེན་གྱིས་རྒྱལ་པོ་ནེ་བུ་ཀད་ནེ་ཛར་རང་གི་དམག་དཔུང་དང་བཅས་པ་ཡེ་རུ་ཤ་ལེམ་དུ་ཡོང་ནས་བཙན་རྒོལ་བྱས་པ་དང་། དེ་ནི་ཛེ་དེ་ཀི་ཡཱས་རྒྱལ་སྲིད་སྐྱོངས་བའི་ལོ་དགུ་པའི་ཟླ་བ་བཅུ་པའི་ཚེས་བཅུའི་ཉིན་ཡིན་པ་དང་། དེ་ཚོས་གྲོང་ཁྱེར་གྱི་ཕྱི་རོལ་དུ་སྡོད་སྒར་རྒྱབ་པ་དང་དེའི་མཐའ་འཁོར་དུ་འཛིངས་ར་རྩིགས་སོ།

² ཛེ་དེ་ཀི་ཡཱས་ལོ་བཅུ་གཅིག་མ་སླེབས་བར་དུ་དེར་དམག་དཔུང་གིས་བསྐོར་ནས་བཞག་གོ

³ ལོ་དེའི་ཟླ་བ་བཞི་པའི་ཚེས་དགུའི་ཉིན་ནས་མུ་གེ་ཚབ་ཆེ་བྱུང་ནས་མི་མང་ལ་ཟ་རྒྱུ་གང་ཡང་མ་ལྷག་གོ

⁴ གྲོང་ཁྱེར་གྱི་ལྕགས་རི་བཤིགས་ཡོད་དོ། བྷེ་བྷི་ལོན་པ་ཚོས་གྲོོང་ཁྱེར་ལ་མཐའ་བསྐོར་ཡོད་ན་ཡང་དམག་མི་ཚང་མ་མཚན་དེ་རང་ལ་རྒྱལ་པོའི་ལྡུམ་རའི་ལམ་ནས་ལྕགས་རི་གཉིས་འབྲེལ་གྱི་རྒྱལ་སྒོ་བརྒྱུད་ཡོར་དན་ལུང་གཤོང་གི་ཕྱོགས་སུ་བྲོས་སོ།

⁵ འོན་ཀྱང་བྷེ་བྷི་ལོན་པའི་དམག་མི་ཚོས་རྒྱལ་པོ་ཛེ་དེ་ཀི་ཡཱ་ལ་རྗེས་དེད་བྱས་ནས་ཡེ་རི་ཀོའི་ཉེ་འགྲམ་གྱི་ཐང་དུ་ཁོང་ལ་བཟུང་བ་དང་། ཁོང་གི་དམག་མི་རྣམས་ནས་ཁོང་ལ་སྤངས་སོ།

⁶ རྒྱལ་པོ་ནེ་བུ་ཀད་ནེ་ཛར་རིབ་ལཱའི་གྲོང་ཁྱེར་དུ་ཡོད་སྐབས་ཛེ་དེ་ཀི་ཡཱ་ལ་རྒྱལ་པོའི་སར་འཁྲིད་ཡོང་བ་དང་། དེར་ནེ་བུ་ཀད་ནེ་ཛར་གྱིས་ཁོང་ལ་ཉེས་ཆད་ཀྱི་གསལ་སྒྲགས་གནང་ངོ་།

⁷ ཛེ་དེ་ཀི་ཡཱའི་མདུན་དུ་ཁོང་གི་སྲས་ཚོ་བསད་པ་མ་ཟད་ནེ་བུ་ཀད་ནེ་ཛར་གྱིས་ཛེ་དེ་ཀི་ཡཱའི་སྤྱན་གཉིས་ཀ་ཕྱིར་བཏོན་བཅུག་གོ ཁོང་ལ་ལྕགས་ཐག་རྒྱབ་ནས་བྷེ་བྷི་ལོན་དུ་འཁྲིད་དོ༎

མཆོད་ཁང་སྟོར་བ།

⁸ བྷེ་བྷི་ལོ་ནི་ཡ་གྱི་རྒྱལ་པོ་ནེ་བུ་ཀད་ནེ་ཛར་གྱི་རྒྱལ་སྲིད་བཟུང་བའི་ལོ་བཅུ་དགུ་དང་ཟླ་བ་ལྔ་པའི་ཚེས་བདུན་ཉིན་རྒྱལ་པོའི་སྒྲོས་སྟོན་པ་དང་དམག་མིའི་དམག་སྤྱི་ནེ་བུ་ཛ་ར་དྷན་བྱ་བ་ཡེ་རུ་ཤ་ལེམ་དུ་སླེབས་སོ།

⁹ ཁོས་མཆོད་ཁང་དང་ཕོ་བྲང་དང་ཡེ་རུ་ཤ་ལེམ་དུ་གནས་ཡོད་མི་སྣ་གཙོ་བོ་ཚང་མའི་ཁང་ཁྱིམ་རྣམས་མེར་བསྲེག་བཏང་ངོ་།

¹⁰ ཁོའི་དམག་མི་ཚོས་གྲོང་ཁྱེར་གྱི་ལྕགས་རི་རྣམས་བཤིགས་སོ།

¹¹ ནེ་བུ་ཛ་ར་དྷན་གྱིས་གྲོང་ཁྱེར་དུ་ལྷག་འཕྲོས་ལུས་པའི་ལག་ཤེས་མཁས་པ་དང་བྷེ་བྷི་ལོན་པ་ཚོའི་ཕྱོགས་བྱེད་མཁན་ཚང་མར་བྷེ་བྷི་ལོ་ནི་ཡ་དུ་འཁྲིད་དོ།

¹² འོན་ཀྱང་ཁོས་ཡ་ཧུ་དཱ་པར་རྒྱུ་དངོས་མེད་མཁན་སྐྱོ་ཤོས་ཁ་ཤས་རྒུན་ཚལ་གྱི་ཞིང་ཁར་ལས་བྱེད་པའི་ཕྱིར་དུ་དེར་བཞག་གོ

¹³ བྷེ་བྷི་ལོན་པ་ཚོས་ལིའི་ཀ་བ་དང་མཆོད་ཁང་ནང་དུ་ཡོད་པའི་ཤིང་རྟ་འཁོར་ལོ་དང་ལིའིི་ཆུ་མཛོད་ཆེན་པོ་དང་བཅས་པ་དུམ་བུར་བཅག་ནས་ལི་ཚང་མ་བྷེ་བྷི་ལོན་དུ་འཁྱེར་རོ།

¹⁴ དེ་ཚོས་ཁང་ཁྱིམ་དང་མཆོད་ཁྲི་བཟོ་སྐབས་བེད་སྤྱོད་བྱེད་པའི་སྣོད་དང་མཆོད་མེའི་ཡོ་བྱད་དང་། དམར་མཆོད་ཀྱི་ཁྲག་ལེན་པའི་དཀར་ཡོལ་དང་སྤོས་སྤོར་བའི་སྤོས་གཞོང་དང་མཆོད་ཁང་དུ་བེད་སྤྱོད་བྱེད་པའི་ལིའིི་དངོས་པོ་ཚང་མ་འཁྱེར་རོ།

¹⁵ དེ་ཚོས་གསེར་དངུལ་ལས་བཟོས་པའི་དངོས་པོ་ཚང་མ་དང་མེའི་སོལ་ལ་ལེན་པའི་སྣོད་དང་། སླ་དང་བཅས་པ་ཡང་འཁྱེར་རོ།

¹⁶ སོ་ལོ་མོན་གྱི་མཆོད་ཁང་གི་ཆེད་དུ་བཟོས་པའི་ལིའི་ཀ་བ་གཉིས་དང་ཤིང་རྟ་འཁོར་ལོ་རྣམས་དང་ཆུ་མཛོད་ཆེན་པོ་དང་བཅས་ཡར་འདེགས་མ་ཐུབ་པ་ཧ་ཅང་ལྗིད་པོ་ཞིག་ཡོད་དོ།

¹⁷ ཀ་བ་གཉིས་པོ་དེ་འདྲ་མཚུངས་ཡོད་པ་དང་། དེ་ཚོ་རེ་རེར་མི་ཀྲར་བརྒྱད་ཀྱི་མཐོ་ཚད་ཡོད་པ་དང་མི་ཀྲར་གཅིག་དང་གྲངས་ཆ་གསུམ་གྱི་མཐོ་ཚད་ཡོད་པའི་ལིའི་ཀ་གཞུའི་སྟེང་དུ་ཡོད། ཀ་གཞུ་རེ་རེའི་མཐའ་འཁོར་དུ་ལིའི་སེ་འབྲུ་རྣམས་ཀྱི་བརྒྱན་པའི་ལིའི་བྲ་བ་ཡོད་དོ༎

ཡ་ཧུ་དཱ་པའི་མི་མང་རྣམས་བྷེ་བྷི་ལོ་ནི་ཡ་དུ་འཁྲིད་པ།

¹⁸ དེ་ནས་དམག་སྤྱི་ནེ་བུ་ཛ་ར་དྷན་གྱིས་བླ་མ་ཆེན་པོར་སེ་ར་ཡཱ་དང་དེའི་འོག་གི་བླ་མ་ཛེ་ཕན་ཡཱ་དང་གཞན་མཆོད་ཁང་གི་ལས་བྱེད་པ་གཙོ་ཆེ་གསུམ་བཅས་འཁྲིད་དོ།

¹⁹ ཁོང་གིས་གྲོང་ཁྱེར་ནས་དམག་དཔོན་བྱེད་མྱོང་བའི་དམག་སྤྱི་ཞིག་དང་། ད་བར་གྲོང་ཁྱེར་དུ་གནས་ཡོད་པའི་རྒྱལ་པོའི་གྲོས་སྟོན་པ་ལྔ་དང་། དམག་མིའི་ཡིག་ཆའི་འགོ་འཛིན་ཡིན་པ་དམག་སྤྱིའི་ལས་རོགས་དང་། གཞན་མི་གཙོ་ཆེ་དྲུག་བཅུ་ཐམ་པ་བཅས་འཁྲིད་དོ།

²⁰ བྷེ་བྷི་ལོ་ནི་ཡ་གྱི་རྒྱལ་པོ་རིབ་ལཱའི་གྲོང་ཁྱེར་དུ་བཞུགས་སྐབས་ནེ་བུ་ཛ་ར་དྷན་གྱིས་དེ་ཚོར་རྒྱལ་པོའི་དྲུང་དུ་འཁྲིད་དོ།

²¹ ཧ་མདའི་མངའ་ཁུལ་གྱི་རིབ་ལཱ་དེ་རང་ལ་རྒྱལ་པོས་དེ་ཚོ་ལ་ཉེས་བརྡུང་བཏང་ནས་བསད་དོ། དེར་བརྟེན་ཡ་ཧུ་དཱ་པའི་མི་མང་རྣམས་རང་ཡུལ་ནས་བཙོན་དུ་འཁྲིད་དོ།

ཡ་ཧུ་དཱ་པའི་སྲིད་སྐྱོངས་པ་གྷེ་དལ་ཡཱ།

²² བྷེ་བྷི་ལོ་ནི་ཡ་གྱི་རྒྱལ་པོ་ནེ་བུ་ཀད་ནེ་ཛར་གྱིས་ཨ་ཧི་ཀམ་གྱི་བུ་ཤ་ཕན་གྱི་ཚ་བོ་ཡིན་པ་གྷེ་དལ་ཡཱ་ལ། ཡ་ཧུ་དཱ་པའི་སྲིད་སྐྱོངས་སུ་བསྐོ་གཞག་གིས་བྷེ་བྷི་ལོ་ནི་ཡ་དུ་མ་འཁྲིད་པ་ཚོའི་འགོ་འཛིན་དུ་བཞག་གོ

²³ མགོ་བཏགས་མ་ཞུས་པའི་ཡ་ཧུ་དཱའི་དཔོན་རིགས་རྣམས་དང་དམག་མི་ཚོས་མི་དེའི་སྐོར་ཐོས་ནས། མིཛ་པཱ་རུ་གྷེ་དལ་ཡཱའི་གི་ཕྱོགས་སུ་ཡོང་ངོ་། དཔོན་རིགས་དེ་ཚོ་ནི་ནེ་ཐན་ཡཱའི་བུ་ཨིཤ་མ་ཨེལ་དང་། ཀ་རི་ཨའི་བུ་ཡོ་ཧ་ནན་དང་། ནེ་ཏོ་ཕཱ་གྲོང་ཁྱེར་གྱི་ཏན་ཧུ་མེད་ཀྱི་བུ་སེ་ར་ཡཱ་དང་། མ་ཀཱ་ནས་ཡེ་ཛ་ནི་ཡཱ་བཅས་ཡོད་དོ།

²⁴ དེ་ནས་གྷེ་དལ་ཡཱས་དེ་ཚོ་ལ། ཁྱོད་ཚོ་བྷེ་བྷི་ལོན་པའི་ལས་བྱེད་པ་ཚོར་འཇིགས་མི་དགོས་པ་ངས་ཁས་ལེན་བྱེད་རྒྱུ་ཡིན། ཡུལ་འདིར་གནས་སྡོད་བྱས་ནས་བྷེ་བྷི་ལོ་ནི་ཡ་གྱི་རྒྱལ་པོའི་ཞབས་ཕྱི་ཞུས་ཤིག་ཁྱོད་ཚོར་སྐྱོན་གང་ཡང་མི་ཡོང་ཞེས་སྨྲས་སོ།

²⁵ འོན་ཀྱང་ལོ་དེའི་ཟླ་བ་བདུན་པར་ནེ་ཐན་ཡཱའི་བུ་ཨེ་ལི་ཤ་མའི་ཚ་བོ་རྒྱལ་པོའི་ཁྱིམ་ཚང་གི་ནང་མི་ཨིཤ་མ་ཨེལ་མིཛ་པཱ་རུ་མི་བཅུ་དང་མཉམ་དུ་ཕྱིན་ནས་གྷེ་དལ་ཡཱ་ལ་འཐབ་རྒོལ་བྱས་ནས་ཁོང་ལ་བསད་དོ། ཁོས་དེར་ཁོང་དང་མཉམ་དུ་ཡོད་པའི་ཨིསི་རཱཨེལ་པ་དང་བྷེ་བྷི་ལོན་པའི་མི་རྣམས་ཀྱང་བསད་དོ།

²⁶ དེ་ནས་ཨིསི་རཱཨེལ་པ་ཚང་མ་དབུལ་ཕྱུག་མེད་པ་དམག་མིའི་དཔོན་རིགས་ཚོ་དང་མཉམ་དུ་ཐོན་ནས་ཨི་ཇིབ་ཏུ་སོང་ངོ། གང་ལགས་ཟེར་ན། དེ་ཚོ་བྷེ་བྷི་ལོན་པ་ཚོར་འཇིགས་ཀྱི་ཡོད་དོ༎

ཡེ་ཧོ་ཡ་ཀིན་བཙོན་ནས་གློད་བཀྲོལ་བཏང་བ།

²⁷ ཨེ་ཝིལ་མེ་རོ་དག་བྷེ་བྷི་ལོ་ནི་ཡའི་རྒྱལ་པོར་འགྱུར་བའི་ལོ་དེ་ལ། ཁོང་གིས་ཡ་ཧུ་དཱ་པའི་རྒྱལ་པོ་ཡེ་ཧོ་ཡ་ཀིན་ལ་སྙིང་རྗེ་བྱས་ནས། ཁོང་བཙོན་དུ་བཅུག་པའི་ལོ་ངོ་གསུམ་ཅུ་སོ་བདུན་པའི་ཟླ་བ་བཅུ་གཉིས་པའི་ཚེས་གཉིས་ཤུ་ཅ་བདུན་ཉིན་ཁོང་ལ་བཙོན་ནས་ཕྱིར་བཏོན་པ་ཡིན་ནོ།

²⁸ ཨེ་ཝིལ་མེ་རོ་དག་གིས་ཁོང་ལ་རྒྱུད་འཇམ་པོ་གནང་བ་དང། ཁོང་མཉམ་དུ་བྷེ་བྷི་ལོ་ནི་ཡ་དུ་བཙོན་དུ་ཡོད་པའི་རྒྱལ་པོ་གཞན་ལས་ཀྱང་ཁོང་ལ་གོ་གནས་ཆེ་བ་གནང་ཡོད་དོ།

²⁹ དེར་བརྟེན་ཡེ་ཧོ་ཡ་ཀིན་གྱིས་བཙོན་པའི་ན་བཟའ་བརྗེ་པོ་རྒྱབ་ནས་ཁོང་གི་སྐུ་ཚེའི་རིང་རྒྱལ་པོའི་གསོལ་ལྕོག་སྟེང་ནས་གསོལ་ཚིག་བཞེས་བཅུག་གོ

³⁰ ཁོང་གི་སྐུ་ཚེའི་རིང་ཉིན་རེ་བཞིན་ཁོང་གི་ཐུགས་མཁོ་རྣམས་ཀྱི་ཆེད་ཕོགས་སྣོན་ཆད་མེད་ཐོབ་ཀྱི་ཡོད་དོ༎