རྒྱལ་རབས་གཉིས་པ། 2 - Tibetan Old Testament 2011

ཨེ་ལི་ཡཱ་ལ་མཐོ་རིས་སུ་འཁྲིད་པ།

¹ གཙོ་བོ་དཀོན་མཆོག་གིས་ཨེ་ལི་ཡཱ་རླུང་འཚུབ་བརྒྱུད་ནས་མཐོ་རིས་སུ་འདྲེན་པའི་དུས་ལ་སླེབས་ཡོད་པས། ཨེ་ལི་ཡཱ་དང་ཨེ་ལི་ཤ་གཉིས་གྷིལ་གཱལ་ནས་ཐོན་ནོ།

² ལམ་དུ་ཨེ་ལི་ཡཱས་ཨེ་ལི་ཤ་ལ་ཁྱོད་འདིར་སྡོད་ཅིག གཙོ་བོ་དཀོན་མཆོག་གིས་ང་བྷེ་ཐེལ་དུ་འགྲོ་དགོས་པའི་བཀའ་གནང་བྱུང་གསུངས་བས། ལན་དུ་ཨེ་ལི་ཤས། ངས་གསོན་པོའི་གཙོ་བོ་དཀོན་མཆོག་དང་ཁྱེད་ཀྱི་ཚེ་སྲོག་དཔང་པོ་བཙུགས་ནས་ངས་ཁྱེད་ལ་སྤངས་རྒྱུ་མིན་ཞེས་སྨྲ་བཞིན་ཡོད། དེའི་རྐྱེན་གྱིས་ཁོང་གཉིས་བྷེ་ཐེལ་བར་དུ་ཕེབས་སོ།

³ དེར་གནས་པའི་ལུང་སྟོན་པ་ཚོ་ཞིག་ཨེ་ལི་ཤའི་སར་ཕེབས་ནས་ཁོང་ལ། དེ་རིང་གཙོ་བོ་དཀོན་མཆོག་ཁྱེད་ཀྱི་བློ་དཔོན་ལ་ཁྱེད་ཀྱི་ས་ནས་འཁྲིད་གནང་རྒྱུ་ཡིན་པ་དེ་ཤེས་ཀྱི་ཡོད་དམ་ཅེས་དྲི་བ་འདྲིས་པས། ཨེ་ལི་ཤས་ངས་ཤེས་ཀྱི་ཡོད། འོན་ཀྱང་ང་ཚོ་དེའི་སྐོར་གཏམ་མི་གཤོད་ཞེས་གསུངས་སོ།

⁴ དེ་ནས་ཨེ་ལི་ཡཱས་ཨེ་ལི་ཤ་ལ་ད་ཁྱོད་འདིར་སྡོད་ཅིག གཙོ་བོ་དཀོན་མཆོག་གིས་ང་ལ་ཡེ་རི་ཀོ་རུ་འགྲོ་དགོས་པའི་བཀའ་གནང་བྱུང་གསུངས་སོ། འོན་ཀྱང་ཨེ་ལི་ཤས་ངས་གསོན་པོའི་གཙོ་བོ་དཀོན་མཆོག་དང་ཁྱེད་ཀྱི་ཚེ་སྲོག་དཔང་པོ་བཙུགས་ནས་ངས་ཁྱེད་ལ་སྤངས་རྒྱུ་མིན་ཞེས་སྨྲ་བཞིན་ཡོད། དེའི་རྐྱེན་གྱི་ཁོང་གཉིས་ཡེ་རི་ཀོ་རུ་ཕེབས་སོ།

⁵ དེར་གནས་པའི་ལུང་སྟོན་པ་ཚོ་ཞིག་ཨེ་ལི་ཤའི་སར་ཕེབས་ནས་ཁོང་ལ། དེ་རིང་གཙོ་བོ་དཀོན་མཆོག་ཁྱེད་ཀྱི་བློ་དཔོན་ལ་ཁྱེད་ཀྱི་ས་ནས་འཁྲིད་གནང་རྒྱུ་ཡིན་པ་དེ་ཤེས་ཀྱི་ཡོད་དམ་ཅེས་དྲི་བ་དྲིས་པས། ཨེ་ལི་ཤས་ངས་ཤེས་ཀྱི་ཡོད། འོན་ཀྱང་ང་ཚོ་དེའི་སྐོར་གཏམ་མི་གཤོད་ཞེས་གསུངས་སོ།

⁶ དེ་ནས་ཨེ་ལི་ཡཱས་ཨེ་ལི་ཤ་ལ་ཁྱོད་འདིར་སྡོད་ཅིག གཙོ་བོ་དཀོན་མཆོག་གིས་ང་ལ་ཆུ་བོ་ཡོར་དན་དུ་འགྲོ་དགོས་པའི་བཀའ་གནང་བྱུང་གསུངས་སོ། ལན་དུ་ཨེ་ལི་ཤས། ངས་གསོན་པོའི་གཙོ་བོ་དཀོན་མཆོག་དང་ཁྱེད་ཀྱི་ཚེ་སྲོག་དཔང་པོ་བཙུགས་ནས་ངས་ཁྱེད་ལ་སྤངས་རྒྱུ་མིན་ཞེས་སྨྲ་བཞིན་ཡོད། དེའི་རྐྱེན་གྱི་ཁོང་གཉིས་ཕེབས་སོ།

⁷ ལུང་སྟོན་པ་ལྔ་བཅུ་ཐམ་པ་ཡང་ཁོང་ཚོའི་རྗེས་སུ་ཡོར་དན་དུ་ཕྱིན་ནོ། ཨེ་ལི་ཡཱ་དང་ཨ་ལི་ཤ་ཆུ་བོའི་འགྲམ་དུ་ལངས་སོ། ལུང་སྟོན་པ་ལྔ་བཅུ་ པོ་རྣམས་ཁོང་གཉིས་ནས་ཕར་ཙམ་ལངས་སོོ།

⁸ དེ་ནས་ཨེ་ལི་ཡཱས་རང་གི་གོས་ཕུད་ནས་བལྟབ་རྩིས་རྒྱབ་ནས་ཆུ་ལ་ཞུས་པས་ཆུ་དེ་ཁག་གཉིས་སུ་གྱེས་པ་དང་ཁོང་དང་ཨེ་ལི་ཤ་གཉིས་ས་སྐམ་ས་ནས་ཕ་རོལ་དུ་རྒལ་ལོ།

⁹ དེར་ཨེ་ལི་ཡཱས་ཨེ་ལི་ཤ་ལ་ང་ཁྱོད་ཀྱི་ས་ནས་འཁྲིད་པའི་སྔོན་ལ་ངས་ཁྱོད་ལ་ཅི་བྱེད་དགོས་སམ་གསུངས་པས། དེའི་ལན་དུ་ཨེ་ལི་ཤས་ཁྱེད་ཀྱི་ཤུལ་འཛིན་དུ་འགྱུར་བར་ཁྱེད་ཀྱི་མཐུ་སྟོབས་ཀྱི་ཆ་ཤས་ང་ལ་ཐོབ་པར་གནང་བར་མཛོད་ཞེས་ཞུསོ།

¹⁰ ཨེ་ལི་ཡཱས། ཁྱོད་ཀྱི་ཞུ་བ་དེ་སྤྲོད་དཀའ་བ་ཞིག་ཡིན་ན་ཡང་། ཁྱོད་ཀྱིས་ང་ཁྱོད་ཀྱིས་ས་ནས་འཁྲིད་པ་མཐོང་བ་ཡིན་ན་ཁྱོད་ལ་དེ་ཐོབ་བོ། ཁྱོད་ཀྱིས་ང་མ་མཐོང་བ་ཡིན་ན་ཁྱོད་ལ་དེ་མི་ཐོབ་ཅེས་ལན་གནང་ངོ་།

¹¹ དེ་ནས་ཁོང་ཚོ་ལམ་ལ་བཀའ་མོལ་གནང་བཞིན་ཕེབས་པས། གློ་བུར་དུ་མེའི་ཤིང་རྟ་འཁོར་ལོ་མེའི་རྟས་འདྲེན་པ་ཞིག་ཁོ་ཚོའི་དབར་སླེབས་པ་དང་ཨེ་ལི་ཡཱ་རླུང་འཚུབ་བརྒྱུད་ནས་མཐོ་རིས་སུ་འདྲེན་ནོ།

¹² ཨེ་ལི་ཤས་དེ་མཐོང་བས་ཨེ་ལི་ཡཱ་ལ། ངའི་ཡབ། ངའི་ཡབ། ཨིསི་རཱཨེལ་གྱི་ཀུན་དབང་ཅན་གྱི་སྲུང་སྐྱོབ་བྱེད་མཁན། ཁྱེད་ཕེབས་ཚར་སོང་ཞེས་སྐད་རྒྱབ་བོ། དེ་ནས་ཁོས་ཨེ་ལི་ཡཱར་ཡང་སྐྱར་མ་མཇལ་ལོ། ཨེ་ལི་ཤས་མྱ་ངན་གྱི་ཐོག་རང་གི་གོས་དུམ་བུ་གཉིས་སུ་ཧྲལ་ནས།

¹³ ཁོས་ཨེ་ལི་ཡཱའི་མར་ཟག་པའི་གོས་དེ་ཡར་སྒྲུག་ནས་ཕྱིར་ལོག་པ་དང་ཡོར་དན་ཆུ་འགྲམ་དུ་ལངས་སོ།

¹⁴ ཁོས་ཨེ་ལི་ཡཱའི་གོས་དེ་ཆུ་ལ་ཞུས་ནས་ཨེ་ལི་ཡཱའི་དཀོན་མཆོག་གཙོ་བོ་དཀོན་མཆོག་གང་དུ་ཡོད་དམ་ཞེས་སྨྲས་སོ། དེ་ནས་ཡང་སྐྱར་ཆུ་ལ་ཞུས་པས་དེ་ཁག་གཉིས་སུ་གྱེས་པ་དང་ཁོ་ཆུའི་ཕ་རོལ་དུ་ཐོན་ནོ།

¹⁵ ཡེ་རི་ཀོའི་ལུང་སྟོན་པ་ལྔ་བཅུས་ཁོང་མཐོང་ནས་ཨེ་ལི་ཡཱའི་མཐུ་སྟོབས་དེ་ཨེ་ལི་ཤ་ལ་འདུག་ཅེས་སྨྲས་ནས། དེ་ཚོ་ཁོང་མཇལ་བར་ཡོང་ནས་ཁོང་གི་མདུན་དུ་ཕྱག་འཚལ་ལོ།

¹⁶ འདིར་ང་ཚོ་མི་ལྔ་བཅུ་ཡོད་པ་ཚང་མ་མི་ཤུགས་ཆེན་པོ་ཤ་ལྟག་ཡིན། ང་ཆོ་ཁྱེད་ཀྱི་ཇོ་བོ་འཚོལ་བར་འགྲོའོ། ཕལ་ཆེར་གཙོ་བོ་དཀོན་མཆོག་གི་ཐུགས་ཉིད་ཀྱིས་ཁོང་འཁྲིད་ནས་རི་བོ་འམ་ལུང་གཤོང་ཁག་ཏུ་བཞག་གནང་ཡོད་སྲིད་ཀྱི་རེད་ཅེས་ཞུས་པས། ལན་དུ་ཨེ་ལི་ཤས། ཁྱོད་ཚོ་སུའང་འགྲོ་མི་རུང་གསུངས་སོ།

¹⁷ འོན་ཀྱང་དེ་ཚོས་ཁོང་གི་ཞལ་བཞེས་མ་གནང་བར་དུ་འགྲོ་བཅུག་པར་ནན་བསྐུལ་ཞུས་པ་དང་། དེ་ཚོ་ལྔ་བཅུ་ཉིན་གསུམ་གི་རིང་ས་གནས་གང་སར་ཨེ་ལི་ཡཱ་བཙལ་ཡང་ཁོང་མ་རྙེད་དོ།

¹⁸ དེ་ནས་དེ་ཚོ་ཨེ་ལི་ཤ་ཡེ་རི་ཀོ་རུ་སྒུག་བཞུགས་ཡོད་པའི་སར་ཕྱིར་ལོག་པ་དང་། ཁོང་གིས་དེ་ཚོ་ལ་ངས་ཁྱོད་ཚོར་མ་འགྲོ་ཅེས་ལབ་མ་བྱུང་ངམ་གསུངས་སོ༎

ཨེ་ལི་ཤའི་ཡ་མཚན་གྱི་མཛད་པ།

¹⁹ ཡེ་རི་ཀོ་ནས་མི་འགའ་ཤས་ཨེ་ལི་ཤའི་སར་སོང་ནས། ཇོ་བོ་ལགས་ཁྱེད་ཀྱིས་མཁྱེན་གསལ་ལྟར་གྲོང་ཁྱེར་འདི་ལེགས་པོ་ཡོད་རུང་ཆུ་ངན་པས་རྐྱེན་གྱིས་མའི་མངལ་ནས་ཕྲུ་གུ་ཤོར་བའི་ནད་ཞིག་ཡོད་ཅེས་ཞུས་སོ།

²⁰ དེ་ནས་ཁོང་གིས་ཚ་ཕྲན་བུའི་ཞིག་དཀར་ཡོལ་གསར་པ་ཞིག་གི་ནང་དུ་བླུག་ནས་འཁྱེར་ཤོག་ཅེས་བཀའ་གནང་བས། དེ་ཚོས་དེ་ཁོང་གི་དྲུང་དུ་འཁྱེར་ཡོང་ངོ་།

²¹ ཁོང་གིས་རྒྱུགས་ཆུ་ཞིག་གི་སར་ཕེབས་ནས་ཆུ་དེ་ལ་ཚ་གཏོར་ནས་གཙོ་བོ་དཀོན་མཆོག་གིས་བཀའ་གནང་བ་ནི། ངས་ཆུ་འདི་གཙང་མ་བཟོས་པ་ཡིན་པ་དང་། ད་ནས་ཕྱིན་ཆད་འཆི་བའམ་མའི་མངལ་ནས་ཕྲུ་གུ་ཤོར་བའི་ནད་མི་འབྱུང་ངོ་ཞེས་གསུངས་སོ།

²² ཨེ་ལི་ཤས་བཀའ་གནང་བ་ལྟར་དེ་ནས་བཟུང་ཆུ་དེ་གཙང་མར་གནས་སོ།

²³ ཨེ་ལི་ཤའི་ཡེ་རི་ཀོ་ནས་བྷེ་ཐེལ་དུ་ཕེབས་པའི་ཕྱིར་ཐོན་པ་དང་ལམ་དུ་བུ་ཕྲག་འགའ་ཤས་གྲོང་ཁྱེར་ནས་ཐོན་ཡོང་ནས་ཁོང་ལ་སྙད་བསྐོས་ནས་མགོ་རིལ་ཕར་སོང་ཞིག་ཅེས་སྐད་འབོད་བྱས་སོ།

²⁴ ཨེ་ལི་ཤས་ཞལ་བསྒྱུར་ནས་དེ་ཚོ་ལ་སྤྱན་ལོག་གཟིགས་ནས་གཙོ་བོ་དཀོན་མཆོག་གི་མཚན་ནས་དེ་ཚོ་ལ་དམོད་པ་གནང་བས། ཤིང་ནགས་ནས་དོམ་མོ་གཉིས་ཡོང་ནས་བུ་ཕྲུག་ བཞི་ཅུ་ཞེ་གཉིས་ལ་སྦར་བྲད་བརྒྱབ་ནས་དུམ་བུར་བཟོས་སོ།

²⁵ ཨེ་ལི་ཤ་རི་བོ་ཀར་མེལ་དུ་ཕེབས་ནས་རྗེས་སུ་ས་མར་ཡ་རུ་ཕྱིར་ལོག་ཕེབས་སོ༎