རྒྱལ་རབས་གཉིས་པ། 11 - Tibetan Old Testament 2011

ཡ་ཧུ་དཱའི་བཙུན་མོ་ཨ་ཐལ་ཡཱ།

¹ རྒྱལ་པོ་ཨ་ཧ་ཛ་ཡཱའི་ཡུམ་ཨ་ཐལ་ཡཱས་རང་གི་སྲས་གྲོངས་པའི་སྐོར་མཁྱེན་མ་ཐག་ཏུ་ཁོང་གིསརྒྱལ་པོའི་ནང་མི་རྣམས་གསོད་དགོས་པའི་བཀའ་གནང་ངོ་།

² ཨ་ཧ་ཛ་ཡཱའི་སྲས་ཡོ་ཨཱཤེ་སྐུ་རྐྱང་བྲོས་ཐར་རོ། ཁོང་གཞན་ཚོ་དང་མཉམ་དུ་གསོད་གྲབ་ཡོད་ན་ཡང་ཁོང་གི་ཨ་ནི་རྒྱལ་པོ་ཡེ་ཧོ་རམ་གྱི་སྲས་མོ་དང་ཨ་ཧ་ཛ་ཡཱའི་ཕ་གཅིག་པའི་སྲིང་མོ་ཡེ་ཧོ་ཤེ་བྷས་སྐྱོབས་སོ། མོས་ཁོང་དང་ཁོང་གིས་མ་མ་མཉམ་དུ་འཁྲིད་ནས་མཆོད་ཁང་གི་ཉལ་ཁང་ཞིག་གི་ནང་ཨ་ཐལ་ཡཱ་ནས་སྦས་པས། དེ་ལྟར་ཁོང་བསད་མེད་དོ།

³ ལོ་དྲུག་རིང་ཡེ་ཧོ་ཤེ་བྷས་སྲས་དེ་མཆོད་ཁང་གི་ཉལ་ཁང་ནང་དུ་སྦས་བཞག་ཡོད་པ་དང་། སྐབས་དེར་ཨ་ཐལ་ཡཱས་རྒྱལ་མོའི་ཚུལ་དུ་རྒྱལ་སྲིད་བསྐྱངས་སོ།

⁴ འོན་ཀྱང་ལོ་བདུན་པར་བླ་མ་ཡེ་ཧོ་ཡ་དྷས་ཕོ་བྲང་གི་རྒྱལ་པོའི་སྐུ་སྲུང་པ་དང་ཕོ་བྲང་གི་སྐུ་སྲུང་པའི་དོ་དམ་པ་ཚོར་མཆོད་ཁང་དུ་ཡོང་དགོས་པའི་ལོན་བཏང་བ་དང་། དེར་ཁོང་གིས་མཛད་འཆར་ཇི་ཡོད་ཁོ་ཚོས་མི་བཏང་ནས་མནའ་བསྐྱེལ་བཅུག་གོ ཁོང་གིས་ཁོ་ཚོར་རྒྱལ་པོ་ཨ་ཧ་ཛ་ཡཱའི་བུ་ཡོ་ཨཱཤེ་བསྟན་པ་དང་།

⁵ ཁོང་ཚོར་གཤམ་གསལ་ལྟར་བཀའ་གནང་བ། ཁྱོད་ཚོ་ངལ་གསོ་བའི་ཞག་ང་ལས་འགན་བྱེད་པར་ཡོང་སྐབས་ཁྱོད་ཆོ་གསུམ་ཆ་གཅིག་གིས་ཕོ་བྲང་སྲུང་དགོས་སོ།

⁶ གསུམ་ཆ་གཞན་དེས་སུར་གྱི་རྒྱལ་སྒོ་དེ་སྲུང་དགོས་པ་དང་གཞན་སུམ་ཆ་དེས་སྐུ་སྲུང་པ་ཚོའི་རྒྱབ་ཀྱི་རྒྱལ་སྒོར་ལངས་ནས་སྲུང་དགོས་སོ།

⁷ ངལ་གསོ་བའི་ཞག་ལ་ལས་འགན་ཚར་ནས་འགྲོ་མཁན་ཚོ་གཉིས་པོའི་འགོ་འཛིན་ཚོས་རྒྱལ་པོར་སྲུང་སྐྱོབས་བྱེད་པའི་ཆེད་དུ་མཆོད་ཁང་དུ་སྲུང་དགོས་སོ།

⁸ ཁྱོད་ཚོས་རལ་གྲི་སྟོན་ནས་རྒྱལ་པོ་ཡོ་ཨཱཤེ་ལ་སྲུང་དགོས་པ་དང་ཁོང་གང་དུ་ཕེབས་ཡང་དེར་ཁོང་མཉམ་དུ་འགྲོ་དགོས་སོ། ཁྱོད་ཚོའི་ཉེ་འགྲམ་དུ་སུ་ཞིག་སླེབས་ན་ཡང་གསོད་དགོས་ཅེས་སྨྲས་སོ།

⁹ འགོ་འཛིན་ཚོས་ཡེ་ཧོ་ཡ་དྷའི་སློབ་སྟོན་ལ་ཉན་ནས་ངལ་གསོ་བའི་ཞག་ལ་ལས་འགན་སྐོས་ཡོད་པའི་མི་ཚང་མ་ཁོང་གི་སར་འཁྲིད་ཡོང་ནས།

¹⁰ ཁོང་གིས་འགོ་འཛིན་ཚོར་རྒྱལ་པོ་དཱ་བིད་ཀྱི་མདུང་དང་ཁྲབ་སོགས་མཆོད་ཁང་དུ་བཞག་ཡོད་པ་དེ་སྤྲད་པ་དང་།

¹¹ མི་རྣམས་རལ་གྲི་སྟོན་ནས་ཡོད་པའི་མི་ཚོས་རྒྱལ་པོར་སྲུང་སྐྱོབས་བྱེད་པའི་ཕྱིར་མཆོད་ཁང་མདུན་གྱི་མཐའ་འཁོར་ལ་བཞག་གོ

¹² དེ་ནས་ཡེ་ཧོ་ཡ་དྷས་ཡོ་ཨཱཤེ་ལ་ཕྱིར་བཏོན་ནས། ཁོང་གི་དབུ་ལ་ཅོད་པན་སྒྲོན་པ་དང་ཁོང་ལ་སྲིད་སྐྱོངས་ཀྱི་ཁྲིམས་ཡིག་འདྲ་བཤུས་ཤིག་གནང་ངོ་། དེ་ནས་ཡོ་ཨཱཤེ་ལ་བསྔོ་འབུལ་བྱས་ནས་རྒྱལ་པོར་གསལ་གྲགས་གནང་ངོ་། དེ་ནས་མི་མང་ཚོས་རང་གི་ལག་པ་བརྡབས་ཏེ། རྒྱལ་པོ་སྐུ་ཚེ་ཡུན་རིང་གནས་པར་ཤོག་ཅེས་སྐད་འབོད་བྱས་སོ།

¹³ རྒྱལ་མོ་ཨ་ཐལ་ཡཱས་སྐུ་སྲུང་བ་དང་མི་མང་གི་སྒྲ་ཐོས་པ་དང་མགྱོགས་པོར་མི་ཚོགས་འཛོམས་ཡོད་པའི་མཆོད་ཁང་དུ་ཡོངས་ནས།

¹⁴ དེར་ལུགས་སྲོལ་ལྟར་རྒྱལ་པོ་གསར་པ་མཆོད་ཁང་གི་འཛུལ་སྒོའི་ཀ་བའི་འགྲམ་དུ་བཞེངས་ཡོད་པ་མོས་མཐོང་ངོ་། ཁོང་ལ་འགོ་འཛིན་ཚོ་དང་དུང་འབུད་མཁན་ཚོས་མཐའ་བསྐོར་ནས་ཡོད་པ་དང་། མི་མང་ཚོས་དགའ་སྤྲོའི་ངང་སྐད་འབོད་བྱེད་པ་དང་དུང་འབུད་བཞིང་ཡོད་པས། ཨ་ཐལ་ཡཱས་མྱ་ངན་གྱིས་རང་གི་གོས་ཧྲལ་ཞིང་། འདི་བསླུ་འཁྲིད་རེད་ཅེས་སྐད་རྒྱབ་བོ།

¹⁵ ཡེ་ཧོ་ཡ་དྷས་མཆོད་ཁང་གི་མངའ་ཁུལ་དུ་ཨ་ཐལ་ཡཱ་ལ་གསོད་འདོད་མེད་པས། དམག་མིའི་འགོ་འཛིན་ཚོར་མོ་ལ་སྐུ་སྲུང་པ་ཚོའི་གྲལ་གྱི་དབར་ཕྱིར་འཁྲིད་ནས་མོ་ལ་སྐྱོབས་པར་ཡོང་མཁན་སུ་ཡིན་རུང་གསོད་ཅིག་ཅེས་བཀའ་གནང་བས།

¹⁶ དེ་ཚོས་མོ་བཟུང་ནས་ཕོ་བྲང་དུ་འཁྲིད་པ་དང་དེར་མོ་ལ་རྟའི་རྒྱལ་སྒོར་བསད་དོ༎

ཡེ་ཧོ་ཡ་དྷས་བསྒྱུར་བཅོས།

¹⁷ བླ་མ་ཡེ་ཧོ་ཡ་དྷས། རྒྱལ་པོ་ཡོ་ཨཱཤེ་དང་མི་མང་རྣམས་གཙོ་བོ་དཀོན་མཆོག་གི་མི་མང་དུ་འགྱུར་བའི་ཕྱིར་གཙོ་བོ་དཀོན་མཆོག་དང་མཉམ་དུ་དམ་བཅའ་ཞིག་བཞག་བཅུག་པ་དང་། ཁོང་གིས་རྒྱལ་པོ་དང་མི་མང་གི་དབར་ལ་དམ་བཅའ་ཞིག་བཟོས་སོ།

¹⁸ དེ་ནས་མི་ཚོ་བྷལ་གྱི་ལྷ་ཁང་དུ་སོང་ནས་ལྷ་ཁང་དེ་རློགས་པ་དང་། དེ་ཚོས་མཆོད་ཁྲི་དང་འདྲ་སྐུ་རྣམས་བཤིག་ཏེ་མཆོད་ཁྲིའི་མདུན་དུ་བྷལ་གྱི་བླ་མ་མཏ་ཏན་ཡང་བསད་དོ། ཡེ་ཧོ་ཡ་དྷས་མཆོད་ཁང་དུ་སྐུ་སྲུང་བ་བཞག་གོ

¹⁹ དེ་ནས་ཁོང་དང་འགོ་འཛིན་ཚོ་དང་རྒྱལ་པོའི་སྐུ་སྲུང་བ་དང་ཕོ་བྲང་གི་སྐུ་སྲུང་པ་བཅས་ནས་རྒྱལ་པོ་ལ་མཆོད་ཁང་ནས་ཕོ་བྲང་དུ་གདན་འདྲེན་ཞུས་པ་དང་མི་མང་ཚང་མས་ཁོང་གི་རྗེ་སུ་འབྲངས་སོ། ཡོ་ཨཱཤེེ་སྐུ་སྲུང་པའི་རྒྱལ་སྒོའི་ནང་འཛུལ་ནས་བཞུགས་ཁྲིའི་སྟེང་དུ་བཞུགས་སོ།

²⁰ མི་མང་ཚང་མས་དགའ་མགུས་ཡིད་རངས་སོ། གྲོང་ཁྱེར་དེ་ཞི་བདེའི་ནང་གནས་ཡོད། གང་ལགས་ཟེར་ན། དེ་དུས་ཨ་ཐལ་ཡཱ་ལ་རྒྱལ་པོའི་ཕོ་བྲང་ནང་བསད་ཟིན་ཡོད།

²¹ ཡོ་ཨཱཤེ་ལོ་བདུན་ལོན་སྐབས་ཡ་ཧུ་དཱའི་རྒྱལ་པོར་འགྱུར་རོ༎