རྒྱལ་རབས་གཉིས་པ། 10 - Tibetan Old Testament 2011

ཨ་ཧབ་ཀྱི་རིགས་བརྒྱུད་རྣམས་བསད་པ།

¹ ས་མར་ཡའི་གྲོང་ཁྱེར་དུ་ཨ་ཧབ་ཀྱི་རིགས་བརྒྱུད་མི་གྲངས་བདུན་ཅུ་གནས་སྡོད་བྱེད་བཞིན་ཡོད་དོ། ཡེ་ཧུས་ཡི་གེ་ཞིག་བྲིས་པ་དང་དེའི་འདྲ་བཤུས་རྣམས་གྲོང་ཁྱེར་གྱི་སྲིད་སྐྱོང་པ་རྣམས་དང་ཡུལ་མི་གཙོ་དྲག་རྣམས་དང་ཨ་ཧབ་རིགས་བརྒྱུད་ཀྱི་ལྟ་སྐྱོང་བྱེད་མཁན་ཚོ་ལ་བཏང་ངོ། ཡི་གེ་དེའི་ནང་གསལ་འདི་ལྟར་བཀོད་ཡོད་དོ།

² ཁྱོད་ཚོ་ནི་རྒྱལ་པོའི་རིགས་བརྒྱུད་ཚོའི་དོ་དམ་པ་ཡིན་པ་དང་། ཁྱོད་ཚོ་ལ་ཤིང་རྟ་འཁོར་ལོ་རྣམས་དང་རྟ་རྣམས་དང་མཚོན་ཆ་རྣམས་དང་གྲོང་ཁྱེར་བཙན་པོ་བཅས་མངའ་འོག་ཏུ་ཡོད་པས། ཁྱོད་ཚོ་ལ་ཡི་གེ་འདི་འབྱོར་མ་ཐག་ཏུ།

³ ཁྱོད་ཚོས་རྒྱལ་པོའི་རིགས་བརྒྱུད་ནས་མི་འོས་པ་ཚད་ལྡན་ཞིག་འདམས་ཏེ་ཁོང་རྒྱལ་པོར་བསྐོས་ནས། ཁོང་ལ་སྐྱོབས་ཕྱིར་དམག་རྒྱབ་ཅིག་ཅེས་སྨྲས་སོ།

⁴ ས་མར་ཡའི་སྲིད་སྐྱོང་པ་རྣམས་ཧ་ཅང་འཇིགས་ནས་དེ་ཚོས་ཡེ་ཧུ་ལ་རྒྱལ་པོ་ཡོ་རམ་དང་རྒྱལ་པོ་ཨ་ཧ་ཛ་ཡཱས་ཀྱང་འགག་བྱ་གནང་ཐུབ་མེད་པས་ང་ཚོས་ཇི་ལྟར་བྱེད་ཐུབ་ཅེས་སྨྲས་སོ།

⁵ དེ་འདྲ་སོང་ཙང་ཕོ་བྲང་གི་དཔོན་པོ་དང་གྲོང་ཁྱེར་གྱི་ལས་བྱེད་པ་དང་ཡུལ་མི་གཙོ་དྲག་རྣམས་དང་ལྟ་སྐྱོང་བྱེད་མཁན་ཚོ་བཅས་མཉམ་དུ་ཡེ་ཧུ་ལ་ང་ཚོ་ཁྱེད་ཀྱི་ཞབས་ཕྱི་ཡིན་པ་དང་ཁྱེད་ཀྱི་ཇི་ལྟར་བཀའ་གནང་བ་སྒྲུབ་རྒྱུར་གྲ་སྒྲིགས་ཡོད། འོན་ཀྱང་ང་ཚོས་སུ་ལ་ཡང་རྒྱལ་པོ་བསྐོས་ཀྱི་མིན། ཁྱེད་ཀྱི་ཐུགས་ལ་ཇི་ལེགས་པ་དེ་གནང་རོགས་ཞེས་པའི་འཕྲིན་བཏང་ངོ་།

⁶ ཡེ་ཧུས་ཁྱོད་ཚོ་ང་མཉམ་དུ་ཡོད་པ་དང་ངའི་བཀའ་སྒྲུབ་རྒྱུར་གྲ་སྒྲིག་ཡོད་པ་ཡིན་ན། སང་ཞོག་དུས་ཚོད་དི་རང་ལ་ཡེཛ་རིལ་དུ་ངའི་སར་རྒྱལ་པོ་ཨ་ཧབ་ཀྱི་རིགས་བརྒྱུད་དེ་ཚོའི་མགོ་རྣམས་འཁྱེར་ཤོག་ཅེས་པའི་ཡི་གེ་གཞན་ཞིག་བཏང་ངོ་། ས་མར་ཡ་རུ་གནས་ཡོད་ཡུལ་མི་ཚོའི་བལྟ་རྟོགས་འོག་ཏུ་ཡོད་པའི་རྒྱལ་པོ་ཨ་ཧབ་ཀྱི་རིགས་བརྒྱུད་བདུན་ཅུ་ཐམ་པ་ཡོད་པ་རྣམས་འཚར་ལོངས་བྱེད་བཞིན་ཡོད་པས།

⁷ ཡེ་ཧུའི་ཡི་གེ་དེ་འབྱོར་བ་དང་། ས་མར་ཡའི་འགོ་འཛིན་ཚོས་ཨ་ཧབ་ཀྱི་རིགས་བརྒྱུད་བདུན་ཅུ་རྣམས་བསད་ནས་དེ་ཚོའི་མགོ་རྣམས་སླེ་པོའི་ནང་བླུགས་ནས་ཡེཛ་རིལ་དུ་ཡེ་ཧུའི་རྩར་བཏང་ངོ་།

⁸ ཡེ་ཧུ་ལ། ཨ་ཧབ་ཀྱི་རིགས་བརྒྱུད་ཚོའི་མགོ་རྣམས་འཁྱེར་ཡོད་ལུགས་ཞུས་པ་དང་། ཁོང་གིས་དེ་ཚོ་གྲོང་ཁྱེར་གྱི་རྒྱལ་སྒོར་ཚོ་གཉིས་སུ་སྤུངས་ནས་ཉིན་རྗེས་མའི་ཞོག་པ་བར་འཇོག་དགོས་པའི་བཀའ་གནང་ངོ་།

⁹ སང་ཞོག་ཁོང་རྒྱལ་སྒོར་ཕེབས་ནས། དེར་ཡོད་པའི་མི་མང་ལ་ངས་རྒྱལ་པོ་ཡོ་རམ་ལ་བྱུས་ངན་གཏིང་ནས་ཁོང་བཀྲོང་པ་ཡིན། དེའི་སྐོར་ཁྱོད་ཆོར་སུ་ཡང་འགན་འཁུར་མི་དགོས། འོན་ཀྱང་འདི་ཆོ་ཚང་མ་སུས་བསད་པ་རེད་དམ།

¹⁰ འདིའི་ཐོག་ནས་གཙོ་བོ་དཀོན་མཆོག་གིས་ཨ་ཧབ་ཀྱི་རིགས་བརྒྱུད་ཀྱི་སྐོར་བཀའ་གནང་བ་ཚང་མ་བདེན་པ་ཡོང་ངོ་། གཙོ་བོ་དཀོན་མཆོག་གིས་ལུང་སྟོན་པ་ཨེ་ལི་ཡཱ་བརྒྱུད་ཞལ་བཞེས་གནང་བ་ཚང་མ་སྒྲུབ་པ་ཡིན་ནོ།

¹¹ དེ་ནས་ཡེ་ཧུས་ཡེཛ་རིལ་དུ་སྡོད་པའི་ཨ་ཧབ་ཀྱི་གཉེན་ཚན་ཚང་མ་དང་། ཁོང་གི་འགོ་འཛིན་ཚང་མ་དང་། གྲོགས་པོ་ཉེ་པོ་རྣམས་དང་། བླ་མ་རྣམས་དང་བཅས་པ་བསད་ནས། དེ་ཚོའི་ནང་ནས་གཅིག་ཀྱང་གསོན་པོར་མ་བཞག་གོ།

རྒྱལ་པོ་ཨ་ཧ་ཛ་ཡཱའི་གཉེན་ཚན་རྣམས་བསད་པ།

¹² ཡེ་ཧུ་ཡེཛ་རིལ་ནས་ས་མར་ཡ་རུ་འགྲོ་བའི་ཕྱིར་ཐོན་པས། ལམ་དུ་ལུག་རྗིའི་སྒར་ཞེས་བའི་ས་གནས་དེར།

¹³ ཁོང་གིས་ཡ་ཧུ་དཱ་པའི་རྒྱལ་པོ་ཨ་ཧ་ཛ་ཡཱའི་གཉེན་ཚན་འགའ་ཤས་དང་འཕྲད་པས་དེ་ཚོ་ལ་ཁྱོད་ཚོ་སུ་ཡིན་ནམ་ཅེས་བཀའ་འདྲི་གནང་བས། དེ་ཚོས་ང་ཚོ་རྒྱལ་པོ་ཨ་ཧ་ཛིའི་ཡའི་གཉེན་ཚན་ཡིན་པས། ང་ཚོ་ཡེཛ་རིལ་དུ་བཙུན་མོ་ཡེ་ཛི་བྷེལ་དང་ཁོང་གི་རྒྱལ་པོའི་ཁྱིམ་ཚང་ལ་གུས་ཞབས་ཞུས་པར་འགྲོ་གི་ཡོད་ཅེས་ཞུས་པས།

¹⁴ ཡེ་ཧུས་རང་གི་མི་ཆོ་ལ་ཁོ་ཚོ་གསོན་པོར་བཟུང་ཞིག་ཅེས་བཀའ་གནང་བ་དང་། ཁོ་ཚོས་མི་བཞི་ཅུ་ཞེ་གཉིས་ཡོད་པ་རྣམས་བཟུང་ནས་དེར་ཡོད་པའི་དོང་ཞིག་གི་ཉེ་འགྲམ་དུ་བསད་ནས་གཅིག་ཀྱང་གསོན་པོར་མ་བཏང་ངོ་༎

ཨ་ཧབ་ཀྱི་མཉེན་ཚན་ལྷག་འཕྲོད་ཚང་མ་བསད་པ།

¹⁵ ཡེ་ཧུ་ཡང་སྐྱར་ཕེབས་པ་དང་ཁོང་གི་ལམ་དུ་རེ་ཀབ་ཀྱི་བུ་ཡོ་ན་དྷབ་དང་འཕྲད་པས། ཡེ་ཧུས་ཁོ་ལ་འཚམས་འདྲི་ཞུས་ནས་ངའི་བསམ་པར་ཁྱོད་དང་ང་གཉིས་འདྲ་མཚུངས་རེད། ཁྱོད་ཀྱིས་ང་ལ་རྒྱབ་སྐྱོར་བྱེད་ཀྱི་ཡིན་ནམ་གསུངས་པས། ཡོ་ན་དྷབ་ཀྱིས་རྒྱབ་སྐྱོར་ཞུ་གི་ཡིན་ཞེས་ཞུས་པས། ཡེ་ཧུས་དེ་འདྲ་ཡིན་ན་ཁྱེད་ཀྱི་ཕྱག་ང་ལ་གནང་བར་མཛོད་གསུངས་པས། ཁོང་གཉིས་ཀྱི་ཕན་ཚུན་ལག་པ་བཟུང་བ་དང་ཡེ་ཧུས་ཁོང་ལ་རོགས་བྱས་ཏེ་ཤིང་རྟ་འཁོར་ལོའི་ནང་དུ་ཐེན་ནོ།

¹⁶ ང་དང་མཉམ་དུ་ཤོག་ལ་ངས་གཙོ་བོ་དཀོན་མཆོག་ལ་མོས་གུས་ཇི་ལྟར་ཞུ་བཞིན་འདུག་པར་ལྟོས་ཤིག་གསུངས་ནས་མཉམ་དུ་ས་མར་ཡ་རུ་སླེབས་སོ།

¹⁷ ཁོང་ཚོ་དེར་འབྱོར་བ་དང་ཡེ་ཧུས། ཨ་ཧབ་ཀྱི་གཉེན་ཚན་གཅིག་ཀྱང་མ་བཞག་པར་ཚང་མ་བསད་དོ། དེ་ནས་གཙོ་བོ་དཀོན་མཆོག་གིས་ཨི་ལི་ཡ་ལ་གང་འབྱུང་རྒྱུའི་སྐོར་གསུངས་པ་དེ་སྒྲུབ་བོ༎

བྷལ་ལ་མཆོད་མཁན་རྣམས་བསད་པ།

¹⁸ ཡེ་ཧུའི་ས་མར་ཡའི་མི་མང་རྣམས་བཀོང་ནས་སྨྲས་པ། རྒྱལ་པོ་ཨ་ཧབ་ཀྱིས་ལྷ་བྷལ་ལ་ཞབས་ཞུ་ཕྲན་བུའི་མ་གཏོགས་ཕུལ་མེད། འོན་ཀྱང་ངས་ཁོང་ལ་དེ་ལས་ཧ་ཅང་མང་བ་ཞབས་ཕྱི་ཞུས་རྒྱུ་ཡིན།

¹⁹ བྷལ་གྱི་ལུང་སྟོན་པ་ཚང་མ་དང་ཁོང་ལ་མཆོད་མཁན་ཚང་མ་དང་ཁོང་གི་བླ་མ་ཚང་མ་བོས་ཤིག སུ་ལ་ཡང་དགོངས་པ་མེད། ངས་བྷལ་ལ་དམར་མཆོད་ཆེན་པོ་འབུལ་རྒྱུ་ཡིན་པས། དེར་མ་ཡོང་མཁན་མི་དེ་གསོད་པར་བྱ་རྒྱུ་ཡིན་གསུངས་ནས། (ཡེ་ཧུས་བྷལ་ལ་མཆོད་མཁན་ཚང་མ་གསོད་པར་བྱ་རྒྱུའི་གཡོ་བྱུས་ཞིག་བྱས་སོ།)

²⁰ དེ་ནས་ཡེ་ཧུས་བྷལ་ལ་མཆོད་པའི་ཉིན་མོ་དེ་ཚང་མར་གསལ་སྒྲགས་བྱོས་ཤིག་ཅེས་བཀའ་གནང་བ་དེ་བཞིན་བྱས་སོ།

²¹ དེ་ནས་ཡེ་ཧུས་ཨིསི་རཱཨེལ་གྱི་ཡུལ་ཚང་མར་ལོན་བཏང་བས། བྷལ་ལ་མཆོད་མཁན་གཅིག་ཀྱང་མ་ལུས་པ་ཚང་མ་ཡོང་ངོ་། དེ་ཚོ་ཚང་མ་བྷལ་གྱི་ལྷ་ཁང་དུ་ཕྱིན་ནས་མཆོད་ཁང་ཡོངས་སུ་ཁེངས་སོ།

²² དེ་ནས་ཡེ་ཧུས་རྩ་ཆེའི་ན་བཟའི་འགོ་འཛིན་བླ་མར། བྷལ་ལ་མཆོད་མཁན་ཚང་མར་གྱོན་ཕྱིར་ན་བཟའ་སྤྲོད་དགོས་པའི་བཀའ་གནང་ངོ་།

²³ དེ་ནས་ཡེ་ཧུས་ཁོང་རང་རེ་ཀབ་ཀྱི་བུ་ཡོ་ན་དྷབ་དང་མཉམ་དུ་ལྷ་ཁང་དུ་ཕེབས་ནས་དེར་ཡོད་པའི་མི་མང་རྣམས་ལ། བྷལ་ལ་མཆོད་མཁན་གཅིག་པུ་འཛོམས་པ་མ་གཏོགས་གཙོ་བོ་དཀོན་མཆོག་ལ་མཆོད་མཁན་སུ་ཡང་ནང་དུ་གཏོང་བར་མི་བྱ་རྒྱུ་ངེས་གཏན་བྱོས་ཤིག་གསུངས་སོ།

²⁴ དེ་ནས་ཁོང་དང་ཡོ་ན་དྷབ་གཉིས་བྷལ་ལ་མཆོད་པ་དང་སྦྱིན་སྲེག་ཕུལ་བར་ནང་དུ་ཕེབས་ནས། ཁོང་གི་ཕྱི་ལོག་ཏུ་མི་བརྒྱད་ཅུ་ཐམ་པ་བཞག་ཡོད་པ་དེ་ཚོར་ཁྱོད་ཚོས་མི་འདི་ཚོ་ཚང་མ་གསོད་དགོས། གལ་ཏེ་སུ་ཞིག་གིས་མི་གཅིག་བྲོས་ནས་བཏང་བ་ཡིན་ན། ཁོས་རང་གི་སྲོག་དེའི་ཆེད་དུ་ཕུལ་དགོས་ཅེས་སློབ་སྟོན་གནང་ཡོད་དོ།

²⁵ ཡེ་ཧུས་མཆོད་པ་ཕུལ་ཚར་མ་ཐག་ཏུ་སྐུ་སྲུང་བ་དང་འགོ་འཛིན་ཚོར། སོང་ལ་དེ་ཚོ་གཅིག་ཀྱང་བྲོས་མ་བཅུག་པར་གསོད་ཅིག་གསུངས་པ་དང་། དེ་ཚོས་གྲི་བཏོན་ནས་ནང་དུ་ཕྱིན་ནས་ཚང་མ་བསད་ནས་དེ་ཚོའི་རོ་ཕྱིར་བཏོན་ནོ། དེ་ནས་དེ་ཚོ་བྷལ་གྱི་ལྷ་ཁང་ནང་མར་ཕྱིན་ནས།

²⁶ དེར་ཡོད་པའི་དམ་པའི་ཀ་བ་དེ་ཕྱིར་འཁྱེར་ཡོང་ནས་མེར་བསྲེགས་སོ།

²⁷ དེ་ལྟར་དེ་ཚོས་དམ་པའི་ཀ་བ་དང་ལྷ་ཁང་སྟོར་ནས་ལྷ་ཁང་དེ་གསང་སྤྱོད་བཟོས་སོ། དུས་དེང་སང་ཡང་དེ་ལྟར་ཡིན་ནོ།

²⁸ དེ་ལྟར་ཡེ་ཧུས་ཨིསི་རཱཨེལ་གྱི་ནང་དུ་བྷལ་ལ་མཆོད་པའི་སྲོལ་དེ་རྩ་མེད་བཟོས་སོ།

²⁹ འོན་ཀྱང་ཁོང་གིས་རྒྱལ་པོ་ཡེ་རོ་བྷམ་གྱི་ཨིསི་རཱཨེལ་གྱི་མི་མང་རྣམས་སྡིག་པར་སྣེ་འཁྲིད་ནས་བྷེ་ཐེལ་དང་དྷན་དུ་བཟོས་པའི་གསེར་གྱི་གླང་གོག་ལ་མཆོད་རྒྱུའི་སྡིག་ལས་དེ་རང་ལ་དཔེ་བལྟས་སོ།

³⁰ གཙོ་བོ་དཀོན་མཆོག་གིས། ཡེ་ཧུ་ལ་ཁྱོད་ཀྱི་ཨ་ཧབ་ཀྱི་རིགས་བརྒྱུད་ལ་ངས་འདོད་པ་ལྟར་ཆ་ཚང་བྱས་ཡོད་པ་སོང་ཙང་ཁྱོད་ཀྱི་རིགས་བརྒྱུད་མི་རབས་བཞི་བར་ཨིསི་རཱཨེལ་གྱི་རྒྱལ་པོ་ཡོང་རྒྱུར་ངས་དམ་བཅའ་བྱ་རྒྱུ་ཡིན་གསུངས་སོ།

³¹ འོན་ཀྱང་ཡེ་ཧུས། རང་གི་བསམ་པ་རྣམ་དག་གིས་ཨིསི་རཱཨེལ་གྱི་གཙོ་བོ་དཀོན་མཆོག་གི་བཀའ་ཁྲིམས་ལ་ཉན་མེད་དོ། དེའི་ཚབ་ཏུ་ཡེ་རོ་བྷམ་གྱིས་ཨིསི་རཱཨེལ་པ་ཚོར་སྡིག་པར་སྣེ་འཁྲིད་བྱས་པའི་དཔེའི་རྗེས་སུ་འཇུག་གོ།

ཡེ་ཧུ་གྲོངས་པ།

³² དུས་སྐབས་དེར་གཙོ་བོ་དཀོན་མཆོག་གིས་ཨིསི་རཱཨེལ་གྱི་ས་ཁུལ་དེ་རྒྱ་ཁྱོན་ཆུང་དུ་གཏོང་དགོས་པའི་བཀའ་གནང་ཡོད་ཅིང་། སི་རི་ཡའི་རྒྱལ་པོ་ཧ་ཛ་ཨེལ་གྱིས་བཙན་འཛུལ་བྱས་པའི་ས་ཁུལ་ཡོངས་སུ།

³³ ཡོར་དན་གྱི་ཤར་ཕྱོགས་སུ་ཡོད་པའི་རྒྱུག་ཆུ་ཨར་ནོན་གྱི་གྲོང་ཁྱེར་ཨ་རོ་ཨེར་གྱི་ལྷོ་ཕྱོགས་བར་གྱི་མི་བརྒྱུད་གྷཌ་དང་རུ་བྷེན་དང་ཤར་དུ་མ་ནསེ་སཱེ་པ་རྣམས་སྡོད་པའི་ས་ཁུལ་གྷིལ་ཨད་དང་བྷ་ཤཱན་བཅས་ཚུད་ཡོད་དོ།

³⁴ ཡེ་ཧུས་མཛད་པ་རྣམས་ཁོང་གི་བློ་སྟོབས་ཆེན་པོའི་བྱས་རྗེས་དང་བཅས་པ་རྣམས་ཨིསི་རཱཨེལ་གྱི་རྒྱལ་པོ་རྣམས་ཀྱི་རྒྱལ་རབས་ནང་བཀོད་ཡོད་དོ།

³⁵ ཁོང་གྲོངས་པ་དང་ས་མར་ཡ་རུ་སྦས་ནས་ཁོང་གི་བུ་ཡེ་ཧོ་ཨ་ཧཛ་ཁོང་གི་ཤུལ་འཛིན་དུ་རྒྱལ་པོར་འགྱུར་རོ།

³⁶ ཡེ་ཧུས་ས་མར་ཡ་རུ་ལོ་ཉི་ཤུ་རྩ་བརྒྱད་རིང་ཨིསི་རཱཨེལ་གྱི་རྒྱལ་སྲིད་བསྐྱངས་ཡོད་དོ༎