སྔོན་རབས་གཉིས་པ། 9 - Tibetan Old Testament 2011

ཤེ་བྷའིི་རྒྱལ་མོའི་གཟིགས་སྐོར།

¹ ཤེ་བྷའི་རྒྱལ་མོས་རྒྱལ་པོ་སོ་ལོ་མོན་གྱི་སྙན་གྲགས་ཀྱི་སྐོར་ཐོས་པ་དང་། མོས་དྲི་བ་ཁག་པོ་ཁག་གིས་ཁོང་ལ་རྟགས་དཔྱད་གནང་བར་ཡེ་རུ་ཤ་ལེམ་དུ་ཕེབས་སོ། ཁོང་གིས་ཁོང་དང་མཉམ་དུ་འཁོར་གཡོག་མང་པོ་དང་རྔ་མོང་ཚོའི་ཐོག་སྨན་སྣ་དང་ནོར་བུའི་རིགས་དང་གསེར་ཁྱོན་ཆེན་གྱི་དོད་པོ་བཀལ་ཡོད་པ་དང་། ཁོང་གིས་སོ་ལོ་མོན་ལ་མཇལ་བ་དང་ཁོང་གིས་ཐུགས་དྲན་གསོས་པའི་དྲི་བ་ཚང་མ་བཀའ་འདྲི་གནང་ངོ་།

² ཁོང་གིས་དེ་ཚོ་ཚང་མ་ལ་ལན་གནང་ངོ་། ཁོང་ལ་དེ་ཚོར་འགྲེལ་བརྗོད་གནང་རྒྱུར་སྐུ་ངལ་མ་བྱུང་ངོ་།

³ ཤེ་བྷའི་རྒྱལ་མོས་སོ་ལོ་མོན་གྱི་ཤེས་རབ་ཀྱི་སྐོར་ལ་གསན་པ་དང་། ཁོང་གིས་བཞེངས་པའི་ཕོ་བྲང་གཟིགས་སོ།

⁴ ཁོང་གིས་གསོལ་ལྕོག་སྟེང་སྒྲིགས་པའི་གསོལ་ཚིག་དང་ལས་བྱེད་པ་ཚོའི་གཟིམ་ཤག་དང་ཕོ་བྲང་གི་ལས་བྱའི་སྒྲིག་འཛུག་དང་དེ་ཚོ་དགྲིག་ཆས་དང་། ཁོང་ལ་གསོལ་སྟོན་སྐབས་སྒུག་བསྡད་པའི་ཞབས་ཕྱི་ཚོའི་ན་བཟའ་དང་མཆོད་ཁང་ནང་ཁོང་གིས་ཕུལ་བའི་དམར་མཆོད་བཅས་གཟིགས་ནས། དེ་ཚོས་ཁོང་ཧོན་འཐོར་བ་དང་ཧང་སང་ངོ་།

⁵ ཤེ་བྷའི་རྒྱལ་མོས་རྒྱལ་པོ་ལ། ངས་ངའི་ཡུལ་དུ་ཁྱེད་དང་ཁྱེད་ཀྱི་ཤེས་རབ་ཀྱི་སྐོར་ཐོས་པ་བདེན་པ་རང་རེད་འདུག

⁶ ང་རང་འདིར་ཡོང་ནས་མ་མཐོང་བར་དུ་དེ་ཚོས་བཤད་པར་ཡིད་མ་ཆེས་སོ། ངས་ཁྱེད་ཀྱི་ཤེས་རབ་ཀྱི་སྐོར་ཕྱེད་ཀ་ཡང་ཐོས་མི་འདུག མིས་བཤད་པ་ལས་ཁྱེད་ཀྱི་ཤེས་རབ་ཆེ་བ་འདུག་གོ

⁷ ཁྱེད་ལ་ཞབས་ཕྱི་ཞུ་མཁན་ཚོ་རྟག་ཏུ་ཁྱེད་དྲུང་ཡོད་པ་དང་། ཁྱེད་ཀྱི་ཤེས་རབ་ཅན་གྱི་གསུང་ཐོས་པའི་གོ་སྐབས་ཡོད་མཁན་ཚོ་ཧ་ཅང་བསོད་ནམས་ཅན་ཞིག་ཡིན་ནོ།

⁸ གཙོ་བོ་དཀོན་མཆོག་ལ་བསྟོད་པ་ཕུལ། ཁོང་གིས་ཁྱེད་རྒྱལ་པོར་བསྐོས་ནས་ཁོང་གིས་མཚན་ནས་རྒྱལ་སྲིད་སྐྱོངས་བཅུག་ནས་ཁོང་ཇི་ལྟར་ཁྱེད་མཉམ་དུ་ཐུགས་མཉེས་པ་བསྟོན་གནང་ངོ་། གང་ལ་ཟེར་ན། ཁོང་གི་ཨིསི་རཱཨེལ་གྱི་མི་མང་ཚོར་ཐུགས་བརྩེ་ཡོད་པ་དང་། དེ་ཚོ་རྟག་ཏུ་གནས་པར་གནང་འདོད་ཡོད་སྟབས། ཁྱེད་ཀྱིས་ཁྲིམས་དང་བདེན་པ་སྲུང་བའི་ཕྱིར་ཁྱེད་རྒྱལ་པོར་བསྐོས་གནང་བ་ཡིན་ཅེས་གསུངས་སོ།

⁹ ཁོང་གིས་འཁྱེར་ཡོང་བའི་འབུལ་བ་གསེར་ཀི་ལོ་གྷ་རམ་ ༤,༠༠༠ ལྷག་དང་སྨན་སྣ་དང་ནོར་བུའི་རིགས་ཁྱོན་ཆེ་བཅས་རྒྱལ་པོ་སོ་ལོ་མོན་ལ་ཕུལ་ལོ། ཤེ་བྷའི་རྒྱལ་མོས་རྒྱལ་པོ་སོ་ལོ་མོན་ལ་ཕུལ་བའི་སྨན་སྣ་དེ་བཞིན་སྨན་སྣ་སྤུས་ལེགས་དེ་ལྟར་གཞན་མེད་དོ།

¹⁰ (རྒྱལ་པོ་ཧི་རམ་དང་རྒྱལ་པོ་སོ་ལོ་མོན་གྱི་མི་ཚོས་ཨོ་ཕིར་ནས་གསེར་འཁྱེར་ཡོང་སྐབས་ཙན་དན་གྱི་ཤིང་དང་རིན་ཆེན་ཁག་ཀྱང་འཁྱེར་ཡོད་དོ།

¹¹ སོ་ལོ་མོན་གྱིས་ཤིང་དེ་ཚོ་མཆོད་ཁང་དང་ཁོང་རང་གི་ཕོ་བྲང་དང་ཐེམ་སྐས་དང་རོལ་མོ་མཁན་ཚོའི་སྒྲ་སྙན་དང་པི་ཝང་བཟོ་བར་བེད་སྤྱོད་གནང་ངོ་། སྔོན་དུ་ཡ་ཧུ་དཱ་པའི་ཡུལ་དུ་དེ་ལྟར་རྩ་བ་ནས་མཐོང་མྱོང་མེད་དོ།)

¹² རྒྱལ་པོ་སོ་ལོ་མོན་གྱི་ཤེ་བའི་རྒྱལ་མོས་ཅི་ཞུས་པ་ཐམས་ཅད་གནང་ངོ་། དེ་ཚོ་ནི་མོས་ཁོང་ལ་ཕུལ་བའི་འབུལ་བ་ཚོའི་ལས་མང་བ་ཡིན་ནོ། དེ་ནས་རྒྱལ་མོ་དང་མོའི་འཁོར་གཡོག་རྣམས་ཤེ་བའི་ཡུལ་དུ་ཕྱིར་ལོག་ཕེབས་སོ༎

རྒྱལ་པོ་སོ་ལོ་མོན་གྱི་རྒྱུ་ནོར།

¹³ ལོ་ལྟར་རྒྱལ་པོ་སོ་ལོ་མོན་ལ་གསེར་ཀི་ལོ་གྷ་རམ་ ༢༣,༠༠༠ ཙམ་འབྱོར་གྱི་ཡོད་པ་དང་།

¹⁴ དེའི་ཐོག་ཚོང་པ་ཚོས་དཔྱ་ཁྲལ་ཕུལ་གྱི་ཡོད་དོ། ཨ་ར་བི་ཡའི་རྒྱལ་པོ་ཚོ་དང་ཨིསི་རཱཨེལ་གྱི་རྫོང་གི་སྲིད་སྐྱོངས་པ་ཚོས་ཁོང་ལ་གསེར་དངུལ་ཕུལ་གྱི་ཡོད།

¹⁵ སོ་ལོ་མོན་གྱིས་ཕུབ་ཆེན་ ༢༠༠ བཟོས་པ་དེ་ཚོ་ཕུབ་རེ་རེར་གསེར་ལྗང་བརྡུང་ཀི་ལོ་གྷ་རམ་བདུན་ཙམ་གཡོགས་ཡོད་པ་དང་།

¹⁶ དེ་ལྟར་ཕུབ་ཆུང་བ་གྲངས་ ༣༠༠ བཟོས་པ་དེ་ཚོ་རེ་རེར་གསེར་ལྗང་བརྡུང་ཀི་ལོ་གྷ་རམ་གསུམ་ཙམ་གཡོགས་ཡོད་དོ། ཁོང་གིས་དེ་ཚོ་ཚང་མ་ལེ་བ་ནོན་གྱི་ཤིང་ནགས་ཀྱི་ཕོ་བྲང་དུ་འཇོག་གནང་ཡོད་དོ།

¹⁷ རྒྱལ་པོས་རྒྱལ་ཁྲི་ཆེན་པོ་ཞིག་ཡང་བཟོས་བཅུག་ཡོད་པ་དང་། དེའི་ཆ་ཤས་ཤིག་ལ་བ་སོས་བཀབ་ཡོད་པ་དང་དེའི་ལྷག་འཕྲོས་རྣམས་གསེར་སྤུས་དག་གི་གཡོག་ཡོད་དོ།

¹⁸ ཁྲི་བར་དུ་ཐེམ་སྐས་དྲུག་ཡོད་པ་དང་། དེ་ལ་གསེར་གྱི་གཡོགས་པའི་རྐང་སྟེགས་བྲལ་ཡོད་དོ། ཁྲི་དེའི་ཕྱོགས་རེར་ལག་པ་འཇོག་ཡུལ་ཡོད་པ་དང་ཕྱོགས་རེར་སེང་གེའི་དབྱིབས་ཅན་ལངས་ཡོད་དོ།

¹⁹ ཐེམ་སྐས་དྲུག་གི་ཕྱོགས་གཉིས་ཀར་སེང་གེའི་དབྱིབས་ཅན་རེ་རེ་རྩིས་པའི་སྡོམ་བཅུ་གཉིས་ཡོད་དོ། རྒྱལ་ཁབ་གཞན་དུ་ཁྲི་འདི་ལྟར་རྩ་བ་ནས་བྱུང་མེད་དོ།

²⁰ རྒྱལ་པོ་སོ་ལོ་མོན་གྱི་ཞལ་དཀར་རྣམས་གསེར་ལས་བཟོས་ཡོད་པ་དང་། ལེ་བ་ནོན་གྱི་ཤིང་ནགས་ཀྱི་ཕོ་བྲང་གི་ཐབ་ཆས་རྣམས་གསེར་སྤུས་དག་འབའ་ཞིག་ལས་སྒྲུབ་པ་ཡིན་ནོ། སོ་ལོ་མོན་གྱི་སྐུ་དུས་སུ་དངུལ་ལ་དེ་ལྟར་རིང་ཐང་རྩིས་སྲོལ་མེད་དོ།

²¹ ཁོང་ལ་མཐའི་རྒྱ་མཚོ་ཆེན་པོར་རྒལ་བའི་གྲུ་གཟིང་ཡོད་པ་རྣམས་རྒྱལ་པོ་ཧི་རམ་གྱི་གྲུ་དང་མཉམ་དུ་མཚོ་ལ་འགྲོ་གི་ཡོད། ལོ་གསུམ་རེའི་མཚམས་ཁོང་གི་གྲུ་གཟིང་ཚོའི་ནང་གསེར་དངུལ་དང་བ་སོ་དང་མི་རྒོད་དང་དང་སྤྲེའུ་བཅས་པ་འཁྱེར་ནས་ཡོང་ངོ་།

²² རྒྱལ་པོ་སོ་ལོ་མོན་ནི་འཛམ་གླིང་གི་རྒྱལ་པོ་གཞན་ཚོ་ལས་ཕྱུག་པ་དང་ཤེས་རབ་དང་ལྡན་པ་ཡོད་དོ།

²³ དེ་ཚོ་ཚང་མས་ཁོང་ལ་དཀོན་མཆོག་གིས་གནང་བའི་ཤེས་རབ་ལ་ཉན་ཕྱིར་གོ་བསྡུར་ཞུ་བཞིན་ཡོད་དོ།

²⁴ དེ་ཚོ་རེ་རེར་སོ་ལོ་མོན་ལ་གསེར་དངུལ་གྱི་དངོས་པོ་དང་ན་བཟའ་དང་མཚོན་ཆ་དང་སྨན་སྣ་དང་རྟ་དྲེལ་བཅས་ཕུལ་གྱི་ཡོད་དོ། དེ་ལྟར་ལོ་ནས་ལོ་བསྟུད་བྱ་བཞིན་ཡོད་དོ།

²⁵ རྒྱལ་པོ་སོ་ལོ་མོན་ལ་ཤིང་རྟ་འཁོར་ལོ་དང་རྟའི་ཕྱིར་རྟ་ར་ ༤,༠༠༠ དང་། རྟ་དམག་གི་རྟ་ ༡༢,༠༠༠ ཡོད། དེ་ཚོ་འགའ་ཤས་ཡེ་རུ་ཤ་ལེམ་དུ་འཇོག་པ་དང་། དེ་འཕྲོས་རྣམས་གྲོང་ཁྱེར་ཁག་ནང་འཇོག་གནང་ཡོད་དོ།

²⁶ ཁོང་ནི་གཙང་པོ་ཡུབ་རད་ནས་ཕེ་ལེ་ཤེད་དང་ཨི་ཇིབ་ཀྱི་ས་མཚམས་ཁུལ་གྱི་རྒྱལ་པོ་ཚང་མའི་གཙོ་བོ་ཡིན་ནོ།

²⁷ ཁོང་གི་སྐུ་དུས་སུ་ཡེ་རུ་ཤ་ལེམ་དུ་དངུལ་ནི་རྡོ་བཞིན་དཀྱུས་མ་ལྟར་དང་འགྱམ་ཤིང་ནི་ཡ་ཧུ་དཱའི་རི་གཤམ་ཏུ་ཡོད་པའི་ཤིང་སེ་ཡབ་དཀྱུས་མ་ལྟ་བུ་འབོལ་པོ་ཡོད་དོ།

²⁸ སོ་ལོ་མོན་གྱིས་རྟ་དེ་རྣམས་མུསི་རི་དང་གཞན་ཡུལ་ཚང་མ་ནས་ཉོས་གནང་ངོ་༎

སོ་ལོ་མོན་གྱི་རྒྱལ་སྲིད་སྐྱོངས་བའི་ལོ་རྒྱུས་མདོར་བསྡུས།

²⁹ སོ་ལོ་མོན་གྱི་རྒྱལ་རབས་གཞན་རྣམས་འགོ་ནས་འཇུག་བར་ལུང་སྟོན་པ་ན་ཐན་གྱི་རྒྱལ་རབས་དང་། ཤི་ལཱོའི་ཨ་ཧི་ཡཱའི་ལུང་བསྟན་དང་ལུང་སྟོན་པ་ཨིད་དྷོའི་ཞལ་གཟིགས་རྣམས་ནང་དེབ་བཀོད་གྱིས་ཡོད་དོ། ཨིད་དྷོའི་ཡིག་ཆ་དེའི་ནང་ཨིསི་རཱཨེལ་གྱི་རྒྱལ་པོ་ཡེ་རོ་བྷམ་གྱི་རྒྱལ་སྲིད་ཀྱི་སྐོར་ལ་ཡང་དེབ་བཀོད་གྱིས་ཡོད་དོ།

³⁰ སོ་ལོ་མོན་གྱི་ཨིསི་རཱཨེལ་ཡོངས་ལ་ཡེ་རུ་ཤ་ལེམ་དུ་ལོ་བཞི་བཅུའི་རིང་རྒྱལ་སྲིད་བསྐྱངས་སོ།

³¹ ཁོང་གྲོངས་ནས་དཱ་བིད་ཀྱི་གྲོང་ཁྱེར་ནང་སྦས་པ་དང་ཁོང་གི་སྲས་རེ་ཧོ་བྷམ་ཁོང་གི་ཚབ་ཏུ་རྒྱལ་པོར་འགྱུར་རོ༎