སྔོན་རབས་གཉིས་པ། 7 - Tibetan Old Testament 2011

མཆོད་ཁང་གི་བསྔོ་འབུལ།

¹ རྒྱལ་པོ་སོ་ལོ་མོན་གྱིས་སྨོན་ལམ་བཏབ་གྲུབ་པ་དང་། མཐོ་རིས་ནས་མེ་བབས་ནས་སྦྱིན་སྲེག་གི་དམར་མཆོད་ཕུལ་བ་རྣམས་བསྲེགས་པ་དང་། གཙོ་བོ་དཀོན་མཆོག་བཞུགས་པའི་ཤིན་ཏུ་འཚེར་བའི་འོད་ཀྱིས་མཆོད་ཁང་ཁེངས་སོ།

² མཆོད་ཁང་དུ་ཤིན་ཏུ་འཚེར་བའི་འོད་ཀྱིས་ཁེངས་ཡོད་སྟབས་དེའི་ནང་བླ་མ་ཚོ་ཡང་འཛུལ་མ་ཐུབ་བོ།

³ ཨིསི་རཱཨེལ་གྱི་མི་མང་ཚོས་མཐོ་རིས་ནས་མེ་བབས་ནས་མཆོད་ཁང་ནང་འོད་ཀྱི་ཁེངས་པ་མཐོང་སྐབས། དེ་ཚོ་ཁྱམས་རར་ཁ་མར་འབུབ་ནས་དཀོན་མཆོག་ལ་མཆོད་པ་དང་། ཁོང་ནི་བཟང་པོ་དང་མཐའ་མེད་པའི་ཐུགས་བརྩེ་ལ་བསྟོད་མངགས་སོ།

⁴ དེ་ནས་སོ་ལོ་མོན་དང་མི་མང་ཚང་མས་གཙོ་བོ་དཀོན་མཆོག་དམར་མཆོད་ཕུལ་ལོ།

⁵ ཁོང་གི་བ་གླང་གྲངས་ ༢༢,༠༠༠ དང་། ལུག་གྲངས་ ༡༢༠,༠༠༠ མཐུན་བྲལ་ཀྱི་མཆོད་པ་ཕུལ་ལོ། དེ་ལྟར་ཁོང་དང་མི་མང་ཚང་མས་མཆོད་ཁང་ལ་བསྔོ་འབུལ་མཛད་དོ།

⁶ བླ་མ་ཚོ་རང་རང་སོ་སོར་སྤྲད་པའི་ས་གནས་དེར་ལངས་སོ། དེ་ཚོའི་ཁ་བལྟས་སུ་ལེ་ཝི་པ་ཚོ་ལངས་ནས་བསྡད་ཡོད་པ་དང་། རྒྱལ་པོ་དཱ་བིད་ཀྱིས་མཁོ་སྒྲུག་གནང་བའི་རོལ་ཆས་རྣམས་དང་མཉམ་དུ་ཁོང་རང་ཉིད་ཀྱིི་བཀའ་བཀོད་གནང་བ་ལྟར་ཁོང་གི་བྱམས་པ་ནི་མཐའ་མེད་པ་ལགས་སོ་ཞེས་པའི་མགུར་མ་བཏང་བཞིན་ཡོད་དོ། མི་མང་ཚང་མ་ལངས་ནས་ཡོད་སྐབས་བླ་མ་ཚོས་དུང་འབུད་དོ།

⁷ སོ་ལོ་མོན་མཆོད་ཁང་གི་མདུན་ཕྱོགས་ཀྱི་ཁྱམས་རའི་དབུས་དེར་ཁོང་གིས་བསྔོ་འབུལ་གནང་ནས། དེར་སྦྱིན་སྲེག་གི་དམར་མཆོད་རྣམས་དང་འབྲུའི་མཆོད་པ་རྣམས་དང་མཐུན་བྲལ་གྱི་མཆོད་པ་རྣམས་ཀྱི་ཚིལ་ལུ་ཕུལ་བ་བཅས་དེ་ལྟར་གནང་ཡོད་དོ། གང་ལ་ཟེར་ན། ཁོང་གིས་བཟོས་པའི་ལིའི་མཆོད་ཁྲི་དེ་ནི་མཆོད་པ་དེ་ཚོ་ལ་ཧ་ཅང་ཆུང་བའི་རྐྱེན་གྱིས་ཡིན་ནོ།

⁸ སོ་ལོ་མོན་དང་ཨིསི་རཱཨེལ་གྱི་མི་མང་ཡོངས་ནས་སྐྱབས་གནས་ཀྱི་དུས་སྟོན་ཉིན་བདུན་རིང་སྲུང་བརྩི་ཞུས་སོ། དེར་བྱང་ཧ་མད་ཀྱི་ལ་ནས་ལྷོ་ཨི་ཇིབ་ཀྱི་ས་མཚམས་བར་གྱི་མི་ཚོགས་ཧ་ཅང་ཆེན་པོ་བསྡུས་ཡོད་དོ།

⁹ དེ་ཚོས་མཆོད་ཁྲི་ལ་བསྔོ་འབུལ་ཉིནེ་བདུན་དང་ཡང་དུས་སྟོན་ཉིནེ་བདུན་སྲུང་བརྩི་ཞུས་སོ། ཉིན་མཐའ་མར་དེ་ཚོས་མཐའ་བསྡོམས་ཀྱི་དུས་སྟོན་བྱས་སོ།

¹⁰ དེ་ནས་ཉིན་རྗེས་མ་ཟླ་བ་བདུན་པའི་ཚེས་ཉི་ཤུ་གསུམ་ཉིན་སོ་ལོ་མོན་གྱི་མི་མང་རྣམས་ཁྱིམ་དུ་ལོག་བཅུག་གོ རང་གི་མི་དབངས་ཨིསི་རཱཨེལ་དང་དཱ་བིད་དང་སོ་ལོ་མོན་བཅས་པར་བྱིན་རླབས་གནང་བར་ཚང་མ་དགའ་མགུར་འགྱུར་རོ༎

སོ་ལོ་མོན་གྱི་ཡང་སྐྱར་དཀོན་མཆོག་མཇལ་བ།

¹¹ རྒྱལ་པོ་སོ་ལོ་མོན་གྱི་མཆོད་ཁང་དང་ཕོ་བྲང་བཅས་ཁོང་གི་འཆར་གཞི་ཚང་མ་ལམ་ལྷོང་ལྡན་པ་སྒྲུབ་པའི་རྗེས་སུ།

¹² མཚན་མོ་ཞིག་ཁོང་ལ་གཙོ་བོ་དཀོན་མཆོག་མཇལ་ནས། ཁོང་གིས་ཁོང་ལ། ངས་ཁྱོད་ཀྱི་སྨོན་ལམ་ཐོས་བྱུང་བས་ངས་མཆོད་ཁང་འདི་ང་ལ་དམར་མཆོད་འབུལ་ཡུལ་དུ་ངོས་འཛིན་བྱ་རྒྱུ་ཡིན་ནོ།

¹³ ངས་ཆར་པ་བཀག་པ་དང་ཆ་ག་འབུ་སྟོན་ཐོག་ཟ་བར་བཏང་བ་དང་ངའི་མི་མང་ལ་རིམ་ནད་གཏོང་སྐབས།

¹⁴ ངའི་མི་མང་ཚོས་ང་ལ་གསོལ་བ་འདེབས་པ་དང་འགྱོད་བཤགས་ཕུལ་ནས་དེ་ཚོས་བྱ་བའི་སྡིག་པ་སྤོང་བ་ཡིན་ན། ངས་མཐོ་རིས་ནས་དེ་ཚོ་ལ་ཉན་རྒྱུ་དང་དེ་ཚོའི་སྡིག་པར་བཟོད་གསོལ་བྱས་ནས། ཡང་སྐྱར་དེ་ཚོའི་ཡུལ་དེ་ཕུན་སུམ་ཚོགས་པ་བཟོ་རྒྱུ་ཡིན་ནོ།

¹⁵ ངས་མཆོད་ཁང་འདིར་བལྟ་རྟོགས་བྱ་རྒྱུ་དང་འདིར་འཏབ་པའི་སྨོན་ལམ་ཚང་མ་ཉན་རྒྱུར་གྲ་སྒྲིག་བྱ་རྒྱུ་ཡིན་ནོ།

¹⁶ གང་ལ་ཟེར་ན། ངས་དེ་འདམས་པ་དང་ང་ལ་རྟག་ཏུ་མཆོད་པ་འབུལ་ཡུལ་དུ་དག་བྱང་བྱས་ཡོད། ངས་དེ་ལ་བལྟ་རྟོགས་བྱ་རྒྱུ་དང་དེ་རྟག་ཏུ་སྲུང་སྐྱོབ་བྱ་རྒྱུ་ཡིན་ནོ།

¹⁷ ཁྱོད་ཀྱི་ཕ་དཱ་བིད་བཞིན་ཁྱོད་ཀྱིས་ལྷག་བསམ་རྣམ་དག་གིས་ངའི་ཞབས་ཕྱི་ཞུ་བ་དང་། ངའི་བཀའ་ཁྲིམས་ལ་ཉན་ནས་ངས་བཀའ་བཏང་བ་བཞིན་བྱས་པ་ཡིན་ན།

¹⁸ ངས་ཁྱོད་ཀྱི་ཕ་དཱ་བིད་ལ་ཁོའི་བརྒྱུད་ཀྱི་རྟག་ཏུ་ཨིསི་རཱཨེལ་གྱི་རྒྱལ་སྲིད་སྐྱོངས་བར་འགྱུར་ཞེས་སྨྲས་ནས་དམ་བཅའ་བཞག་པར་ཆ་འཛིན་བྱ་རྒྱུ་ཡིན་ནོ།

¹⁹ འོན་ཀྱང་ཁྱོད་དང་ཁྱོད་ཀྱི་མི་མང་ཚོས་ངས་བཏང་བའི་བཀའ་ཁྲིམས་དང་ངའི་བཀའ་རྒྱ་ལ་མ་ཉན་པར་ལྷ་གཞན་ལ་བསྟན་པ་ཡིན་ན།

²⁰ ངས་ཁྱོད་ལ་སྤྲད་པའི་ཡུལ་འདི་ནས་ཕྱིར་འབུད་བྱ་རྒྱུ་དང་། ངས་ང་ལ་མཆོད་ཡུལ་དུ་བསྔོ་འབུལ་བྱས་པའི་མཆོད་ཁང་འདི་སྤོང་རྒྱུ་ཡིན་ནོ། ས་ཁུལ་ཚང་མའི་མི་མང་ཚོས་དེ་ལ་སྣང་ཆུང་དང་འཕྱ་བའི་ཡུལ་དུ་འགྱུར་རོ།

²¹ ད་ལྟ་མཆོད་ཁང་འདིར་གུས་བཀུར་ཆེན་པོ་ཞུས་ཡོད། འོན་ཀྱང་མི་ཆང་མ་འདི་བརྒྱུད་ནས་འགྲོ་མཁན་ཚོ་ཧང་སང་ནས་གཙོ་བོ་དཀོན་མཆོག་གིས་ཡུལ་འདི་དང་མཆོད་ཁང་འདིར་ཅིའི་ཕྱིར་འདི་འདྲ་མཛད་པ་ཡིན་ནམ་ཞེས་འདྲི་བར་འགྱུར་རོ།

²² ལན་དུ་མི་མང་ཚོས། རང་གི་ཕ་མེས་ཚོ་ལ་ཨི་ཇིབ་ནས་འདོན་གནང་མཁན་གཙོ་བོ་དཀོན་མཆོག་དེ་ཚོའི་དཀོན་མཆོག་དེ་ལ་དེ་ཚོས་སྤངས་ནས། ལྷ་གཞན་ལ་བསྟེན་ཅིང་མཆོད་པས་རྐྱེན་གྱིས་གཙོ་བོ་དཀོན་མཆོག་གིས་དེ་ཚོ་ལ་རྐྱེན་ངན་འདི་འཁྱེར་གནང་ཡོང་བ་ཡིན་ནོ་ཞེས་སྨྲ་འོང༎