སྔོན་རབས་གཉིས་པ། 6 - Tibetan Old Testament 2011

སོ་ལོ་མོན་གྱིས་མི་མང་ལ་གསུང་བཤད་གནང་བ།

¹ དེ་ནས་རྒྱལ་པོ་སོ་ལོ་མོན་གྱིས་སྨོན་ལམ་འདེབས་སོ། གཙོ་བོ་དཀོན་མཆོག་ཁྱེད་ནི་སྤྲིན་དང་མུན་པའི་ནང་བཞུགས་པར་འདམས་གནང་ཡོད།

² ད་ཆ་ངས་ཁྱེད་ཀྱི་ཆེད་དུ་གཏན་དུ་བཞུགས་པའི་ངོ་མཚར་ཅན་གྱི་མཆོད་ཁང་ཞིག་བཞེངས་ཡོད།

³ ཨིསི་རཱཨེལ་གྱི་མི་མང་རྣམས་དེར་ལངས་ཡོད། རྒྱལ་པོས་དེ་ཚོའི་ཕྱོགས་སུ་ཞལ་བསྒྱུར་ནས་དེ་ཚོ་ལ་དཀོན་མཆོག་གྱི་བྱིན་རླབས་ཞུས་སོ།

⁴ ཁོང་གིས་གསུངས་པ། ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་ལ་བསྟོད་པ་ཕུལ། ཁོང་གིས་ངའི་ཡབ་དཱ་བིད་ལ་ཞལ་བཞེས་གནང་བ་རྣམས་ཡོངས་སུ་སྒྲུབ་ཡོད་དོ།

⁵ ཁོང་གིས་ངའི་མི་མང་རྣམས་ཨི་ཇིབ་ནས་ཕྱིར་བཏོན་པ་ནས་བཟུང་ད་བར་ངས་ཨིསི་རཱཨེལ་གྱི་ཡུལ་ནང་གྲོང་ཁྱེར་གང་དུ་ཡང་ང་ལ་མཆོད་པའི་ཕྱིར་མཆོད་ཁང་བཞེངས་པའི་ས་གནས་ཤིག་འདམས་མེད་དོ།

⁶ ད་ཆ་ངས་ཡེ་རུ་ཤ་ལེམ་དེ་ངས་མཆོད་པའི་ཡུལ་དུ་འདམས་པ་དང་། དཱ་བིད་ཁྱོད་ནི་ངའི་མི་མང་གི་དབང་བསྒྱུར་བར་འདམས་པ་ཡིན་ཞེས་བཀའ་གནང་ཡོད་ཅེས་གསུངས་སོ།

⁷ སོ་ལོ་མོན་གྱིས་མུ་མཐུད་ནས་བཀའ་གནང་བ། ངའི་ཡབ་དཱ་བིད་ཀྱིས་ཨིསི་རཱཨེལ་གྱི་དཀོན་མཆོག་་གཙོ་བོ་དཀོན་མཆོག་ལ་མཆོད་པའི་ཕྱིར་མཆོད་ཁང་ཞིག་བཞེངས་རྒྱུའི་འཆར་གཞི་གཏིང་གནང་ཡོད།

⁸ འོན་ཀྱང་གཙོ་བོ་དཀོན་མཆོག་གིས་ཁོང་ལ་ཁྱོད་ཀྱིས་ངའི་ཆེད་དུ་མཆོད་ཁང་བཞེངས་འདོད་པ་དེ་ལེགས་སོ།

⁹ འོན་ཀྱང་ཁྱོད་ཀྱིས་དེ་ནམ་ཡང་བཞེངས་མི་ཡོང་། ཁྱོད་རང་ཉིད་ཀྱི་བུས་ངའི་མཆོད་ཁང་བཞེངས་པར་འགྱུར་ཞེས་བཀའ་གནང་ཡོད་དོ།

¹⁰ ད་ཆ་གཙོ་བོ་དཀོན་མཆོག་གིས་ཞལ་བཞེས་སྒྲུབ་གནང་ཡོད། ང་ནི་ཨིསི་རཱཨེལ་གྱི་རྒྱལ་པོར་ངའི་ཡབ་ཀྱི་རྗེ་ཤུལ་འཛིན་གྱིས་ནས་ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་ལ་མཆོད་ཡུལ་མཆོད་ཁང་ཞིག་བཞེངས་ཡོད་དོ།

¹¹ གཙོ་བོ་དཀོན་མཆོག་གིས་ཨིསི་རཱཨེལ་གྱི་མི་མང་ལ་གནང་བའི་དམ་བཅའི་རྡོ་ལེབ་དེ་དམ་བཅའི་སྒྲོམ་དེའི་ནང་ངས་མཆོད་ཁང་ནང་དུ་བཞག་ཡོད་ཅེས་གསུངས་སོ༎

སོ་ལོ་མོན་གྱི་སྨོན་ལམ།

¹² དེ་ནས་མི་མང་གི་ཁྲོད་དུ་སོ་ལོ་མོན་ཕེབས་ནས། མཆོད་ཁྲིའི་མདུན་དུ་བཞེངས་ནས་ཕྱག་བརྐྱངས་ཏེ་སྨོན་ལམ་བཏབ་བོ།

¹³ སོ་ལོ་མོན་གྱིས་ལིའིི་སྡྡིང་བྱ་ཞིག་བཟོས་ནས་ཁྱམས་རའི་དཀྱིལ་དུ་བཞག་གོ དེ་ལ་མི་ཀྲར་ ༢.༢ ཡོད་པ་གྲུ་བཞི་མཐོ་དམན་མི་ཀྲར་ ༡.༣ ཡོད་པ་དང་། ཁོང་གིས་དེའི་སྟེང་ཕེབས་ནས་ཚང་མས་མཐོང་ཡུལ་ཞིག་ཏུ་པུས་མོ་བཙུགས་ནས་མཐོ་རིའི་ཕྱོགས་སུ་ཕྱག་བརྐྱངས་སོ།

¹⁴ ཁོང་གིས་འདི་ལྟར་སྨོན་ལམ་འདེབས་སོ། ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་མཐོ་རིས་དང་ས་གཞི་ནང་ཁྱེད་ལྟར་དཀོན་མཆོག་གཞན་མེད། ཁྱེད་ཀྱིས་ཁྱེད་ཀྱི་མི་མང་དབར་གྱི་དམ་བཅའ་སྲུང་བརྩི་གནང་བ་དང་། དེ་ཚོའི་སྙིང་ནས་ཁྱེད་ཀྱི་བཀའ་ལ་ངོས་ལེན་ཞུས་པ་ཡིན་ན། དེ་ཚོ་ལ་བརྩེ་བ་གནང་གི་ཡོད་དོ།

¹⁵ ཁྱེད་ཀྱིས་ངའི་ཡབ་དཱ་བིད་ལ་གནང་བའི་ཞལ་ཆད་ལ་སྲུང་བརྩི་གནང་ནས་དེ་རིང་ཁྱེད་ཀྱི་བཀའ་རེ་རེ་བཞིན་སྒྲུབ་ཡོད་དོ།

¹⁶ ངའི་ཡབ་ཀྱིས་ཁོང་གིས་བཀའ་ལ་སྲུང་བརྩི་གནང་བ་ལྟར་ཁྱོད་ཚོས་ཀྱང་ཟབ་ཟབ་ཀྱིས་ཁོང་གི་བཀའ་ལ་སྲུང་བརྩི་ཞུས་པ་ཡིན་ན། ཁོང་གི་རིགས་བརྒྱུད་ཞིག་གི་རྟག་ཏུ་ཨིསི་རཱཨེལ་གྱི་རྒྱལ་སྲིད་སྐྱོངས་ཡོང་གསུངས་པའི་ཞལ་ཆད་དེ་ཡང་སྒྲུབ་པར་མཛད་དོ།

¹⁷ དེ་ལྟར་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་ཁྱེད་ཀྱི་ཞབས་ཕྱི་དཱ་བིད་ལ་ཞལ་བཞེས་གནང་བ་ཚང་མ་སྒྲུབ་པར་མཛོད་ཅིག

¹⁸ འོན་ཀྱང་དཀོན་མཆོག་ཁྱེད་ནི་འཇིག་རྟེན་འདིའི་ནང་སྐྱེས་པ་དང་བུད་མེད་མཉམ་དུ་བཞུགས་ཐུབ་བམ། མཐོ་རིས་ཡོངས་སུ་ཡང་ཁྱེད་ཤོང་བའི་ཆེན་པོ་མེད་སྟབས། ངས་བཞེངས་པའི་མཆོད་ཁང་འདིར་ཁྱེད་ཇི་ལྟར་ཤོང་ངམ།

¹⁹ གཙོ་བོ་དཀོན་མཆོག་ངའི་དཀོན་མཆོག་ལགས། ང་ནི་ཁྱེད་ཀྱི་ཞབས་ཕྱིས་ཡིན། ངས་གསོལ་བ་འདེབས་པར་གསན་ནས། ངས་ཁྱེད་ལ་རེ་བསྐུལ་ཞུས་པ་རྣམས་གནང་བར་མཛོད་ཅིག

²⁰ ཉིན་མཚན་གཉིས་ཀར་མཆོད་ཁང་འདིར་འཟིགས་རོགས་གནང་། ཁྱེད་ཀྱིས་གནས་འདི་ནི་ཁྱེད་ལ་མཆོད་ཡུལ་ཡིན་པའི་ཞལ་བཞེས་གནང་ཡོད་སྟབས། ངས་མཆོད་ཁང་འདིར་ཁ་བལྟས་ནས་གསོལ་བ་འདེབས་པར་གསན་པར་མཛོད།

²¹ གནས་འདིར་ཁ་བལྟས་ནས་ངས་གསོལ་བ་འདེབས་པ་དང་ཨིསི་རཱཨེལ་གྱི་མི་མང་ནས་གསོལ་བ་འདེབས་པར་གསན་རོགས་གནང་། ཁྱེད་ཀྱི་མཐོ་རིས་ཀྱི་བཞུགས་ཡུལ་ནས་ང་ཚོར་གསན་པ་དང་བཟོད་གསོལ་གནང་བར་མཛོད།

²² གལ་ཏེ་མི་ཞིག་གིས་གཞན་ལ་གནོད་སྐྱོན་བྱས་པའི་སྐྱོན་བཏགས་པར་ཁོ་པ་སྐྱོན་མེད་ཡིན་པའི་མནའ་བསྐྱེལ་བར་མཆོད་ཁང་འདིར་ཁྱེད་ཀྱི་མཆོད་ཁྲིའི་མདུན་དུ་འཁྲིད་ཡོང་བ་ཡིན་ན།

²³ ཀྱེ་གཙོ་བོ་དཀོན་མཆོག། ཁྱེད་ཀྱིས་དེ་ཚོ་མཐོ་རིས་ནས་གསན་ནས་ཁྱེད་ཀྱི་ཞབས་ཕྱི་ཚོར་ཁྲིམས་ཀྱི་དཔྱད་མཚམས་གཏོང་བར་མཛོད་ཅིག ཉེས་ཅན་ལ་དགོས་ངེས་ཀྱི་ཆད་པ་དང་སྐྱོན་མེད་ལ་བདེན་པ་གནང་བར་མཛོད་ཅིག

²⁴ ཨིསི་རཱཨེལ་གྱི་མི་མང་ཚོས་ཁྱེད་ཀྱི་སྤྱན་སྔར་སྡིག་པ་གྱིས་པའི་རྐྱེན་གྱིས་དེ་ཚོའི་དགྲ་བོས་ཕམ་པར་བྱས་རྗེས་དེ་ཚོས་ཁྱེད་ལ་བལྟས་ནས་མཆོད་ཁང་འདིར་ཡོང་ནས་ཉམ་ཆུང་གིས་ཁྱེད་ལ་བཟོད་གསོལ་གནང་རོགས་ཞུས་པ་ཡིན་ན།

²⁵ མཐོ་རིས་ནས་དེ་ཚོ་ལ་གསན་པར་མཛོད་ཅིག ཁྱེད་ཀྱི་མི་མང་སྡེི་པར་བཟོད་གསོལ་གནང་ནས་དེ་ཚོ་དང་དེ་ཚོའི་ཕ་མེས་ཚོར་གནང་བའི་ཡུལ་དུ་འཁྲིད་པར་མཛོད་ཅིག

²⁶ ཁྱེད་ཀྱི་མི་མང་གིས་ཁྱེད་ཀྱི་སྤྱན་སྔར་སྡིག་པ་གྱིས་པའི་རྐྱེན་གྱིས་ཁྱེད་ཀྱིས་ཆར་པ་འགོག་པར་གནང་སྐབས། དེ་ཚོའི་འགྱོད་བཤགས་ཀྱིས་མཆོད་ཁང་འདིར་ཁ་བལྟས་ནས་ཉམ་ཆུང་གིས་ཁྱེད་ལ་གསོལ་བ་འདེབས་པ་ཡིན་ན།

²⁷ ཀྱེ་གཙོ་བོ་དཀོན་མཆོག། དེ་ཚོ་ལ་མཐོ་རིས་ནས་གསན་ནས་ཨིསི་རཱཨེལ་གྱི་མི་མང་ཁྱེད་ཀྱི་ཞབས་ཕྱི་ཚོའི་སྡིག་པར་བཟོད་གསོལ་གནང་ནས་དེ་ཚོའི་འོས་པ་ཇི་བྱེད་དགོས་སློབ་སྟོན་གནང་བར་མཛོད། དེ་ནས་ཀྱེ་གཙོ་བོ་དཀོན་མཆོག། ཁྱེད་ཀྱི་མི་མང་ཚོར་གཏན་དུ་བདག་པར་གནང་བའི་ཡུལ་འདིར་ཆར་པ་གཏོང་བར་མཛོད་ཅིག

²⁸ ཡུལ་དུ་མུ་གེའམ་ནད་ཡམས་སམ་སྟོན་ཐོག་ལ་རླུང་འཚུབ་སྐམ་པོས་ཚིག་པའམ་ཆ་ག་འབུའི་ཁྱུ་ཚོགས་ཀྱིས་མེད་པར་བཟོས་པའམ་ཁྱེད་ཀྱི་མི་མང་ལ་དགྲ་བོས་འཛིང་པའམ་དེ་ཚོའི་ཁྲོད་དུ་རིམ་ནད་ཀྱི་མནར་བའི་སྐབས་སུ།

²⁹ དེ་ཚོས་གསོལ་བ་འདེབས་པ་ལ་གསན་པར་མཛོད་ཅིག ཁྱེད་ཀྱི་ཨིསི་རཱཨེལ་གྱི་མི་མང་སུ་ཞིག་ལ་སྡུག་བསྔལ་དྲག་པོས་མཆོད་ཁང་འདིའི་ཕྱོགས་སུ་གསོལ་འདེབས་ཆེད་ལག་པ་བརྐྱངས་པ་ཡིན་ན།

³⁰ དེ་ཚོའི་གསོལ་འདེབས་ལ་གསན་པར་མཛོད་ཅིག དེ་ཚོ་ལ་ཁྱེད་ཀྱི་མཐོ་རིས་ཀྱི་བཞུགས་གནས་ནས་བཟོད་གསོལ་གནང་བར་མཛོད་ཅིག ཁྱེད་གཅིག་པུས་འགྲོ་བ་མིའི་སེམས་རྟོགས་ཐུབ་པ་དང་། མི་རེ་རེ་ལ་དགོས་ངེས་ཀྱི་འབྲེལ་བ་གནང་རོགས།

³¹ དེ་བས་ཁྱེད་ཀྱིས་མི་མང་དེ་ཚོའི་ཕ་མེས་ཚོར་གནང་བའི་ཡུལ་དི་སྡོད་རིང་དུ་ཁྱེད་ལ་འཇིགས་པ་དང་ཁྱེད་ཀྱི་བཀའ་ལ་བརྩི་བཀུར་ཞུ་མཁན་དུ་འགྱུར་བར་གནང་བར་མཛོད་ཅིག

³² ཐག་རིང་དུ་བསྡད་པའི་ཕྱི་རྒྱལ་བ་ཞིག་གིས་ཁྱེད་ཀྱི་མཚན་སྙན་གྲགས་དང་མཐུ་སྟོབས་ཅན་གྱི་རྟག་ཏུ་བྱ་བ་མཛད་རྒྱུར་གྲ་སྒྲིགས་ཡོད་པ་བཅས་མཐོང་ནས་མཆོད་ཁང་འདིར་ཁྱེད་ལ་གསོལ་བ་འདེབས་པར་ཡོང་བ་ཡིན་ན།

³³ ཁོའི་གསོལ་འདེབས་ལ་གསན་པར་མཛོད། མཐོ་རིས་སུ་ཁྱེད་ཀྱི་བཞུགས་ས་ནས་ཁོ་ལ་གསན་ནས་ཁོས་ཞུ་བ་ཕུལ་བ་ལྟར་གནང་བར་མཛོད། དེ་ལྟར་ཁྱེད་ཀྱི་མི་མང་ལ་ཨིསི་རཱཨེལ་པ་ཚོས་བྱས་པ་ལྟར་འཛམ་གླིང་མི་མང་ཡོངས་ནས་ཁྱེད་ལ་ངོ་ཤེས་པ་དང་། ཁྱེད་ཀྱི་བཀའ་ལ་བརྩི་མཁན་དུ་འགྱུར་བར་མཛོད་ཅིག དེ་ནས་དེ་ཚོས་ཁྱེད་ལ་ངས་བཞེངས་པའི་མཆོད་ཡུལ་གྱི་མཆོད་ཁང་འདི་ངོ་ཤེས་པར་འགྱུར་རོ།

³⁴ ཁྱེད་ཀྱིས་རང་གི་མི་མང་རྣམས་དགྲ་བོར་འཐབ་པར་གཡུལ་དུ་འགྲོ་དགོས་པའི་བཀའ་གནང་སྐབས། ཁྱེད་ཀྱིས་འདམས་གནང་བའི་གྲོང་ཁྱེར་འདི་དང་། ངས་ཁྱེད་ཀྱི་ཕྱིར་བཞེངས་པའི་མཆོད་ཁང་འདིར་ཁ་བལྟས་ནས། དེ་ཚོས་ས་གནས་གང་ནས་ཁྱེད་ལ་སྨོན་ལམ་འདེབས་པ་ཡིན་ན།

³⁵ དེ་ཚོའི་གསོལ་འདེབས་ལ་མཐོ་རིས་ནས་གསན་ནས་དེ་ཚོ་ལ་རྒྱལ་ཁ་གནང་བར་མཛོད་ཅིག

³⁶ ཁྱེད་ཀྱི་མི་མང་གིས་ཁྱེད་ཀྱི་སྤྱན་སྔར་སྡིག་པ་གྱིས་ཡོད་པ་དང་། སྡིག་པ་མི་གྱིས་མཁན་སུ་ཡང་མེད་པ་དང་། ཁྱེད་ཐུགས་ཁྲོས་ནས་དགྲ་བོས་དེ་ཚོ་ལ་ཕམ་པར་བྱས་ནས། ཡུལ་ཐག་རིང་ཐུང་ཇི་འདྲ་བཙོན་པར་འཁྲིད་ཡོད་ནས་ཡང་།

³⁷ ཁྱེད་ཀྱི་དེ་ཚོའི་སྨོན་ལམ་ལ་གསན་པར་མཛོད། ཡུལ་དེར་དེ་ཚོས་སྡིག་པ་དང་སྤྱོད་ངན་ཇི་ལྟར་བྱས་པར་ངོས་ལེན་གྱིས་ནས་ཁྱེད་ལ་གསོལ་བ་འདེབས་པ་ཡིན་ན། ཀྱེ་གཙོ་བོ་དཀོན་མཆོག་དེ་ཚོའི་གསོལ་འདེབས་ལ་གསན་པར་མཛོད་ཅིག

³⁸ ཡུལ་དེར་དེ་ཚོའི་དངོས་འབྲེལ་དང་དྲང་པོའི་ངང་ནས་འགྱོད་བཤགས་ཕུལ་ན། ཁྱེད་ཀྱིས་འདམས་པ་གནང་བའི་ང་ཚོའི་ཕ་མེས་ཚོར་གནང་བའི་ཡུལ་དང་། ངས་ཁྱེད་ཀྱི་ཆེད་དུ་བཞེངས་པའི་མཆོད་ཁང་འདིའི་ཕྱོགས་སུ་བལྟས་ནས་སྨོན་ལམ་འདེབས་པ་ཡིན་ན།

³⁹ དེ་ཚོའི་སྨོན་ལམ་ལ་གསན་པར་མཛོད་ཅིག ཁྱེད་ཀྱི་མཐོ་རིས་ཀྱི་བཞུགས་གནས་ནས་དེ་ཚོ་ལ་གསན་ནས་སྙིང་རྗེ་ཆེན་པོས་ཁྱེད་ཀྱི་མི་མང་ཚོའི་སྡིག་པ་རྣམས་ལ་བཟོད་གསོལ་གནང་བར་མཛོད་ཅིག

⁴⁰ ད་ངའི་དཀོན་མཆོག་ཁྱེད་ཀྱིས་ང་ཚོར་གཟིགས་ནས་གནས་འདིར་བཏབ་པའི་སྨོན་ལམ་ལ་གསན་པར་མཛོད་ཅིག

⁴¹ ད་གཙོ་བོ་དཀོན་མཆོག་བཞེངས་ནས། ཁྱེད་ཀྱི་མཐུ་སྟོབས་ཀྱི་མཚན་རྟགས་དམ་བཅའི་སྒྲོམ་འདི་མཉམ་དུ་མཆོད་ཁང་ནང་གཤེགས་ནས་ཇི་སྲིད་ནམ་གནས་བར་དེར་བཞུགས་སུ་གསོལ། ཁྱེད་ཀྱི་བླ་མ་ཚོས་བྱེད་པའི་བྱ་བ་ཐམས་ཅད་ལ་བྱིན་རླབས་གནང་རོགས། ཁྱེད་ཀྱི་མི་མང་རྣམས་དགའ་སྐྱིད་ཡོང་བར་ཤོག། གང་ལ་ཟེར་ན། ཁྱེད་ཀྱིས་དེ་ཚོ་ལ་བཟང་པོ་གནང་བའི་ཕྱིར་རོ།

⁴² གཙོ་བོ་དཀོན་མཆོག་ཁྱེད་ཀྱིས་འདམས་གནང་བའི་རྒྱལ་པོ་ལ་མ་སྤངས་རོགས་གནང་། ཁྱེད་ཀྱི་ཞབས་ཕྱི་དཱ་བིད་ལ་ཡོད་པའི་ཐུགས་བརྩེ་བ་དེ་དྲན་གསོས་གནང་བར་མཛོད༎