སྔོན་རབས་གཉིས་པ། 5 - Tibetan Old Testament 2011

¹ རྒྱལ་པོ་སོ་ལོ་མོན་གྱིས་མཆོད་ཁང་གི་ཕྱག་ལས་རྣམས་གྲུབ་པ་དང་། གསེར་དངུལ་དང་གཞན་དངོས་པོ་རྣམས་ཁོང་གི་ཡབ་དཱ་བིད་ཀྱིས་གཙོ་བོ་དཀོན་མཆོག་ལ་བསྔོ་བའི་མཆོད་ཁང་གི་བང་མཛོད་ནང་བཞག་གནང་ངོ་༎

དམ་བཅའི་སྒྲོམ་དེ་མཆོད་ཁང་ནང་གདན་དྲངས་བ།

² གཙོ་བོ་དཀོན་མཆོག་གི་དམ་བཅའི་སྒྲོམ་དེ་ཛི་ཡོན་ནས་དཱ་བིད་ཀྱི་གྲོང་ཁྱེར་གྱི་མཆོད་ཁང་ནང་འཁྱེར་ཡོང་བར་རྒྱལ་པོ་སོ་ལོ་མོན་གྱིས་ཨིསི་རཱཨེལ་གྱི་སྡེ་རིགས་ཀྱི་འགོ་འཛིན་དང་རིགས་རུས་ཀྱི་འགོ་འཛིན་རྣམས་ཡེ་རུ་ཤ་ལེམ་དུ་འཛོམས་དགོས་པའི་བཀའ་གནང་ངོ་།

³ དེ་ཚོ་ཚང་མ་རྩ་ཡབ་ཀྱི་དུས་ཆེན་སྐབས་སུ་འཛོམས་སོ།

⁴ འགོ་འཛིན་རྣམས་ཚང་མ་འཛོམས་པ་དང་ལེ་ཝི་པས་དམ་བཅའི་སྒྲོམ་དེ་སྟེགས་ནས།

⁵ མཆོད་ཁང་དུ་འཁྱེར་རོ། བླ་མ་དང་ལེ་ཝི་པ་ཚོས་གཙོ་བོ་དཀོན་མཆོག་གནས་པའི་དབུ་གུར་དམ་པ་དང་དེའི་དངོས་པོ་ཚང་མ་མཆོད་ཁང་ནང་འཁྱེར་རོ།

⁶ རྒྱལ་པོ་སོ་ལོ་མོན་དང་ཨིསི་རཱཨེལ་གྱི་མི་མང་རྣམས་དམ་བཅའི་སྒྲོམ་གྱི་མདུན་དུ་འཛོམས་ནས་ལུག་དང་བ་ཕྱུགས་གྲངས་ལས་འདས་པ་ཧ་ཅང་མང་པོ་དམར་མཆོད་དུ་ཕུལ་ལོ།

⁷ དེ་ནས་བླ་མ་ཚོས་གཙོ་བོ་དཀོན་མཆོག་གི་དམ་བཅའི་སྒྲོམ་དེ་འཁྱེར་ནས་ཀེ་རུབ་ཚོའི་འགོ་ཏུ་ཤིན་ཏུ་དམ་པའི་གནས་སུ་འཇོག་གནང་ངོ་།

⁸ དེ་ཚོས་ཤོག་པ་བརྐྱངས་ནས་ཡོད་པས་སྒྲོམ་དང་འཁུར་བྱེད་རྒྱུག་པ་རྣམས་དང་བཅས་པ་བཀབ་ཡོད་དོ།

⁹ རྒྱུག་པའི་མཐའ་དེ་ཚོ་ཤིན་ཏུ་དམ་པའི་གནས་ཀྱི་མདུན་དུ་ཐད་ཀར་སྡོད་མི་ཚོས་མཐོང་བ་ལས་གཞན་གང་ནས་ཀྱང་མི་མཐོང་ངོ་། (རྒྱུག་པ་རྣམས་དེང་སང་ཡང་དེར་ཡོད་དོ།)

¹⁰ དམ་བཅའི་སྒྲོམ་ནང་ཨིསི་རཱཨེལ་གྱི་མི་མང་རྣམས་ཨི་ཇིབ་ཡུལ་ནས་ཡོང་སྐབས་གཙོ་བོ་དཀོན་མཆོག་གིས་དེ་ཚོ་དང་དམ་བཅའ་མཛད་པའི་རྡོ་ལེབ་གཉིས་པོ་དེ་མོ་ཤེས་རི་བོ་སི་ནཡེའི་རུ་བཞག་པ་དེ་མ་གཏོགས་གཞན་གང་ཡང་དེར་མེད་དོ༎

གཙོ་བོ་དཀོན་མཆོག་གི་བཟི་བརྗིད།

^11-14 དེར་ཡོད་བླ་མ་ཚང་མ་ཚོ་ཁག་གང་ནས་ཡིན་རུང་རང་རང་སོ་སོར་གཙང་བར་བྱས་སོ། རོལ་མོ་མཁན་ལེ་ཝི་པ་ཡོངས་དང་། ཨ་སཕེ་དང་། ཧེ་མན་དང་ཡེ་དུ་ཐུན་དང་དེ་ཚོའི་རིགས་རུས་ཀྱི་མཐུས་མི་ནས་རས་ཀ་ཤི་ཀའི་གོས་གྱོན་ཡོད་དོ། ལེ་ཝི་པ་ཚོ་མཆོད་ཁྲིའི་ཤར་ཕྱོགས་ཀྱི་ཉེ་འགྲམ་དུ་སྦུབ་དང་སྒྲ་སྙན་དང་བཅས་ལངས་ནས་དེ་ཚོ་དང་མཉམ་དུ་དུང་འབུད་མཁན་བླ་མ་ ༡༢༠ ཡོད་པ་དང་། མགུར་མ་ལེན་མཁན་ཚོས་དུང་དང་སྦུབ་དང་གཞན་རོལ་ཆས་སྣ་ཚོགས་དང་བཅས་གཙོ་བོ་དཀོན་མཆོག་ལ་འདི་ལྟར་སྒྲ་དབྱངས་ཤིན་ཏུ་མཐུན་པོས་བསྟོད་པ་ཕུལ་ལོ། གཙོ་བོ་དཀོན་མཆོག་ལ་བསྟོད་པ་ཕུལ་ཤིག གང་ལགས་ཟེར་ན། ཁོང་ནི་བཟང་པོ་ཡིན་པ་དང་། ཁོང་གི་ཐུགས་བརྩེ་ནི་མཐའ་མེད་པ་ཡིན་ནོ། བླ་མ་ཚོ་མཆོད་ཁང་ནས་ཐོན་སྐབས་གཙོ་བོ་དཀོན་མཆོག་གི་བཞུགས་གནས་སུ་འོད་འཚེར་བའི་སྤྲིན་ཚོགས་ཀྱིས་དེ་ཁེངས་པ་དང་དེ་ཚོའི་མཆོད་པའི་མཛད་སྒོ་མུ་མཐུད་ནས་བྱས་མ་ཐུབ་བོ༎