སྔོན་རབས་གཉིས་པ། 3 - Tibetan Old Testament 2011

¹ སོ་ལོ་མོན་གྱི་ཡབ་རྒྱལ་པོ་དཱ་བིད་ཀྱིས་ཐོག་མ་ནས་མཆོད་ཁང་བཞེངས་པའི་ཆེད་དུ་ས་ཆ་གོ་སྒྲིགས་གནང་ཡོད། དེ་ནི་ཡེ་རུ་ཤ་ལེམ་གྱི་རི་བོ་མོ་རི་ཡའི་སྟེང་ཡེ་བྷསེ་པ་ཨ་རོ་ནཱའི་གཡུལ་ཁ་བྱ་ཡུལ་གནས་དེར་ཡིན་ནོ། དེར་རྒྱལ་པོ་དཱ་བིད་ལ་གཙོ་བོ་དཀོན་མཆོག་མངོན་པར་མཇལ་གནང་ཡོད་དོ། རྒྱལ་པོ་སོ་ལོ་མོན་གྱིས་དེའི་འཛུགས་བསྐྲུན་འགོ་ཆུགས་གནང་ངོ།

² ཁོང་རྒྱལ་པོ་གནང་བའི་ལོ་བཞི་པའི་ཟླ་བ་གཉིས་པའི་ནང་འགོ་འཛུགས་གནང་ཡོད།

³ རྒྱལ་པོ་སོ་ལོ་མོན་གྱིས་བཞེངས་པའི་མཆོད་ཁང་དེའི་རིང་ཐུང་ལ་མི་ཀྲར་ཉི་ཤུ་རྩ་བདུན་དང་ཞེང་ཁར་མི་ཀྲར་དགུ་ཡོད་དོ།

⁴ འཛུལ་སྒོའི་ཁང་མིག་དེ་མཆོད་ཁང་གི་ཞེང་ཁ་ལྟར་མི་ཀྲར་དགུ་དང་མཐོ་ཚད་མི་ཀྲར་ལྔ་བཅུ་ང་བཞི་ཡོད། ཁང་མིག་དེའི་ནང་གི་ས་མཐིལ་ནི་གསེར་སྤུས་དག་གིས་བཏུམ་ཡོད་དོ།

⁵ ཁང་མིག་གཙོ་བོ་དེ་འགྱམ་ཤིང་གི་སྤང་ལེབ་ཀྱིས་བཀབ་ནས། དེར་གསེར་སྤུས་དག་གིས་གཡོགས་ཡོད་ཅིང་། དེ་ཚོའི་སྟེང་དུ་ཁ་ཟུར་ཤིང་དང་ཅག་ཐག་གི་བཟོ་དབྱིབས་བཀོད་ཡོད་དོ།

⁶ རྒྱལ་པོས་མཆོད་ཁང་དེ་པར་ཝེམ་ཡུལ་ནས་འོར་འདྲེན་བྱས་པའི་རིན་ཆེན་རྡོ་མཛེས་པོ་དང་གསེར་གྱིས་ཕྲ་རྒྱན་གྱིས་སྤྲོས་གནང་ཡོད།

⁷ རྒྱལ་པོས་མཆོད་ཁང་གི་རྩིག་པ་དང་མདུང་མ་དང་ཐེམ་ཀ་དང་སྒོ་བཅས་པར་གསེར་གིས་གཡོགས་གནང་ངོ་། རྩིག་པའི་སྟེང་ལག་ཤེས་པ་ཚོས་ཀེ་རུབ་ཀྱི་བཟོ་དབྱིབས་བརྐོས་ཡོད་དོ།

⁸ ཁང་མིག་ནང་མ་ཤིན་ཏུ་དམ་པའི་གནས་ཟེར་བ་དེའི་རིང་ཐུང་མི་ཀྲར་དགུ་དང་ཞེང་ཁ་མི་ཀྲར་དགུ་བཅས་མཆོད་ཁང་གི་ཞེང་ཁ་ལྟར་ཡོད། ཤིན་ཏུ་དམ་པའི་གནས་ཀྱི་རྩིག་པ་བཏུམ་པར་གསེར་མི་ཀྲི་རིག་ཀྲོན་ཉི་ཤུ་ལྷག་པ་བེད་སྤྱོད་གནང་ངོ་།

⁹ གསེར་གྷ་རམ་ ༥༧༠ དེས་གཟེར་བཟོས་སོ། སྟེང་གི་ཁང་མིག་ཚོའི་རྩིག་པ་ལ་ཡང་གསེར་གཡོགས་ཡོད་དོ།

¹⁰ རྒྱལ་པོས་ལག་ཤེས་པ་ཚོར་གསེར་དངུལ་ཟངས་ལྕགས་རིགས་ཀྱི་ཀེ་རུབ་གཉིས་བཟོས་དགོས་པ་དང་། དེ་ཚོ་ལ་གསེར་གཡོགས་ནས་ཤིན་ཏུ་དམ་པའི་གནས་སུ་འཇོགས་དགོས་པའི་བཀའ་གནང་ངོ་།

^11-13 དེར་དེ་ཚོ་རྒྱལ་སྒོའི་འགྲམ་དུ་གཅིག་གིས་གཅིག་ལ་ཁ་བལྟས་ནས་བཞག་དགོས་སོ། རེ་རེ་ཤོག་པ་ཆ་གཅིག་དང་ཤོག་པ་རེ་རེེར་རིང་ཐུང་མི་ཀྲར་ ༢.༢ ཡོད་པ་དང་། དེ་ཚོ་ཁང་མིག་གི་དཀྱིལ་དུ་གཅིག་གི་གཅིག་ལ་རེག་པ་བྱས་ཏེ་བརྐྱངས་ཡོད་པ་དང་། ཁང་མིག་གི་གཡས་གཡོན་གྱི་རྩིག་པར་ཐུག་ཡོད་པར་མི་ཀྲར་དགུ་ཙམ་གྱི་ཞེངས་ཁ་ཚང་མ་བརྐྱངས་ཡོད་དོ།

¹⁴ ཤིན་ཏུ་དམ་པའི་གནས་དེའི་ཡོལ་བ་དེ་ཀ་ཤི་ཀའི་རས་དང་གཞན་རྒྱུ་ཆ་ཚོན་མདོག་སྔོན་པོ་དང་མུ་མན་དང་དམར་པོའི་སྟེང་ཀེ་རུབ་ཀྱི་བཟོ་དབྱིབས་ཡོད་པ་བཟོས་ཡོད་དོ༎

ལིའི་ཀ་བ་གཉིས།

¹⁵ རྒྱལ་པོས་ཀ་བ་རེ་རེར་རིང་ཐུང་མི་ཀྲར་ ༡༥.༥ ཡོད་པ་གཉིས་བཟོས་གནང་བ་དང་དེ་གཉིས་མཆོད་ཁང་གི་མདུན་དུ་འཇོག་གནང་ངོ་། དེ་ཚོ་རེ་རེར་ཀ་གཞུ་རིང་ཐུང་མི་ཀྲར་ ༢.༢ བྱས་པ་ཡོད།

¹⁶ ཀ་བ་དེ་ཚོའི་སྟེང་དུ་ཅག་ཐག་ཕར་འགྲེལ་ཚུར་འབྲེལ་གྱི་བཟོ་དབྱིབས་དང་ལིའི་སེ་འབྲུ་ ༡༠༠ ཐམ་པས་བརྒྱན་སྤྲོད་བྱས་ཡོད་དོ།

¹⁷ ཀ་བ་དེ་ཚོ་མཆོད་ཁང་གི་འཛུལ་སྒོའི་ཉེ་འགྲམ་དུ་ཡོད་པ་དང་། དེ་ནས་གཅིག་ལྷོར་ཡོད་པ་དེ་ལ་ཡ་ཀིན་ཟེར་བ་དང་། བྱང་ལ་ཡོད་པ་དེ་ལ་བྷོ་ཨཛ་ཟེར་རོ༎