སྔོན་རབས་གཉིས་པ། 27 - Tibetan Old Testament 2011

ཡ་ཧུ་དཱ་པའི་རྒྱལ་པོ་ཡོ་ཐམ།

¹ ཡོ་ཐམ་དགུང་ལོ་ཉི་ཤུ་རྩ་ལྔ་ལོན་ནས་རྒྱལ་པོར་འགྱུར་བ་དང་། ཁོང་གིས་ལོ་བཅུ་དྲུག་རིང་ཡེ་རུ་ཤ་ལེམ་དུ་རྒྱལ་སྲིད་བསྐྱངས་སོ། ཁོང་གི་ཡུམ་ནི་ཛ་དཱོག་གི་སྲས་མོ་ཡེ་རུ་ཤཱ་ཟེར་བ་དེ་ཡིན་ནོ།

² ཁོང་གིས་རང་གི་ཡབ་ཀྱི་མཛད་པ་ལྟར་གཙོ་བོ་དཀོན་མཆོག་གི་ཐུགས་མཉེས་པ་འབའ་ཞིག་གནང་ན་ཡང་། ཁོང་གི་ཡབ་ལྟར་མཆོད་ཁང་དུ་བདུག་སྤོས་བདུག་པའི་སྡིག་པ་གནང་མེད་དོ། འོན་ཀྱང་མི་མང་རྣམས་ནས་སྡིག་པ་བྱས་བཞིན་གནས་སོ།

³ ཡོ་ཐམ་གྱིས་མཆོད་ཁང་གི་བྱང་གི་རྒྱལ་སྒོ་བཟོས་པ་དང་། ཡེ་རུ་ཤ་ལེམ་གྱི་ས་ཁུལ་ཨོ་ཕེལ་ཞེས་པར་གྲོང་ཁྱེར་གྱི་ལྕགས་རིའི་ལས་འགུལ་རྒྱ་ཆེ་གནང་ངོ་།

⁴ ཁོང་གིས་ཡ་ཧུ་ད་པའི་རི་བོའི་ཁུལ་དུ་གྲོང་ཁྱེར་ཁག་བཟོས་པ་དང་། ཤིང་ནག་ནང་ཁོང་གིས་མཁར་དང་གན་དྷོ་ལ་ཁག་བཟོས་སོ།

⁵ ཁོང་གིས་ཨམ་མོན་གྱི་རྒྱལ་པོ་དང་འཐབ་ནས་དེ་ཚོའི་དམག་མི་རྣམས་ཕམ་པར་མཛད་དོ། དེ་ནས་ཁོང་གིས་ཨམ་མོན་པ་ཚོར་ལོ་གསུམ་རིང་ལོ་ལྟར་དངུལ་ཀི་ལོ་གྷ་རམ་ ༣,༤༠༠ དང་། གྲོ་ཀྲོན་ ༡,༠༠༠ དང་། ནད་ཀྲོན་ ༡,༠༠༠ ཁྲལ་ཕུལ་དགོས་པ་བཟོས་སོ།

⁶ ཡོ་ཐམ་གྱི་ཁོང་གི་གཙོ་བོ་དཀོན་མཆོག་ལ་ལྷག་བསམ་རྣམ་དག་གིས་བཀའ་ལ་ཉན་ནས་ཁོང་གི་སྟོབས་ཤུགས་ཆེ་རུ་འཕེལ་ལོ།

⁷ ཡོ་ཐམ་གྱི་སྲིད་སྐྱོང་སྐབས་ཀྱི་གནས་ཚུལ་གཞན་ཁག་ནི། དམག་འཁྲུགས་དང་ཁོང་གི་སྲིད་བྱུས་སོགས་ཚང་མ་ཨིསི་རཱཨེལ་དང་ཡ་ཧུ་དཱ་པའི་རྒྱལ་པོ་རྣམས་ཀྱི་རྒྱལ་རབས་ནང་བཀོད་ཡོད་དོ།

⁸ ཡོ་ཐམ་རྒྱལ་པོར་འགྱུར་སྐབས་དགུང་ལོ་ཉི་ཤུ་རྩ་ལྔ་ཡིན་པ་དང་། ཁོང་གིས་ཡེ་རུ་ཤ་ལེམ་དུ་ལོ་བཅུ་དྲུག་རིང་རྒྱལ་སྲིད་བཟུང་ངོ་།

⁹ ཁོང་གྲོངས་ནས་དཱ་བིད་ཀྱི་གྲོང་ཁྱེར་ནང་སྦས་པ་དང་། ཁོང་གི་སྲས་ཨ་ཧཛ་ཁོང་གི་ཤུལ་འཛིན་དུ་རྒྱལ་པོར་འགྱུར་རོ༎