སྔོན་རབས་གཉིས་པ། 26 - Tibetan Old Testament 2011

ཡ་ཧུ་དཱ་པའི་རྒྱལ་པོ་ཨུ་ཛི་ཡཱ།

¹ ཡ་ཧུ་དཱ་པའི་མི་མང་རྣམས་ནས་ཨ་མ་ཛ་ཡཱའི་སྲས་ཨུ་ཛི་ཡཱ་དགུང་ལོ་བཅུ་དྲུག་ལ་ཕེབས་པ་དེ་ལ་ཡབ་ཀྱི་ཤུལ་འཛིན་དུ་རྒྱལ་པོར་བསྐོས་སོ།

² (ཨ་མ་ཛ་ཡཱ་གྲོངས་པའི་རྗེས་སུ་ཨུ་ཛི་ཡཱས་ཨེ་ལད་སྐྱར་བཟུང་གནང་ནས་གྲོང་ཁྱེར་རྣམས་སྐྱར་བཟོ་གནང་ངོ་།)

³ ཨུ་ཛི་ཡཱ་དགུང་ལོ་བཅུ་དྲུག་ལ་རྒྱལ་པོར་འགྱུར་བ་དང་། ཁོང་གིས་ཡེ་རུ་ཤ་ལེམ་དུ་ལོ་ལྔ་བཅུ་ང་གཉིས་རིང་རྒྱལ་སྲིད་བསྐྱངས་སོ། ཁོང་གི་ཡུམ་ཡེ་རུ་ཤ་ལེམ་གྱི་ཡེ་ཀོལ་ཡཱ་ཟེར་བ་དེ་ཡིན་ནོ།

⁴ ཁོང་གིས་རང་གི་ཡབ་རྒྱལ་པོའི་རྗེས་སུ་འཇུག་ནས་གཙོ་བོ་དཀོན་མཆོག་གིས་ཐུགས་མཉེས་པ་འབའ་ཞིག་གནང་ཡོད་དོ།

⁵ ཁོང་གི་ཆོས་ཀྱི་སློབ་སྟོན་པ་ཛེ་ཀར་ཡ་ལ་འཚོ་བཞུགས་རིང་ཁོང་གིས་གཙོ་བོ་དཀོན་མཆོག་ལ་ལྷག་བསམ་རྣམ་དག་གིས་ཞབས་ཞུ་ཞུས་པ་དང་དཀོན་མཆོག་གིས་ཁོང་ལ་བྱིན་རླབས་གནང་ངོ་།

⁶ ཨུ་ཛི་ཡཱས་ཕེ་ལེ་ཤེད་པ་མཉམ་དུ་དམག་འཐབ་གནང་བ་དང་། ཁོང་གིས་གྲོང་ཁྱེར་གྷད་དང་ཛམ་ནི་ཨ་དང་ཨཤ་དྷོད་ཀྱི་ལྕགས་རི་རྣམས་བཤིགས་པ་དང་། ཨཤ་དྷོད་ཀྱི་ཉེ་འགྲམ་དང་ཕེ་ལེ་ཤེད་ཀྱི་གྲོང་ཁྱེར་ལྷག་ལུས་རྣམས་བཙན་པོར་བཟོས་སོ།

⁷ དཀོན་མཆོག་གིས་ཕེ་ལེ་ཤེད་པ་དང་གྷུར་བྷལ་དུ་སྡོད་མཁན་ཨ་རབ་པ་ཚོ་དང་མུ་ནི་པ་བཅས་ལ་ཕམ་པར་བྱེད་རྒྱུར་ཁོང་ལ་རོགས་གནང་ངོ་།

⁸ ཨམ་མོན་པ་ཚོས་ཨུ་ཛི་ཡཱ་ལ་དཔྱ་ཁྲལ་ཕུལ་བ་དང་ཁོང་ཧ་ཅང་སྟོབས་ཤུགས་ཆེན་པོར་འགྱུར་སྐབས་ཁོང་གི་སྙན་གྲགས་ནི་ཨི་ཇིབ་དུ་ཡང་ཁྱབ་བོ།

⁹ ཨུ་ཛི་ཡཱས། ཟུར་གྱི་རྒྱལ་སྒོ་ཁག་དང་ལུང་གཤོང་གི་རྒྱལ་སྒོ་དང་ལྕགས་རི་བསྐོར་ཀྱོག་ཁག་ལ་གན་དྷོ་ལ་རིང་པོ་བརྩིགས་ནས་ཡེ་རུ་ཤ་ལེམ་བཙན་པོ་བཟོས་ནས་ཤུགས་ཆེར་བཏང་ངོ་།

¹⁰ ཁོང་གིས་ཡུལ་གྱི་ས་སྟོང་ཁུལ་དུ་གན་དྷོ་ལ་རིང་པོ་བཙན་པོ་བཟོས་པ་དང་ཆུ་མཛོད་མང་པོ་བྲུས་སོ། གང་ལ་ཟེར་ན། ཁོང་ལ་ནུབ་ཕྱོགས་རི་གཤམ་དང་ཐང་ཁུལ་དུ་བ་ཕྱུགས་ཀྱི་ཁྱུ་ཚོགས་མང་པོ་ཡོད་དོ། ཁོང་ནི་ཞིང་ལས་ལ་མཉེས་པོ་ཡོད་སྟབས། ཁོང་གིས་མི་མང་ལ་རི་ཁུལ་ཡུལ་ཁག་ཏུ་རྒུན་ཚལ་འདེབས་པ་དང་ས་ལུད་འཛོམས་པའི་ས་ཆར་ས་ཞིང་འདེབས་དགོས་པའི་སེམས་ཤུགས་སྤྲོད་གནང་གི་ཡོད་དོ།

¹¹ ཁོང་ལ་དམག་གི་ཕྱིར་དམག་དཔུང་ཁྱོན་ཆེ་གྲ་སྒྲིགས་ཡོད་དོ། དེ་ཚོའི་ལོ་རྒྱུས་ཁོང་གི་དྲུང་ཡིག་ཡི་ཨེལ་དང་མ་སི་ཨ་ནས་རྒྱལ་པོའི་ལས་བྱའི་འཐུས་མི་ཧ་ནན་ཡཱའི་ལམ་སྟོན་འོག་བཀོད་པ་བཏང་གི་ཡོད།

¹² དམག་དཔོན་ ༢,༦༠༠ དམག་མི་རྣམས་ལ་བཀའ་བཀོད་གནང་གི་ཡོད།

¹³ དེ་ཚོའི་འོག་ཏུ་རྒྱལ་པོའི་དགྲ་བོ་ཚོར་དམག་ནུས་ཤུགས་ཀྱི་རྒྱབ་ཐུབ་མཁན་འབྱོན་སྟངས་ཅན་གྱི་དམག་མི་རྩལ་ལྡན་ ༣༠༧,༥༠༠ ཡོད་དོ།

¹⁴ ཨུ་ཛི་ཡཱས་དམག་མི་རྣམས་ལ་ཕུབ་དང་མདུང་དང་རྨོག་དང་གོ་ཁྲབ་དང་གཞུ་དང་འུར་རྡོ་བཅས་མཁོ་སྒྲུབ་གནང་ངོ་།

¹⁵ ཡེ་རུ་ཤ་ལེམ་དུ་ཁོང་གི་གསར་དུ་བཟོ་མཁན་ཚོས་མདའ་འཕེན་པའི་ཡོ་བྱད་དང་གྲོང་ཁྱེར་གྱི་ལྕགས་རི་གན་དྷོ་ལ་རིང་པོ་ནས་རྡོ་ཤིན་ཏུ་ཆེན་པོ་དབྱུགས་བྱེད་ཡོ་བྱད་བཟོས་སོ། ཁོང་ལ་གཙོ་བོ་དཀོན་མཆོག་གིས་རོགས་པ་ཐོབ་པའི་རྐྱེན་གྱིས་ཁོང་མཚན་སྙན་གྲགས་ཡོངས་སུ་ཁྱབ་པ་དང་ཁོང་ཧ་ཅང་སྟོབས་ཤུགས་ཆེན་པོར་འགྱུར་རོ༎

ཨུ་ཛི་ཡཱའི་ང་རྒྱལ་ལ་བརྟེན་ནས་ཆད་པ་བཏང་བ།

¹⁶ འོན་ཀྱང་རྒྱལ་པོ་ཨུ་ཛི་ཡཱ་སྟོབས་ཆེ་རུ་ཕྱིན་པ་དང་། ཁོང་ང་རྒྱལ་ཇི་ཆེར་འགྱུར་བ་དེ་ལས་ཉམས་རྒུད་ཀྱི་རྐྱེན་དུ་འགྱུར་རོ། ཁོང་གིས་སྤོས་བདུག་པའི་མཆོད་ཁྲིའི་སྟེང་སྤོས་བདུག་པར་ཕེབས་ནས། ཁོང་གིས་རང་གི་དཀོན་མཆོག་གཙོ་བོ་དཀོན་མཆོག་ལ་བརྩི་མེད་ཞུས་སོ།

¹⁷ བླ་མ་ཨ་ཛར་ཡཱ་དང་ཁོང་མཉམ་བློ་སྟོབས་ཅན་གྱི་བླ་མ་བརྒྱད་བཅུ་རྒྱལ་པོའི་རྗེས་སུ་ཕེབས་ནས།

¹⁸ ཁོང་ལ་སྐྱོན་བརྗོད་གནང་ནས། དེ་ཚོས་ཨུ་ཛི་ཡཱ་ཁྱེད་འདིར་གཙོ་བོ་དཀོན་མཆོག་ལ་སྤོས་བདུག་པར་ཕེབས་པའི་ཐོབ་ཐང་མེད། ཨ་རོན་གྱི་བརྒྱུད་ལས་ཆད་པའི་བླ་མ་རྣམས་ལ་དེ་ལྟར་བྱེད་པར་བསྔོ་འབུལ་མཛད་ཡོད། གནས་དམ་པ་འདི་ནས་ཐོན་ཞིག། ཁྱེད་ཀྱིས་གཙོ་བོ་དཀོན་མཆོག་གི་བཀའ་ལས་འགལ་ཡོད་པས་ཁྱེད་ལ་ཁོང་གི་བྱིན་རླབས་མེད་ཅེས་ཞུས་སོ།

¹⁹ ཨུ་ཛི་ཡཱ་མཆོད་ཁང་ནང་དུ་བདུག་སྤོས་ཀྱི་མཆོད་ཁྲིའི་ཉེ་འགྲམ་དུ་བཞེངས་ཡོད་པ་དང་། ཕྱག་ཏུ་བདུག་སྤོས་འཁྱེར་ནས་ཡོད། ཁོང་བླ་མ་ཚོ་ལ་ཐུགས་ཁྲོས་པ་དང་། དེ་མ་ཐག་ཁོང་གི་དཔྲལ་བར་པགས་ནད་ཚབ་ཆེ་ཞིག་ཐོན་ནོ།

²⁰ ཨ་ཛར་ཡཱ་དང་གཞན་བླ་མ་ཆོས་རྒྱལ་པོའི་དཔྲལ་བར་འཇིགས་སྐྲག་ངང་བལྟས་ནས་ཁོང་མཆོད་ཁང་ནས་བཙན་དབང་གི་ཕྱིར་འབུད་གནང་ངོ་། ཁོང་རང་ཡང་མགྱོགས་པོར་ཕྱིར་ཐོན་ནོ། གང་ལ་ཟེར་ན། གཙོ་བོ་དཀོན་མཆོག་གིས་ཁོང་ལ་ཆད་པ་གཏོང་གནང་ཡོད་དོ།

²¹ ན་ཚ་དེས་རྒྱལ་པོ་ཨུ་ཛི་ཡཱའི་སྐུ་ཚེའི་ཁྲོད་རྣམས་ཆོ་ག་ལྟར་མི་གཙང་བར་འགྱུར་བའོ། མཆོད་ཁང་དུ་ཕེབས་མི་ཆོག་པས་ཁོང་རང་ཉིད་ཀྱི་གཟིམ་ཁང་ནང་བཞུགས་དགོས་པ་དང་། ཁོང་རང་གི་ཕྱག་ལས་ཚང་མ་མཚམས་བཞག་པ་དང་། ཁོང་གི་སྲས་ཡོ་ཐམ་གྱིས་ཡུལ་གྱི་འཛིན་སྐྱོངས་གནང་ངོ་།

²² ཨ་མོཛའི་བུ་ལུང་སྟོན་པ་ཨེ་ཤ་ཡཱས་རྒྱལ་པོ་ཨུ་ཛི་ཡཱའི་སྐུ་དུས་རིང་གི་མཛད་པ་རྣམས་དེབ་བཀོད་གཞན་ནང་བཀོད་ཡོད་དོ།

²³ ཨུ་ཛི་ཡཱ་གྲོངས་པ་དང་རྒྱལ་བརྒྱུད་དུ་སྦས་ཡོད་ན་ཡང་། ཁོང་གི་ནད་ཀྱི་རྐྱེན་ཀྱིས་རྒྱལ་པོའི་དུར་ཁང་ནང་སྦས་མེད་དོ། ཁོང་གི་སྲས་ཡོ་ཐམ་ནི་ཁོང་གི་ཤུལ་འཛིན་དུ་རྒྱལ་པོར་འགྱུར་རོ༎