སྔོན་རབས་གཉིས་པ། 25 - Tibetan Old Testament 2011

ཡ་ཧུ་དཱ་པའི་རྒྱལ་པོ་ཨ་མ་ཛ་ཡཱ།

¹ ཨ་མ་ཛ་ཡཱ་དགུང་ལོ་ཉི་ཤུ་རྩ་ལྔར་རྒྱལ་པོར་འགྱུར་བ་དང་། ཁོང་གིས་ཡེ་རུ་ཤ་ལེམ་དུ་ལོ་ཉི་ཤུ་རྩ་དགུའི་རིང་རྒྱལ་སྲིད་བསྐྱངས་སོ། ཁོང་གི་ཡུམ་ནི་ཡེ་རུ་ཤ་ལེམ་གྱི་ཡེ་ཧོ་ཨ་དྷིན་ཟེར་བ་ཡིན་ནོ།

² ཁོང་གིས་གཙོ་བོ་དཀོན་མཆོག་ཐུགས་མཉེས་པ་འབའ་ཞིག་གནང་ཡང་། དེ་ཚོ་རང་གི་སྙིང་ཐག་པ་ནས་བྱས་མེད་དོ།

³ ཁོང་གི་དབང་བརྟན་པོར་འགྱུར་མ་ཐག། ཁོང་གིས་རང་གི་ཡབ་བཀྲོང་མཁན་ལས་བྱེད་པ་རྣམས་དམར་གསོད་བཏང་ངོ་།

⁴ འོན་ཀྱང་ཁོང་གིས་དེ་ཚོའི་བུ་ཕྲུག་ཚོ་ལ་བསད་མེད་དོ། ཁོང་གིས་གཙོ་བོ་དཀོན་མཆོག་གི་བཀའ་མོ་ཤེའི་བཀའ་ཁྲིམས་ནང་བུ་ཕྲུག་ཚོས་ཉེས་པ་གྱིས་པར་ཕ་མ་འཆི་རུ་མི་རུང་བ་དང་། ཕ་མ་ཚོས་ཉེས་པ་གྱིས་པར་བུ་ཕྲུག་ཚོ་འཆི་བར་འཇུག་མི་རུང་། དེ་ཚོ་རང་ཉིད་ནས་ཉེས་པ་གྱིས་པར་བརྟེན་འཆི་བར་འཇུག་དགོས་སོ། ཤེས་བཀའ་གནང་ཡོད་པ་ལྟར་ཕྱག་ལེན་གནང་ངོ་༎

ཨེ་དྷོམ་པ་དང་དམག་འཁྲུགས་བྱུང་བ།

⁵ རྒྱལ་པོ་ཨ་མ་ཛ་ཡཱས་ཡ་ཧུ་དཱ་དང་བྷེན་ཡ་མིན་གྱི་སྡེ་རིགས་རྣམས་ཀྱི་ཀྱེ་པ་ཚོར། དེ་ཚོའི་རིགས་རུས་གང་ནས་ཡིན་རུང་དམག་མིའི་སྡེ་མཚན་དུ་གོ་སྒྲིགས་གནང་བ་དང་། མི་གྲངས་ ༡,༠༠༠ གི་སྡེ་ཚན་དང་། མི་གྲངས་ ༡༠༠ སྡེ་ཚན་ལ་འགོ་འཛིན་བསྐོ་བཞག་གནང་ཡོད། དེའི་ནང་མི་ལོ་ཉི་ཤུ་ཡན་གྱི་མི་ཚང་མ་ཡོད་པའི་བསྡོམས་གྲངས་ ༣༠༠,༠༠༠ ཡོད། དེ་ཚོ་ནི་དམག་འཐབ་ལ་གྲ་སྒྲིགས་ཡོད་པ་རྣམས་འདམས་སྒྲུག་བྱས་པ་དང་། མདུང་དང་ཕུབ་ལ་བེད་སྤྱོད་བྱ་རྒྱུར་མཁས་པོ་ཤ་ཏག་ཡིན་ནོ།

⁶ དེའི་ཐོག་ཁོང་གིས་ཨིསི་རཱཨེལ་ལ་དངུལ་ཀི་ལོ་གྷ་རམ་ ༣,༤༠༠ སྤྲད་དེ་དམག་མི་ ༡༠༠,༠༠༠ གཡར་ཡོད་དོ།

⁷ འོན་ཀྱང་ལུང་སྟོན་པ་རྒྱལ་པོའི་སར་ཕེབས་ནས་ཁོང་ལ། ཨིསི་རཱཨེལ་གྱི་མི་དེ་ཚོ་ཁྱེད་དང་མཉམ་དུ་མ་འཁྲིད་ཅིག གཙོ་བོ་དཀོན་མཆོག་ནི་བྱང་ཕྱོགས་ཀྱི་རྒྱལ་ཁབ་ནས་ཡིན་པའི་མི་དེ་ཚོ་དང་མཉམ་དུ་མེད་དོ།

⁸ ཁྱེད་ཀྱི་ཐུགས་ལ་དེ་ཚོས་དམག་སར་ཁྱེད་ལ་སྟོབས་ཤུགས་ཆེར་རུ་གཏོང་གི་རེད་བསམ་གྱི་ཡོད་དམ། འོན་ཀྱང་རྒྱལ་བ་དང་ཕམ་ཉེས་གཏོང་གནང་རྒྱུའི་མཐུ་སྟོབས་དེ་གཙོ་བོ་དཀོན་མཆོག་ཁོང་ལ་ཡོད་པ་དང་། ཁོང་གིས་ཁྱེད་ཀྱི་དགྲ་བོ་ཚོས་ཁྱེད་ལ་ཕམ་པར་བྱེད་དུ་བཅུག་གནང་གི་རེད་ཅེས་ཞུས་སོ།

⁹ ཨ་མ་ཛ་ཡཱས་ལུང་སྟོན་པ་ལ། ངས་སྤྲད་ཟིན་པའི་དངུལ་དེའི་སྐོར་ལ་ཅི་བྱེད་ཅེས་བཀའ་འདྲི་ཞུས་སོ། ལན་དུ་ལུང་སྟོན་པས། གཙོ་བོ་དཀོན་མཆོག་གིས་ཁྱེད་ལ་དེ་ལས་ལྷག་པ་གནང་ཐུབ་ཅེས་ཞུས་སོ།

¹⁰ དེ་འདྲ་སོང་ཙང་ཨ་མ་ཛ་ཡཱས་དམག་དཔུང་གླས་པ་རྣམས་ཕྱིར་གཏོང་བྱས་ནས་དེ་ཚོ་ལ་ཁྱིམ་དུ་ལོག་ཅིག་གསུངས་སོ། དེ་བས་ན་དེ་ཚོ་ཁྱིམ་དུ་ལོག་པ་དང་ཡ་ཧུ་དཱ་པའི་མི་མང་ལ་ཤིན་ཏུ་ཁྲོས་སོ།

¹¹ ཨ་མ་ཛ་ཡཱས་བློ་སྟོབས་སྐྱེད་དེ་ཁོང་གིས་རང་གི་དམག་དཔུང་རྣམས་ཚའི་ལུང་གཤོང་དུ་འཁྲིད་དོ། དེར་དེ་ཚོས་འཐབ་པ་དང་ཨེ་དྷོམ་པའི་དམག་མི་ ༡༠,༠༠༠ བསད་ནས།

¹² ༡༠,༠༠༠ འཛིན་བཟུང་བྱས་སོ། དེ་ཚོས་བཙོན་པ་རྣམས་གྲོང་ཁྱེར་སེ་ལའི་བྲག་གི་རྩེ་མོར་འཁྲིད་ནས་དེ་ཚོ་གཤམ་དུ་ཡོད་པའི་བྲག་གི་སྟེང་གསོད་པའི་ཕྱིར་དེ་ཚོ་གཡང་དུ་སྐྱུར་རོ།

¹³ སྐབས་དེར་ཨ་མ་ཛ་ཡཱས་ཨིསི་རཱཨེལ་གྱི་དམག་མི་ཁོང་དང་མཉམ་དུ་དམག་ཏུ་འགྲོ་མ་བཅུག་པ་ཚོས། ས་མར་ཡ་དང་བྷེད་ཧོ་རོན་དབར་གྱི་ཡ་ཧུ་དཱ་པའི་གྲོང་ཁྱེར་ཁག་ལ་བཙན་བཟུང་བྱས་ནས། མི་ ༣,༠༠༠ བསད་པ་དང་བཅོམ་ནོར་ཁྱོན་ཆེ་དབང་བཟུང་བྱས་སོ།

¹⁴ ཨ་མ་ཛ་ཡཱས་ཨེ་དྷོམ་པ་ཕམ་པར་བྱས་ནས་ཕྱིར་ཕེབས་དུས། ཁོང་དང་མཉམ་དུ་འཁྱེར་ཡོང་བའི་སྐུ་འདྲ་དེ་ཚོ་སྒྲིགས་ཏེ་དེ་ཚོ་ལ་མཆོད་པ་དང་སྤོས་བདུག་གོ

¹⁵ དེའི་རྐྱེན་གྱིས་གཙོ་བོ་དཀོན་མཆོག་ཐུགས་ཁྲོས་པ་དང་། ཁོང་གིས་ལུང་སྟོན་པ་ལ་ཨ་མ་ཛ་ཡཱའི་སར་གཏོང་གནང་ངོ་། ལུང་སྟོན་པས་ཁྱེད་ཀྱིས་ཕྱི་རྒྱལ་བའི་ལྷ་རང་གི་མི་མང་རྣམས་ལ་ཁྱེད་ཀྱི་མཐུ་སྟོབས་ལས་སྐྱོབས་མི་ཐུབ་མཁན་ཚོར་མཆོད་པ་ཡིན་ནམ་ཞེས་བཀའ་འདྲི་གནང་ངོ་།

¹⁶ ཨ་མ་ཛ་ཡཱས་གླེང་མོལ་བྱེད་དུ་མ་བཅུག་པར། ང་ཚོས་ཁྱེད་ལ་རྒྱལ་པོའི་སློབ་སྟོན་པར་ག་དུས་བསྐོས་བྱུང་ངམ། ངས་ཁྱོད་གསོད་པའི་སྔོན་ལ་ཁ་རོག་སྡོད་ཅེས་གསུངས་སོ། ལུང་སྟོན་པ་ཁ་རོག་བཞུགས་པའི་སྔོན་ལ། ཁོང་གིས་ད་ངས་གཙོ་བོ་དཀོན་མཆོག་གིས་ཁྱེད་མེད་པར་མཛད་རྒྱུའི་ཐུགས་ཐག་བཅད་པ་ཤེས་སོང་། གང་ལ་ཟེར་ན། ཁྱེད་ཀྱི་འདི་ཚོ་ཚང་མ་གནང་བ་དང་ངའི་སླབ་བྱར་རྩིས་མེད་གནང་སོང་ཞེས་སྨྲས་སོ།

ཨིསི་རཱཨེལ་དང་དམག་འཐབ་པ།

¹⁷ ཡ་ཧུ་དཱ་པའི་རྒྱལ་པོ་ཨ་མ་ཛ་ཡཱ་དང་ཁོང་གི་སློབ་སྟོན་པ་ཚོས་ཨིསི་རཱཨེལ་ལ་བྱུས་ངན་བརྩམས་པ་དང་། དེ་ནས་ཁོང་གིས་ཡེ་ཧུའི་ཚ་བོ་དང་ཡེ་ཧོ་ཨ་ཧཛའི་བུ་ཨིསི་རཱཨེལ་གྱི་རྒྱལ་པོ་ཡེ་ཧོ་ཨཤེ་ལ་དམག་འཐབ་ཀྱི་འགྲན་བསྡུར་བྱ་དགོས་པའི་འཕྲིན་ཞིག་བཏང་ངོ་།

¹⁸ དེའི་ལན་དུ། ཡེ་ཧོ་ཨཤེས་ཨ་མ་ཛ་ཡཱ་ལ། སྔར་ལེ་བ་ནོན་གྱི་རི་བོའི་སྟེང་གི་ལྗང་ཚེར་གྱིས་འགྱམ་ཤིང་ཞིག་ལ་ཁྱོད་ཀྱི་བུ་མོ་ངའི་བུའི་མནའ་མར་སྤྲོད་དགོས་ཤེས་ལོན་ཞིག་བཏང་ངོ་། དེ་ནས་ནགས་ཀྱི་སེམས་ཅན་རྒོད་པོ་ཞིག་ལྗང་ཚེར་ལ་རྡོག་བརྫིས་བཏང་ངོ་།

¹⁹ ད་ཨ་མ་ཛ་ཡཱ་ཁྱེད་ནས་ཨེ་དྷོམ་པ་ཚོ་ཕམ་པར་བྱས་པར་འབོར་ཤོད་གནང་བཞིན་ཡོད་པས། ངས་ཁྱེད་རང་གཟིམ་ཁང་དུ་བཞུགས་དགོས་པའི་བསླབ་བྱ་ཞུ་རྒྱུ་ཡིན། ཁྱེད་དང་ཁྱེད་ཀྱི་མི་མང་ལ་རྐྱེན་ངན་ཡོང་བའི་རྙོག་སྒྲ་སློང་བཞིན་ཡོད་དམ་ཞེས་སྨྲས་སོ།

²⁰ འོན་ཀྱང་ཨ་མ་ཛ་ཡཱས་དེ་ལ་ཉན་པར་མ་འདོད་དོ། གང་ལ་ཟེར་ན། ཁོང་གིས་ཨེ་དྷོམ་པའི་སྐུ་འདྲ་མཆོད་ཡོད་པའི་རྐྱེན་གྱིས་དཀོན་མཆོག་གི་དགོངས་པར་ཨ་མ་ཛ་ཡཱ་ཕམ་པར་མཛད་འདོད་ཡོད་དོ།

²¹ དེ་འདྲ་སོང་ཙང་ཨིསི་རཱཨེལ་གྱི་རྒྱལ་པོ་ཡེ་ཧོ་ཨཤེས་ཡ་ཧུ་དཱ་པའི་རྒྱལ་པོ་ཨ་མ་ཛ་ཡཱ་དང་འཐབ་པར་སླེབས་སོ། དེ་ཚོ་ཡ་ཧུ་དཱ་པའི་བྷེད་ཤེ་མེཤི་རུ་འཕྲད་དོ།

²² ཡ་ཧུ་དཱ་པའི་དམག་མི་རྣམས་ཕམ་པ་དང་རང་གི་ཁྱིམ་དུ་བྲོས་སོ།

²³ ཡེ་ཧོ་ཨཤེས་ཨ་མ་ཛ་ཡཱ་བཟུང་ནས་ཡེ་རུ་ཤ་ལེམ་དུ་འཁྲིད་དོ། དེར་ཁོང་གིས་གྲོང་ཁྱེར་གྱི་ལྕགས་རི་ཨེཕ་ར་ཡིམ་གྱི་རྒྱལ་སྒོ་ནས་ཟུར་གྱི་རྒྱལ་སྒོའི་བར་རིང་ཚད་མི་ཀྲར་ ༢༠༠ ཙམ་ཡོད་པ་དེ་བཤིགས་སོ།

²⁴ ཁོང་གི་མཆོད་ཁང་གི་གསེར་དངུལ་ཡོངས་དང་ཨོ་བེད་ཨེ་དྷོམ་གྱི་རིགས་བརྒྱུད་ནས་སྲུང་སྐྱོབས་བྱེད་པའི་མཆོད་ཁང་གི་ཡོ་བྱད་དང་ཕོ་བྲང་གི་གཏིར་མཛོད་རྣམས་ས་མར་ཡ་རུ་བཅོམ་ནོར་དུ་འཁྱེར་རོ། དེ་ཙམ་མ་ཟད་ཁོང་གིས་གཏའ་མར་བཞག་ཡོད་པའི་མི་རྣམས་ཀྱང་མཉམ་དུ་འཁྲིད་གནང་ངོ་།

²⁵ ཡ་ཧུ་དཱ་པའི་རྒྱལ་པོ་ཨ་མ་ཛ་ཡཱ་ཨིསི་རཱཨེལ་གྱི་རྒྱལ་པོ་ཡེ་ཧོ་ཨཤེ་ལས་ལོ་བཅོ་ལྔ་མང་བ་འཚོ་བཞུགས་གནང་ངོ་།

²⁶ ཨ་མ་ཛ་ཡཱའི་མཛད་པ་གཞན་རྣམས་མགོ་ནས་རྒྱལ་སྲིད་བཟུང་བའི་མཐའ་མའི་བར་ཡ་ཧུ་ད་དང་ཨིསི་རཱཨེལ་གྱི་རྒྱལ་པོ་རྣམས་ཀྱི་རྒྱལ་རབས་ནང་བཀོད་ཡོད་དོ།

²⁷ ཁོང་གིས་གཙོ་བོ་དཀོན་མཆོག་ལ་ངོ་ལོག་གནང་བ་ནས་བཟུང་ཡེ་རུ་ཤ་ལེམ་དུ་ཁོང་ལ་བྱུས་ངན་བརྩམས་མཁན་བྱུང་ངོ་། མཐའ་མར་ཁོང་ནི་ལ་ཀིཤི་རུ་བྲོས་ཕེབས་ཀྱང་ཁོང་གི་དགྲ་བོ་ཚོས་ཁོང་གི་རྗེས་སུ་རྒྱུགས་ནས་ཁོང་བཀྲོངས་སོ།

²⁸ ཁོང་གི་སྐུ་ལུས་ཡེ་རུ་ཤ་ལེམ་དུ་རྟའི་སྟེང་ལ་འཁྱེར་ནས་དཱ་བིད་ཀྱི་གྲོང་ཁྱེར་གྱི་རྒྱལ་པོའི་དུར་ཁང་ནང་སྦས་སོ༎