སྔོན་རབས་གཉིས་པ། 24 - Tibetan Old Testament 2011

ཡ་ཧུ་དཱ་པའི་རྒྱལ་པོ་ཡོ་ཨཱཤེ།

¹ ཡོ་ཨཱཤེ་དགུང་ལོ་བདུན་ལ་ཕེབས་སྐབས་ཡ་ཧུ་དཱ་པའི་རྒྱལ་པོར་འགྱུར་བ་དང་། ཁོང་གིས་ལོ་བཞི་བཅུའི་རིང་ཡེ་རུ་ཤ་ལེམ་དུ་རྒྱལ་སྲིད་བསྐྱངས་སོ། ཁོང་གི་ཡུམ་ནི་བྷིར་ཤེ་བྷྷ་གྲོང་ཁྱེར་གྱི་ཛི་བི་ཨཱ་ཡིན་ནོ།

² བླ་མ་ཡེ་ཧོ་ཡ་དྷ་སྐུ་གསོན་རིང་ཁོང་གིས་གཙོ་བོ་དཀོན་མཆོག་ཐུགས་མཉེས་པ་འབའ་ཞིག་གནང་ཡོད་དོ།

³ ཡེ་ཧོ་ཡ་དྷས་ཡོ་ཨཱཤེ་ལ་ཆུང་མ་གཉིས་འདམས་གནང་བ་དང་། དེ་ཚོ་ལ་ཁོང་གི་བུ་དང་བུ་མོ་སྐྱེས་སོ།

⁴ ཁོང་རྒྱལ་པོར་འགྱུར་ནས་དུས་ཡུན་ཐུང་ངུའི་རྗེས་སུ། ཡོ་ཨཱཤེས་མཆོད་ཁང་ཉམས་གསོ་གནང་རྒྱུའི་ཐུགས་ཐག་བཅད་དོ།

⁵ ཁོང་གིས་བླ་མ་ཚོ་དང་ལེ་ཝི་པ་ཚོར་ཡ་ཧུ་དཱ་པའི་གྲོང་ཁྱེར་ཁག་ནང་ཕྱིན་ནས་ལོ་འཁོར་གྱི་མཆོད་ཁང་ཉམས་གསོ་བྱ་རྒྱུའི་དགོས་ངེས་དངུལ་བསྡུས་དགོས་པའི་བཀའ་གནང་ནས། ཁོང་གིས་དེ་ཚོ་ལ་འཕྲལ་དུ་ལས་འགུལ་མགྱོགས་པོ་བྱེད་དགོས་པའི་བཀའ་གནང་ཡང་ལེ་ཝི་པ་ཚོས་དུས་འགྱངས་བྱས་སོ།

⁶ དེའི་རྐྱེན་ཁོང་གིས་ཡེ་ཧོ་ཡ་དྷ་དང་དེ་ཚོའི་འགོ་འཛིན་ཚོ་ལ་བཀའ་འགུགས་གནང་ནས། གཙོ་བོ་དཀོན་མཆོག་གི་ཞབས་ཕྱི་མོ་ཤེའི་དགོངས་དོན་ལྟར་མི་མང་ནས་གཙོ་བོ་དཀོན་མཆོག་གནས་པའི་དབུ་གུར་དམ་པའི་འཛིན་སྐྱོངས་བྱེད་པར་འབུལ་བའི་ཁྲལ་ལེ་ཝི་པ་ཚོས་ཡ་ཧུ་དཱ་དང་ཡེ་རུ་ཤ་ལེམ་ནས་ཙི་ཕྱིར་མ་བསྡུ་བ་ཡིན་ཞེས་བཀའ་འདྲི་གནང་ངོ་།

⁷ (རྒྱུ་ངན་ཟ་མཁན་ཨ་ཐལ་ཡཱའི་རྗས་བྲངས་པ་རྣམས་ཀྱིས་མཆོད་ཁང་ལ་སྐྱོན་བཏང་བ་དང་། དངོས་པོ་རྩ་ཆེ་མང་པོ་བྷལ་ལ་མཆོད་རྒྱུར་བེད་སྤྱོད་བྱས་ཡོད།)

⁸ རྒྱལ་པོས་ལེ་ཝི་པ་ཚོར་ཞལ་འདེབས་ཀྱི་ཆེད་དུ་སྒམ་ཞིག་བཟོས་ནས། མཆོད་ཁང་གི་རྒྱལ་སྒོར་འཇོག་དགོས་པའི་བཀའ་གནང་ངོ་།

⁹ དེ་ཚོས་ཡེ་རུ་ཤ་ལེམ་དང་ཡ་ཧུ་དཱ་ཡུལ་ཡོངས་སུ་མི་མང་ཆང་མར་ཐོག་མར་དཀོན་མཆོག་གི་ཞབས་ཕྱི་མོ་ཤེས་མི་མེད་ལུང་སྟོང་དུ་བསྡུ་བའི་ཁྲལ་དེ་གཙོ་བོ་དཀོན་མཆོག་གི་སྤྱན་སྔར་འཁྱེར་ཡོང་དགོས་བའི་ལན་བཏང་ངོ་།

¹⁰ དེས་མི་མང་དང་དེ་ཚོའི་འགོ་འཛིན་དང་བཅས་པ་དགའ་བར་འགྱུར་ནས། དེ་ཚོས་ཁྲལ་གྱི་དངུལ་འཁྱེར་ཡོང་ནས་སྒམ་དེ་བཀང་ངོ་།

¹¹ ཉིན་ལྟར་ལེ་ཝི་པ་ཚོས་སྒམ་དེ་རྒྱལ་པོའི་ལས་བྱེད་པ་དོ་དམ་པའི་སར་འཁྱེར་གྱི་ཡོད་པ་དང་། དེ་ནམ་ཁེངས་སྐབས་རྒྱལ་པོའི་དྲུང་ཡིག་དང་བླ་མ་གཙོ་བོའི་སྐུ་ཚབ་ཀྱིས་དངུལ་རྣམས་མར་འདོན་ནས་སྒམ་དེ་འཇོག་ཡུལ་དུ་ཕྱིར་ལོག་གཏོང་གནང་བཞིན་ཡོད། དེ་ལྟར་དེ་ཚོས་དངུལ་ཁྱོན་ཆེ་བསྡུས་སོ།

¹² རྒྱལ་པོ་དང་ཡེ་ཧོ་ཡ་དྷས་དངུལ་རྣམས་མཆོད་ཁང་ཉམས་གསོའི་འགོ་འཛིན་ཚོར་གནང་བ་དང་། དེ་ཚོས་མཆོད་ཁང་ཉམས་གསོའི་ཆེད་རྡོ་བཟོ་བ་དང་ཤིང་བཟོ་བ་དང་ལྕགས་བཟོ་བ་བཅས་ཀྱི་མི་ལ་གླ་གནང་ངོ་།

¹³ ལས་མི་ཚང་མས་ལས་ཀ་ཧུར་ཐག་བྱས་ནས་མཆོད་ཁང་དེ་སྔར་བཞིན་ཉམས་གསོ་བརྟན་པོ་གནང་བ་དང་།

¹⁴ ཉམས་གསོ་ཚར་བ་དང་གསེར་དངུལ་ལྷག་མ་རྣམས་རྒྱལ་པོ་དང་ཡེ་ཧོ་ཡ་དྷ་ལ་ཕུལ་བ་དང་། ཁོང་ཚོས་དེ་ཚོ་མཆོད་ཁང་གི་བཞེས་ཕོར་དང་གཞན་ཡོ་བྱད་བཟོ་བར་བེད་སྤྱོད་གནང་ངོ་༎ ཡེ་ཧོ་ཡ་དའི་སྐུ་ཚེའི་རིང་མཆོད་ཁང་དུ་སྦྱིན་སྲེག་གི་མཆོད་པ་ཉིན་ལྟར་ཕུལ་གྱི་ཡོད་པ་དང་།

ཡེ་ཧོ་ཡ་དྷའི་སྲིད་བྱུས་ལ་བསྒྱུར་བཅོས།

¹⁵ ཁོང་དགུང་ལོ་ཧ་ཅང་མཐོ་ཞིང་དགུང་ལོ་ ༡༣༠ ཕེབས་སྐབས་ཁོང་གྲོངས་སོ།

¹⁶ ཁོང་གིས་ཨིསི་རཱཨེལ་གྱི་མི་མང་དང་དཀོན་མཆོག་དང་མཆོད་ཁང་བཅས་པར་ཞབས་ཞུ་གནང་བར་ངོས་ལེན་གྱི་ཆེད་དུ། ཁོང་དཱ་བིད་ཀྱི་གྲོང་ཁྱེར་གྱི་དུར་ཁང་ནང་སྦས་སོ།

¹⁷ ཡེ་ཧོ་ཡ་དྷ་གྲོངས་པའི་རྗེས་སུ་ཡ་ཧུ་དཱ་པའི་འགོ་འཛིན་ཚོས་རྒྱལ་པོ་ཡོ་ཨཱཤེ་ལ་དེ་ཚོ་ལ་གཏམ་ལ་གསན་དགོས་པའི་བསྐུལ་མ་ཞུས་སོ།

¹⁸ དེ་ལྟར་མི་མང་ཚོས་རང་གི་ཕ་མེས་ཀྱི་དཀོན་མཆོག་གཙོ་བོ་དཀོན་མཆོག་གི་མཆོད་ཁང་དུ་མཆོད་རྒྱུ་བར་མཚམས་བཞག་ནས། ཁོ་ཚོས་ལྷ་མོ་ཨ་ཤེ་རཱ་དང་སྐུ་འདྲ་གཞན་རྣམས་མཆོད་འགོ་འཚུགས་སོ། དེ་ཚོའི་སྡིག་པའི་ཉེས་པའི་ཕྱིར་གཙོ་བོ་དཀོན་མཆོག་ཡ་ཧུ་དཱ་དང་ཡེ་རུ་ཤ་ལེམ་ལ་ཐུགས་ཁྲོ་བར་འགྱུར་རོ།

¹⁹ གཙོ་བོ་དཀོན་མཆོག་གིས་ལུང་སྟོན་པ་བརྒྱུད། ཁོང་གི་ཕྱོགས་སུ་ཕྱིར་ལོག་དགོས་པའི་ཉེན་བརྡ་བཏང་གནང་ཡང་མི་མང་ཚོས་ཉན་མེད་དོ།

²⁰ དེ་ནས་གཙོ་བོ་དཀོན་མཆོག་གི་ཐུགས་ཉིད་དེ་བླ་མ་ཡེ་ཧོ་ཡ་དྷའི་བུ་ཛ་ཀར་ཡཱ་ལ་བཞུགས་སོ། ཁོང་མི་མང་གི་མཐོང་སར་ལངས་ནས། གཙོ་བོ་དཀོན་མཆོག་གིས། ཁྱོད་ཚོས་ཁོང་གི་བཀའ་ལ་མ་ཉན་པར་ཁྱོད་ཚོའི་ཐོག་ཏུ་རྐྱེན་ངན་ཅི་ལ་ལེན་བཞིན་ཡོད་དམ། ཁྱོད་ཚོས་ཁོང་སྤངས་སྐབས་ཁོང་གིས་ཁྱོད་ཚོ་སྤངས་བ་ཡིན་ཞེས་བཀའ་གནང་བྱུང་ཞེས་གསུངས་སྐད་ཆེན་པོ་སྐྱོན་ནོ།

²¹ རྒྱལ་པོ་ཡོ་ཨཱཤེས་ཛ་ཀར་ཡཱ་ལ་བྱ་བ་ངན་བྱུས་ནང་བཞུགས་ནས། རྒྱལ་པོའི་བཀའ་བཞིན་མི་མང་གིས་ཛ་ཀར་ཡཱ་ལ་མཆོད་ཁང་གི་ཁྱམས་རར་རྡོ་རུབ་བཏང་ནས་བསད་དོ།

²² རྒྱལ་པོས་ཛེ་ཀར་ཡཱའི་ཡབ་ཡེ་ཧོ་ཡ་དས་ཁོང་ཕྱོགས་སུ་གནང་བའི་ལྷག་བསམ་རྣམ་དག་གི་བྱས་རྗེས་རྣམས་བརྗེད་ནས་ཁོང་གིས་ཛེ་ཀར་ཡཱ་ལ་བསད་དུ་འཇུག་གོ ཛེ་ཀར་ཡཱ་གྲོངས་སྐབས་ཁོང་གིས། གཙོ་བོ་དཀོན་མཆོག་གིས་ཁྱོད་ཚོས་ཇི་བྱེད་པ་གཟིགས་ནས་ཆད་པ་གཏོང་གནང་བར་ཤོག་ཅེས་གསུངས་སྐད་སྐྱོན་ནོ༎

ཡོ་ཨཱཤེའི་སྲིད་སྐྱོང་ཀྱི་མཐའ་མ།

²³ ལོ་དེའི་སྟོན་ཀར་སླེབས་པ་དང་སི་རི་ཡ་པའི་དམག་མི་ཚོས་ཡ་ཧུ་དཱ་དང་ཡ་རུ་ཤ་ལེམ་དུ་བཙན་འཛུལ་བྱས་ཏེ་འགོ་འཛིན་ཚང་མ་བསད་ནས། བཅོམ་ནོར་ཁྱོན་ཆེ་དྷ་མསེ་ཀསེ་དུ་འཁྱེར་རོ།

²⁴ སི་རི་ཡ་པའི་དམག་དཔུང་ཉུང་ཉུང་ཡིན་རུང་གཙོ་བོ་དཀོན་མཆོག་གིས་དེ་ཚོ་ལ་ཡ་ཧུ་དཱ་པའི་དཔུང་དམག་སྟོབས་ཆེན་ལ་ཕམ་དུ་འཇུག་གནང་ཡོད། གང་ལ་ཟེར་ན། དེ་ཚོས་རང་གི་ཕ་མེས་ཀྱི་དཀོན་མཆོག་གཙོ་བོ་དཀོན་མཆོག་ལ་སྤངས་ཡོད་པའི་ཕྱིར་རོ། དེ་ལྟར་རྒྱལ་པོ་ཡོ་ཨཱཤེ་ལ་ཆད་པ་གཏོང་གནང་ཡོད།

²⁵ ཁོང་ཧ་ཅང་ཚབ་ཆེ་རྨས་པ་དང་དགྲ་བོ་ཚོ་ཕྱིར་འཐེན་བྱ་སྐབས། ཁོང་གི་ལས་བྱེད་པ་གཉིས་ཀྱིས་གྲོས་ངན་གཏིང་ནས་བླ་མ་ཡེ་ཧོ་ཡ་དྷའི་བུ་བསད་པར་དགྲ་ཤ་ལེན་པའི་ཆེད་ཁོང་གི་ཉལ་ཁྲིའི་སྟེང་དུ་ཁོང་ལ་བཀྲོངས་སོ། ཁོང་དཱ་བིད་ཀྱི་གྲོང་ཁྱེར་ནང་སྦས་ན་ཡང་རྒྱལ་པོའི་དུར་ཁང་ནང་སྦས་མེད་དོ།

²⁶ (ཁོང་ལ་གྲོས་ངན་གཏིང་མཁན་ཚོ་ནི་ཨམ་མོན་པའི་བུད་མེད་ཤིམ་ཡད་ཟེར་བའི་བུ་ཛ་བྷད་དང་མོ་ཨབ་པའི་བུད་མེད་ཤིམ་རིད་ཟེར་བའི་བུ་ཡེ་ཧོ་ཛ་བྷད་ཡིན་ནོ།)

²⁷ རྒྱལ་པོའི་དེབ་ཀྱི་འགྲེལ་བརྗོད་ནང་ཡོ་ཨཱཤེའི་སྲས་ཚོའི་ལོ་རྒྱུས་དང་། ཁོང་ཐོག་ངོ་རྒོལ་གནང་བའི་ལུང་བསྟན་རྣམས་དང་ཁོང་གིས་མཆོད་ཁང་གིས་མཆོད་ཁང་ཇི་ལྟར་སྐྱར་བཞེངས་གནང་བ་བཅས་ཀྱི་སྐོར་འཁོད་ཡོད་དོ། ཁོང་གི་སྲས་ཨ་མ་ཛ་ཡཱ་ཁོང་གི་ཤུལ་འཛིན་དུ་རྒྱལ་པོར་འགྱུར་རོ༎