སྔོན་རབས་གཉིས་པ། 23 - Tibetan Old Testament 2011

ཨ་ཐལ་ཡཱ་ལ་ངོ་ལོག་བྱས་པ།

¹ ལོ་དྲུག་སྒུག་པའི་རྗེས་སུ་བླ་མ་ཡེ་ཧོ་ཡ་དྷས་ལས་འགུལ་བྱེད་དགོས་པའི་ཐག་བཅད་ནས། ཁོང་གིས་དམག་མིའི་འགོ་འཛིན་ཡེ་རོ་ཧམ་གྱི་བུ་ཨ་ཛར་ཡཱ་དང་ཡེ་ཧོ་ཧ་ནན་གྱི་བུ་ཨིཤ་མ་ཨེལ་དང་ཨོ་བྷེདའི་བུ་ཨ་ཛར་ཡ་དང་ཨ་ད་ཡཱའི་བུ་མ་སི་ཨ་དང་ཛིག་རིའི་བུ་ཨེ་ལི་ཤ་ཕད་བཅས་ལྔ་པོ་མཉམ་དུ་མཐུན་སྒྲིགས་བཞག་གོ

² དེ་ཚོས་ཡ་ཧུ་དཱ་པའི་གྲོང་ཁྱེར་ཡོངས་སུ་བསྐོར་ནས་ལེ་ཝི་པ་ཚོ་དང་རིགས་རུས་ཀྱི་འགོ་འཁྲིད་ཚང་མ་ཡེ་རུ་ཤ་ལེམ་དུ་འཁྲིད་ཡོང་ངོ་།

³ དེ་ཚོ་ཚང་མ་མཆོད་ཁང་དུ་འཛོམས་ནས་རྒྱལ་པོའི་སྲས་ཡོ་ཨཱཤེ་མཉམ་དུ་དམ་བཅའ་བཞག་གོ ཡེ་ཧོ་ཡ་དྷས་དེ་ཚོ་ལ་རྒྱལ་པོ་གྲོང་པའི་སྲས་འདིར་ཡོད། གཙོ་བོ་དཀོན་མཆོག་གིས་རྒྱལ་པོ་དཱ་བིད་ལ་ཞལ་བཞེས་གནང་བ་ལྟར། ད་ཁོང་གི་རྒྱལ་བརྒྱུད་དུ་རྒྱལ་པོར་འགྱུར་དགོས་སོ།

⁴ ང་ཚོས་དེ་ལྟར་བྱ་འོ། བླ་མ་ཚོ་དང་ལེ་ཝི་པ་ཚོ་ངལ་གསོ་བའི་ཞག་ལ་ལས་འགན་དུ་ཕེབས་སྐབས་སུ། དེ་ཚོ་གསུམ་ཆ་གཅིག་གི་མཆོད་ཁང་གི་རྒྱལ་སྒོ་སྲུང་བར་བྱ་རྒྱུ་དང་།

⁵ གསུམ་ཆ་གཞན་དེས་རྒྱལ་པོའི་ཕོ་བྲང་སྲུང་བར་བྱ་རྒྱུ་དང་། དེ་འཕྲོས་རྣམས་རྨང་གཞིའི་རྒྱལ་སྒོར་འཇོག་པར་བྱའོ། མི་མང་ཚང་མ་མཆོད་ཁང་གི་ཁྱམས་རར་འཛོམས་དགོས་སོ།

⁶ མཆོད་ཁང་གི་ནང་བླ་མ་དང་ལེ་ཝི་པ་ལས་འགན་ཡོད་མཁན་ཚོ་མ་གཏོགས་གཞན་ཡང་འཛུལ་མི་ཆོག གང་ལ་ཟེར་ན། དེ་རྣམས་དམ་པར་མཛད་ཡོད་སྟབས་འཛུལ་ཆོག་གོ དེ་འཕྲོས་རྣམས་གཙོ་བོ་དཀོན་མཆོག་གི་སློབ་སྟོན་ལ་ཉན་ནས་ཕྱི་ལོག་ཏུ་སྡོད་དགོས་སོ།

⁷ ལེ་ཝི་པ་ཚོས་རང་གི་རལ་གྲི་འདོན་ནས་རྒྱལ་པོའི་མཐའ་འཁོར་དུ་སྡོད་དགོས་པ་དང་། རྒྱལ་པོ་གང་དུ་ཕེབས་སར་དེ་ཚོ་དེར་འགྲོ་དགོས་སོ། མཆོད་ཁང་ནང་འཛུལ་ཐབས་བྱེད་མཁན་སུ་ཡིན་ཡང་དེ་གསོད་དགོས་ཤེས་བཀའ་གནང་ངོ་།

⁸ ལེ་ཝི་པ་དང་ཡ་ཧུ་དཱ་པའི་མི་མང་རྣམས་ནས་ཡེ་ཧོ་ཡ་དྷ་ནས་སློབ་སྟོན་གནང་བ་ལྟར་བྱས་སོ། ངལ་གསོ་བའི་ཞག་ལ་ལས་འགན་དུས་ཚོད་ཡོལ་ནས་འགྲོ་མཁན་གྱི་མི་རྣམས་དགོངས་པ་སྤྲད་མེད་དོ། དེར་བརྟེན་དམག་སྤྱི་ཚོ་ལ་ལས་ཀར་ཡོང་མཁན་དང་ལས་ཀ་ནས་དུས་ཚོད་ཡོལ་ནས་འགྲོ་མཁན་གཉིས་ཀ་ཐོབ་པ་ཡིན་ནོ།

⁹ ཡེ་ཧོ་ཡ་དྷས་མཆོད་ཁང་ནང་དུ་བཞག་ཡོད་པའི་རྒྱལ་པོ་དཱ་བིད་ཀྱི་མདུང་དང་ཕུབ་རྣམས་འགོ་འཛིན་ཚོར་གནང་ངོ་།

¹⁰ ཁོང་གིས་རྒྱལ་པོ་སྐྱོབ་པའི་ཆེད་མི་རལ་གྲི་འདོན་ནས་ཡོད་པ་རྣམས་མཆོད་ཁང་གི་མདུན་དུ་མཐའ་བསྐོར་ནས་བཞག་གོ

¹¹ དེ་ནས་ཡེ་ཧོ་ཡ་དྷས་ཡོ་ཨཱཤེ་ལ་ཕྱིར་འདོན་གནང་ནས། ཁོང་གི་དབུ་ལ་ཅོད་པན་གཡོགས་པ་དང་ཁོང་ལ་རྒྱལ་བརྒྱུད་འཛིན་པའི་ཁྲིམས་ཡིག་གི་དཔེ་ཞིག་ཕུལ་ནས། དེ་ལྟར་ཁོང་རྒྱལ་པོར་བསྐོས་སོ། བླ་མ་ཡེ་ཧོ་ཡ་དྷ་དང་ཁོང་གི་བུ་ཚོས་ཡོ་ཨཱཤེ་ལ་སྣུམ་བྱུགས་པ་དང་ཚང་མས་རྒྱལ་པོ་སྐུ་ཚེ་རིང་པོ་གནས་པར་ཤོག་ཅེས་སྐད་འབོད་བྱས་སོ།

¹² ཨ་ཐལ་ཡཱས་མི་མང་གིས་རྒྱལ་པོར་ཆེ་བསྟོད་ཞུས་པ་ཐོས་པ་དང་། མི་ཚོགས་མཆོད་ཁང་དུ་བསྡུས་ནས་ཡོད་པ་མཐོང་བས་མགྱོགས་པོར་ཕེབས་སོ།

¹³ དེར་ཁོང་གིས་རྒྱལ་པོ་གསར་པ་མཆོད་ཁང་དུ་འཛུལ་ས་དེར། རྒྱལ་པོ་ཚོ་བཞུགས་ཡུལ་ཀ་བའི་འགྲམ་དུ་བཞེངས་ཡོད་པ་དང་། དམག་མིའི་འགོ་འཛིན་ཚོ་དང་དུང་པ་ཚོས་མཐའ་བསྐོར་ནས་ཡོད་པ་མཐོང་བ་དང་། མི་མང་རྣམས་དགའ་སྤྲོའི་ངང་སྐད་འབོད་བྱེད་པ་དང་། དུང་གཏོང་བཞིན་ཡོད་པ་དང་མཆོད་ཁང་གི་རོལ་མོ་བ་ཚོས་རོལ་ཆས་དང་བཅས་དུས་སྟོན་ལ་སྣེ་འཁྲིད་བྱེད་བཞིན་ཡོད་པ་མཐོང་ནས། མོས་རང་གི་སྡུག་བསྔལ་གྱིས་གོས་ཧྲལ་ནས་བསླུ་འཁྲིད་བསླུ་འཁྲིད་ཅེས་སྐད་རྒྱབ་བོ།

¹⁴ ཡེ་ཧོ་ཡ་དྷས་ཨ་ཐལ་ཡཱ་མཆོད་ཁང་གི་མངའ་ཁུལ་དུ་གསོད་པའི་ཐུགས་འདོད་མེད་སྟབས། ཁོང་གིས་དམག་མིའི་འགོ་འཛིན་ཚོ་འབོད་གནང་ནས། མོ་ལ་སྐུ་སྲུང་བའི་རུའི་དབར་འཁྲིད་ནས། མོ་ལ་སྐྱོབས་པར་སུ་ཞིག་ཡོང་ན་ཡང་གསོད་ཅེས་བཀའ་གནང་ངོ་།

¹⁵ དེ་ཚོས་མོ་ལ་བཟུང་ནས་མོ་རང་གི་ཕོ་བྲང་དུ་འཁྲིད་ནས་དེར་རྟའི་རྒྱལ་སྒོར་མོ་ལ་བསད་དོ༎

ཡེ་ཧོ་ཡ་དྷའི་བསྒྱུར་བཅོས་རྣམས།

¹⁶ བླ་མ་ཡེ་ཧོ་ཡ་དྷས་རྒྱལ་པོ་ཡོ་ཨཱཤེ་དང་མི་མང་བཅས་པར་གཙོ་བོ་དཀོན་མཆོག་གི་མི་འབངས་བྱ་རྒྱུའི་དམ་བཅའ་ཞིག་འཇོག་གནང་ངོ་།

¹⁷ དེ་ནས་ཁོང་རྣམས་ཐམས་ཅད་བྷལ་གྱི་ལྷ་ཁང་དུ་ཕེབས་ནས་དེ་མར་བཤིགས་སོ། དེ་ཚོས་མཆོད་ཁྲི་དང་དེར་ཡོད་པའི་སྐུ་འདྲ་དང་བཅས་པ་དུམ་བུར་བཅག་པ་དང་། མཆོད་ཁྲིའི་མདུན་དུ་བྷལ་གྱི་བླ་མ་མཏ་ཏན་ལ་བསད་དོ།

¹⁸ ཡེ་ཧོ་ཡ་དྷས་བླ་མ་དང་ལེ་ཝི་པ་རྣམས་མཆོད་ཁང་གི་ལས་ཀའི་འགོ་འཛིན་དུ་བསྐོ་བཞག་གནང་ངོ་། དེ་ཚོས་རྒྱལ་པོ་དཱ་བིད་ཀྱིས་བསྐོས་གནང་བའི་ལས་འགན་རྣམས་སྒྲུབ་རྒྱུ་དང་། མོ་ཤེའི་བཀའ་ཁྲིམས་ལྟར་གཙོ་བོ་དཀོན་མཆོག་ལ་ཕུལ་བའི་དམར་མཆོད་རྣམས་སྲེག་རྒྱུ་ཡིན་པ་དང་། དེ་ཚོ་རོལ་མོ་དང་དུས་སྟོན་གྱི་འགོ་འཛིན་ཡང་ཡིན་ནོ།

¹⁹ ཡེ་ཧོ་ཡ་དྷས་ཆོ་ག་ལྟར་མི་གཙང་བ་སུ་ཞིག་ཡིན་རུང་འགོག་ཕྱིར་མཆོད་ཁང་གི་རྒྱལ་སྒོར་སྐུ་སྲུང་བ་རྣམས་འཇོག་གནང་ཡོད་དོ།

²⁰ དམག་མིའི་དམག་དཔོན་ཚོ་དང་ཡུལ་གྱི་གནས་ཡོད་མི་སྣ་དང་ལས་བྱེད་པ་ཚོ་དང་མི་མང་ཡོངས་རྫོགས་དང་བཅས་པ། ཡེ་ཧོ་ཡ་དྷ་མཉམ་དུ་རྒྱལ་པོ་ལ་མཆོད་ཁང་ནས་ཕོ་བྲང་བར་དུ་རུ་སྒྲིགས་ཐོག་གདན་འདྲེན་ཞུས་པ་དང་། དེ་ཚོ་རྒྱལ་སྒོ་ལྟེ་བ་ནས་ནང་དུ་བཞུགས་ནས་རྒྱལ་པོ་བཞུགས་ཁྲིའི་སྟེང་བཞུགས་སོ།

²¹ མི་མང་རྣམས་དགའ་སྤྲོས་ཁེངས་པ་དང་གྲོང་ཁྱེར་ཁ་ཁུ་སིམ་པོར་གནས་ཡོད། གང་ལགས་ཟེར་ན། དེ་དུས་ཨ་ཐལ་ཡཱ་བསད་ཟིན་ཡོད་དོ༎