སྔོན་རབས་གཉིས་པ། 21 - Tibetan Old Testament 2011

¹ ཡེ་ཧོ་ཤ་ཕད་གྲོངས་པ་དང་ཁོང་དཱ་བིད་ཀྱི་གྲོང་ཁྱེར་གྱི་རྒྱལ་པོའི་དུར་ཁང་ནང་སྦས་ནས། ཁོང་གི་སྲས་ཡེ་ཧོ་རམ་ཁོང་གི་ཤུལ་འཛིན་དུ་རྒྱལ་པོར་རོ༎

ཡ་ཧུ་དཱ་པའི་རྒྱལ་པོ་ཡེ་ཧོ་རམ།

² རྒྱལ་པོ་ཡེ་ཧོ་ཤ་ཕད་ཀྱི་སྲས་ཡེ་ཧོ་རམ་ལ་སྐུ་མཆེད་ཨ་ཛར་ཡཱ་དང་། ཡེ་ཧི་ཨེལ་དང་། ཛ་ཀར་ཡཱ་དང་། ཨ་ཛར་ཡེ་ཧུ་དང་མི་ཀ་ཨེལ་དང་ཤེ་ཕཏ་ཡཱ་བཅས་དྲུག་ཡོད་དོ།

³ ཁོ་ཚོའི་ཡབ་ཀྱིས་ཁོ་ཚོར་གསེར་དངུལ་དང་གཞན་རྩ་ཆེའི་དངོས་པོ་ཧ་ཅང་ཁྱོན་ཆེ་གནང་བ་དང་། དེ་ཚོ་ཚང་མ་རེ་རེ་བཞིན་ཡ་ཧུ་དཱ་པའི་གྲོང་ཁྱེར་བཙན་པོར་བཟོས་པ་རེ་རེའི་འགོ་པ་ཚོར་སྤྲད་དོ། ཡེ་ཧོ་རམ་ནི་བུ་རྒན་ཤོས་ཡིན་སྟབས་ཡེ་ཧོ་ཤ་ཕད་ཀྱིས་ཁོང་ལ་ཁོང་གི་ཤུལ་འཛིན་དུ་བསྐོས་གནང་ངོ་།

⁴ ཡེ་ཧོ་རམ་ལ་རྒྱལ་ཁབ་དབང་བསྒྱུར་བརྟན་པོ་ཡོད་སྟབས། ཁོང་གི་སྐུ་མཆེད་རྣམས་དང་གཞན་ཨིསི་རཱཨེལ་གྱི་ལས་བྱེད་པ་འགའ་ཤས་བསད་དོ།

⁵ ཡེ་ཧོ་རམ་དགུང་ལོ་སུམ་ཅུ་སོ་གཉིས་ཕེབས་སྐབས་རྒྱལ་པོར་འགྱུར་བ་དང་། ཁོང་གིས་ཡེ་རུ་ཤ་ལེམ་དུ་ལོ་བརྒྱད་རིང་རྒྱལ་སྲིད་བསྐྱངས་སོ།

⁶ ཁོང་གིས་རྒྱལ་པོ་ཨ་ཧབ་དང་གཞན་ཨིསི་རཱཨེལ་གྱི་རྒྱལ་པོ་གཞན་ཚོའི་མཛད་ཚུལ་ངན་པའི་རྗེས་སུ་འཇུག་གནང་ཡོད་དོ། གང་ལ་ཟེར་ན། ཁོང་གིས་ཨ་ཧབ་ཀྱི་སྲས་མོ་ཞིག་དང་ཆང་ས་རྒྱབ་ཡོད་པ་དང་། ཁོང་གིས་གཙོ་བོ་དཀོན་མཆོག་གིས་སྤྱན་སྔར་སྡིག་པ་གྱིས་ཡོད་དོ།

⁷ འོན་ཀྱང་གཙོ་བོ་དཀོན་མཆོག་ལ་དཱ་བིད་ཀྱི་རིགས་བརྒྱུད་མེད་པར་མཛད་རྒྱུའི་ཐུགས་འདོད་མེད་དོ། གང་ལ་ཟེར་ན། ཁོང་གིས་དཱ་བིད་ཀྱི་རིགས་བརྒྱུད་ཀྱི་རྟག་ཏུ་རྒྱལ་སྲིད་བཟུང་རྒྱུའི་དམ་བཅའ་གནང་ཡོད་དོ།

⁸ ཡེ་ཧོ་རམ་གྱི་སྐུ་དུས་སུ་ཨེ་དྷོམ་པས་ཡ་ཧུ་དཱ་པར་ངོ་ལོག་བྱས་པ་དང་། ཁོང་ཚོ་རང་བཙན་གྱི་རྒྱལ་ཁབ་ཏུ་འགྱུར་རོ།

⁹ དེ་འདྲ་སོང་ཙང་ཁོང་དང་ཁོང་གི་འགོ་འཛིན་ཚོ་ཤིང་རྟ་འཁོར་ལོ་དང་བཅས་ཨེ་དྷོམ་པར་འཐབ་རྒོལ་བྱེད་པར་ཐོན་ནོ། དེར་ཨེ་དྷོམ་པའི་དམག་མི་ཚོས་ཁོ་ཚོའི་མཐའ་བསྐོར་རོ། འོན་ཀྱང་མཚན་མོའི་སྐབས་སུ་དེ་ཚོ་བྲོས་ཐར་ཐུབ་བོ།

¹⁰ དེ་ནས་བཟུང་ཨེ་དྷོམ་པ་རྣམས་ཡ་ཧུ་དཱ་པ་ནས་རང་བཙན་ངང་གནས་སོ། ཡེ་ཧོ་རམ་ནས་གཙོ་བོ་དཀོན་མཆོག་ཕ་མེས་ཀྱི་དཀོན་མཆོག་སྤངས་པའི་རྐྱེན་གྱིས་དུས་སྐབས་དེ་རང་ལ་ལིབ་ནཱའི་གྲོང་ཁྱེར་གྱི་ཀྱང་ངོ་ལོག་བྱས་སོ།

¹¹ ཁོང་གིས་ཡ་ཧུ་དཱ་པའི་རི་བརྒྱུད་ཀྱི་ཁུལ་དུ་ཕྱི་པའི་ལྷ་ལ་མཆོད་ཡུལ་ཁག་བཞེངས་པ་དང་། ཡ་ཧུ་དཱ་དང་ཡེ་རུ་ཤ་ལེམ་གྱི་མི་མང་རྣམས་གཙོ་བོ་དཀོན་མཆོག་གི་སྤྱན་སྔར་སྡིག་ལས་སུ་སྣེ་འཁྲིད་བྱས་སོ།

¹² ལུང་སྟོན་པ་ཨེ་ལི་ཡཱས་ཡེ་ཧོ་རམ་ལ་ཡི་གེ་ཞིག་བཏང་བའི་ནང་། ཁྱེད་ཀྱི་མེས་པོ་དཱ་བིད་ཀྱི་དཀོན་མཆོག་གཙོ་བོ་དཀོན་མཆོག་གིས་ཁྱེད་ལ་སྐྱོན་བརྫོད་མཛད་ཡོད་དོ། གང་ལ་ཟེར་ན། ཁྱེད་ཀྱིས་རང་གི་ཕ་ཡེ་ཧོ་ཤ་ཕད་དང་པོ་པོ་རྒྱལ་པོ་ཨ་ས་གཉིས་ཀྱི་བྱས་པ་ལྟར་ཇེས་སུ་འབྲངས་མེད་དོ།

¹³ དེ་མ་ཟད་ཁྱེད་ཀྱིས་ཨ་ཧབ་ཀྱི་ཤུལ་འཛིན་རིམ་པས་ཨིསི་རཱཨེལ་གྱི་མི་མང་རྣམས་དམ་ཉམས་སུ་སྣེ་འཁྲིད་བྱས་པ་ལྟར། ཁྱེད་ཀྱི་རྒྱལ་པོ་ཡ་ཧུ་དཱ་དང་ཡེ་རུ་ཤ་ལེམ་གྱི་མི་མང་རྣམས་དཀོན་མཆོག་ལ་དད་པ་དང་དམ་ཚིག་མེད་པ་བཟོ་བར་སྣེ་འཁྲིད་བྱ་མཁན་ཚོའི་རྗེས་སུ་འཇུག་ཡོད། ཁྱེད་ཀྱིས་རང་གི་སྤུན་ཁྱེད་ལས་ལེགས་པ་ཚོ་ཡང་བསད་ཡོད་དོ།

¹⁴ དེའི་འབྲས་བུར་གཙོ་བོ་དཀོན་མཆོག་གིས་ཁྱེད་ཀྱི་མི་མང་དང་བུ་ཕྲུག་དང་ཆུང་མ་རྣམས་ལ་ཉེས་པ་ཚབ་ཆེ་གཏོང་གནང་རྒྱུ་དང་། ཁོང་གིས་ཁྱེད་ཀྱི་བདག་དབང་རྣམས་མེད་པར་བཟོ་གནང་ཡོང་།

¹⁵ ཁྱེད་རང་ཡང་རྒྱུ་ནད་དྲག་པོ་ཞིག་གིས་མནར་ནས་དེ་ཇེ་སྡུག་ཇེ་སྡུག་ཏུ་འགྲོ་གི་རེད་ཅེས་འཀོད་ཡོད་དོ།

¹⁶ ཕེ་ལེ་ཤེད་པ་དང་ཨ་རམ་པ་འགའ་ཤས་རྒྱ་མཚོའི་འགྲམ་དུ་གཞིས་ཆགས་ནས་གནས་སྡོད་བྱེད་པ་ཨི་ཐི་ཨོ་པི་པ་ཚོའི་ཉེ་འགྲམ་སྡོད་ཀྱི་ཡོད། གཙོ་བོ་དཀོན་མཆོག་གིས་དེ་ཚོ་ལ་ཡེ་ཧོ་རམ་མཉམ་དུ་དམག་འཁྲུགས་བྱེད་རྒྱུ་སྐུལ་སློང་གནང་ངོ་།

¹⁷ དེ་ཚོས་ཡ་ཧུ་དཱར་བཙན་འཛུལ་བྱས་ནས་རྒྱལ་པོའི་ཕོ་བྲང་ནང་འཕྲོག་བཅོམ་བྱས་པ་དང་རྒྱལ་པོའི་སྲས་ཆུང་ཤོས་ཨ་ཧ་ཛ་ཡཱ་མ་གཏོགས་གཞན་རྒྱའ་པོའི་སྲས་ཚོ་དང་བཙུན་མོ་དང་བཅས་པ་ཚང་མ་བཙོན་པར་འཁྲིད་དོ།

¹⁸ དེ་ཚོ་ཚང་མ་བྱུང་བའི་རྗེས་ལ་གཙོ་བོ་དཀོན་མཆོག་གིས་རྒྱལ་པོ་ལ་རྒྱུ་ནད་དྲག་པོ་ཞིག་གཏོང་གནང་ངོ་།

¹⁹ ལོ་གཉིས་ཙམ་བར་དེ་ཇི་སྡུག་ཏུ་སོང་བ་དང་མཐའ་མར་ཁོང་ཐབས་སྡུག་ངང་གྲོངས་སོ། ཁོང་གི་མི་མང་ཚོས་དེ་ཚོའི་ཕ་མེས་ཚོར་བྱས་པ་ལྟར་མྱ་ངན་ཞུ་བའི་མེ་སྤུང་སྤར་མེད་དོ།

²⁰ ཡེ་ཧོ་རམ་ལོ་སུམ་ཅུ་སོ་གཉིས་ཕེབས་སྐབས་རྒྱལ་པོར་འགྱུར་ནས། ལོ་བརྒྱད་རིང་ཡེ་རུ་ཤ་ལེམ་དུ་རྒྱལ་སྲིད་བསྐྱངས་སོ། ཁོང་གྲོངས་པ་ལ་སུ་ལ་ཡང་བློ་ཕམ་བྱུང་མེད་དོ། དེ་ཚོས་ཁོང་དཱ་བིད་ཀྱི་གྲོང་ཁྱེར་དུ་སྦས་ན་ཡང་རྒྱལ་པོའི་དུར་ཁང་ནང་སྦས་མེད་དོ༎