སྔོན་རབས་གཉིས་པ། 20 - Tibetan Old Testament 2011

ཨེ་དྷོམ་དང་མཉམ་དུ་དམག་འཁྲུགས།

¹ དུས་ཚོད་ཡུན་ཙམ་རྗེས་སུ་མོ་ཨབ་དང་ཨམ་མོན་དང་དེ་ཚོའི་མཐུན་ཕྱོགས་མེ་འུན་བཅས་ཀྱི་དམག་མིས་ཡ་ཧུ་དཱར་བཙན་འཛུལ་བྱས་སོ།

² བང་ཆེན་འགའ་ཤས་རྒྱལ་པོ་ཡེ་ཧོ་ཤ་ཕད་ལ་འཆི་བའི་རྒྱ་མཚོའི་ཕྱོགས་ནས་ཁྱེད་ལ་དམག་འཐབ་བྱེད་པར་ཨེ་དྷོམ་པའི་དམག་དཔུང་ཁྱོན་ཆེ་ཡོང་འདུག་པས། དེ་ཚོས་ཧ་ཛ་ཛོན་ཏ་མཱར་བཙན་བཟུང་བྱས་ཟིན་སོང་ཞེས་ཞུས་སོ། (དེའི་མིང་གཞན་ནི་ཨེན་གྷེ་ཌི་ཟེར་བའོ།)

³ ཡེ་ཧོ་ཤ་ཕད་ཧ་ཅང་འཇིགས་ནས་གཙོ་བོ་དཀོན་མཆོག་ལ་ལམ་སྟོན་གྱི་ཕྱིར་གསོལ་འདེབས་ཞུས་སོ། དེ་ནས་ཁོང་གིས་ཡུལ་ཁམས་ཀུན་ནང་སྨྱུང་གནས་བྱེད་དགོས་པའི་བཀའ་གནང་ངོ་།

⁴ ཡ་ཧུ་དཱ་པའི་གྲོང་ཁྱེར་ཡོངས་ཀྱི་མི་མང་ཡེ་རུ་ཤ་ལེམ་དུ་གཙོ་བོ་དཀོན་མཆོག་ལ་ལམ་སྟོན་ཞུ་བར་ཡོང་ངོ་།

⁵ དེ་ཚོ་དང་ཡེ་རུ་ཤ་ལེམ་གྱི་མི་མང་རྣམས་མཆོད་ཁང་གི་ཁྱམས་ར་གསར་པའི་ནང་འཛོམས་སོ། རྒྱལ་པོ་ཡེ་ཧོ་ཤ་ཕད་ཕེབས་ནས་དེ་དག་གི་མདུན་དུ་བཞེངས་ཏེ།

⁶ གསུང་སྐད་ཆེན་པོས་ཐུགས་སྨོན་གནང་བ་དང་། ཁྱེད་ང་ཚོའི་ཕ་མེས་ཀྱི་དཀོན་མཆོག་གཙོ་བོ་དཀོན་མཆོག། ཁྱེད་ཀྱིས་མཐོ་རིས་ནས་འཛམ་གླིང་ཡོངས་ཀྱི་རྒྱལ་ཁབ་ཚོར་རྒྱལ་སྲིད་སྐྱོངས་གནང་བཞིན་ཡོད། ཁྱེད་ནི་སྟོབས་ཤུགས་དང་ནུས་མཐུ་ལྡན་པ་ཡིན་སྟབས་ཁྱེད་ལ་སུས་ཀྱང་འགྲན་པར་མི་ནུས་སོ། ཁྱེད་ནི་ང་ཚོའི་དཀོན་མཆོག་ཡིན་ནོ།

⁷ ཁྱེད་ཀྱིས་ཨིསི་རཱཨེལ་གྱི་མི་མང་རྣམས་ཡུལ་འདིར་གནས་སྤོས་བྱ་སྐབས་སུ། ཁྱེད་ཀྱིས་ཡུལ་འདིར་གནས་པའི་མི་མང་ཕྱིར་འབུད་གནང་ནས། ཁྱེད་ཀྱི་གྲོགས་པོ་ཨབ་ར་ཧམ་གྱི་མི་བརྒྱུད་ཚོར་རྟག་ཏུ་བདག་པའི་ཕྱིར་གནང་བ་ཡིན་ནོ།

⁸ དེ་ཚོ་འདིར་བསྡད་ནས་ཁྱེད་ལ་གུས་ཞབས་ཞུས་བའི་ཕྱིར་མཆོད་ཁང་ཞིག་བཞེངས་པར་མཁྱེན་གསལ་ལྟར།

⁹ དེ་ཚོ་ལ་ཉེས་པ་གཏོང་བའི་ཆེད་རྐྱེན་ངན་དང་། དམག་འཁྲུགས་དང་། རིམ་ནད་དང་། མུ་གེ་བཅས་བྱུང་བ་ཡིན་ན། དེ་ཚོ་ཡོངས་ནས་ཁྱེད་ལ་མཆོད་པའི་མཆོད་ཁང་འདིའི་མདུན་དུ་ལངས་ཐུབ་བོ། དེ་ཚོས་ཁོ་ཚོའི་དཀའ་སྡུག་ཆེད་ཁྱེད་ལ་གསོལ་འདེབས་ཞུ་ཐུབ་པ་དང་། ཁྱེད་ཀྱིས་དེ་ཚོ་གསན་ནས་དེ་ཚོ་ལ་སྐྱོབ་པར་འགྱུར་རོ།

¹⁰ ད་ཆ་ང་ཚོར་ཨམ་མོན་དང་མོ་ཨབ་དང་ཨེ་དྷོམ་བཅས་ཀྱི་མི་མང་ནས་འཐབ་རྒོལ་བྱས་ཡོད། ང་ཚོའི་ཕ་མེས་ཚོར་ཨི་ཇིབ་ནས་ཐོན་སྐབས། ཁྱེད་ཀྱིས་ཁོ་ཚོ་ཡུལ་དེ་ཚོའི་ནང་འཛུལ་བཅུག་གནང་མེད་པ་དང་། ང་ཚོའི་ཕ་མེས་ཚོ་དེ་ཚོ་ལ་བསྐོར་ནས་ཕྱིན་ཏེ་དེ་ཚོ་མེད་པར་བཟོས་མེད་དོ།

¹¹ དེ་ཚོ་ནས་དྲིན་ལན་འཇལ་སྟངས་འདི་ལྟར་ཡིན། དེ་ཚོ་ཁྱེད་ཀྱིས་ང་ཚོར་གནང་བའི་ཡུལ་ནས་ང་ཚོ་ཕྱིར་འབུད་བྱེད་པར་ཡོང་བ་ཡིན་ནོ།

¹² ཁྱེད་ང་ཚོའི་དཀོན་མཆོག་ཡིན། ཁྱེད་ཀྱིས་དེ་ཚོ་ལ་ཆད་པ་གཏོང་གནང་རོགས། གང་ལ་ཟེར་ན། དམག་དཔུང་ཁྱོན་ཆེའི་མདུན་དུ་ང་ཚོར་བཙན་རྒོལ་བྱ་བའི་རེ་ཐབས་བྲལ་ཡོད། ང་ཚོས་ཅི་བྱེད་དགོས་ཤེས་ཀྱི་མེད་སྟབས། ང་ཚོས་ཁྱེད་ཀྱི་སྐྱབས་རོགས་ལ་རེ་བ་བཅོལ་ཡོད་ཅེས་ཞུས་སོ།

¹³ ཡ་ཧུ་དཱ་པའི་སྐྱེས་པ་རྣམས་དེ་ཚོའི་ཆུང་མ་དང་བུ་ཕྲུག་དང་བཅས་པ་མཆོད་ཁང་དུ་ལངས་ནས་ཡོད།

¹⁴ མི་ཚོགས་ཀྱི་ཁྲོད་དུ་ཡོད་པའི་ལེ་ཝི་པ་ཞིག་ལ། གཙོ་བོ་དཀོན་མཆོག་གི་ཐུགས་ཉིད་བབས་ནས། ཁོ་ནི་ཛེ་ཀར་ཡཱའི་བུ་ཡ་ཧ་ཛི་ཨེལ་ཟེར་བ་དེ་ཡིན་ནོ། ཁོ་ནི་ཨ་སཕེ་ཀྱི་རིགས་རུས་ནས་ཡིན་པ་དང་། ཁོ་ཨ་སཕེ་ཀྱི་བརྒྱུད་པ་མ་ཏན་ཡཱ་དང་ཡི་ཨེལ་དང་བྷེ་ན་ཡཱ་བཅས་ནས་ཡིན་ནོ།

¹⁵ ཡ་ཧ་ཛི་ཨེལ་གྱིས། མི་དབང་ཆེན་པོ་དང་ཡ་ཧུ་དཱ་དང་ཡེ་རུ་ཤ་ལེམ་གྱི་མི་མང་ལྷན་རྒྱས་ཚོ་ལ། གཙོ་བོ་དཀོན་མཆོག་གིས། ཁྱོད་ཚོ་དམག་དཔུང་ཁྱོན་ཆེ་འདིར་གདོང་ལེན་བྱེད་པར་སེམས་ཤུགས་ཆགས་པ་དང་འཇིགས་པ་བཅས་མ་བྱེད་ཅིག དམག་འཁྲུགས་དེ་དཀོན་མཆོག་ལ་རགས་ལུས་པ་མ་གཏོགས་ཁྱོད་ཚོར་རགས་ལུས་མེད་དོ།

¹⁶ སང་ཉིན་དེ་ཚོ་ཛིཛི་ལ་རུ་སླེབས་སྐབས་དེ་ཚོ་ལ་ཕར་རྒོལ་བྱོས་ཤིག ཁྱོད་ཚོས་དེ་ཚོའི་ཤུལ་ཙམ་མ་ལུས་པར་ཡེ་རུ་ཨེལ་གྱི་ཉེ་འགྲམ་དུ་འགྲོ་བའི་ལུང་གཤོང་གི་མཐར་འཕྲད་པར་འགྱུར་རོ།

¹⁷ ཁྱོད་ཚོས་དམག་འདི་རྒྱབ་མི་དགོས། ཁྱོད་ཚོ་གྲ་སྒྲིགས་བྱས་ནས་སྒུག་སྡོད་ལ་གཙོ་བོ་དཀོན་མཆོག་གིས་ཁྱོད་ཚོར་རྒྱལ་ཁ་གནང་བ་མཐོང་བར་འགྱུར་རོ། ཡ་ཧུ་དཱ་དང་ཡེ་རུ་ཤ་ལེམ་གྱི་མི་མང་ཚོ་ཐེ་ཚོམ་དང་མ་འཇིགས་ཤིག དམག་ཏུ་སོང་ཞིག་དང་གཙོ་བོ་དཀོན་མཆོག་ཁྱོད་ཚོ་དང་མཉམ་དུ་ཡོད་ཅེས་གསུངས་བྱུང་ཞེས་སྨྲས་སོ།

¹⁸ དེ་ནས་རྒྱལ་པོ་ཡེ་ཧོ་ཤ་ཕད་ཀྱིས་ཤིན་ཏུ་མར་སྒུག་ནས་གདོང་ས་ལ་རེག་ནས་ཕྱག་འཚལ་བ་དང་། མི་མང་ཚོས་ཀྱང་ཁོང་མཉམ་དུ་ཕྱག་འཚལ་ནས་གཙོ་བོ་དཀོན་མཆོག་ལ་མཆོད་དོ།

¹⁹ ལེ་ཝི་པ་ཀོ་ཧད་དང་ཀོ་རཱའི་རིགས་རུས་ཀྱི་འཐུས་མི་ཚོ་ཡར་ལངས་ནས་སྐད་ཆེན་པོས། ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་ལ་བསྟོད་པ་ཕུལ་ལོ།

²⁰ སང་ཞོག་སྔ་པོ་མི་མང་རྣམས་ཊེ་ཀོ་ཨའི་ཉེ་འགྲམ་ཡུལ་གྱི་འབྲོག་སྟོང་དུ་ཕྱིན་ནོ། དེ་ཚོ་འགྲོ་བའི་སྐབས་སུ་ཡེ་ཧོ་ཤ་ཕད་ཀྱིས་མི་མང་ལ་ཚིག་འདི་ལྟར་བཀའ་གནང་ངོ་། ཡ་ཧུ་དཱ་དང་ཡེ་རུ་ཤ་ལེམ་པ་ཁྱོད་ཚོ་རང་གི་དཀོན་མཆོག་གཙོ་བོ་དཀོན་མཆོག་ལ་བློ་བཅོལ་ཞིག་དང་ཁྱེད་རྣམས་བརྟན་པོར་གནས་ཐུབ་བོ། ལུང་སྟོན་པས་ཇི་ལྟར་གསུངས་བར་ཡིད་ཆེས་བྱོས་ཤིག་དང་། ཁྱོད་ཚོའི་བསམ་དོན་སྒྲུབ་པར་འགྱུར་ཞེས་སོ།

²¹ རྒྱལ་པོས་མི་མང་ཚོ་དང་གོ་བསྡུར་གནང་བའི་རྗེས་སུ། རོལ་མོ་མཁན་འགའ་ཞིག་ལ་དུས་ཆེན་རྩ་ཆེན་སྐབས་སུ་གྱོན་བཞིན་པའི་ན་བཟའ་གྱོན་ཞིང་དམག་མིའི་སྔོན་དུ་ཕྱིན་ནས། གཙོ་བོ་དཀོན་མཆོག་ལ་བསྟོད་པ་ཕུལ་ཞིག། ཁོང་གི་ཐུགས་བརྩེ་མཐའ་མེད་པ་ཡིན་ཞེས་པའི་མགུར་མ་གཏོང་བཞིན་འགྲོ་དགོས་པའི་བཀའ་གནང་ངོ་།

²² དེ་ཚོས་མགུར་མ་འགོ་ཚུགས་པ་དང་གཙོ་བོ་དཀོན་མཆོག་གིས་བཙན་འཛུལ་བྱེད་པའི་དམག་མི་ཚོའི་ཐོག་འཇིགས་སྐྲག་གཏོང་གནང་ངོ་།

²³ ཨམ་མོན་པ་ཚོ་དང་མོ་ཨབ་པ་ཚོས་ཨེ་དྷོམ་པའི་དམག་དཔུང་དང་འཐབ་ནས། དེ་ཚོ་ཆ་ཚང་རྩ་མེད་བཟོས་པ་དང་། དེ་རྗེས་དེ་ཚོ་རང་རང་སོ་སོ་གཅིག་གིས་གཅིག་ལ་འཛིང་རེ་ཙབ་ཆེན་བྱས་སོ།

²⁴ ཡ་ཧུ་དཱ་པའི་དམག་མི་རྣམས་བྱེ་ཐང་དུ་ཡོད་པའི་གན་དྷོ་ལར་སླེབས་པ་དང་། དེ་ཚོས་དགྲ་བོའི་ཕྱོགས་སུ་བལྟ་སྐབས་དེ་ཚོ་ཚང་མ་སའི་སྟེང་དུ་རིལ་ནས་འཆི་ཡོད་པ་མཐོང་ངོ་། དེ་ཚོ་གཅིག་ཀྱང་ཐར་མེད་དོ།

²⁵ ཡེ་ཧོ་ཤ་ཕད་དང་ཁོང་གི་དམག་དཔུང་རྣམས་འཕྲོག་བཅོམ་གྱི་རྒྱུ་དངོས་ལེན་དུ་ཡོང་སྐབས། དེ་ཚོ་བ་ཕྱུགས་མང་པོ་དང་མཁོ་རྒྱགས་དང་། གྱོན་གོས་དང་གཞན་དངོས་པོ་རྩ་ཆེ་མང་པོ་རྙེད་དོ། ཁོ་ཚོ་འཕྲོག་ནོར་བསྡུ་བར་ཉིན་གསུམ་བསྡད་ན་ཡང་དེར་དངོས་པོ་ཧ་ཅང་ཁྱོན་ཆེ་ཡོད་སྟབས་ཆ་ཚང་འཁྱེར་མ་ཐུབ་བོ།

²⁶ ཉིན་བཞི་པར་ཁོང་ཚོ་བྷེ་ར་ཀའི་ལུང་གཤོང་དུ་འཛོམས་ནས། གཙོ་བོ་དཀོན་མཆོག་གིས་ཇི་ལྟར་མཛད་པར་བསྟོད་པ་ཕུལ་ལོ། དེའི་རྐྱེན་གྱིས་ལུང་གཤོང་དེ་ལ་བྷེ་ར་ཀ་ཞེས་བརྗོད་ཀྱི་ཡོད་དོ།

²⁷ ཡེ་ཧོ་ཤ་ཕད་ཀྱི་རང་གི་དམག་དཔུང་རྣམས་ཡེ་རུ་ཤ་ལེམ་དུ་རྒྱལ་ཁའི་ངང་སྣེ་འཁྲིད་གནང་ངོ་། གང་ལ་ཟེར་ན། གཙོ་བོ་དཀོན་མཆོག་གིས་ཁོ་ཚོའི་དགྲ་བོ་རྣམས་ཕམ་པར་མཛད་ཡོད་དོ།

²⁸ དེ་ཚོ་གྲོང་ཁྱེར་དུ་འབྱོར་སྐབས་དེ་ཚོ་མཆོད་ཁང་དུ་རོལ་མོ་དང་པི་ཝང་དང་དུང་བཅས་གཏོང་བར་འབྱོར་རོ།

²⁹ རྒྱལ་ཁབ་ཚང་མས་གཙོ་བོ་དཀོན་མཆོག་གིས་ཨིསི་རཱཨེལ་གྱི་དགྲ་བོ་རྣམས་ཇི་ལྟར་ཕམ་པར་མཛད་པ་ཐོས་པ་དང་འཇིགས་སྐྲག་སྐྱེས་སོ།

³⁰ དེ་འདྲ་སོང་ཙང་ཡེ་ཧོ་ཤ་ཕད་ཀྱིས་ཞི་བདེའི་ངང་རྒྱལ་སྲིད་བསྐྱངས་པ་དང་དཀོན་མཆོག་གིས་ཁོང་ལ་ཕྱོགས་ཚང་མ་ནས་སྲུང་སྐྱོབ་གནང་ངོ་༎

ཡེ་ཧོ་ཤ་ཕད་ཀྱི་རྒྱལ་སྲིད་མཐའ་མ།

³¹ ཡེ་ཧོ་ཤ་ཕད་དགུང་ལོ་སུམ་ཅུ་སོ་ལྔར་ཕེབས་སྐབས་ཡ་ཧུ་དཱའི་རྒྱལ་པོར་འགྱུར་བ་དང་། ཁོང་གིས་ཡེ་རུ་ཤ་ལེམ་དུ་ལོ་ཉི་ཤུ་རྩ་ལྔའི་རིང་རྒྱལ་སྲིད་བསྐྱངས་སོ། ཁོང་གི་ཡུམ་ཤིལ་ཧིའི་བུ་མོ་ཨ་ཛུ་བཱ་ཟེར་བ་ཡིན་ནོ།

³² སྔར་ཁོང་གི་ཡབ་ཨ་ས་ལྟར་ཁོང་གིས་གཙོ་བོ་དཀོན་མཆོག་གི་སྤྱན་སྔར་དྲང་བདེན་གང་ཡིན་པ་འབའ་ཞིག་གནང་ཡོད་དོ།

³³ འོན་ཀྱང་ཕྱི་པའི་ལྷ་མཆོད་ཡུལ་ཁག་མེད་པར་བཟོས་གནང་མེད་པ་དང་། མི་མང་རྣམས་རང་གི་ཕ་མེས་ཀྱི་དཀོན་མཆོག་ལ་བློ་གཅིག་སེམས་གཅིགས་གིས་མཆོད་པ་བྱེད་མཁན་དུ་འགྱུར་ཐུབ་མེད་དོ།

³⁴ ཡེ་ཧོ་ཤ་ཕད་ཀྱི་མཛད་པ་ཡོངས་རྫོགས་ཁོང་གིས་རྒྱལ་སྲིད་བཟུང་བའི་འགོ་ནས་འཇུག་བར་ཧ་ན་ནིའི་བུ་ཡེ་ཧུའི་རྒྱལ་རབས་ཨིསི་རཱཨེལ་གྱི་རྒྱལ་པོ་ཚོའི་རྒྱལ་རབས་བཅས་ཀྱི་ཆ་ཤས་ཡིན་པ་དེའི་ནང་བཀོད་ཡོད་དོ།

³⁵ དུས་སྐབས་ཤིག་ལ། ཡ་ཧུ་དཱ་པའི་རྒྱལ་པོ་ཡེ་ཧོ་ཤ་ཕད་ཀྱིས་ཨིསི་རཱཨེལ་གྱི་རྒྱལ་པོ་ཨ་ཧ་ཛ་ཡཱ་མཉམ་དུ་མཐུན་སྒྲིགས་གནང་ཡོད་པ་དང་། ཨ་ཧ་ཛ་ཡཱས་མཛད་ཚུལ་ངན་པ་ཧ་ཅང་མང་པོ་མཛད་ཡོད་དོ།

³⁶ ཨེ་ཛི་ཨོན་གྷེ་བྷེར་གྱི་གྲུ་ཁར་ཁོ་ཚོས་རྒྱ་མཚོར་རྒལ་བའི་གྲུ་བཟོད་ཡོད་དོ།

³⁷ འོན་ཀྱང་མ་རེ་ཤའི་གྲོང་ཁྱེར་ནས་ཡིན་པ་དྷོ་ད་བ་ཧུའི་བུ་ཨེ་ལི་ཨེ་ཛེར་གྱིས་ཡེ་ཧོ་ཤ་ཕད་ལ། ཁྱེད་ཀྱིས་ཨ་ཧ་ཛ་ཡཱ་དང་མཉམ་དུ་མཐུན་སྒྲིགས་གནང་ཡོད་སྟབས་གཙོ་བོ་དཀོན་མཆོག་གིས་ཁྱེད་ཀྱིས་བཟོས་པ་རྣམས་མེད་པར་མཛད་རྒྱུ་རེད་ཅེས་ཉེན་བརྡ་བཏང་ཡོད། དེ་ལྟར་གྲུ་རྣམས་བཞིགས་པ་དང་རྒྱ་མཚོར་མ་ཕྱིན་ནོ༎