སྔོན་རབས་གཉིས་པ། 2 - Tibetan Old Testament 2011

མཆོད་ཁང་བཞེངས་རྒྱུའི་གྲ་སྒྲིགས།

¹ རྒྱལ་པོ་སོ་ལོ་མོན་གྱིས་གཙོ་བོ་དཀོན་མཆོག་ལ་མཆོད་པ་འབུལ་ཡུལ་གྱི་མཆོད་ཁང་ཞིག་དང་། ཁོང་རང་བཞུགས་ཡུལ་ཕོ་བྲང་ཞིག་བཞེངས་རྒྱུའི་ཐུགས་ཐག་བཅད་པ་ཡིན་ནོ།

² ཁོང་གིས་འོར་འདྲེན་ཆེད་དུ་མི་ ༧༠,༠༠༠ དང་རྡོ་གཤག་མཁན་ ༨༠,༠༠༠ བསྐོ་བཞག་གནང་ངོ་། ལས་དོན་ལ་བལྟ་རྟོགས་བྱེད་མི་ ༣,༦༠༠ བཅས་ཡོད་དོ།

³ སོ་ལོ་མོན་གྱིས། ཊ་ཡར་གྱི་རྒྱལ་པོ་ཧི་རམ་གྱི་རྩར་མི་ཞིག་བཏང་ནས། ངའི་ཡབ་དཱ་བིད་ལ་ཁོང་གི་ཕོ་བྲང་བཞེངས་པའི་ཆེད་འགྱམ་ཤིང་གི་ཚོང་འབྲེལ་གྱིས་པ་ལྟར་ང་དང་མཉམ་དུ་ཡང་ཚོང་འབྲེལ་གནོང་ཞིག་ཅེས་སྨྲས་སོ།

⁴ ངའི་དཀོན་མཆོག་གཙོ་བོ་དཀོན་མཆོག་ལ་གུས་བརྩི་ཞུ་ཕྱིར་མཆོད་ཁང་ཞིག་ངས་བཞེངས་རྒྱུ་ཡིན། དེ་ནི་གནས་མཆོག་དམ་པ་ང་དང་ངའི་མི་མང་ཚོས་དྲི་བཟང་གི་སྤོས་ཕུལ་ནས་ཁོང་ལ་མཆོད་ཡུལ་དང་། ང་ཚོས་མུ་མཐུད་རྩ་ཆེའི་བཞེས་བག་འབུལ་ཡུལ་དང་ང་ཚོས་རྟག་ཏུ་སྔ་དགོང་གཉིས་དང་ངལ་གསོ་བའི་ཞག་རྣམས་དང་ཟླ་བ་གསར་པའི་དུས་ཆེན་རྣམས་དང་། གཞན་དམ་པའི་ཉིན་ཚོར་ལ་ང་ཚོའི་དཀོན་མཆོག་གཙོ་བོ་དཀོན་མཆོག་ལ་གུས་བརྩི་ཞུས་ནས་སྦྱིན་སྲེག་གི་མཆོད་པ་འབུལ་ཡུལ་དུ་འགྱུར་ཡོང་། ཁོང་གིས་ཨིསི་རཱཨེལ་པ་ཚོར་རྟག་ཏུ་དེ་ལྟར་བྱེད་དགོས་པའི་བཀའ་གནང་ཡོད།

⁵ ང་ལ་མཆོད་ཁང་ངོ་མཚར་ཅན་ཞིག་བཞེངས་རྒྱུའི་འདོད་པ་དྲག་པོ་ཡོད། གང་ལག་ཟེར་ན། ང་ཚོའི་དཀོན་མཆོག་ནི་དཀོན་མཆོག་གཞན་ལས་ལྷག་པ་ཡིན་ནོ།

⁶ འོན་ཀྱང་སུ་ཞིག་གིས་དངོས་སུ་དཀོན་མཆོག་ལ་མཆོད་ཁང་ཞིག་བཞེངས་མི་ཐུབ། གང་ལ་ཟེར་ན། མཐོ་རིས་རྒྱ་ཆེན་འདི་ཚོའི་ནང་ལ་ཡང་ཁོང་མི་ཤོང་ངོ་། དེ་འདྲ་སོང་ཙང་ངས་དཀོན་མཆོག་ལ་སྤོས་བདུག་ཡུལ་ཞིག་ལས་ལྷག་གཞན་མཆོད་ཁང་ཇི་ལྟར་བཞེངས་ནུས་སམ།

⁷ ད་ངའི་སར་གསེར་དངུལ་དང་ལི་དང་ལྕགས་ལ་རི་མོ་བརྐོ་མཁན་དང་རེས་སྔོན་པོ་དང་མུ་མན་དང་དམར་པོ་བཟོས་མཁན་མི་མཁས་པ་ཞིག་གཏོང་རོགས་གནང། དེས་ངའི་ཡབ་དཱ་བིད་ཀྱིས་འདམས་གནང་བའི་ཡ་ཧུ་དཱ་དང་ཡེ་རུ་ཤ་ལེམ་གྱི་ལག་ཤེས་པ་ཚོ་དང་མཉམ་དུ་ལས་བྱེད་པར་འགྱུར་རོ།

⁸ ངས་ཁྱེད་ཀྱི་ཤིང་གི་ལས་མི་ཚོ་མཁས་པོ་ཇི་ལྟར་ཡོད་པ་ཤེས་པས་ཁྱེད་ཀྱིས་ལེ་བ་ནོན་ནས་འགྱམ་ཤིང་དང་སོམ་ཤིང་དང་ཤུག་ཤིག་གྱི་གདུང་མ་སོགས་གཏོང་བར་མཛོད།

⁹ ཁྱེད་ཀྱི་ལས་མི་ཚོར་ཤིང་ཁྱོན་ཆེ་གྲ་སྒྲིག་བྱེད་ཕྱིར་རོགས་བྱེད་པར་ངའི་མེ་ཚོར་གཏོང་རྒྱུར་གྲ་སྒྲིག་ཡོད། གང་ལ་ཟེར་ན། ངས་བཞེངས་རྒྱུའི་མཆོད་ཁང་འདི་བཞིན་ཆེན་པོ་དང་ངོ་མཚར་ཅན་ཞིག་བཞེངས་འདོད་ཡོད།

¹⁰ ལས་མི་ཚོའི་འཚོ་བའི་མཐུན་རྐྱེན་ཚེད་གྲོ་མི་ཀྲི་ཀྲོན་ ༢༠༠ དང་ནས་མི་ཀྲི་རིག་ཀྲོན་ ༢,༠༠༠ དང་རྒུན་ཆང་ལི་ཏར་ ༤༠༠,༠༠༠ དང་ཁ་སྐྱུ་རུའི་སྣུམ་ལི་ཏར་ ༤༠༠,༠༠༠ གཏོང་རྒྱུ་ཡིན་ཞེས་སྨྲས་སོ།

¹¹ རྒྱལ་པོ་ཧི་རམ་གྱིས་སོ་ལོ་མོན་ལ་ཡིག་ལན་ཞིག་གནང་བའི་ནང་། གཙོ་བོ་དཀོན་མཆོག་གིས་ཁོང་གི་མི་མང་ལ་མཉེས་པོ་གནང་གི་ཡོད་སྟབས། ཁོང་གིས་ཁྱེད་ལ་རྒྱལ་པོར་བསྐོས་གནང་ཡོད།

¹² ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་མཐོ་རིས་དང་ས་གཞི་བཀོད་པ་པོ་ལ་བསྟོད་པ་ཕུལ། ཁོང་གིས་རྒྱལ་པོ་དཱ་བིད་ལ་སྲས་ཤེས་རབ་ཅན་དང་བསམ་ཤེས་ཀྱི་ཕྱུག་པ་གཙོ་བོ་དཀོན་མཆོག་ལ་མཆོད་ཁང་དང་ཁོང་རང་གི་ཕོ་བྲང་བཅས་བཞེངས་མཁན་ཞིག་གནང་ཡོད།

¹³ ངས་ཁྱོད་ལ་ཤེས་རབ་ཅན་དང་རྩལ་དང་ལྡན་པ་ལག་ཤེས་མཁས་པ་ཧུ་རམ་ཞེས་པ་དེ་གཏོང་རྒྱུ་ཡིན།

¹⁴ ཁོའི་མ་ནི་དཱན་སྡེ་རིགས་ནས་ཡིན་པ་དང་ཕ་ནི་ཊ་ཡར་གྱི་ཡུལ་མི་ཡིན། ཁོས་གསེར་དངུལ་དང་ལི་དང་ལྕགས་དང་རྡོ་དང་ཤིང་སོགས་ནས་དངོས་རིགས་བཟོ་ཤེས་སོ། ཁོས་རས་གོས་སྔོན་པོ་དང་མུ་མན་དང་དམར་པོ་བཅས་ཀྱི་ལས་རིགས་བྱེད་ཐུབ་པ་དང་། ཁོས་རྐོས་བརྒྱབ་པའི་ལས་རིགས་ཚང་མ་བྱེད་ཤེས་པ་དང་། ཁོ་ལ་གང་མངགས་པའི་བཟོ་དབྱིབས་ཚང་མ་བཟོ་ཐུབ་བོ། ཁྱེད་ཀྱིས་ཁོ་ལ་རྩལ་དང་ལྡན་པའི་ལག་ཤེས་པ་ཚོ་དང་ཁྱེད་ཀྱི་ཡབ་རྒྱལ་པོ་དཱ་བིད་ཀྱི་ཆེད་དུ་ལས་བྱས་མཁན་ལས་བྱས་པ་ཚོ་མཉམ་དུ་ལས་བྱེད་དུ་བཅུག་རོགས་གནང།

¹⁵ དེ་འདྲ་སོང་ཙང་ཁྱེད་ཀྱིས་ཞལ་བཞེས་གནང་བའི་གྲོ་དང་ནས་དང་ཆང་དང་ཁ་སྐྱུ་རུའི་སྣུམ་གཏོང་བར་མཛོད།

¹⁶ ལེབ་ནོན་གྱི་རི་བོར་ང་ཚོས་ཁྱེད་ལ་དགོས་པའི་འགྱམ་ཤིང་བཅད་ནས་དེ་ཚོ་མཉམ་དུ་བསྡམས་ནས་ཡོ་པ་བར་དུ་ཆུ་ཐོག་གཏོང་བར་བྱེད། དེ་ནས་ཁྱེད་ཀྱིས་དེ་ཚོ་ཡེ་རུ་ཤ་ལེམ་དུ་ལེན་ཐུབ་ཅེས་དྲིས་ཡོད་དོ༎

མཆོད་ཁང་བཞེངས་འགོ་ཚུགས་པ།

¹⁷ རྒྱལ་པོ་སོ་ལོ་མོན་གྱིས་ཁོང་གི་ཡབ་དཱ་བིད་ཀྱིས་མི་མང་གྲངས་གཤེར་གནང་བ་ལྟར། ཨིསི་རཱཨེལ་གྱི་ཡུལ་དུ་སྡོད་པའི་ཕྱི་རྒྱལ་བ་ཚང་མའི་གྲངས་གཤེར་གནང་ངོ་། དེར་ཕྱི་རྒྱལ་བ་གནས་སྡོད་བྱ་མིའི་གྲངས་ ༡༥༣,༦༠༠ ཡོད་དོ།

¹⁸ ཁོང་གིས་དེ་ཚོ་གྲངས་ ༧༠,༠༠༠ ལ་ཅ་དངོས་འོར་འདྲེན་གྱི་ལས་འགན་དང་། གྲངས་ ༨༠,༠༠༠ ལ་རི་བོའི་སྟེང་རྡོ་གཤག་པའི་ལས་འགན་དང་། གྲངས་ ༣,༦༠༠ ལ་ལས་ཀ་ཇི་ལྟར་བྱ་བཞིན་ཡོད་མེད་བལྟ་རྟོགས་བྱེད་མཁན་ལ་བསྐོས་སོ༎