སྔོན་རབས་གཉིས་པ། 19 - Tibetan Old Testament 2011

ལུང་སྟོན་པ་ཞིག་གིས་ཡེ་ཧོ་ཤ་ཕད་ལ་བཀའ་སྐྱོན་གནང་བ།

¹ ཡ་ཧུ་དཱ་པའི་རྒྱལ་པོ་ཡེ་ཧོ་ཤ་ཕད་སྐྱོན་མེད་ཡེ་རུ་ཤ་ལེམ་དུ་རང་གི་ཕོ་བྲང་དུ་ཕྱིར་ཕེབས་གནང་ངོ་།

² ཧ་ན་ནིའི་བུ་ལུང་སྟོན་པ་ཡེ་ཧུས་རྒྱལ་པོ་མཇལ་དུ་ཕྱིན་ནས་ཁོང་ལ། ཁྱེད་ཀྱི་ཐུགས་ལ་སྤྱོད་ངན་ལ་རོགས་བྱ་རྒྱུ་དང་གཙོ་བོ་དཀོན་མཆོག་ལ་སྡང་མཁན་ཚོའི་ཕྱོགས་བྱེད་རྒྱུ་འོས་པ་རེད་དགོངས་ཀྱི་འདུག་གམ། ཁྱེད་ཀྱིས་ཇི་མཛད་པར་གཙོ་བོ་དཀོན་མཆོག་ཁྱེད་ལ་ཐུགས་ཁྲོ་བར་འགྱུར་ཡོད་དོ།

³ འོན་ཀྱང་ཁྱེད་ཀྱི་རང་ལ་ལེགས་པ་ཁ་ཤས་གནང་ཡོད། མི་མང་ཚོས་མཆོད་པའི་ལྷ་མོ་ཨ་ཤེ་རའི་འདྲ་སྐུ་ཚང་མར་ཁྱེད་ཀྱིས་ཕྱིར་འབུད་གནང་བ་དང་། ཁྱེད་ཀྱིས་དཀོན་མཆོག་གི་ཐུགས་དགོངས་ཀྱི་རྗེས་སུ་འཇུག་ཡོད་ཅེས་སྨྲས་སོ༎

ཡེ་ཧོ་ཤ་ཕད་ཀྱི་བསྒྱུར་བཅོས་རྣམས།

⁴ རྒྱལ་པོ་ཡེ་ཧོ་ཤ་ཕད་ཡེ་རུ་ཤ་ལེམ་དུ་བཞུགས་ན་ཡང་། ཁོང་ནི་མི་མང་གི་ཁྲོད་དུ་རང་གི་ཕ་མེས་ཀྱི་དཀོན་མཆོག་གཙོ་བོ་དཀོན་མཆོག་གི་ཕྱོགས་སུ་འགུག་པའི་ཕྱིར་ལྷོ་བྷིར་ཤེ་བྷ་ནས་བྱང་ཨེཕ་ར་ཡིམ་གྱི་རི་བརྒྱུད་ཡུལ་གྱི་མཐའ་བར་རྟག་ཏུ་ཕེབས་ཀྱི་ཡོད།

⁵ ཁོང་གིས་ཡ་ཧུ་དཱ་པའི་གྲོང་ཁྱེར་བཙན་པོར་བཟོས་པ་རེ་རེའི་ནང་ཁྲིམས་དཔོན་བསྐོས་གནང་བ་དང་།

⁶ དེ་ཚོ་ལ་ཁྱོད་ཚོས་ཁྲིམས་ཀྱི་དཔྱད་མཚམས་གཏོང་སྐབས་ཟབ་ཟབ་བྱ་དགོས་སོ། ཁྱོད་ཚོས་མིའི་དབང་ཆ་བེད་སྤྱོད་མི་བྱེད་པར་གཙོ་བོ་དཀོན་མཆོག་གི་སྐུ་དབང་བེད་སྤྱོད་བྱ་བཞིན་ཡོད་པ་དང་། ཁྱོད་ཚོས་ཁྲིམས་ཀྱི་དཔྱད་མཚམས་གཏོང་སྐབས་ཁོང་ཁྱོད་ཚོ་མཉམ་དུ་ཡོད།

⁷ གཙོ་བོ་དཀོན་མཆོག་ལ་འཇིགས་ཤིང་ཟབ་ཟབ་བྱ་དགོས། གང་ལ་ཟེར་ན། ང་ཚོའི་དཀོན་མཆོག་གཙོ་བོ་དཀོན་མཆོག་གིས་རྫུན་དང་ཕྱོགས་ཞེན་དང་ལྐོག་རྔན་སོགས་ལ་ཐུགས་རྩ་བ་ནས་མི་མཉེས་སོ་ཤེས་སློབ་སྟོན་གནང་ངོ་།

⁸ ཡེ་རུ་ཤ་ལེམ་དུ་ཡེ་ཧོ་ཤ་ཕད་ཀྱིས། གཙོ་བོ་དཀོན་མཆོག་གི་བཀའ་ཁྲིམས་ལས་འགལ་བ་དང་། གྲོང་ཁྱེར་ནང་གི་ཡུལ་མིའི་ཁྲིམས་ཀྱི་རྩོད་རྙོག་ཐག་གཅོད་བྱ་མཁན་ནི་ལེ་ཝི་པ་དང་། བླ་མ་ཚོ་དང་ཡུལ་གྱི་གནས་ཡོད་མི་སྣ་ཁག་བཅས་ཁྲིམས་དཔོན་དུ་བསྐོ་བཞག་གནང་ངོ་།

⁹ ཁོང་གིས་དེ་ཚོ་ལ་སློབ་སྟོན་འདི་ལྟར་གནང་ངོ་། ཁྱོད་ཚོས་ལས་དོན་བྱ་སྒོ་ཚང་མར་གཙོ་བོ་དཀོན་མཆོག་ལ་འཇིགས་ཤིང་ཁོང་གི་བཀའ་རྣམས་སྲུང་ཞིང་རང་གི་ལས་འགན་སྒྲུབ་དགོས་སོ།

¹⁰ གྲོང་ཁྱེར་གང་རུང་ཞིག་ནས་ཁྱོད་རང་ཚོའི་ཡུལ་གྱི་མི་ཚོས་མི་གསོད་པ་འམ་ཁྲིམས་ལས་འགལ་བ་འམ་བཀའ་དང་འགལ་བའི་ཁ་མཆུ་ཁྱོད་ཚོའི་སར་འཁྱེར་ཡོང་ན། དེ་ཚོས་གཙོ་བོ་དཀོན་མཆོག་གི་མདུན་དུ་སྡིག་པ་མི་གྱིས་པའི་ཆེད་དུ་དེ་ཚོས་ཁ་མཆུའི་སྐབས་སྤྱོད་ཚུལ་ཇི་ལྟར་བྱ་དགོས་སློབ་སྟོན་ཟབ་ཟབ་བྱ་དགོས། ཁྱོད་ཚོས་དེ་ལྟར་མ་བྱས་པ་ཡིན་ན། ཁྱོད་ཚོས་ཁྱོད་ཚོའི་ཡུལ་མི་ཚོར་གཙོ་བོ་དཀོན་མཆོག་ཐུགས་ཁྲོ་བའི་ནུས་པ་ཡོང་བར་འཚོར་བར་འགྱུར་རོ། འོན་ཀྱང་ཁྱོད་ཚོས་རང་གི་ལས་འགན་ལྟར་བྱས་པ་ཡིན་ན་ཁྱོད་ཚོར་ཉེས་སྐྱོན་མི་ཡོང་ངོ་།

¹¹ བླ་མ་ཆེན་པོ་ཨ་མར་ཡཱ་ལ་ཆོས་ཀྱི་སྐོར་གྱི་ཁ་མཆུ་ཚང་མའི་དབང་ཆ་ཚང་ཡོད་པ་དང་། ཡ་ཧུ་དཱ་པའི་སྤྱི་ཁྱབ་པ་ཨིཤ་མ་ཨེལ་གྱི་བུ་ཛེ་བ་དི་ཡཱ་ལ་མི་མང་གི་ཁ་མཆུ་ཚང་མའི་དབང་ཆ་ཡོད། ལེ་ཝི་པ་ཚོར་ཁྲིམས་ཀྱི་ཐག་གཅོད་ཆ་ཚང་ཏན་ཏན་བྱས་ཡོད་མེད་བལྟ་བའི་ལས་འགན་ཡོད། སྙིང་སྟོབས་སྐྱེད་ནས་སློབ་སྟོན་རྣམས་ལས་འགན་ལྟར་གྱིས་ཤིག་དང་། གཙོ་བོ་དཀོན་མཆོག་བདེན་པའི་ཕྱོགས་སུ་གནས་པར་ཤོག།