སྔོན་རབས་གཉིས་པ། 17 - Tibetan Old Testament 2011

ཡེ་ཧོ་ཤ་ཕད་རྒྱལ་པོར་འགྱུར་བ།

¹ ཡེ་ཧོ་ཤ་ཕད་རང་གི་ཡབ་རྒྱལ་པོ་ཨ་སའི་ཤུལ་འཛིན་དུ་རྒྱལ་པོར་འགྱུར་བ་དང་། ཁོང་གིས་ཨིསི་རཱཨེལ་ལས་རང་གི་གནས་སྟངས་སྟོབས་ཤུགས་ཆེ་རུ་བཏང་ངོ་།

² ཁོང་གིས་ཡ་ཧུ་དཱའི་འཛིང་རག་ཅན་གྱི་གྲོང་ཁྱེར་རྣམས་དང་ཡ་ཧུ་དཱའི་གྲོང་སེབ་དང་རྒྱལ་པོ་ཨ་སས་དབང་འཛིན་གནང་བའི་ཨེཕ་ར་ཡིམ་གྱི་མངའ་ཁུལ་དུ་དམག་དཔུང་རྣམས་འཇོག་གནང་ངོ་།

³ གཙོ་བོ་དཀོན་མཆོག་གིས་ཡེ་ཧོ་ཤ་ཕད་ལ་བྱིན་རླབས་གནང་ཡོད། གང་ལ་ཟེར་ན། ཁོང་གིས་ཁོང་རང་གི་ཡབ་ཀྱི་ཐོག་མའི་སྐུ་དུས་དཔེའི་རྗེས་སུ་འབྲངས་ནས། བྷལ་ལ་མཆོད་མེད་དོ།

⁴ ཁོང་གི་ཡབ་ཀྱི་དཀོན་མཆོག་གི་ཞབས་ཕྱི་ཞུ་གནང་བ་དང་། དཀོན་མཆོག་གི་བཀའ་ལ་གསན་པ་དང་ཨིསི་རཱཨེལ་གྱི་རྒྱལ་པོ་ཚོས་མཛད་པ་བཞིན་གནང་མེད་དོ།

⁵ གཙོ་བོ་དཀོན་མཆོག་གིས་ཡེ་ཧོ་ཤ་ཕད་ལ་ཡ་ཧུ་དཱ་པའི་རྒྱལ་ཁབ་ཏུ་སྐུ་དབང་བརྟན་པོར་གནང་ཡོད་པ་དང་། མི་མང་ཚང་མས་ཁོང་ལ་འབུལ་བ་འཁྱེར་ཡོང་བ་དང་། ཁོང་ཕྱུག་པོ་དང་སྙན་གྲགས་ཅན་དུ་འགྱུར་རོ།

⁶ ཁོང་གིས་གཙོ་བོ་དཀོན་མཆོག་གི་ཞབས་ཕྱི་ཞུ་རྒྱུར་སྤོབས་པ་གནང་ནས། ཡ་ཧུ་དཱ་པའི་ཡུལ་གྱི་ཕྱི་པའི་ལྷ་མཆོད་ཡུལ་ཆང་མ་དང་ལྷ་མོ་ཨ་ཤེ་རཱའི་རྟགས་མཚན་རྣམས་མེད་པར་མཛད་དོ།

⁷ ཁོང་གིས་རྒྱལ་སྲིད་སྐྱོངས་བའི་ལོ་གསུམ་པའི་སྐབས་སུ། ཁོང་གིས་ལས་བྱེད་པ་རྣམས་བྷེན་ཧེལ་དང་ཨོ་བ་དི་ཡཱ་དང་ཛ་ཀར་ཡཱ་དང་ནེ་ཐ་ནེལ་དང་མི་ཀ་ཡ་བཅས་པ་ཡ་ཧུ་དཱའི་གྲོང་ཁྱེར་ཁག་ནང་སློབ་སྟོན་བྱ་བར་མངགས་སོ།

⁸ དེ་ཚོ་དང་མཉམ་དུ་ལེ་ཝི་པ་དགུ་དང་བླ་མ་གཉིས་ཡོད། ལེ་ཝི་པ་ཚོ་ནི་ཤེ་མ་ཡཱ་དང་། ནེ་ཐན་ཡཱ་དང་། ཛེ་བ་དི་ཡཱ་དང་། ཨ་ས་ཧེལ་དང་། ཤེ་མི་ར་མོད་དང་། ཡེ་ཧོ་ན་ཐན་དང་། ཨ་དྷོ་ནི་ཡཱ་དང་། ཏོ་བྷི་ཡཱ་དང་ཏོ་བྷ་དོ་ནི་ཡཱ་བཅས་ཡིན་པ་དང་། བླ་མ་ནི་ཨེ་ལི་ཤ་མ་དང་ཡེ་ཧོ་རམ་གཉིས་ཡིན་ནོ།

⁹ དེ་ཚོས་གཙོ་བོ་དཀོན་མཆོག་གི་བཀའ་ཁྲིམས་ཀྱི་དེབ་འཁྱེར་ནས་ཡ་ཧུ་དཱའི་ཡུལ་ཡོངས་སུ་མི་མང་ལ་སློབ་སྟོན་བྱེད་པར་ཕེབས་སོ༎

ཡེ་ཧོ་ཤ་ཕད་ཀྱི་རླབས་ཆེན།

¹⁰ གཙོ་བོ་དཀོན་མཆོག་གིས་ཉེ་འཁོར་གྱི་རྒྱལ་ཁབ་ཚང་མས་རྒྱལ་པོ་ཡེ་ཧོ་ཤ་ཕད་མཉམ་དུ་དམག་འཐབ་བྱེད་པར་འཇིགས་པ་བཟོ་གནང་ངོ་།

¹¹ ཕེ་ལེ་ཤེད་པ་འགའ་ཞིག་གིས་ཁོང་ལ་རིན་ཆེན་དངུལ་ཁྱོན་ཆེ་དང་གཞན་འབུལ་བ་ཁག་འཁྱེར་ཡོང་བ་དང་། ཨ་རབ་པ་འགའ་ཞིག་གིས་ཁོང་ལ་ལུག་ ༧,༧༠༠ དང་། ར་ ༧,༧༠༠ བཅས་འཁྱེར་ཡོང་ངོ་།

¹² དེ་ལྟར་ཡེ་ཧོ་ཤ་ཕད་ཀྱི་སྟོབས་ཤུགས་ཇེ་ཆེར་འཕེལ་བ་དང་། ཡ་ཧུ་དཱ་ཡུལ་ཡོངས་སུ་ཁོང་གི་འཛིངས་རག་དང་གྲོང་ཁྱེར་ཁག་བཟོས་པ་དང་།

¹³ དེ་ཚོའི་ནང་མཁོ་སྒྲུབ་ཧ་ཅང་ཁྱོན་ཆེ་བསགས་སོ། ཡེ་རུ་ཤ་ལེམ་དུ་ཁོང་གི་འགོ་འཛིན་མཁས་པ་རྣམས་བཞག་གནང་ངོ་།

¹⁴ དེ་ཚོ་ནི་དེ་ཚོའི་རིགས་རུས་ལྟར་ཡིན་ནོ། ཨད་ནཱ་ནི་ཡ་ཧུ་དཱ་པའི་རིགས་རུས་ཀྱི་དམག་དཔུང་གི་དམག་སྤྱི་ཡིན་པ་དང་། ཁོང་གི་འོག་དམག་མི་ ༣༠༠,༠༠༠ ཡོད་དོ།

¹⁵ གོ་རིམ་གཉིས་པ་ལ་ཡེ་ཧོ་ཧ་ནན་ལ་དམག་མི་ ༢༨༠,༠༠༠ ཡོད་པ་དང་།

¹⁶ གོ་རིམ་གསུམ་པ་ལ་ཛིག་རིའི་བུ་ཨ་མ་ས་ཡཱ་ལ་དམག་མི་ ༢༠༠,༠༠༠ ཡོད་དོ། (ཨ་མ་ས་ཡཱས་གཙོ་བོ་དཀོན་མཆོག་གིས་ཞབས་ཕྱི་ཞུ་རྒྱུར་ཁས་ལེན་ཞུས་སོ།)

¹⁷ བྷེན་ཡ་མིན་གྱི་རིགས་རུས་ཀྱི་དམག་དཔུང་གི་དམག་སྤྱི་ཁྱད་དུ་འཕགས་པ་ཨེལ་ཡ་དྷ་ཡིན་པ་དང་། ཁོང་གི་མངའ་འོག་ཏུ་དམག་མི་ ༢༠༠,༠༠༠ ཕུབ་དང་གཞུ་བཅས་རང་སྒྲིགས་ཡོད་དོ།

¹⁸ ཁོང་གི་མངའ་འོག་རིམ་པ་གཉིས་པ་ཡེ་ཧོ་ཛ་བྷད་ལ་དམག་མི་ ༡༨༠,༠༠༠ ཡོད་པ་རྣམས་དམག་འཁྲུགས་ཀྱི་ཆེད་དུ་གོ་མཚོན་གང་ལེགས་ལྡན་པ་ཡོད་དོ།

¹⁹ མི་འདི་ཚོས་ཡེ་རུ་ཤ་ལེམ་དུ་རྒྱལ་པོའི་ཞབས་ཞུ་ཞུ་བ་དང་། དེ་མ་ཟད་ཁོང་གིས་གཞན་ཡ་ཧུ་དཱའི་འཛིང་རག་ཅན་གྱི་གྲོང་ཁྱེར་ནང་དམག་མི་འཕར་མ་རྣམས་བཞག་གནང་ཡོད་དོ༎