སྔོན་རབས་གཉིས་པ། 15 - Tibetan Old Testament 2011

ཨ་སའི་ལེགས་བཅོས་རྣམས།

¹ དེ་ནས་ཨོ་དེད་ཀྱི་བུ་ཨ་ཛར་ཡཱ་ལ་དཀོན་མཆོག་གི་ཐུགས་ཉིད་བབས་པ་དང་།

² ཁོང་གིས་རྒྱལ་པོ་ཨ་ས་མཇལ་བར་ཕེབས་ནས། ཁོང་གིས་ཞུས་པ། རྒྱལ་པོ་ཨ་ས་དང་ཡ་ཧུ་དཱ་དང་བྷེན་ཡ་མིན་གྱི་མི་མང་རྣམས་ང་ལ་ཉོན་ཞིག ཁྱོད་ཚོ་གཙོ་བོ་དཀོན་མཆོག་གི་ཕྱོགས་སུ་ཡོད་རིང་། ཁོང་ཡང་ཁྱོད་ཚོ་དང་མཉམ་དུ་ཡོད་དོ། ཁྱོད་ཚོས་ཁོང་ལ་འཚོལ་ན་ཁོང་གིས་ཁྱོད་ཚོར་རྙེད་པ་གནང་ཡོང་། ཁྱོད་ཚོས་ཁོང་ནས་ཁ་བསྒྱུར་ན་ཁོང་གིས་ཁྱོད་ཚོར་སྤངས་བ་གནང་ཡོང་།

³ དུས་ཡུན་རིང་པོའི་རིང་ཨིསི་རཱཨེལ་པ་ཚོ་དཀོན་མཆོག་ངོ་མ་མེད་པར་མི་ཚེ་སྐལ་བ་དང་། སློབ་སྟོན་གནང་མཁན་བླ་མ་མེད་པ་དང་ཁྲིམས་མེད་པར་གནས་ཡོད་དོ།

⁴ འོན་ཀྱང་དཀའ་ངལ་བྱུང་སྐབས་དེ་ཚོས་ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་གི་ཕྱོགས་སུ་ཁ་བསྒྱུར་རོ། དེ་ཚོས་ཁོང་ལ་འཚོལ་བས་ཁོང་རྙེད་དོ།

⁵ སྐབས་དེར་སུ་ཡང་བརྟན་པོར་འགྲོ་བསྐྱོད་བྱེད་མི་ཐུབ་བོ། གང་ལ་ཟེར་ན། སྐབས་དེར་ཡུལ་ཁམས་ཚང་མར་རྩོད་རྙོག་ཡོད་པ་དང་བདེ་འཇགས་མེད་དོ།

⁶ རྒྱལ་ཁབ་གཅིག་གིས་གཞན་ལ་མནར་གཅོད་བྱེད་པ་དང་། གྲོང་ཁྱེར་གཅིག་གིས་གཞན་ལ་མནར་གཅོད་བྱ་བཞིན་ཡོད་དོ། གང་ལ་ཟེར་ན། གཙོ་བོ་དཀོན་མཆོག་གིས་དེ་ཚོ་ལ་དཀའ་ངལ་དང་སྡུག་བསྔལ་འཁྱེར་གནང་བཞིན་ཡོད་དོ།

⁷ འོན་ཀྱང་ཁྱོད་ཚོ་སྟོབས་ཤུགས་ཆེན་པོ་བྱེད་དགོས་པ་དང་སེམས་ཤུགས་ཆགས་མི་རུང་། ཁྱོད་ཚོས་ལས་ཀ་གྱིས་པ་དེ་ལ་བྱ་དགའ་ཐོབ་པར་འགྱུར་ཞེས་སོ།

⁸ ཨ་སས་ཨོ་དེད་ཀྱི་བུ་ཨ་ཛར་ཡཱས་གསུངས་པའི་ལུང་བསྟན་གསན་པ་དང་བློ་སྟོབས་འཕེལ་ལོ། ཁོང་གིས་ཡ་ཧུ་དཱ་དང་བྷེན་ཡ་མིན་གྱི་ཡུལ་དུ་སྐུ་འདྲ་རྣམས་དང་ཨེཕ་ར་ཡིམ་གྱི་རི་བརྒྱུད་ཡུལ་གྱི་གྲོང་ཁྱེར་ཁོང་གིས་དབང་འཛིན་གནང་བ་ཚོའི་ནང་ཡོད་པའི་སྐུ་འདྲ་ཚང་མ་མེད་པར་བཟོས་སོ། ཁོང་གིས་མཆོད་ཁང་གི་ཁྱམས་རར་ཡོད་པའི་གཙོ་བོ་དཀོན་མཆོག་གི་མཆོད་ཁྲི་དེ་ཚོ་ཉམས་གསོ་གནང་ངོ་།

⁹ ཨེཕ་ར་ཡིམ་དང་། མ་ནསེ་སཱེ་དང་། སིམ་ཨོན་ནས་ཨ་སའི་ཕྱོགས་སུ་ཁོང་གི་རྒྱལ་ཁབ་ཏུ་གནས་སྡོད་བྱེད་པར་མི་མང་མང་པོ་ཡོང་ཡོད་པ་ཡིན་ནོ། གང་ལ་ཟེར་ན། དེ་ཚོས་གཙོ་བོ་དཀོན་མཆོག་ཁོང་དང་མཉམ་དུ་ཡོད་པ་མཐོང་བ་ཡིན་ནོ། ཨ་སས་དེ་ཚོ་ཚང་མ་དང་ཡ་ཧུ་དཱ་དང་བྷེན་ཡ་མིན་གྱི་མི་མང་རྣམས་བཀའ་འགུག་གནང་ངོ་།

¹⁰ ཨ་ས་རྒྱལ་པོར་འགྱུར་བའི་ལོ་བཅོ་ལྔ་དང་ཟླ་བ་གསུམ་པ་ལ་དེ་ཚོ་ཡེ་རུ་ཤ་ལེམ་དུ་འཛོམས་སོ།

¹¹ ཉིན་དེར་དེ་ཚོས་འཁྱེར་ཡོང་བའི་བཅོམ་ནོར་ནས་གཙོ་བོ་དཀོན་མཆོག་ལ་བ་ཕྱུགས་ ༧༠༠ དང་ལུག་ ༧,༠༠༠ དམར་མཆོད་ཕུལ་ལོ།

¹² དེ་ཚོའི་ཕ་མེས་ཀྱི་དཀོན་མཆོག་གཙོ་བོ་དཀོན་མཆོག་ལ་ལྷག་བསམ་རྣམ་དག་གིས་མཆོད་རྒྱུའི་ཁས་ལེན་གྱི་དམ་བཅའ་ཞིག་བཟོས་སོ།

¹³ གཞོན་ནུའམ་ལོ་ན་རྒས་པོ་སྐྱེས་པའམ་བུད་མེད་སུ་ཞིག་ཁོང་ལ་མ་མཆོད་མཁན་ཡོད་ན་སྲོག་ཐོག་གཏོང་རྒྱུ་བྱས་སོ།

¹⁴ དེ་ཚོས་སྐད་ཤུགས་ཆེན་པོས་གཙོ་བོ་དཀོན་མཆོག་གི་མཚན་ནས་དམ་བཅའ་སྲུང་རྒྱུའི་མནའ་བསྐྱེལ་ལོ། དེ་ནས་དེ་ཚོས་སྐད་འབོད་བྱས་པ་དང་དུང་འབུད་དོ།

¹⁵ ཡ་ཧུ་དཱ་པའི་མི་མང་རྣམས་དགའ་པོ་བྱུང་ཡོད། གང་ལ་ཟེར་ན། དེ་ཚོས་སེམས་ཀྱི་གཏིང་ནས་དམ་བཅའ་བཞག་པ་དང་། གཙོ་བོ་དཀོན་མཆོག་ལ་མཆོད་རྒྱུར་དགའ་སྤྲོ་བྱེད་པ་དང་། ཁོང་གིས་དེ་ཚོ་ལ་ངོས་ལེན་གནང་བ་དང་ཕྱོགས་ཚང་མར་ཞི་བདེ་གནང་ངོ་།

¹⁶ རྒྱལ་པོ་ཨ་སས་རང་གི་རྨོ་རྨོ་མ་ཀཱ་ལ་ཡུམ་རྒྱལ་མོའི་གོ་གནས་ནས་མར་ཕབ་བོ། གང་ལ་ཟེར་ན། མོས་ལྷ་མོ་ཨ་ཤེ་རཱའི་འདྲ་སྐུ་སྐྱོག་དྲོ་པོ་ཞིག་བཟོས་ཡོད་དོ། ཨ་སས་སྐུ་འདྲ་དེ་བཅག་པ་དང་དུམ་བུར་བཏུབ་ནས་ཀིད་རོན་གྱི་ལུང་གཤོང་དུ་མེར་བསྲེགས་བཏང་ངོ་།

¹⁷ ཨ་སས་ཕྱི་པའི་ལྷ་མཆོད་ཡུལ་ཚང་མ་མེད་པར་བཟོས་མེད་ན་ཡང་། ཁོང་གི་སྐུ་ཚེའི་རིང་གཙོ་བོ་དཀོན་མཆོག་ལ་དམ་ཚིག་གཙང་མར་གནས་སོ།

¹⁸ ཁོང་གི་ཡབ་ཨ་བྷི་ཡཱས་གཙོ་བོ་དཀོན་མཆོག་ལ་བསྔོ་བའི་དངོས་པོ་རྣམས་དང་ཁོང་རང་ཉིད་ཀྱིས་བསྔོ་བའི་གསེར་དངུལ་གྱི་དངོས་པ་རྣམས་མཆོད་ཁང་ནང་བཞག་གནང་ངོ་།

¹⁹ ཁོང་གིས་རྒྱལ་སྲིད་སྐྱོངས་བའི་ལོ་ངོ་སུམ་ཅུ་སོ་ལྔའི་རིང་དམག་འཁྲུགས་གཞན་མ་བྱུང་ངོ་༎