སྔོན་རབས་གཉིས་པ། 14 - Tibetan Old Testament 2011

རྒྱལ་པོ་ཨ་སས་ཨི་ཐི་ཨོ་པི་ཡ་ལ་ཕམ་པ།

¹ རྒྱལ་པོ་ཨ་བྷི་ཡཱ་གྲོངས་པ་དང་ཁོང་ལ་དཱ་བིད་ཀྱི་གྲོང་ཁྱེར་གྱི་རྒྱལ་པོའི་དུར་ཁང་ནང་སྦས་སོ། ཁོང་གི་སྲས་ཨ་ས་ཁོང་གི་ཤུལ་འཛིན་དུ་རྒྱལ་པོར་འགྱུར་བ་དང་། ཨ་སའི་རྒྱལ་སྲིད་སྐྱོངས་བའི་ལོ་བཅུ་བར་དུ་ཡུལ་དེར་ཞི་བདེར་གནས་སོ།

² ཨ་སས་བདེན་པ་དང་ལེགས་པ་འབའ་ཞིག་གནང་ནས། གཙོ་བོ་དཀོན་མཆོག་ཐུགས་མཉེས་པར་མཛད་དོ།

³ ཁོང་གིས་ཕྱི་རྒྱལ་བའི་མཆོད་ཁྲི་དང་ཕྱི་པའི་ལྷ་མཆོད་ཡུལ་རྣམས་ཕྱིར་འབུད་གནང་བ་དང་། རྡོའི་དམ་པའི་ཀ་བ་རྣམས་བཅག་པ་དང་ལྷ་མོ་ཨ་ཤེ་རཱའི་མཚན་མ་རྣམས་བཅད་དོ།

⁴ ཁོང་གིས་ཡ་ཧུ་དཱ་པའི་མི་མང་ཚོར་དེ་ཚོ་ཕ་མེས་ཀྱི་དཀོན་མཆོག་གཙོ་བོ་དཀོན་མཆོག་གི་ཐུགས་དགོངས་ལྟར་བྱེད་དགོས་པ་དང་། ཁོང་གི་སློབ་སྟོན་དང་བཀའ་ལ་ཉན་དགོས་པའི་བཀའ་གནང་ངོ་།

⁵ ཡ་ཧུ་དཱ་པའི་ཡུལ་ཡོངས་ནས་ཁོང་གིས་ཕྱི་པའི་ལྷ་མཆོད་ཡུལ་དང་སྤོས་ཀྱི་མཆོད་ཁྲི་ཡོངས་རྫོགས་མེད་པར་བཟོ་གནང་བའི་རྐྱེན་གྱིས་ཁོང་གི་སྐུ་དུས་རྒྱལ་ཁབ་ནང་བདེ་སྐྱིད་བྱུང་ངོ་།

⁶ ཁོང་གི་སྐུ་དུས་ཡ་ཧུ་དཱའི་གྲོང་ཁྱེར་ནང་འཛིང་རག་བཟོས་གནང་བ་དང་། ལོ་མང་པོའི་རིང་དམག་འཁྲུགས་མ་བྱུང་ངོ་། གང་ལ་ཟེར་ན། གཙོ་བོ་དཀོན་མཆོག་གིས་ཁོང་ལ་ཞི་བདེ་གནང་ཡོད་དོ།

⁷ ཁོང་གིས་ཡ་ཧུ་དཱའི་མི་མང་ལ། ང་ཚོས་གྲོང་ཁྱེར་ཁག་ལ་རྩིག་པ་དང་གན་དྷོ་ལ་དང་རྒྱལ་སྒོ་ཕྱེ་རྒྱུ་དང་རྒྱབ་རྒྱུ་ཡོད་པ་བཟོས་ནས་བཙན་པོར་བཟོས་དགོས་སོ། ང་ཚོར་ཡུལ་གྱི་དབང་ཆ་ཚང་ཡོད་དོ། གང་ལ་ཟེར་ན། ང་ཚོས་ང་ཚོའི་དཀོན་མཆོག་གཙོ་བོ་དཀོན་མཆོག་གིས་ཐུགས་དགོངས་ལྟར་བྱས་ཡོད་པས། ཁོང་གིས་ང་ཚོར་སྲུང་སྐྱོབས་གནང་བ་དང་ཕྱོགས་ཚང་མར་བཙན་པོར་འཛོག་གནང་ཡོད། རྒྱལ་པོས་གསུངས་པ་ལྟར་དེ་ཚོས་བཟོས་ནས་ཕུན་སུམ་ཚོགས་པ་འགྱུར་རོ།

⁸ ཡ་ཧུ་དཱ་ནས་རྒྱལ་པོ་ཨ་ས་ལ་དམག་མི་ཕུབ་དང་མདུང་གི་གོ་མཚོན་རང་སྒྲིགས་ཅན་ ༣༠༠,༠༠༠ དང་། བྷེན་ཡ་མིན་ནས་དམག་མི་ཕུབ་དང་མདའ་གཞུ་རང་སྒྲིགས་ཅན་ ༢༨༠,༠༠༠ ཡོད་དོ། དེ་ཚོ་ཚང་མ་བློ་སྟོབས་ཅན་དང་སྦྱོངས་འདར་ལེགས་པར་ཟིན་པ་འབའ་ཞིག་ཡིན་ནོ།

⁹ ཨི་ཐི་ཨོ་པི་ཡ་པ་ཛེ་རཱ་ཟེར་བ་ཞིག་གིས། ཡ་ཧུ་དཱར་དམག་མི་ ༡༠,༠༠,༠༠༠ དང་ཤིང་རྟ་འཁོར་ལོ་ ༣༠༠ བཅས་པས་བཙན་འཛུལ་བྱས་ནས། དེ་ཚོ་མ་རེ་ཤ་བར་སླེབས་སོ།

¹⁰ ཨ་ས་ཁོ་མཉམ་དུ་འཐབ་པར་ཕྱིན་པ་དང་ཕན་ཆུན་གཉིས་ཀ་མ་རེ་ཤའི་ཉེ་འགྲམ་དུ་ཛེ་ཕ་ཐའི་ལུང་གཤོང་དུ་དམག་གྲ་སྒྲིགས་སོ།

¹¹ ཨ་སས་ཁོང་གི་དཀོན་མཆོག་གཙོ་བོ་དཀོན་མཆོག་ལ། ཀྱེ་གཙོ་བོ་དཀོན་མཆོག་ཁྱེད་ཀྱིས་དམག་མི་སྐྱོ་པོ་ཞིག་ལ་སྟོབས་ཤུགས་ཆེན་པོའི་ཐོག་ཏུ་རོགས་གནང་ཐུབ་མཁན་ཁྱེད་མ་རྟོགས་གཞན་མེད་དོ། ཀྱེ་གཙོ་བོ་དཀོན་མཆོག་ང་ཚོའི་དཀོན་མཆོག་ང་ཚོར་རོགས་མཛོད་ཅིག གང་ལགས་ཟེར་ན། ང་ཚོས་ཁྱེད་ལ་བློ་བཅོལ་ཡོད་པ་དང་། ཁྱེད་ཀྱི་མཚན་ནས་ང་ཚོས་དམག་དཔུང་ཆེན་པོ་འདི་མཉམ་དུ་འཐབ་པར་ཡོང་བ་ཡིན། གཙོ་བོ་དཀོན་མཆོག་ཁྱེད་ནི་ང་ཚོའི་དཀོན་མཆོག་ཡིན་པས་ཁྱེད་ལ་ཕམ་པར་བྱ་རྒྱུའི་རེ་བ་སུས་ཀྱང་གཏོང་མི་ཐུབ་ཅེས་གསོལ་བ་འདེབས་སོ།

¹² ཨ་ས་དང་ཡ་ཧུ་དཱའི་དམག་དཔུང་ཚོས། ཨི་ཐི་ཨོ་པི་ཡ་པའི་དམག་དཔུང་ལ་འཐབ་པས་གཙོ་བོ་དཀོན་མཆོག་གིས་དེ་ཚོ་ལ་ཕམ་པར་མཛད་ནས། དེ་ཚོ་བྲོས་སོ།

¹³ ཨ་ས་དང་ཁོང་གི་དམག་དཔུང་ཚོས་དེ་ཚོ་གྷེ་རར་བར་དུ་དེད་དོ། ཨི་ཐི་ཨོ་པི་ཡ་པའི་དམག་མི་ཁྱོན་ཆེ་བསད་ཡོད་སྟབས་དེ་ཚོ་ཡང་སྐྱར་དམག་རྒྱབ་མི་ཐུབ་བོ། གཙོ་བོ་དཀོན་མཆོག་གིས་དེ་ཚོའི་དམག་དཔུང་དབང་བསྒྱུར་གནང་བས་རྐྱེན་གྱིས་དམག་མི་ཚོས་བཅོམ་ནོར་ཁྱོན་ཆེ་འཁྱེར་རོ།

¹⁴ དེ་ནས་དེ་ཚོས་གྷེ་རར་གྱི་མཐའ་འཁོར་གྱི་གྲོང་ཁྱེར་རྣམས་མེད་པར་བཟོ་ཐུབ་བོ། གང་ལ་ཟེར་ན། མི་མང་རྣམས་གཙོ་བོ་དཀོན་མཆོག་ལ་ཤིན་ཏུ་འཇིགས་ཡོད་དོ། དམག་མི་ཚོས་གྲོང་ཁྱེར་དེ་ཚོ་ཚང་མ་བཅོམ་པ་དང་བཅོམ་ནོར་ཁྱོན་ཆེ་འཁྱེར་རོ།

¹⁵ དེ་ཚོས་ལུག་རྫིའི་སྡོད་སྒར་འགའ་ཞིག་ལ་འཐབ་ནས་ལུག་དང་རྔ་མོང་གྲངས་འབོར་ཁྱོན་ཆེ་དབང་བཟུང་བྱས་སོ། དེ་ནས་དེ་ཚོ་ཡེ་རུ་ཤ་ལེམ་དུ་ཕྱིར་ལོག་གོ།