སྔོན་རབས་གཉིས་པ། 13 - Tibetan Old Testament 2011

ཨ་བྷི་ཡཱས་ཡེ་རོ་བྷམ་དང་མཉམ་དུ་དམག་འཐབ་པ།

¹ ཨིསི་རཱཨེལ་དུ་ཡེ་རོ་བྷམ་གྱིས་རྒྱལ་སྲིད་སྐྱོངས་བའི་ལོ་བཅོ་བརྒྱད་སོང་བའི་སྐབས་སུ། ཨ་བྷི་ཡཱ་ནི་ཡ་ཧུ་དཱའི་རྒྱལ་པོར་འགྱུར་བ་དང་།

² ཁོང་གིས་ཡེ་རུ་ཤ་ལེམ་དུ་ལོ་གསུམ་རིང་རྒྱལ་སྲིད་སྐྱངས་སོ། ཁོང་གི་ཡུམ་ནི་གྷི་བི་ཨཱའི་གྲོང་ཁྱེར་ནས་ཡིན་པ་ཨུ་རི་ཨེལ་གྱི་བུ་མོ་མི་ཀ་ཡ་ཟེར་བ་ཡིན་ནོ། ཨ་བྷི་ཡཱ་དང་ཡེ་རོ་བྷམ་གཉིས་དབར་དམག་འཁྲུགས་ལངས་སོ།

³ ཨ་བྷི་ཡཱས་ད་དུང་དམག་མི་ ༤༠༠,༠༠༠ བཙུགས་པ་དང་། ཡེ་རོ་བྷམ་གྱིས་དམག་དཔུང་ ༨༠༠,༠༠༠ ཀྱིས་དམག་ལན་སློག་གོ

⁴ དམག་མི་རྣམས་ཨེཕ་ར་ཡིམ་གྱི་རི་བརྒྱུད་ཀྱི་གྲོང་དུ་འཛོམས་སོ། རྒྱལ་པོ་ཨ་བྷི་ཡཱས་ཛེ་མ་རེམ་གྱི་རི་བོའི་སྟེང་ཡོང་ནས། ཡེ་རོ་བྷམ་དང་ཨིསི་རཱཨེལ་པ་ཚོར། ང་ལ་ཉོན་ཞིག་སྨྲས་སོ།

⁵ ཁྱོད་ཚོས་ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་གིས་དྷ་བདི་ལ་ཁོང་དལ་ཁོང་དང་ཁོང་གི་བརྒྱུད་པ་ཚོས་རྟག་ཏུ་ཨིསི་རཱཨེལ་གྱི་རྒྱལ་པོར་བསྐོས་གནང་རྒྱུའི་ཞལ་ཆད་བརྟན་པོ་གནང་ཡོད་པ་དེ་ཤེས་ཀྱི་མེད་དམ།

⁶ ནེ་བྷད་ཀྱི་བུ་ཡེ་རོ་བྷམ་གྱིས་ཁོས་རྒྱལ་པོ་སོ་ལོ་མོན་ལ་ངོ་ལོག་བྱས་པའི་རྗེས་སུ།

⁷ ཁོས་སྙིང་པོ་མེད་པའི་མི་ངན་འགའ་ཞིག་ཚོགས་བཅུག་ནས། རྒྱལ་པོ་སོ་ལོ་མོན་གྱི་སྲས་རེ་ཧོ་བྷམ་སྐུ་ན་ཧ་ཅང་ཆུང་ཆུང་ཡིན་ཞིང་། ཁོ་ལ་ཁ་ཐེབ་བཅོག་རྒྱུའི་ཉམས་མྱོང་མེད་པར་དེ་ཚོས་བཙན་དབང་གིས་ཁོ་པའི་འདོད་པ་ལྟར་བྱེད་དུ་བཅུག་གོ

⁸ ད་ཆ་ཁྱོད་ཚོས་གཙོ་བོ་དཀོན་མཆོག་གིས་དཱ་བིད་ཀྱི་བརྒྱུད་པར་གནང་བའི་རྒྱལ་པོའི་དབང་ཆ་ལ་འཐབ་རྒྱུའི་གྲ་སྒྲིགས་བྱེད་བཞིན་ཡོད་དམ། ཁྱོད་ཚོར་དམག་དཔུང་ཁྱོན་ཆེ་དང་ཡེ་རོ་བྷམ་གྱིས་ཁྱོད་ཚོའི་དཀོན་མཆོག་ལྟར་བཟོས་པའི་གསེར་གྱི་བ་གླང་ཚོ་ཡོད་དོ།

⁹ ཁྱོད་ཚོས་ཨ་རོན་གྱི་བརྒྱུད་པའི་གཙོ་བོ་དཀོན་མཆོག་གི་བླ་མ་ཚོ་དང་ལེ་ཝི་པ་ཚོ་ཕྱིར་འབུད་བྱས་ནས། ཁྱོད་ཚོས་དེའི་ཚབ་ལ་རྒྱལ་ཁབ་གཞན་གྱིས་བྱས་པ་ལྟར་བླ་མ་བསྐོས་ཡོད། སུ་ཞིག་གིས་བ་གླང་ངམ་ལུག་བདུན་མཉམ་དུ་ཡོང་བ་ཡིན་ན། ཁོ་ལ་ཁྱོད་ཚོའི་ལྷ་ཡིན་ཟེར་བའི་བླ་མར་བསྔོ་འབུལ་བྱེད་བཞིན་ཡོད་དོ།

¹⁰ འོན་ཀྱང་ང་ཚོས་ད་དུང་ང་ཚོའི་དཀོན་མཆོག་གཙོ་བོ་དཀོན་མཆོག་ལ་སྤངས་མེད། ཨ་རོན་གྱི་བརྒྱུད་པའི་བླ་མ་ཚོས་རང་གི་ལས་འགན་བྱེད་པ་དང་ལེ་ཝི་པ་ཚོས་དེ་ཚོར་རོགས་བྱེད་བཞིན་ཡོད་དོ།

¹¹ དེ་ཚོས་ཉིན་ལྟར་སྔ་དགོང་གཉིས་ལ་ཁོང་ལ་སྤོས་དང་སེམས་ཅན་གྱི་དམར་མཆོད་ཆ་ཚང་སྲེག་ནས་མཆོད་པ་ཕུལ་ལོ། དེ་ཚོས་ཆོ་ག་ལྟར་གཙང་བའི་རྒྱ་ལྕོག་གི་སྟེང་དུ་བཞེས་བག་གི་འབུལ་བ་སྒྲིགས་པ་དང་། དགོང་རེ་བཞིན་གསེར་གྱི་ཞུ་སྟེགས་སྟེང་མཆོད་མེ་སྤར་གྱི་ཡོད་དོ། ང་ཚོས་གཙོ་བོ་དཀོན་མཆོག་གིས་བཀའ་གནང་བ་ལྟར་སྒྲུབ་ཀྱི་ཡོད་དོ། འོན་ཀྱང་ཁྱོད་ཚོས་ཁོང་ལ་སྤངས་ཡོད་དོ།

¹² གཙོ་བོ་དཀོན་མཆོག་ཁོང་རང་ང་ཚོའི་དབུ་འཁྲིད་ཡིན་པ་དང་། ཁོང་གི་བླ་མ་ཚོས་དམག་དུང་འཁྱེར་ནས་ཁྱོད་ཚོ་དང་མཉམ་དུ་དམག་འཐབ་ལ་ང་ཚོར་འབོད་དུ་གཏོང་རྒྱུར་གྲ་སྒྲིགས་ཡོད། ཨིསི་རཱཨེལ་གྱི་མི་མང་ཚོ་ཁྱོད་ཚོའི་ཕ་མེས་ཀྱི་དཀོན་མཆོག་གཙོ་བོ་དཀོན་མཆོག་དང་མཉམ་དུ་དམག་འཁྲུགས་མ་བྱེད་ཅིག ཁྱོད་ཚོ་ལ་རྒྱལ་ཁ་མི་ཐོབ་ཅེས་སོ།

¹³ སྐབས་དེར་ཡེ་རོ་བྷམ་གྱིས་ཡ་ཧུ་དཱ་པའི་དམག་དཔུང་ལ་འཇབ་དམག་བྱེད་པ་ཁོ་རང་གི་དམག་མི་འགའ་ཤས་རྒྱབ་ཕྱོགས་ནས་བཏང་བ་དང་། དེ་བྱིང་གིས་མདུན་ཕྱོགས་ནས་ཁ་བལྟས་སོ།

¹⁴ ཡ་ཧུ་དཱ་པ་ཚོས་བལྟ་སྐབས་དེ་ཚོ་མཐའ་བསྐོར་ནས་ཡོད་པ་མཐོང་ནས། དེ་ཚོས་གཙོ་བོ་དཀོན་མཆོག་ལ་རོགས་རམ་ཆེད་དུ་སྐད་འབོད་བྱེད་པ་དང་བླ་མ་ཚོས་དུང་འབུད་དོ།

¹⁵ ཡ་ཧུ་དཱ་པ་ཚོས་སྐད་འབོད་བྱས་པ་དང་། ཨ་བྷི་ཡཱས་སྣེ་འཁྲིད་ཀྱིས་ཕར་རྒོལ་བྱས་སོ། དཀོན་མཆོག་གིས་ཡེ་རོ་བྷམ་དང་ཨིསི་རཱཨེལ་གྱི་དམག་དཔུང་ཚོ་ལ་ཕམ་པར་མཛད་དོ།

¹⁶ ཨིསི་རཱཨེལ་པ་ཚོ་ཡ་ཧུ་དཱ་པའི་ས་ནས་བྲོས་པ་དང་། དཀོན་མཆོག་གིས་ཡ་ཧུ་དཱ་པ་ཚོ་དེ་ཚོ་ལ་དབང་བསྒྱུར་བྱེད་དུ་བཅུག་གནང་ངོ་།

¹⁷ ཨ་བྷི་ཡཱ་དང་ཁོང་གི་དམག་དཔུང་ཚོས་ཨིསི་རཱཨེལ་པ་ཚོར་ཕམ་ཉེས་ཚབ་ཆེ་བཟོས་པ་དང་། ཨིསི་རཱཨེལ་གྱི་དམག་མི་དཔའ་རྩལ་ལྡན་པ་འབུམ་ལྔ་བསད་དོ།

¹⁸ དེ་ལྟར་ཡ་ཧུ་དཱ་པའི་མི་མང་རྣམས་ཨིསི་རཱཨེལ་པ་ཚོ་ལས་རྒྱལ་བར་འགྱུར་རོ། གང་ལ་ཟེར་ན། དེ་ཚོས་རང་གི་ཕ་མེས་ཀྱི་དཀོན་མཆོག་གཙོ་བོ་དཀོན་མཆོག་ལ་བློ་བཅོལ་ཡོད་པ་ཡིན་ནོ།

¹⁹ ཨ་བྷི་ཡཱས་ཡེ་རོ་བྷམ་གྱི་དམག་དཔུང་གི་རྗེས་དེད་བྱས་པ་དང་། ཁོང་གི་གྲོང་ཁྱེར་འགའ་ཤས་བྷེ་ཐེལ་དང་ཡེ་ཤ་ནཱ་དང་ཨེཕ་རོན་དང་གྲོང་ཁྱེར་དེ་ཚོ་རེ་རེའི་ཉེ་འགྲམ་གྱི་གྲོང་གསེབ་རྣམས་དབང་བཟུང་བྱས་སོ།

²⁰ ཨ་བྷི་ཡཱའི་རྒྱལ་སྲིད་སྐྱོངས་བའི་རིང་ཡེ་རོ་བྷམ་གྱིས་རང་གི་སྟོབས་ཤུགས་སླར་གསོ་རྩ་བ་ནས་བྱེད་མ་ཐུབ་བོ། མཐའ་མར་གཙོ་བོ་དཀོན་མཆོག་གིས་ཁོ་པར་ཞུས་ནས་ཁོ་ཤིའོ།

²¹ གང་ལྟར་ཨ་བྷི་ཡཱ་སྟོབས་ཤུགས་ཆེ་རུ་སོང་ངོ་། ཁོང་ལ་ཆུང་མ་གྲངས་བཅུ་བཞི་ཡོད་པ་དང་། བུ་ཉི་ཤུ་རྩ་གཉིས་དང་བུ་མོ་བཅུ་དྲུག་གི་ཕ་ཡིན་ནོ།

²² ཨ་བྷི་ཡཱའི་རྒྱལ་རབས་ལྷག་འཕྲོས་ཁོང་གིས་སྨྲས་པ་དང་གང་བྱས་པ་རྣམས་ལུང་སྟོན་པ་ཨིད་དྷོའི་རྒྱལ་རབས་ནང་བཀོད་ཡོད་དོ༎