སྔོན་རབས་གཉིས་པ། 12 - Tibetan Old Testament 2011

ཨི་ཇིབ་པས་ཡ་ཧུ་དཱ་ལ་བཙན་འཛུལ་བྱས་པ།

¹ རེ་ཧོ་བྷམ་རྒྱལ་པོའི་ཚུལ་དུ་དབང་བཟུང་བྱས་མ་ཐག་ཏུ་ཁོང་དང་ཁོང་གི་མི་མང་ཚོས་གཙོ་བོ་དཀོན་མཆོག་གི་བཀའ་ཁྲིམས་སྤངས་སོ།

² རེ་ཧོ་བྷམ་གྱིས་རྒྱལ་སྲིད་སྐྱོངས་བའི་ལོ་ལྔ་པའི་སྐབས་སུ་དེ་ཚོས་གཙོ་བོ་དཀོན་མཆོག་ལ་དམ་ཚིག་མི་གཙང་བའིརྐྱེན་གྱིས་ཆད་པ་གནང་ངོ་། ཨི་ཇིབ་ཀྱི་རྒྱལ་པོ་ཤི་ཤག་གིས་ཡེ་རུ་ཤ་ལེམ་དུ་བཙན་འཛུལ་བྱས་པར།

³ དམག་མིའི་ཤིང་རྟ་འཁོར་ལོ་གྲངས་ ༡,༢༠༠ དང་། རྟ་དམག་ ༦༠,༠༠༠ དང་ལིབ་ཡ་པ་དང་སུག་ཀི་པ་དང་ཨི་ཐི་ཨོ་པི་ཡ་པའི་དམག་དཔུང་བཅས་པ་དམག་མི་གྲངས་ལས་འདས་པ་ཡོད་དོ།

⁴ ཁོང་གིས་ཡ་ཧུ་དཱའི་འཛིང་རག་ཅན་གྱི་གྲོང་ཁྱེར་ཁག་བཙན་བཟུང་བྱས་པ་དང་། ཐག་རིང་པོ་ཡེ་རུ་ཤ་ལེམ་བར་དུ་སླེབས་སོ།

⁵ ལུང་སྟོན་པ་ཤེ་མ་ཡཱ་ནི་རྒྱལ་པོ་རེ་ཧོ་བྷམ་དང་ཡ་ཧུ་དཱ་པའི་འགོ་འཁྲིད་རྩར་ཡེ་རུ་ཤ་ལེམ་དུ་ཤི་ཤག་ནས་བྲོས་ཕྱིར་འཛོམས་ཡོད་སར་སླེབས་སོ། ཁོང་གིས་དེ་ཚོ་ལ་དཀོན་མཆོག་གི་གསུང་འཕྲིན་གནང་བ་འདི་ལྟར་ཡིན། ཁྱོད་ཚོས་ང་སྤངས་པས་རྐྱེན་གྱིས་ངས་ཁྱོད་ཚོ་སྤངས་ནས་ཤི་ཤག་ལ་རྩིས་སྤྲད་པ་ཡིན་ཞེས་གསུངས་སོ།

⁶ རྒྱལ་པོ་དང་འགོ་འཛིན་ཚོས་སྡིག་པ་གྱིས་པར་ཁས་ལེན་བྱས་པ་དང་། དེ་ཚོས་གཙོ་བོ་དཀོན་མཆོག་གི་ཇི་མཛད་པ་རྣམས་དྲང་བདེན་རེད་ཅེས་སྨྲས་སོ།

⁷ གཙོ་བོ་དཀོན་མཆོག་གིས་དེ་ལྟར་གཟིགས་པ་དང་ཁོང་གིས་ཤེ་མ་ཡཱ་ལ་བཀའ་གནང་ནས་གསུངས་པ། དེ་ཚོས་རང་གི་སྡིག་པར་ངོས་ལེན་བྱས་པའི་རྐྱེན་གྱིས་ངས་དེ་ཚོ་མེད་པར་བྱ་རྒྱུ་མ་ཡིན་ནོ། འོན་ཀྱང་ཤི་ཤག་གིས་བཙན་འཛུལ་བྱ་སྐབས་དེ་ཚོ་དཀའ་ངལ་གྱི་ངང་ཐར་བར་འགྱུར། ཡེ་རུ་ཤ་ལེམ་གྱི་ངའི་ཁྲོ་བ་ཆ་ཚང་འཚོར་བར་མི་འགྱུར།

⁸ འོན་ཀྱང་ཤི་ཤག་གིས་དེ་ཚོ་དབང་བར་བྱ་བ་དང་། དེ་ཚོས་ང་ལ་ཞབས་ཞུ་བྱ་བ་དང་འཇིག་རྟེན་གྱི་རྒྱལ་པོ་ཚོར་ཞབས་ཞུ་བྱ་བ་གཉིས་ཀྱི་ཁྱད་པར་ཤེས་པར་འགྱུར་ཞེས་སོ།

⁹ རྒྱལ་པོ་ཤི་ཤག་ཡེ་རུ་ཤ་ལེམ་དུ་ཡོང་ནས་མཆོད་ཁང་དང་ཕོ་བྲང་ནས་རིན་ཆེན་གྱི་བང་མཛོད་རྣམས་འཁྱེར་རོ། ཁོང་གིས་རྒྱལ་པོ་སོ་ལོ་མོན་གྱིས་བཟོས་གནང་བའི་གསེར་གྱི་ཕུབ་དང་བཅས་པ་ཚང་མ་འཁྱེར་རོ།

¹⁰ དེའི་ཚབ་ལ་རེ་ཧོ་བྷམ་གྱིས་ལིའི་ཕུབ་བཟོས་ནས་ཕོ་བྲང་གི་རྒྱལ་སྒོ་སྲུང་བའི་འབྲེལ་ཡོད་ཀྱི་འགོ་འཛིན་ཚོར་རྩིས་སྤྲོད་གནང་ངོ་།

¹¹ རྒྱལ་པོ་མཆོད་ཁང་དུ་ཕེབས་རིན་བཞིན་དུ་སྐུ་སྲུང་བས་ཕུབ་དེ་ཚོ་ཐོག་པ་དང་། དེ་ནས་དེ་ཚོ་སྐུ་སྲུང་བའི་ཁང་མིག་ནང་འཇོག་བཞིན་ཡོད།

¹² ཁོང་གིས་གཙོ་བོ་དཀོན་མཆོག་ལ་ཉམ་ཆུང་བྱ་སྐབས་གཙོ་བོ་དཀོན་མཆོག་གི་ཁྲོ་བས་ཁོ་ལ་ཆ་ཚང་མེད་པར་མ་མཛད་པ་དང་ཡ་ཧུ་དཱའི་གནས་སྟངས་ལེགས་པར་འགྱུར་རོ༎

རེ་ཧོ་བྷམ་གྱིས་རྒྱལ་སྲིད་ཀྱི་ལོ་རྒྱུས་མདོར་བསྡུས།

¹³ རེ་ཧོ་བྷམ་གྱིས་ཡེ་རུ་ཤ་ལེམ་དུ་རྒྱལ་སྲིད་སྐྱོངས་བ་དང་ཁོང་ནི་རྒྱལ་པོའི་ཚུལ་བཞིན་སྟོབས་ཤུགས་འཕེལ་ལོ། ཁོང་རྒྱལ་པོར་འགྱུར་སྐབས་དགུང་ལོ་བཞི་བཅུ་ཞེ་གཅིག་ཡིན་པ་དང་། ཨིསི་རཱཨེལ་གྱི་མངའ་ཁུལ་ཡོང་ནས་གཙོ་བོ་དཀོན་མཆོག་ལ་མཆོད་ཡུལ་འདམས་གནང་བའི་གྲོང་ཁྱེར་ཡེ་རུ་ཤ་ལེམ་དུ་ལོ་བཅུ་བདུན་རིང་རྒྱལ་སྲིད་བསྐྱངས་སོ། རེ་ཧོ་བྷམ་གྱི་ཨ་མ་ནི་ཨམ་མོན་ཡུལ་གྱི་ན་མཱ་ཟེར་བ་དེ་ཡིན་ནོ།

¹⁴ ཁོང་གིས་བྱ་བ་ངན་པ་འབའ་ཞིག་བྱས་ཡོད་དོ། གང་ལ་ཟེར་ན། ཁོང་གིས་གཙོ་བོ་དཀོན་མཆོག་གི་དགོངས་པ་ཇི་ཡིན་ཤེས་ཐབས་བྱས་མེད་དོ།

¹⁵ རེ་ཧོ་བྷམ་གྱི་བྱ་བ་སྔ་ཕྱི་རྣམས་འགོ་ནས་འཇུག་བར་དང་། ཁོང་གི་ཁྱིམ་ཚང་གི་མིང་ཐོ་བཅས་པ་ལུང་སྟོན་པ་ཤེ་མ་ཡཱའི་རྒྱལ་རབས་དང་ལུང་སྟོན་པ་ཨིད་དྷོའི་རྒྱལ་རབས་ནང་གསལ་ཡོད་དོ། རེ་ཧོ་བྷམ་དང་ཡེ་རོ་བྷམ་གཉིས་ཕན་ཚུན་ཡང་ཡང་དམག་འཁྲུགས་རྒྱབ་བཞིན་ཡོད་དོ།

¹⁶ རེ་ཧོ་བྷམ་གྲོངས་པ་དང་དཱ་བིད་ཀྱི་གྲོང་ཁྱེར་གྱི་རྒྱལ་པའོ་པུར་ཁང་ནང་སྦས་སོ། ཁོང་གི་བུ་ཨ་བྷི་ཡཱ་ཁོང་གི་ཤུལ་འཛིན་དུ་རྒྱལ་པོར་འགྱུར་རོ༎