སྔོན་རབས་གཉིས་པ། 11 - Tibetan Old Testament 2011

ཤེ་མ་ཡཱའི་ལུང་བསྟན།

¹ རྒྱལ་པོ་རེ་ཧོ་བྷམ་ཡེ་རུ་ཤ་ལེམ་དུ་སླེབས་པ་དང་། ཁོང་གིས་བྷེན་ཡ་མིན་དང་ཡ་ཧུ་དཱའི་སྡེ་རིགས་ཀྱི་དམག་མི་ཡག་ཤོས་གྲངས་ ༡༨༠,༠༠༠ འཛོམས་བཅུག་གོ། ཁོང་གིས་ཨིསི་རཱཨེལ་གྱི་བྱང་ཕྱོགས་ཀྱི་སྡེ་རིགས་ཚོ་སྐྱར་དུ་དབང་བསྒྱུར་བྱེད་པའི་ཆེད་དམག་རྒྱབ་འདོད་ཡོད་དོ།

² འོན་ཀྱང་གཙོ་བོ་དཀོན་མཆོག་གིས་ལུང་སྟོན་པ་ཤེ་མ་ཡཱ་ལ།

³ རྒྱལ་པོ་རོ་ཧོ་བྷོམ་དང་ཡ་ཧུ་དཱ་དང་བྷེན་ཡ་མིན་སྡེ་རིགས་ཀྱི་མི་མང་ལ་འཕྲིན་འདི་ལྟར་སྤྲོད་དགོས་པའི་བཀའ་གནང་ངོ་།

⁴ ཁྱོད་ཚོས་ཨིསི་རཱཨེལ་གྱི་སྤུན་ཟླ་ཚོར་མ་འཛིང་པར་ཁྱོད་ཚོ་ཚང་མ་རང་གི་ཁྱིམ་དུ་ལོག་ཅིག ཇི་བྱུང་བ་ཚང་མ་ངའི་འདོད་པ་ལྟར་ཡིན་ཞེས་སོ། དེ་ཚོས་གཙོ་བོ་དཀོན་མཆོག་གི་བཀའ་ལ་ཉན་ནས་ཡེ་རོ་བྷོམ་མཉམ་དུ་འཐབ་པར་མ་ཕྱིན་ནོ༎

རེ་ཧོ་བྷམ་གྱི་གྲོང་ཁྱེར་ཁག་ལ་འཛིང་རག་གི་བསྐོར་བ།

⁵ རེ་ཧོ་བྷམ་ཡེ་རུ་ཤ་ལེམ་དུ་བཞུགས་ནས་ཡ་ཧུ་དཱ་དང་བྷེན་ཡ་མིན་གྱི་གཤམ་གསལ་གྲོང་ཁྱེར་ཁག་ལ་འཛིང་རག་བསྐོར་བ་ནི།

⁶ བྷེད་ལེ་ཧེམ་དང་ ཨེ་ཏམ་དང་། ཊེ་ཀོ་ཨ་དང་།

⁷ བྷེད་ཛུར་དང་། སོ་ཀོ་དང་། ཨ་དུལ་ལམ་དང་།

⁸ གྷད་དང་། མ་རེ་ཤ་དང་། ཛིཕ་དང་།

⁹ ཨ་དྷོ་རེམ་དང་། ལ་ཀིཤི་དང་། ཨ་ཛི་ཀཱ་དང་།

¹⁰ ཛོ་རཱ་དང་། ཨེ་ཡ་ལོན་དང་། ཧེབ་རོན་བཅས་སོ།

¹¹ ཁོང་གིས་གྲོང་ཁྱེར་དེ་ཚོ་ལ་འཛིང་རག་བརྟན་པོ་བཟོས་པ་དང་། དེ་ཚོ་རེ་རེར་དམག་སྤྱི་རེ་རེ་བསྐོས་ནས་མཁོ་སྒྲུབ་ཀྱི་ཟས་དང་ཁ་སྐྱུར་པོའི་སྣུམ་དང་རྒུན་ཆང་སྤྲད་དོ།

¹² ཕུབ་དང་མདུང་རྣམས་བཅས་པ་བཏང་ངོ་། དེ་ལྟར་ཁོང་གིས་ཡ་ཧུ་དཱ་དང་བྷེན་ཡ་མིན་རང་གི་མངའ་འོག་ཏུ་བཞག་གོ

བླ་མ་དང་ལེ་ཝི་པ་རྣམས་ཡ་ཧུ་དཱར་ཕེབས་པ།

¹³ ཨིསི་རཱཨེལ་གྱི་མངའ་ཁུལ་ཡོངས་ནས་བླ་མ་ཚོ་དང་ལེ་ཝི་པ་རྣམས་ཡ་ཧུ་དཱའི་ལྷོ་ཕྱོགས་སུ་ཡོང་ངོ་།

¹⁴ ལེ་ཝི་པ་ཚོས་རང་གི་རྩྭ་ཁ་རྣམས་དང་ས་ཞིང་རྣམས་སྤངས་ནས་ཡ་ཧུ་དཱ་དང་ཡེ་རུ་ཤ་ལེམ་དུ་གནས་སྤོས་བྱས་སོ། གང་ལ་ཟེར་ན། རྒྱལ་པོ་ཡེ་རོ་བྷམ་དང་ཁོང་གི་ཤུལ་འཛིན་ཨིསི་རཱཨེལ་གྱི་རྒྱལ་པོ་ཚོས་དེ་ཚོ་ལ་གཙོ་བོ་དཀོན་མཆོག་གི་བླ་མའི་ཞབས་ཞུ་བྱེད་དུ་བཅུག་གི་མེད་དོ།

¹⁵ ཡེ་རོ་བྷམ་གྱིས་ཕྱི་པའི་ལྷ་མཆོད་ཡུལ་དང་བདུད་དང་གླང་གོག་གི་དབྱིབས་སུ་བཟོས་པའི་འདྲ་སྐུར་མཆོད་པར་ཁོང་རང་རང་ཉིད་ཀྱིས་བླ་མ་རྣམས་བསྐོས་ཡོད་དོ།

¹⁶ ཨིསི་རཱཨེལ་གྱི་སྡེ་རིགས་ཡོངས་ནས་ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་ལ་ལྷག་བསམ་རྣམ་དག་གིས་མཆོད་འདོད་ཡོད་མི་ཚོས། དེ་ཚོའི་ཕ་མེས་ཀྱི་དཀོན་མཆོག་གཙོ་བོ་དཀོན་མཆོག་ལ་དམར་མཆོད་ཕུལ་ཐུབ་པའི་ཆེད། ཡེ་རུ་ཤ་ལེམ་དུ་ལེ་ཝི་པ་ཚོའི་རྗེས་སུ་འབྲངས་སོ།

¹⁷ དེས་ཡ་ཧུ་དཱའི་རྒྱལ་ཁབ་ཀྱི་ནུས་ཤུགས་ཇེ་ཆེར་ཕྱིན་པ་དང་། དེ་ཚོས་ལོ་གསུམ་རིང་སོ་ལོ་མོན་གྱི་སྲས་རེ་ཧོ་བྷོམ་གྱི་རྒྱབ་སྐྱོར་གྱིས་པ་དང་། དེ་ཚོ་རྒྱལ་པོ་དཱ་བིད་དང་རྒྱལ་པོ་སོ་ལོ་མོན་གྱི་རྒྱལ་སྲིད་སྐྱོངས་བའི་དུས་སྐབས་ལྟར་གནས་སོ༎

རེ་ཧོ་བྷམ་གྱི་ཁྱིམ་ཚང་།

¹⁸ རེ་ཧོ་བྷམ་གྱིས་མ་ཧ་ལད་དང་ཆང་ས་རྒྱབ་བོ། དེའི་ཡབ་ནི་རྒྱལ་པོ་དཱ་བིད་ཀྱི་སྲས་ཡེ་རི་མོད་དང་ཡུམ་ནི་ཡི་ཤེའི་ཚ་མོ་དང་ཨེ་ལི་ཨབ་ཀྱི་བུ་མོ་ཨ་བྷི་ཧེལ་ཡིན་ནོ།

¹⁹ དེ་ཚོ་ལ་བུ་ཡེ་ཨུཤེ་དང་ཤེ་མར་ཡཱ་དང་ཛ་ཧམ་བཅས་གསུམ་ཡོད་དོ།

²⁰ རྗེས་སུ་ཁོང་གིས་ཨབ་ས་ལོམ་གྱི་སྲས་མོ་མ་ཀཱ་དང་ཆང་ས་རྒྱབ་ནས། དེ་ཚོ་ལ་བུ་ཨ་བྷི་ཡཱ་དང་ཨ་ཏའི་དང་ཛི་ཛ་དང་ཤེ་ལོ་མིད་དང་བཅས་བཞི་ཡོད་དོ།

²¹ རེ་ཧོ་བྷམ་ལ་ཆུང་མ་བསྡོམས་བཅོ་བརྒྱད་དང་སྙིང་སྡུག་དྲུག་ཅུ་ཡོད་པ་དང་། ཁོང་ནི་བུ་ཉི་ཤུ་རྩ་བརྒྱད་དང་བུ་མོ་དྲུག་ཅུའི་ཕ་ཡིན་ནོ། ཁོང་གི་ཆུང་མ་དང་སྙིང་སྡུག་ཚང་མ་ལས་མ་ཀཱ་ལ་བྱམས་ཤོས་གནང་བ་དང་།

²² མོའི་བུ་ཨ་བྷི་ཡཱ་ལ་བུ་ཚང་མ་ལས་དགའ་པོ་གནང་བ་དང་། ཁོང་གི་ཁོ་ལ་རྗེས་འཛིན་དུ་རྒྱལ་པོར་འདམས་གནང་ངོ་།

²³ རེ་ཧོ་བྷམ་གྱིས་ཤེས་རབ་ལྡན་པའི་ཐོག་ནས་རང་གི་བུ་སོ་སོར་ལས་འགན་གནང་ཡོད་པ་དང་། དེ་ཡ་ཧུ་དཱ་དང་བྷེན་ཡ་མིན་གྱི་འཛིང་ར་བཟོས་པའི་གྲོང་ཁྱེར་ཡོངས་སུ་འཇོག་གནང་ཡོད། ཁོང་གིས་དེ་ཚོ་ལ་གཟིགས་སྐྱོངས་ཆེན་པོས་དགོས་མཁོ་ཁག་གནང་བ་དང་། དེ་ཚོ་ལ་ཆུང་མ་གང་མང་བསླངས་སོ༎