སྔོན་རབས་གཉིས་པ། 10 - Tibetan Old Testament 2011

བྱང་ཕྱོགས་ཀྱི་སྡེ་རིགས་ཚོའི་ངོ་རྒོལ།

¹ རེ་ཧོ་བྷམ་ཤེ་ཀེམ་དུ་བསླེབས་པ་དང་དེར་ཨིསི་རཱཨེལ་གྱི་བྱང་ཕྱོགས་ཀྱི་མི་མང་ཡོངས་ནས་ཁོང་ལ་རྒྱལ་པོར་བསྐོ་བར་འཛོམས་སོ།

² ནེ་བྷད་ཀྱི་བུ་ཡེ་རོ་བྷམ་སོ་ལོ་མོན་ནས་ཐར་བའི་ཕྱིར་ཨི་ཇིབ་དུ་བྲོས་ནས་བསྡད་ཡོད་པ་དེས། གཏམ་དེ་ཐོས་པ་དང་ཁྱིམ་དུ་ཕྱིར་ལོག་གོ

³ བྱང་ཕྱོགས་སུ་ཡོད་པའི་སྡེ་རིགས་ཀྱི་མི་མང་ཚོས་ཁོང་ལ་འཚོལ་བར་སོང་ནས། དེ་ཚོ་ཚང་མ་མཉམ་དུ་རེ་ཧོ་བྷམ་སར་ཡོང་ནས་ཞུས་པ།

⁴ ཁྱེད་ཀྱི་ཡབ་ཀྱི་ང་ཚོར་འཁུར་ལྗིད་པོ་བཀལ་ཡོད། ཁྱེད་ཀྱིས་ང་ཚོར་འཁུར་ཡང་དུ་བཏང་ནས་ང་ཚོའི་མི་ཚེ་ལྷོད་དུ་བཏང་ན་ང་ཚོ་ཁྱེད་ཀྱི་དམ་ཚིག་ཅན་གྱི་མི་སེར་ལ་འགྱུར་བར་བྱ་ཞེས་སྨྲས་སོ།

⁵ ལན་དུ་རེ་ཧོ་བྷམ་གྱིས། དོན་གནས་དེར་བསམ་བློ་ཞིབ་པར་གཏོང་བ་ལ་ང་ལ་ཉིན་གསུམ་གྱི་དུས་ཚོད་སྤྲོད་རོགས། དེ་རྗེས་ཁྱོད་ཚོ་ཤོག་ཅེས་སྨྲས་སོ། དེ་འདྲ་སོང་ཙང་མི་མང་ཚོ་ཕྱིར་ལོག་གོ

⁶ རྒྱལ་པོ་རེ་ཧོ་བྷམ་གྱིས། ཁོང་གི་ཡབ་རྒྱལ་པོ་སོ་ལོ་མོན་གྱི་སློབ་སྟོན་གྱི་ལས་འགན་འཁུར་མྱོང་བས་མི་རྒན་པ་ཚོར་བཀའ་འདྲི་ཞུས་སོ། ཁོང་གིས། ཁྱོད་ཚོས་ངས་མི་མང་ཆོར་ལན་སྤྲད་རྒྱུར་སློབ་སྟོན་ག་རེ་ཡོད་དམ་ཞེས་སྨྲས་སོ།

⁷ དེ་ཚོས་ལན་དུ། གལ་སྲིད་ཁྱེད་ཀྱི་མི་མང་ཚོར་དགའ་བའི་ཕྱིར་བྱམས་བརྩེའི་དགོངས་བཞེས་ཀྱིས་ལན་གནང་བ་ཡིན་ན། དེ་ཚོས་རྟག་ཏུ་ལྷག་བསམ་རྣམ་དག་གིས་ཁྱེད་ཀྱི་ཞབས་ཕྱི་ཞུ་གི་རེད་ཞུས་སོ།

⁸ འོན་ཀྱང་ཁོང་གིས་མི་རྒན་པ་ཚོའི་བསླབ་བྱར་བརྩི་མེད་གནང་ངོ་། ཁོང་དང་མཉམ་དུ་འཚར་ལོང་བྱུང་བའི་ལོ་ན་གཞོན་པ་དང་དེའི་སྐབས་སུ་ཁོང་གིས་གྲོས་སྟོན་པ་ཡིན་པ་ཚོའི་སར་ཕེབས་ནས།

⁹ ཁོང་གིས་ཁྱོད་ཚོས་ངས་གང་བྱེད་དགོས་པའི་སློབ་སྟོན་སྤྲོད་རྒྱུ་ཡོད་དམ། མི་མང་དེ་ཚོའི་འཁུར་པོ་ཡང་དུ་གཏོང་རོགས་ཞུ་མཁན་དེ་ཚོ་ལ་ངས་ག་རེ་ལན་འདེབས་སམ་ཞེས་བཀའ་འདྲི་གནང་ངོ་།

¹⁰ དེ་ཚོས་ལན་དུ། ཁྱེད་ཀྱིས་ངའི་མཐེབ་ཆུང་ནི་ངའི་ཡབ་ཀྱི་སྐུ་རྐེད་ལས་སྦོམ་པ་ཡོད་གསུངས་དགོས་སོ།

¹¹ ཁྱེད་ཀྱིས། ངའི་ཡབ་ཀྱིས་ཁྱོད་ཚོར་འཁུར་ལྗིད་པོ་བཀལ་ཡོད་ཅིང་། ངས་དེ་ལས་ཡང་འཁུར་ལྗིད་རུ་གཏོང་གིན་ཡིན། ཁོང་གིས་ཁྱོད་ཚོར་རྟག་ལྕག་གིས་བཅུན་གནང་ཡོད་ན། ངས་ཁྱོད་ཚོར་རྟ་པོའི་རྟ་ལྕག་གིས་བཅུན་རྒྱུ་ཡིན་ཞེས་གསུང་དགོས་ཤེས་སྨྲས་སོ།

¹² ཁོང་གིས་བཀའ་གནང་བ་ལྟར་ཡེ་རོ་བྷམ་དང་མི་མང་ཚོ་རྒྱལ་པོ་རེ་ཧོ་བྷམ་སར་ཉིན་གསུམ་གྱི་རྗེས་སུ་སླེབས་སོ།

¹³ རྒྱལ་པོས་མི་རྒན་པ་ཚོའི་བསླབ་བྱར་བརྩི་མེད་གནང་ནས། མི་མང་ལ་ཚིག་རྩུབ་པོས།

¹⁴ ན་གཞོན་ཚོས་གྲོས་སྟོན་ཕུལ་བ་ལྟར་ལན་གནང་ངོ་། ཁོང་གིས་ངའི་ཡབ་ཀྱིས་ཁྱོད་ཚོར་འཁུར་ལྗིད་པོ་བཀལ་ཡོད་པ་དང་། ངས་དེ་ལས་ལྗིད་རུ་གཏོང་རྒྱུ་ཡིན་ནོ། ཁོང་གིས་ཁྱོད་ཚོར་རྟ་ལྕག་གིས་བཅུན་ཡོད་པ་དང་། ངས་ཁྱོད་ཚོར་རྟ་པོའི་རྟ་ལྕག་གིས་བཅུན་རྒྱུ་ཡིན་ཞེས་སྨྲས་སོ།

¹⁵ དེ་ནི་གཙོ་བོ་དཀོན་མཆོག་གི་ཐུགས་དགོངས་ལྟར་ཤི་ལཱོ་ནས་ལུང་སྟོན་པ་ཨ་ཧི་ཡཱ་བརྒྱུད་ནེ་བྷད་ཀྱི་བུ་ཡེ་རོ་བྷམ་ལ་བཀའ་གནང་བ་སྒྲུབ་པའི་ཕྱིར་ཡིན་ནོ། དེའི་རྐྱེན་གྱིས་རྒྱལ་པོས་མི་མང་ལ་སྣང་མེད་བྱས་པ་ཡིན་ནོ།

¹⁶ མི་མང་ཚོས། རྒྱལ་པོས་ཁོང་ཚོའི་ཞུ་བ་ལ་གསན་རྒྱུ་མིན་པ་ཧ་གོ་བ་དང་། དེ་ཚོས་དཱ་བིད་དང་ཁོང་གི་ཁྱིམ་ཚང་འཇིགས་པར་འགྱུར་ཞེས་སྐད་འབོད་བྱས་སོ། དེ་ཚོས་ང་ཚོར་འབྲེལ་བ་ཅི་ཡོད་དམ། ཨིསི་རཱཨེལ་གྱི་མི་མང་ཚོ་ང་ཚོ་ཁྱིམ་དུ་ལོག་འགྲོ། རེ་ཧོ་བྷམ་ཁོང་རང་ཉིད་ཀྱིས་བལྟ་རྟོགས་བྱེད་བཅུག་ཅེས་སྐད་འབོད་བྱབ་སོ། དེ་འདྲ་སོང་ཚང་ཨིསི་རཱཨེལ་གྱི་མི་མང་ཚོས་ངོ་ལོག་བྱས་སོ།

¹⁷ རེ་ཧོ་བྷམ་ནི་ཡ་ཧུ་དཱའི་མངའ་ཁུལ་གྱི་མི་མང་ཚོའི་རྒྱལ་པོ་གཅིག་པུར་འགྱུར་རོ།

¹⁸ དེ་ནས་རྒྱལ་པོ་རེ་ཧོ་བྷམ་གྱིས། བཙན་ལས་ཀྱི་དོ་དམ་པ་ཨ་དྷོ་ནི་རམ་ཨིསི་རཱཨེལ་པ་ཚོའི་སར་བཏང་ངོ་། འོན་ཀྱང་དེ་ཚོས་ཁོ་ལ་རྡོ་རུབ་བཏང་ནས་བསད་དོ། སྐབས་དེར་རེ་ཧོ་བྷམ་མགྱོགས་པོར་རང་གི་ཤིང་རྟ་འཁོར་ལོར་བཞོན་ནས་ཡེ་རུ་ཤ་ལེམ་དུ་བྲོས་སོ།

¹⁹ སྐབས་དེ་ནས་བཟུང་ཨིསི་རཱཨེལ་བྱང་ཕྱོགས་ཀྱི་རྒྱལ་ཁབ་ཀྱི་མི་མང་རྣམས་དཱ་བིད་ཀྱི་རྒྱལ་བརྒྱུད་ལ་ངོ་རྒོལ་བྱ་མཁན་དུ་འགྱུར་རོ༎