ཤ་མུ་ཨེལ་དང་པོ། 5 - Tibetan Old Testament 2011

དམ་བཅའི་སྒྲོམ་དེ་ཕེ་ལེ་ཤེད་པ་རྣམས་ཀྱི་དཀྱིལ་དུ་ཡོད་པ།

¹ ཕེ་ལེ་ཤེད་པ་རྣམས་ཀྱིས་དམ་བཅའི་སྒྲོམ་དེ་ཕྲོགས་ཏེ། ཨེ་བྷེ་ནེ་ཛར་ནས་ཁོ་ཚོའི་གྲོང་ཁྱེར་ཨཤ་དྷོད་དུ་འཁྱེར་ཞིང་།

² དེར་ཁོ་ཚོའི་ལྷ་དྷ་གོན་གྱི་ལྷ་ཁང་དུ་འཁྱེར་ནས་ལྷ་རྟེན་དེའི་ཉེ་འགྲམ་དུ་བཞག་གོ

³ ཨཤ་དྷོད་ཀྱི་ཡུལ་མི་རྣམས་སང་ཞོགས་སྔ་པོར་ལངས་ནས་བལྟས་པས། དྷ་གོན་གྱི་སྐུ་འདྲ་དེ་གཙོ་བོ་དཀོན་མཆོག་གི་དམ་བཅའི་སྒྲོམ་གྱི་མདུན་དུ་ཁ་བུབ་ལོག་ནས་མར་འགྲིལ་ཡོད་པ་མཐོང་བ་དང་། ཁོ་ཚོས་སྐུ་འདྲ་དེ་ཡར་བསླངས་ཏེ་རང་གནས་སུ་བཞག་གོ

⁴ གནང་ཉིན་ཞོགས་སྔ་པོར་ཁོ་ཚོ་ཡར་ལངས་ནས་བལྟས་པས། སྐུ་འདྲ་དེ་སླར་ཡང་དམ་བཅའི་སྒྲོམ་གྱི་མདུན་དུ་མར་འགྲིལ་ཡོད་པ་མཐོང་ངོ་། འོན་ཀྱང་སྐབས་དེར་དེའི་མགོ་དང་ལག་པ་གཉིས་ཆག་ཏེ་ཐེམ་པའི་ཁར་ལུས་ཤིང་། གཟུགས་པོ་འབའ་ཞིག་ས་ཁར་ལུས་ཡོད་པ་དང་།

⁵ (དེར་བརྟེན་པས་དེང་སང་ཡང་དྷ་གོན་གྱི་བླ་མ་རྣམས་དང་དེའི་རྗེས་འབྲངས་པ་ཚོས་ས་ཆ་དེའི་ཐོད་ནས་འགམ་པ་མ་གཏོགས་དེའི་ཁར་ནམ་ཡང་རྐང་པ་བཞག་སྲོལ་མེད་དོ།)

⁶ གཙོ་བོ་དཀོན་མཆོག་གིས་ཨཤ་དྷོད་ཐོག་ཉེས་ཆད་དྲག་པོ་དང། དངངས་སྐྲག་ཆེན་པོ་སྐྱེད་བཅུག་གོ། ཁོང་གི་དེ་ཚོ་དང་དེའི་ཉེ་འགྲམ་གྱི་ས་ཁུལ་ཁག་གི་ཡུལ་མི་རྣམས་ལ་གཉན་འབུར་སྣམ་ཕེབས་ནས་ཉེས་ཆད་བཏང་གནང་ངོ་།

⁷ ཁོ་ཚོའི་ཐོག་ཏུ་གང་བྱུང་བའི་གནས་ཚུལ་དེ་དག་མཐོང་ནས་ཁོ་ཚོས་སྨྲས་པ། ཨིསི་རཱཨེལ་གྱི་དཀོན་མཆོག་གིས་ང་ཚོ་དང་ང་ཚོའི་ལྷ་དྷ་གོན་གྱི་ཐོག་ཏུ་ཉེས་ཆད་གཏོང་གིན་འདུག་པས། དམ་བཅའི་སྒྲོམ་དེ་ད་ང་ཚོའི་ཁྲོད་དུ་བཞག་མི་རུང་ངོ་།

⁸ དེ་ནས་ཁོ་ཚོས་བང་ཆེན་པ་རྣམས་བཏང་སྟེ་ཕེ་ལེ་ཤེད་པའི་རྒྱལ་པོ་ལྔ་གར་སྐད་བཏང་ནས་དེ་དག་ལ། ད་ང་ཚོས་ཨིསི་རཱཨེལ་གྱི་དཀོན་མཆོག་གི་དམ་བཅའི་སྒྲོམ་འདི་ལ་ག་རེ་བྱེད་ན་དགའ་བ་འདུག་ཅེས་གྲོས་བསྡུར་བྱས་པས། དེ་ཚོས་ལན་དུ། དེ་ནི་གྷད་ཀྱི་ཡུལ་དུ་བསྐྱལ་དགོས་ཅེས་སྨྲས་པ་དང་། དེ་ཚོས་སྒྲོམ་དེ་ཕེ་ལེད་ཤད་པའི་གྲོང་ཁྱེར་གྷད་དུ་བསྐྱལ་མོད།

⁹ འོན་ཀྱང་དམ་བཅའི་སྒྲོམ་དེ་དེར་སླེབས་པའི་རྗེས་སུ་གཙོ་བོ་དཀོན་མཆོག་གིས་གྲོང་ཁྱེར་དེ་ལའང་ཉེས་ཆད་གནང་སྟེ་དེར་དངངས་སྐྲག་ཆེན་པོ་བྱུང་ཞིང་། ཁོང་གིས་གྲོང་ཁྱེར་དེའི་ཡུལ་མི་རྒན་གཞོན་ཚང་མའི་ཐོག་ཏུ་གཉན་འབུར་གྱི་ནད་ཞིག་བཏང་བ་གནང་སྟེ་དེ་ཚོར་ཉེས་ཆད་གནང་ངོ་།

¹⁰ དེར་བརྟེན་ཁོ་ཚོས་དམ་བཅའི་སྒྲོམ་དེ་ཨེག་རོན་ཞེས་པའི་ཕེ་ལེ་ཤེད་པའི་གྲོང་ཁྱེར་གཞན་ཞིག་ཏུ་བཏང་ངོ་། འོན་ཀྱང་སྒྲོམ་དེ་ས་གནས་དེར་འབྱོར་མ་ཐག་ཏུ་ཡུལ་མི་ཚོས་སྐད་འབོད་ཆེན་པོ་བརྒྱབ་སྟེ། ཁོ་ཚོས་ང་ཚོ་ཚང་མ་བསད་པའི་ཕྱིར་ཡིསི་རཱཨེལ་པའི་དཀོན་མཆོག་གི་དམ་བཅའི་སྒྲོམ་དེ་ང་ཚོའི་དཀྱིལ་དུ་འཁྱེར་ཡོང་བཞག་ཅེས་བརྗོད་དོ།

¹¹ དེ་ཚོས་སླར་ཡང་ཕེ་ལེ་ཤེད་པའི་རྒྱལ་པོ་རྣམས་བོས་ཏེ་དེ་དག་ལ། ང་ཚོ་དང་ང་ཚོའི་ནང་མི་རྣམས་ཤི་མ་དགོས་པའི་ཕྱིར་ཨིསི་རཱཨེལ་གྱི་དམ་བཅའི་སྒྲོམ་དེ་རང་གནས་སུ་ཕར་ཕྱིར་ལོག་བྱེད་དགོས་ཅེས་སྨྲས་སོ། དཀོན་མཆོག་གིས་དེ་ཚོ་ལ་ཉེས་ཆད་དྲག་པོ་བཏང་གནང་བའི་རྐྱེན་གྱིས་གྲོང་ཁྱེར་ཡོངས་སུ་དངངས་སྐྲག་ཆེན་པོ་བྱུང་ངོ་།

¹² གསོན་པོར་ལུས་པ་རྣམས་ལ་ཡང་གཉན་འབུར་གྱི་ནད་ཕོག་སྟེ། དེ་ཚོས་རང་རང་སོ་སོའི་ལྷ་རྟེན་དག་ལ་ནད་དེ་ལས་སྐྱོབ་ཕྱིར་འབོད་བསྐུལ་ཞུས་སོ༎