ཤ་མུ་ཨེལ་དང་པོ། 4 - Tibetan Old Testament 2011

དམ་བཅའི་སྒྲོམ་དེ་དབང་བཟུང་བྱས་པ།

¹ སྐབས་དེར་ཕེ་ལེ་ཤད་པ་རྣམས་ཨིསི་རཱཨེལ་ལ་དམག་བརྒྱབ་པའི་ཕྱིར་ཕྱོགས་གཅིག་ཏུ་འཛོམས་པ་དང་། ཨིསི་རཱཨེལ་པ་རྣམས་ཀྱང་འཐབ་འཛིང་བྱེད་ཕྱིར་ཐོན་ནས། ཨེ་བྷེ་ནེ་ཛར་ཞེས་པའི་ས་གནས་སུ་ཨིསི་རཱཨེལ་པ་ཚོས་དམག་སྒར་བརྒྱབ་ནས་བསྡད་དོ། དེ་བཞིན་ཕེ་ལེ་ཤེད་པ་རྣམས་ཀྱང་ཨ་ཕེག་ཅེས་པའི་ས་གནས་སུ་སྒར་བརྒྱབ་ནས་བསྡད་དོ།

² ཕེ་ལེ་ཤེད་པ་ཚོས་དམག་བརྒྱབ་ནས། འཐབ་འཛིང་ཤུགས་ཆེན་པོ་བྱུང་བའི་རྗེས་སུ་ཨིསི་རཱཨེལ་པ་རྣམས་འཕམ་ཞིང་། སྐྱེས་པ་ ༤,༠༠༠ ཙམ་དམག་སར་སྲོག་སྐྱོན་བྱུང་བ་དང་།

³ དམག་མི་ལྷག་འཕྲོས་ལུས་པ་རྣམས་དམག་སྒར་དུ་ཕྱིར་ལོག་བྱེད་སྐབས་ཨིསི་རཱཨེལ་པའི་འགོ་བྱེད་རྣམས་ཀྱིས་སྨྲས་པ། དེ་རིང་གཙོ་བོ་དཀོན་མཆོག་གི་ང་ཚོ་ཕེ་ལེ་ཤེད་པའི་ལག་ནས་འཕམ་བཅུག་པར་མཛད་པ་དེ་ཅི་ཡིན་ནམ། ད་ང་ཚོ་ཕྱིན་ནས་གཙོ་བོ་དཀོན་མཆོག་གི་དམ་བཅའི་སྒྲོམ་དེ་ཤི་ལཱོ་ནས་ཚུར་གདན་དྲངས་དགོས། དེ་ལྟར་བྱེད་ན་ཁོང་ང་ཚོ་དང་མཉམ་དུ་ཕེབས་ཏེ་ང་ཚོའི་དགྲ་བོའི་ལག་ནས་སྲུང་སྐྱོབ་མཛད་པར་འགྱུར།

⁴ དེར་བརྟེན་ཁོ་ཚོས་ཤི་ལཱོ་རུ་བང་ཆེན་རྣམས་བཏང་ནས། ཀེ་རུབ་རྣམས་ཀྱི་སྟེང་དུ་བཞུགས་མཁན་ཀུན་དབང་ལྡན་པའི་གཙོ་བོ་དཀོན་མཆོག་ཁོང་གི་དམ་བཅའི་སྒྲོམ་དེ་གདན་འདྲེན་ཞུས་སོོ། ཨེ་ལིའི་བུ་ཧོཕ་ནི་དང་ཕིན་ཧསི་གཉིས་ཀྱང་དམ་བཅའི་སྒྲོམ་དང་མཉམ་དུ་ཡོང་ངོ་།

⁵ དམ་བཅའི་སྒྲོམ་དེ་སླེབས་མ་ཐག་ཏུ་ཨིསི་རཱཨེལ་པ་རྣམས་དགའ་སྣང་ཆེན་པོས་སྐད་ཅོར་བརྒྱབ་པས་ས་གཞི་གཡོས་སོ།

⁶ ཕེ་ལེ་ཤེད་པ་ཚོས་འུར་སྒྲ་དེ་ཐོས་ནས་སྨྲས་པ་དང་། ཨིབ་རི་པའི་དམག་སྒར་ནང་གི་འུར་སྒྲ་དེ་ལ་ཉོན་དང་། དེ་ལྟ་བུའི་སྐད་ཅོར་ཆེན་པོ་བརྒྱབ་དགོས་དོན་གང་ཡིན་ནམ། གཙོ་བོ་དཀོན་མཆོག་གི་དམ་བཅའི་སྒྲོམ་དེ་ཨིབ་རི་པའི་དམག་སྒར་ནང་དུ་འབྱོར་ཡོད་པའི་གནས་ཚུལ་ཐོས་ནས།

⁷ དེ་ཚོ་འཇིགས་སྣང་སྐྱེད་དེ་སྨྲས་པ། དེ་ཚོའི་དམག་སྒར་ནང་དུ་དཀོན་མཆོག་ཞིག་འབྱོར་འདུག་པས། ད་ང་ཚོ་འཇིགས་ངེས་སོ། དེ་ལྟ་བུ་ནི་དེ་སྔ་ནམ་ཡང་མ་བྱུང་ངོ་།

⁸ ད་ནུས་ཤུགས་ལྡན་པའི་དཀོན་མཆོག་དེ་ཚོའི་ལག་ནས་སུས་ང་ཚོ་ལ་སྐྱབས་ཐུབ་བམ། སྔར་འབྲོག་སྟོང་ནང་དུ་ཨི་ཇིབ་པ་རྣམས་སྡེབ་གསོད་གཏོང་མཁན་ཀྱང་དཀོན་མཆོག་དེ་ཚོ་རང་ཡིན་ནོ།

⁹ དེ་བས་ན་ཀྱེ་ཕེ་ལེ་ཤེད་པ་རྣམས། བློ་སྟོབས་སྐྱེད་པར་གྱིས་ཤིག། སྐྱེས་པ་བཞིན་དུ་འཐབ་མོ་འཐབས་ཤིག དེ་མིན་ཨིབ་རི་པ་དེ་ཚོ་སྔར་ང་ཚོའི་བྲན་གཡོག་ཏུ་གནས་པ་བཞིན་ང་ཚོའང་དེ་ཚོའི་བྲན་འཁོལ་དུ་ཚུད་ཉེན་ཡོད་དོ། དེར་བརྟེན་སྐྱེས་པ་བཞིན་དུ་འཐབ་ཤིག

¹⁰ དེ་ནས་ཕེ་ལེ་ཤེད་པ་ཚོས་དམག་འཐབ་ཤུགས་ཆེན་པོ་བརྒྱབ་ནས་ཨིསི་རཱཨེལ་པ་རྣམས་འཕམ་པར་བྱས་པས། དེ་ཚོ་རང་རང་སོ་སོའི་ཁང་ཁྱིམ་དུ་བྲོས་ཕྱིན་པ་དང་། ཨིསི་རཱཨེལ་གྱི་དམག་མི་ ༣༠,༠༠༠ ལ་སྲོག་སྐྱོན་བྱུང་སྟེ་མི་མང་པོ་སྡེབ་གསོད་གཏོང་ངོ་།

¹¹ དཀོན་མཆོག་གི་དམ་བཅའི་སྒྲོམ་དེའང་དབང་བཟུང་དུ་ཤོར་བ་དང་། དེ་བཞིན་ཨེ་ལིའི་བུ་ཧོབ་ནི་དང་ཕི་ནེ་ཧསེ་གཉིས་ཀ་བསད་དོ༎

ཨེ་ལི་འཚི་བ།

¹² བྷེན་ཡ་མིན་གྱི་སྡེ་རིགས་ལས་ཡིན་པའི་མི་ཞིག་དམག་བརྒྱབ་ས་ནས་བརྒྱུགས་ནས་ཡོང་སྟེ། ཉིན་མོ་དེ་རང་ལ་ཤི་ལཱོ་རུ་བསླེབས་ཤིང་། ཁོས་མྱ་ངན་གྱི་ཚུལ་དུ་རང་གི་གྱོན་གོས་ཧྲལ་ཏེ་མགོ་ལ་ས་བྱུགས་ཡོད་དོ།

¹³ ཨེ་ལི་ནི་དམ་བཅའི་སྒྲོམ་གྱི་སྐོར་ལ་སེམས་འཁྲལ་བྱེད་དེ་སྟེགས་ཤིག་གི་སྒང་དུ་བསྡད་ནས་ལམ་གྱི་ཟུར་དུ་གནས་ཤིང་བལྟ་གིན་བསྡད་ཡོད་དོ། མི་དེས་གྲོང་ཚོ་ཀུན་ཏུ་ཕྱིན་ནས་གནས་ཚུལ་དེ་ཡོངས་སུ་ཁྱབ་པར་བྱས་པས། མི་ཚང་མ་འཇིགས་སྣང་སྐྱེད་དེ་སྐད་ཅོར་འདོན་ནོ།

¹⁴ ཨེ་ལིས་སྐད་ཅོར་དེ་ཐོས་ནས། འུར་སྒྲ་དེ་ག་རེ་ཡིན་ནམ་ཞེས་འདྲི་རྩད་བྱས་པས། མི་དེས་གནས་ཚུལ་དེ་བཤད་ཕྱིར་ཨེ་ལིའི་རྩར་བརྒྱུགས་ཕྱིན་པ་དང་།

¹⁵ (སྐབས་དེར་ཨེ་ལི་ནི་རང་ལོ་དགུ་བཅུ་གོ་རྒྱད་ ལོན་ཏེ་མིག་གཉིས་ཕལ་ཆེར་གྲིབ་ནས་ལོང་བ་ལྟ་བུར་ཆགས་ཡོད་དོ།)

¹⁶ མི་དེས། ང་ནི་དམག་ས་ནས་བྲོས་ཐར་ཏེ། དེ་རིང་འདིར་སླེབས་པ་ཡིན་ཞེས་སྨྲས་སོ། ཨེ་ལིས་མི་དེ་ལ། ཀྱེ་ངའི་བུ། ག་རེ་བྱུང་སོང་ངམ་ཞེས་དྲིས་པའི་ལན་དུ།

¹⁷ བང་ཆེན་དེས་སྨྲས་པ། ཨིསི་རཱཨེལ་པ་རྣམས་ཕེ་ལེ་ཤེད་པའི་མདུན་ནས་བྲོས་པས། ང་ཚོར་འཕམ་རྒུད་ཆེན་པོ་བྱུང་བ་དང་། ཁྱེད་ཀྱི་བུ་ཧོཕ་ནི་དང་ཕིན་ཧསི་གཉིས་ཀྱང་སྲོག་སྐྱོན་བྱུང་ཞིང་། དཀོན་མཆོག་གི་དམ་བཅའི་སྒྲོམ་དེའང་དབང་བཟུང་བྱས་སོ།

¹⁸ མི་དེས་དམ་བཅའི་སྒྲོམ་གྱི་གནས་ཚུལ་བཤད་མ་ཐག་ཏུ་ཨེ་ལི་ནི་རྒྱལ་སྒོའི་འགྲམ་དུ་རང་ཉིད་བསྡད་ཡོད་པའི་སྟེགས་བུའི་སྒང་ནས་མར་གན་རྒྱལ་ལོག་སྟེ་རིལ་བ་དང་། ཡང་ཁོ་ནི་ཧ་ཅང་ལོ་ན་རྒས་པ་མ་ཟད་ལུས་སྟོབས་ཆེ་བའི་རྐྱེན་གྱིས་ས་ལ་མར་རིལ་སྐབས་འཇིང་ཚིག་ཆགས་ནས་ཤིའོ། ཁོས་ཨིསི་རཱཨེལ་གྱི་ཐོག་ཏུ་ལོ་ངོ་བཞི་བཅུ་བར་དུ་སྲིད་སྐྱོང་བྱས་པ་ཡིན་ནོ༎

ཕིན་ཧསི་ཀྱི་ཆུང་མ་འཚི་བ།

¹⁹ སྐབས་དེར་ཨེ་ལིའི་མནའ་མ། ཕིན་ཧསི་ཀྱི་ཆུང་མ་དེ་ནི་མངལ་དང་ལྡན་ཞིང་། ཕྲུ་གུ་སྐྱེ་བའི་དུས་རན་ཡོད་པ་དང་། དཀོན་མཆོག་གི་དམ་བཅའི་སྒྲོམ་དེ་དབང་བཟུང་དུ་ཤོར་བ་དང་། དེ་བཞིན་མོའི་གྱོས་པོ་དང་རང་གི་བཟའ་ཟླ་ཤི་བའི་གནས་ཚུལ་ཐོས་མ་ཐག་ཏུ་མོ་ལ་སྐྱེ་ཟུག་བརྒྱབ་ནས་ཕྲུ་གུ་སྐྱེས་སོ།

²⁰ མོ་འཆི་བར་བསླེབས་སྐབས་མོའི་སྐྱེས་གཡོག་མ་ཚོས་མོ་ལ། ཁྱོད་རང་སེམས་ཤུགས་མ་ཉམས་ཤིག ཁྱོད་ལ་བུ་ཞིག་སྐྱེས་བཞག་ཅེས་བརྗོད་རུང་། མོས་དེ་ལ་དོ་སྣང་མ་བྱས་པར་ལན་གང་ཡང་མ་བརྒྱབ་བོ།

²¹ མོས་ཕྲུ་གུའི་མིང་ཨི་ཀ་འབོད་བཞག་གོ། དེའི་དོན་ནི་ཨིསི་རཱཨེལ་ནས་དཀོན་མཆོག་གི་གཟི་བརྗིད་དེ་ཡལ་ནས་སོང་ངོ། གནས་ཚུལ་དེས་དམ་བཅའི་སྒྲོམ་དེ་དབང་བཟུང་བྱས་པ་དང་། མོའི་གྱོས་པོ་དང་བཟའ་ཟླ་བཅས་ཀྱང་ཤི་བ་ལ་སྟོན་ནོ།

²² མོས་སྨྲས་པ། དཀོན་མཆོག་གི་དམ་བཅའི་སྒྲོམ་དེ་དབང་བཟུང་བྱས་པ་ཡིན་པས། ཁོང་གིས་གཟི་བརྗིད་དེའང་ཨིསི་རཱཨེལ་གྱི་ཐོག་ནས་ཡལ་བ་ཡིན་ནོ༎