ཤ་མུ་ཨེལ་དང་པོ། 31 - Tibetan Old Testament 2011

ས་ཨུལ་དང་ཁོའི་བུ་རྣམས་འདས་གྲོངས་ཕྱིན་པ།

¹ དེ་ནས་ཕེ་ལེ་ཤེད་པ་ཚོས་རི་བོ་གྷིལ་བོའི་སྟེང་དུ་ཨིསི་རཱཨེལ་པ་རྣམས་དང་འཐབ་རྒོལ་བྱས་ནས། དེར་ཨིསི་རཱཨེལ་པ་གྲངས་མང་ཞིག་སྲོག་སྐྱོན་བྱུང་ཞིང་། ས་ཨུལ་དང་ཁོའི་བུ་རྣམས་ཀྱི་གཙོས་པའི་དེ་འཕྲོས་ལུས་པ་རྣམས་ཀྱང་བྲོས་ཕྱིན་མོད།

² འོན་ཀྱང་ཕེ་ལེ་ཤེད་པ་ཚོས་ཁོ་ཚོ་འཛིན་བཟུང་བྱས་ནས། ས་ཨུལ་གྱི་བུ་ཡོ་ན་ཐན་དང་ཨ་བྷི་ན་དྷབ་དང་མལ་ཀི་ཤུ་ཨ་བཅས་བསད་དོ།

³ ས་ཨུལ་གྱི་ཉེ་འཁོར་དུ་དམག་འཁྲུགས་ཤུགས་ཆེན་པོ་ལངས་པས། ཁོ་ལ་དགྲ་བོའི་མདའ་ཕོག་ནས་རྨས་སྐྱོན་ཆེན་པོ་བྱུང་ངོ་།

⁴ ས་ཨུལ་གྱིས་རང་གི་གོ་མཚོན་འཁྱེར་མཁན་གཞོན་ནུ་དེ་ལ། ཕེ་ལེ་ཤེད་པ་ཆོས་མེད་ཀླ་ཀློ་པ་དེ་ཚོས་འཕྱ་ནས་ང་ལ་མ་གསོད་གོང་དུ་ཁྱོད་ཀྱིས་རང་གི་རལ་གྲི་དེ་བཏོན་ནས་ང་གསོད་ཅིག་ཅེས་སྨྲས་པ་དང་། གཞོན་ནུ་དེ་ཧ་ཅང་ཞེད་ནས་དེ་བཞིན་བྱེད་མ་ཐུབ་པས། ས་ཨུལ་གྱིས་རང་གི་རལ་གྲི་དེ་བླངས་ནས་དེའི་སྟེང་མཆོངས་སོ།

⁵ གཞོན་ནུས་ས་ཨུལ་དེ་བཞིན་གྲོངས་པ་མཐོང་ནས་ཁོ་རང་ཡང་རང་གི་རལ་གྲིའི་སྟེང་དུ་མཆོངས་ནས་ས་ཨུལ་དང་མཉམ་དུ་ཤི་བ་ཡིན་ནོ།

⁶ ས་ཨུལ་དང་ཁོའི་བུ་གསུམ་དང་གོ་མཚོན་འཁྱེར་མཁན་གཞོན་ནུ་དང་བཅས་པ་དེ་བཞིན་ཤི་བས། དེ་ཉིན་ས་ཨུལ་གྱི་སྐྱེས་པ་ཚང་མ་ཤི་བ་ཡིན་ནོ།

⁷ ཡེཛ་རིལ་ལུང་གཤོང་གི་ཕར་ཕྱོགས་དང་གཙང་པོ་ཡོར་དན་གྱི་ཤར་ཕྱོགས་སུ་ཡོད་པའི་ཨིསི་རཱཨེལ་པ་ཚོས། ས་ཨུལ་དང་ཁོའི་བུ་རྣམས་བསད་ཟིན་པའི་སྐོར་ཐོས་པས། ཁོ་ཚོ་རང་གི་གྲོང་ཁྱེར་རྣམས་སྤངས་ནས་བྲོས་ཕྱིན་པ་དང་། དེ་རྗེས་ཕེ་ལེ་ཤེད་པ་རྣམས་ཡོང་ནས་དེ་དག་དབང་འཛིན་བྱས་སོ།

⁸ དམག་ཐག་ཆོད་པའི་སང་ཉིན་དེར་ཕེ་ལེ་ཤེད་པ་རྣམས་དམག་སར་ཤི་བའི་མི་རྣམས་ཀྱི་རོ་གོས་བཤུ་བ་དང་དེ་ཚོའི་གོ་མཚོན་བསྡུ་སྒྲུག་བྱེད་ཕྱིར་འགྲོ་སྐབས། ཁོ་ཚོས་ས་ཨུལ་དང་ཁོའི་བུ་སྤུན་གསུམ་གྱི་རོ་རྣམས་རི་བོ་གྷིལ་བོ་རུ་ས་ཁར་འགྲིལ་ནས་ཡོད་པ་མཐོང་བས།

⁹ ཁོ་ཚོས་ས་ཨུལ་གྱི་མགོ་བཅད་དེ། ཁོ་ཁྲབ་བཤུས་ནས། ཁོ་ཚོའི་སྐུ་འདྲ་མཆོད་སའི་ལྷ་ཁང་ཁག་དང་མི་མང་ལ་དེ་དག་བསྟན་ཏེ། ས་ཨུལ་བསད་པའི་འཕྲིན་བཟང་ཤོད་ཕྱིར་ཕེ་ལེ་ཤེད་ཀྱི་ས་ཁུལ་ཡོངས་རྫོགས་སུ་བང་ཆེན་རྣམས་བཏང་ངོ་།

¹⁰ དེ་ནས་ཁོ་ཚོས་ས་ཨུལ་གྱི་གོ་མཚོན་རྣམས་ལྷ་མོ་ཨསེ་ཏཱར་ཀྱི་ལྷ་ཁང་དུ་བཞག་པ་དང་། ཁོའི་སྐུ་ཕུང་དེ་ནི་གྲོང་ཁྱེར་བྷེད་ཤཱན་གྱི་ལྕགས་རིར་གཟེར་བརྒྱབ་ནས་བཞག་གོ

¹¹ ཕེ་ལེ་ཤེད་པ་ཚོས་ས་ཨུལ་ལ་གང་བྱས་པའི་སྐོར་ལ་གྷིལ་ཨད་ཡ་བྷེཤ་ཀྱི་ཡུལ་མི་ཚོས་ཐོས་ནས།

¹² ཁོ་ཚོའི་སྐྱེས་པ་བློ་སྟོབས་ཆེ་ཤོས་རྣམས་མཚན་གང་ཕྱིན་ཏེ་བྷེད་ཤཱན་དུ་སླེབས་པ་དང་། ཁོ་ཚོས་ས་ཨུལ་དང་ཁོའི་བུ་རྣམས་ཀྱི་ཕུང་པོ་དག་ལྕགས་རི་ནས་མར་ཕབ་ནས་ཡ་བྷེཤ་སུ་ཕྱིར་ལོག་འཁྱེར་ཡོང་ནས་དེར་མེར་སྲེག་བཏང་ངོ་།

¹³ དེ་ནས་ཁོ་ཚོས་རུས་པ་རྣམས་འཁྱེར་ནས་གྲོང་ཁྱེར་དུ་ཡོད་པའི་འོམ་བུའི་ཤིང་གི་འོག་ཏུ་དེ་དག་ས་སྦས་བཏང་སྟེ། བདུན་ཕྲག་གཅིག་གི་རིང་དུ་སྨྱུང་གནས་བསྲུངས་པ་ཡིན་ནོ༎