ཤ་མུ་ཨེལ་དང་པོ། 30 - Tibetan Old Testament 2011

ཨ་མ་ལེག་པ་རྣམས་དང་དམག་འཐབ་པ།

¹ དེ་ནས་ཉིན་ཞག་གཉིས་ཀྱི་རྗེས་སུ་དཱ་བིད་དང་ཁོའི་མི་རྣམས་ཛིག་ལག་ཏུ་སླེབས་པ་དང་། ཨ་མ་ལེག་པ་ཚོས་ཡ་ཧུ་དཱའི་ལྷོ་ཕྱོགས་ནས་དམག་དྲངས་ཏེ་ཛིག་ལག་ཏུ་འཐབ་རྒོལ་བྱས་སོ། དེ་ཚོས་གྲོང་ཁྱེར་མེར་སྲེག་བཏང་སྟེ།

² བུད་མེད་ཚང་མ་འཛིན་བཟུང་བྱས་སོ། མི་གཅིག་ཀྱང་མ་བསད་པར་སོ་སོ་ཕྱོགས་ཐོན་བྱེད་སྐབས་དེ་ཚོ་ཚང་མ་རང་དང་མཉམ་དུ་འཁྲིད་ཕྱིན་ནོ།

³ དེ་ནས་དཱ་བིད་དང་ཁོའི་མི་རྣམས་དེར་སླེབས་སྐབས། ཁོ་ཚོས་གྲོང་ཁྱེར་དེ་མེར་སྲེག་བཏང་ཡོད་པ་དང་། ཁོ་ཚོའི་སྐྱེ་དམན་བུ་ཕྲུག་ཚང་མ་འཁྲིད་ཟིན་ཡོད་པ་མཐོང་ངོ།

⁴ དཱ་བིད་དང་ཁོའི་མི་རྣམས་ངུ་ཤོར་ནས། ཁོ་ཚོ་ངུ་ཐག་མ་ཆད་བར་དུ་ངུས་སོ།

⁵ དཱ་བིད་ཀྱི་ཆུང་མ་ཨ་ཧི་ནོ་ཨམ་དང་ཨ་བྷི་གེལ་གཉིས་ཀྱང་བུད་མེད་གཞན་རྣམས་དང་མཉམ་དུ་འཁྲིད་ཡོད་པ་ཡིན་ནོ།

⁶ དཱ་བིད་ནི་དཀའ་ངལ་ཆེན་པོ་ཞིག་གི་ནང་དུ་ཚུད་ཡོད་པ་ཡིན་ནོ། གང་ལགས་ཟེར་ན། ཁོའི་མི་རྣམས་ཀྱི་ཆུང་མ་བུ་ཕྲུག་དང་བཅས་པ་ཚང་མ་འཛིན་བཟུང་བྱས་ནས་འཁྲིད་ཡོད་པ་ཡིན་པས། ཁོ་ཚོ་ཧ་ཅང་ཁོང་ཁྲོ་ལངས་ནས་ཁོ་ལ་རྡོ་རུབ་གཏོང་རྒྱུའི་སྡིགས་ར་བསྐུལ་གྱི་ཡོད་དོ། འོན་ཀྱང་གཙོ་བོ་དཀོན་མཆོག་ཁོའི་དཀོན་མཆོག་གིས་ཁོ་ལ་བློ་སྟོབས་གནང་ཡོད་པ་ཡིན་ནོ།

⁷ དེ་ནས་དཱ་བིད་ཀྱིས་ཨ་ཧི་མེ་ལེག་གི་བུ་བླ་མ་ཨ་བྷི་ཡ་ཐར་ལ། ང་ལ་ཨེ་ཕོད་དེ་ཚུར་གཤུགས་ཤིག་ཅེས་སྨྲས་པས། ཨ་བྷི་ཡ་ཐར་གྱིས་དེ་ཁོང་གི་རྩར་འཁྱེར་ཡོང་བ་དང་།

⁸ དཱ་བིད་ཀྱིས་གཙོ་བོ་དཀོན་མཆོག་ལ། ངས་འཇབ་རྒོལ་བྱེད་མཁན་རྣམས་ཀྱི་རྗེས་འདེད་བྱེད་དམ། ངས་ཁོ་ཚོ་འཛིན་བཟུང་བྱེད་ཐུབ་བམ་ཞེས་བཀའ་འདྲི་ཞུས་པས། དེའི་ལན་དུ་ཁོང་གིས། ཁོ་ཚོའི་རྗེས་འདེད་བྱོས་ཤིག། ཁྱོད་ཀྱིས་ཁོ་ཚོ་འཛིན་བཟུང་བྱེད་དེ། བཙོན་པ་རྣམས་ཀྱང་སྐྱབས་ཐུབ་པ་ཡོད་ཅེས་གསུངས་སོ།

⁹ དེར་བརྟེན་དཱ་བིད་དང་ཁོའི་མི་རྣམས་ ༦༠༠ དེ་ནས་ཕྱིན་ཏེ། ཁོ་ཚོ་བྷེ་སོར་ཞེས་པའི་ཆུ་ཀླུང་དུ་སླེབས་པ་དང་། མི་འགའ་ཤས་གནས་དེ་རང་དུ་བསྡད་དོ།

¹⁰ དཱ་བིད་ནི་རང་དང་མཉམ་དུ་མི་རྣམས་ ༤༠༠ འཁྲིད་ནས་ད་དུང་མུ་མཐུད་ཀྱིས་ཕྱིན་པ་དང་། དེ་འཕྲོད་མི་གྲངས་ ༢༠༠ ནི་ཧ་ཅང་ཐང་ཆད་དེ་ཆུ་ཀླུང་རྒལ་མ་ཐུབ་པར་དེ་ག་རང་དུ་བསྡད་པ་རེད།

¹¹ དེ་ནས་དཱ་བིད་དང་མཉམ་དུ་ཡོད་པའི་མི་ཚོས་ཐང་སྟོང་ཁུལ་དུ་ཨི་ཇིབ་པའི་བུ་ཞིག་མཐོང་ནས། དེ་དཱ་བིད་ཀྱི་རྩར་འཁྲིད་ཡོང་པ་དང་། ཁོ་ཚོས་དེ་ལ་ཁ་ཟས་ཕྲན་བུ་ཞིག་དང་ཆུ་སྤྲད་དོ།

¹² ཁོ་ལ་ཁ་ཟས་སུ་སེ་ཡབ་ཀྱི་ཤིང་འབྲས་སྐམ་པོ་ཕྲན་བུ་ཞིག་དང་རྒུན་འབྲུམ་ཆག་པ་གཉིས་སྤྲད་པས། ཁོས་དེ་ཟས་པའི་རྗེས་སུ་ཁོ་ལ་ལུས་སྟོབས་སླར་གསོ་བྱུང་ངོ་། ཁོས་ཉིན་མཚན་ཆ་ཚང་གསུམ་གྱི་རིང་ལ་བཟའ་བཏུང་སོགས་གང་ཡང་བྱས་མེད་པ་ཡིན་ནོ།

¹³ དེ་ནས་དཱ་བིད་ཀྱིས་ཁོ་ལ། ཁྱོད་ཀྱི་སྦྱིན་བདག་སུ་ཡིན་པ་དང་ཁྱོད་རང་གང་ནས་ཡིན་ནམ་ཞེས་འདྲི་རྩད་བྱས་པས། ཁོས་ལན་དུ། ང་ནི་ཨི་ཇིབ་པ་ཞིག་ཡིན་ཏེ། ཨ་མ་ལེག་པ་ཞིག་གི་བྲན་གཡོག་ཡིན། ང་ནད་པ་ཡིན་པས། ངའི་སྦྱིན་བདག་གིས་ང་སྤངས་ནས་ཉིན་ཞག་གསུམ་ཕྱིན་སོང་།

¹⁴ ང་ཚོས་ཡ་ཧུ་དཱའི་ལྷོ་ཕྱོགས་སུ་ཡོད་པའི་ཀེ་རེ་པའི་ས་ཁུལ་ཁག་དང་། ཀ་ལེབ་རིགས་རུས་ཀྱི་ས་ཁུལ་ཁག་ཏུ་འཇབ་རྒོལ་བྱས་ནས། ཛིག་ལག་མེར་སྲེག་བཏང་བ་ཡིན་ཞེས་སྨྲས་པ་དང་།

¹⁵ དཱ་བིད་ཀྱིས་ཁོ་ལ། ཁྱོད་ཀྱིས་ང་ལ་འཇབ་རྒོལ་བྱེད་མཁན་དེ་ཚོའི་རྩར་འཁྲིད་ཐུབ་བམ་ཞེས་དྲིས་པས། ཁོས་ལན་དུ། གལ་སྲིད་ཁྱེད་ཀྱི་ང་ལ་གསོད་རྒྱུ་མིན་པ་དང་། ང་སྦྱིན་བདག་གི་ལག་པར་རྩིས་སྤྲོད་མི་བྱེད་ཅེས་དཀོན་མཆོག་གི་མཚན་གྱི་ངང་དུ་དམ་བཅའ་གནང་བ་ཡིན་ན། ངས་དེ་བཞིན་བྱེད་རྒྱུ་ཡིན་ཞེས་སྨྲས་སོ།

¹⁶ ཁོས་དཱ་བིད་ལ་ཁོ་ཚོའི་རྩར་འཁྲིད་ཕྱིན་ནོ། འཇབ་རྒོལ་བྱེད་མཁན་དམག་མི་ཚང་མ་ཁ་འཐོར་ནས་བསྡད་ཡོད་པ་དང་། ཁོ་ཚོས་བཟའ་བཏུང་དང་དགའ་སྟོན་ལ་རོལ་ཞིང་ཡོད་པ་ཡིན། གང་ལགས་ཟེར་ན། ཁོ་ཚོས་ཕེ་ལེ་ཤེད་དང་ཡ་ཧུ་དཱ་ནས་རྒྱུ་ནོར་ཧ་ཅང་ཕོན་ཆེ་ཞིག་བཅོམ་ཡོད་པ་ཡིན་ནོ།

¹⁷ དཱ་བིད་ཀྱིས་དེའི་ཕྱི་ཉིན་ཐོ་རེངས་སྔ་པོ་ནས་ཕྱི་དྲོ་བར་ཁོ་ཚོའི་ཐོག་ཏུ་འཐབ་རྒོལ་བྱས་པས། རྔ་མོང་ལ་བཞོན་ནས་བྲོས་ཕྱིན་པའི་གཞོན་ནུ་མི་གྲངས་ ༤༠༠ དེ་མ་གཏོགས། དེ་མིན་མི་གཅིག་ཀྱང་མ་ཐར་རོ།

¹⁸ ཨ་མ་ལེག་པ་ཚོས་འཁྲིད་པའི་མི་དང་དངོས་པོ་ཚང་མ་དཱ་བིད་ཀྱིས་ཚུར་ཕྱིར་འཕྲོག་བྱས་ཐུབ་བོ། དེའི་ཁོངས་སུ་ཁོའི་ཆུང་མ་གཉིས་ཀྱང་ཡོད་པ་ཡིན་ནོ།

¹⁹ ཨ་མ་ལེག་པ་ཚོས་འཛིན་བཟུང་བྱས་ནས་འཁྲིད་པའི་མི་དང་། དཱ་བིད་ཀྱི་མི་ཚང་མའི་བུ་དང་བུ་མོ་ཚང་མ་དང་། ཁོ་ཚོས་འཕྲོག་བཅོམ་བྱས་པའི་རྒྱུ་དངོས་ནང་ནས་གཅིག་ཀྱང་མ་ལུས་པར་དཱ་བིད་ལ་ཕྱིར་སློག་ཐོབ་བོ།

²⁰ ཁོས་ཕྱུགས་ཟོག་རྣམས་ཀྱང་ཡོངས་སུ་ཕྱིར་འཕྲོག་བྱས་པས། ཁོའི་མི་རྣམས་ཀྱིས་དེ་དག་རང་གི་མདུན་དུ་དེད་ནས་སྨྲས་པ། འདི་ཚོ་ནི་དཱ་བིད་ལ་བདག་པ་ཡིན་ནོ།

²¹ དེ་ནས་དཱ་བིད་མི་རྣམས་ ༢༠༠ རྣམས་ཉམ་ཞིང་རྒུད་ནས་ཁོང་དང་མཉམ་དུ་འགྲོ་མ་ཐུབ་པར་ཆུ་ཀླུང་བྷེ་སོར་གྱི་འགྲམ་དུ་དེ་ཚོ་བསྡད་ཡོད་སར་ཕྱིར་ལོག་གོ ཁོ་ཚོའང་དཱ་བིད་དང་ཁོའི་མི་རྣམས་ཐུགས་འཕྲད་བྱེད་པར་མདུན་དུ་ཡོང་ཞིང་། དཱ་བིད་ཁོ་ཚོའི་རྩར་མདུན་དུ་ཕྱིན་ནས་དགའ་བསུ་བྱས་སོ།

²² འོན་ཀྱང་དཱ་བིད་དང་མཉམ་དུ་འགྲོ་མཁན་མི་ངན་འགའ་ཤས་ཀྱིས། ཁོ་ཚོ་ང་ཚོ་དང་མཉམ་དུ་མ་ཕྱིན་པ་ཡིན་པས། ང་ཚོས་བཅོམ་ནོར་ནས་ཁོ་ཚོར་གང་ཡང་སྤྲོད་ཀྱི་མིན། འོན་ཀྱང་ཁོ་ཚོས་རང་གི་ཆུང་མ་དང་བུ་ཕྲུག་སོགས་འཁྲིད་ནས་འགྲོ་ཆོག་གི་རེད་ཅེས་སྨྲས་མོད།

²³ འོན་ཀྱང་དཱ་བིད་ཀྱིས་ལན་དུ། རྒྱུ་ནོར་འདི་དག་ནི་གཙོ་བོ་དཀོན་མཆོག་གིས་ང་ཆོར་གནང་བ་ཡིན་པས། ཀྱེ་ངའི་སྤུན་རྣམས། ཁྱོད་ཚོས་དེ་ལྟར་བྱེད་ན་མི་སྒྲིག་ཅིང་། ཁོང་གིས་ང་ཚོ་ཉེན་ཁ་ལས་སྐྱབས་པ་གནང་ནས་འཇབ་རྒོལ་བྱེད་མཁན་ལས་རྒྱལ་ཁ་གནང་ཡོད་པ་ཡིན།

²⁴ ཁྱོད་ཚོས་གང་བཤད་པ་དེ་ལ་སུས་ཀྱང་ཁས་ལེན་བྱེད་མི་ཡོང་། དེ་བས་ན་ཚང་མར་ཐོབ་སྐལ་འདྲ་མཉམ་སྤྲོད་དགོས། ཟས་རིགས་མཁོ་ཆས་སོགས་ལ་བལྟ་རྟོགས་བྱེད་མཁན་རྣམས་ལའང་དམག་སར་འགྲོ་མཁན་རྣམས་དང་མཚུངས་པར་ཐོབ་སྐལ་འདྲ་མཉམ་སྤྲོད་དགོས་ཅེས་སྨྲས་སོ།

²⁵ དཱ་བིད་ཀྱིས་ལམ་སྲོལ་དེ་བཟོས་པ་ནས་བཟུང་ཨིསི་རཱཨེལ་དུ་དེ་བཞིན་ལག་ལེན་བསྟར་བཞིན་པ་ཡིན་ནོ།

²⁶ དེ་ནས་དཱ་བིད་ཛིག་ལག་ཏུ་ཕྱིར་ལོག་བྱས་ཏེ། རང་གི་གྲོགས་པོ་ཡ་ཧུ་དཱའི་འགོ་དཔོན་རྣམས་ལ་བཅོམ་ནོར་གྱི་ཆ་ཤས་ཤིག་བཏང་ནས་གཤམ་གསལ་ལྟར་འཕྲིན་ཞིག་བསྐུར་བ། ང་ཚོས་གཙོ་བོ་དཀོན་མཆོག་གི་དགྲ་བོའི་ལག་ནས་འཕྲོག་པའི་བཅོམ་ནོར་ལས་ཁྱོད་ཚོར་ཕྱག་རྟགས་ཕྲན་བུ་ཞིག་བསྐུར་ཡོད།

²⁷ དེ་བཞིན་དཱ་བིད་ཀྱིས་བྷེ་ཐེལ་གྱི་མི་རྣམས་དང། ཡ་ཧུ་དཱའི་ལྷོ་ཕྱོགས་སུ་ཡོད་པའི་ར་མཱའི་མི་རྣམས་དང་། ཡ་ཏིར་གྲོང་ཁྱེར་རྣམས་ཀྱི་མི་རྣམས་དང།

²⁸ ཨ་རོ་ཨེར། སིཕ་མོད། ཨེཤ་ཏེ་མོ།

²⁹ ར་ཀལ་གྲོང་ཁྱེར་གྱི་མི་རྣམས་དང། ཡེ་རཱ་མིལ་གྱི་རིགས་རུས་དང་། ཀེ་ནེ་པ་རྣམས་དང་།

³⁰ དེ་བཞིན་ཧོར་མཱ། བོ་ར་ཤན་དང་། ཨ་ཐག་དང་།

³¹ ཧེབ་རོན་གྲོང་ཁྱེར་གྱི་མི་མང་ཚོ་དང་། ཁོ་དང་ཁོའི་མི་རྣམས་དེ་སྔ་ས་ཁུལ་གང་དུ་ཕྱིན་པ་དེ་ཚོ་ཚང་མར་ཁོས་ཕྱག་རྟགས་དེ་དག་བཏང་བ་ཡིན་ནོ༎