ཤ་མུ་ཨེལ་དང་པོ། 29 - Tibetan Old Testament 2011

ཕེ་ལེ་ཤེད་པ་ཚོས་དཱ་བིད་ལ་ངོས་ལེན་མ་བྱས་པ།

¹ ཕེ་ལེ་ཤེད་པ་ཚོས་རང་གི་དམག་དཔུང་རྣམས་ས་གནས་ཨ་ཕེག་ཏུ་བསྡུ་འཛོམས་བྱས་པ་དང་། དེ་བཞིན་ཨིསི་རཱཨེལ་པ་རྣམས་ཀྱང་ཡེཛ་རིལ་ལུང་གཤོང་གི་ཆུ་མིག་ཞིག་གི་ཉེ་འགྲམ་དུ་སྒར་བརྒྱབ་ནས་བསྡད་ཡོད་དོ།

² ཕེ་ལེ་ཤེད་པའི་རྒྱལ་པོ་ལྔ་ནི་མི་གྲངས་བརྒྱ་ཕྲག་དང་སྟོང་ཕྲག་བྱས་པའི་རང་རང་སོ་སོའི་སྡེ་ཁག་དང་མཉམ་དུ་མདུན་སྐྱོད་བྱས་པ་དང་། དཱ་བིད་དང་ཁོའི་མི་རྣམས་རྒྱལ་པོ་ཨ་ཀིཤི་དང་མཉམ་དུ་གྲལ་ཞུགས་སུ་ཕྱིན་ནོ།

³ ཕེ་ལེ་ཤེད་པའི་དམག་དཔྱིད་རྣམས་ཀྱི་ཁོ་ཚོ་མཐོང་ནས། ཨིབ་རི་པ་དེ་ཚོ་འདིར་ག་རེ་བྱེད་ཀྱི་ཡོད་པ་ཡིན་ནམ་ཞེས་དྲིས་པ་དང་། ལན་དུ་ཨ་ཀིཤི་ཀྱིས། འདི་ནི་ཨིསི་རཱཨེལ་གྱི་རྒྱལ་པོ་ས་ཨུལ་གྱི་ལས་བྱེད་པ་དཱ་བིད་ཅེས་པ་དེ་ཡིན་པ་དང་། ཁོ་ནི་ང་ཚོའི་ཁྲོད་དུ་གནས་སྡོད་བྱས་ནས་དུས་ཡུན་རིང་པོར་སོང་བས། ཁོ་ངའི་རྩར་སླེབས་པའི་ཉིན་མོ་ནས་བཟུང་སྟེ་ད་བར་ཁོས་ནོར་འཁྲུལ་བྱས་པ་གཅིག་ཀྱང་ངས་མཐོང་མ་བྱུང་།

⁴ འོན་ཀྱང་ཕེ་ལེ་ཤེད་པའི་དམག་དཔྱིད་རྣམས་ཨ་ཀིཤི་དང་ཁོང་ཁྲོ་ལངས་ནས་ཁོ་ལ། མི་དེ་ཁྱོད་ཀྱིས་སྤྲད་པའི་གྲོང་ཁྱེར་དེར་ཕྱིར་ལོག་བྱེད་དུ་ཆུག་ཅིག ཁོ་ང་ཚོ་དང་མཉམ་དུ་དམག་སར་ཡོང་མ་ཅུག་ཅིག དམག་འཐབ་བྱེད་སྐབས་ཁོས་ང་ཚོར་འཐབ་རྒོལ་ཡང་བྱེད་སྲིད། རང་གི་སྦྱིན་བདག་མཉེས་པར་བྱེད་པའི་ཐབས་ལམ་བཟང་ཤོས་དེ་ནི། ང་ཚོའི་མི་རྣམས་བསད་པའི་སྒོ་ནས་མ་གཏོགས་གཞན་ཐབས་ལམ་བཟང་བ་ཞིག་གང་ཡོད་དམ།

⁵ གང་ལྟར་ཡིན་རུང་ཁོ་ནི་དཱ་བིད་ཟེར་བ་དེ་མ་ཡིན་ནམ། ཁོའི་སྐོར་ལ་བུད་མེད་ཚོས་བྲོ་ཁར་ཁྲབ་སྟེ། ས་ཨུལ་གྱིས་སྟོང་ཕྲག་བསད་ཅིང་། དཱ་བིད་ཀྱིས་ཁྲི་ཕྲག་བསད་དོ་ཞེས་གཞས་བཏང་བ་མ་ཡིན་ནམ།

⁶ དེ་ནས་ཨ་ཀིཤི་ཀྱིསེ་དཱ་བིད་བོས་ནས། ངས་ཨིསི་རཱཨེལ་པའི་སྐུ་གསོན་པོར་བཞུགས་པའི་གཙོ་བོ་དཀོན་མཆོག་གི་མཚན་གྱི་ངང་དུ་མནའ་བསྐྱེལ་ནས་བརྗོད་རྒྱུར། ཁྱོད་ཀྱིས་ང་ལ་ཞེན་སེམས་ཆེན་པོ་བྱེད་ཀྱི་ཡོད་པ་དང་། ཁྱོད་རང་ང་དང་མཉམ་དུ་ཡོང་ནས་ངའི་ཕྱོགས་གཏོགས་བྱེད་དེ་དམག་བརྒྱབ་པ་དེ་ལ་ཧ་ཅང་དགའ་པོ་འདུག དེ་ཙམ་མ་ཟད། ཁྱོད་ངའི་རྩར་ཡོང་བ་ནས་བཟུང་སྟེ་ད་བར་ངས་ཁྱོད་ལ་སྐྱོན་གང་ཡང་མཐོང་མ་བྱུང་། འོན་ཀྱང་རྒྱལ་པོ་གཞན་ཚོས་ཁྱོད་ལ་ཁས་ལེན་བྱེད་ཀྱི་མིན་འདུག

⁷ དེ་བས་ན་ཁྱོད་ཞི་བདེའི་ནང་རང་ཁྱིམ་དུ་ཕྱིར་ལོག་བྱོས་ཤིག ཁོ་ཚོའི་འདོད་པ་དང་མ་མཐུན་པའི་ལས་གང་ཡང་མ་བྱེད་རོགས་གནང་ཞེས་སྨྲས་སོ།

⁸ དེའི་ལན་དུ་དཱ་བིད་ཀྱིས། ཀྱེ་ཇོ་བོ་ལགས། ངས་ནོར་འཁྲུལ་ག་རེ་བྱས་ཡོད་དམ། ད་ལྟ་ཁྱེད་ཀྱིས་བཀའ་གནང་གསལ་ལྟར། ངས་ཁྱེད་ཀྱི་ཞབས་ཕྱི་ཞུས་པ་ནས་བཟུང་ད་བར་ཁྱེད་ཀྱིས་ང་ལ་སྐྱོན་གང་ཡང་གཟིགས་མེད་པ་ཡིན་ན། ངས་རང་གི་སྦྱིན་བདག་དང་རྒྱལ་པོའི་ལྷན་དུ་ཕྱིན་ཏེ་སྐུ་ཉིད་ཀྱི་དགྲ་བོ་རྣམས་དང་དམག་འཐབ་བྱེད་མི་ཆོག་པ་དེ་གང་ཡིན་ནམ་ཞེས་སྨྲས་པ་དང་།

⁹ ཨ་ཀིཤི་ཀྱིས་ལན་དུ། ཁྱོད་ཀྱིས་གང་སྨྲས་པ་དེ་བདེན་པ་ཡིན་པ་དང་། ངས་ནི་ཁྱོད་ལ་དཀོན་མཆོག་གི་ཕོ་ཉ་བཞིན་དུ་ཚུལ་མཐུན་ཞེན་ཅན་ཞིག་ཏུ་ངོས་འཛིན་བྱེད་ཀྱི་ཡོད། འོན་ཀྱང་རྒྱལ་པོ་གཞན་ཚོས་ཁྱོད་རང་ང་ཚོ་དང་མཉམ་དུ་དམག་ལ་ཡོང་མི་ཆོག་ཅེས་བརྗོད་ཀྱི་འདུག་པས།

¹⁰ དེ་བས་ན་དཱ་བིད་ས་ཨུལ་ལ་སྤངས་ནས་ངའི་རྩར་ཡོང་མཁན་ཁྱོད་ཚོ་ཚང་མ་སང་ཞོགས་སྔ་པོར་ལངས་ཏེ་སྐྱ་བཏང་མ་ཐག་ཏུ་ཐོན་དགོས་ཅེས་སྨྲས་སོ།

¹¹ དེ་ནས་དཱ་བིད་དང་ཁོའི་མི་རྣམས་སང་ཞོགས་སྔ་པོར་ལངས་ནས་ཕེ་ལེ་ཤེད་དུ་ཐོན་པ་དང་། དེ་བཞིན་ཕེ་ལེ་ཤེད་པ་ཚོའང་ཡེཛ་རིལ་གྱི་ཕྱོགས་སུ་ཐོན་པ་ཡིན་ནོ༎