ཤ་མུ་ཨེལ་དང་པོ། 28 - Tibetan Old Testament 2011

¹ ནམ་ཞིག་གི་རྗེས་སུ་ཕེ་ལེ་ཤེད་པ་ཚོས་ཨིསི་རཱཨེལ་གྱི་ཐོག་ཏུ་དམག་འདྲེན་ཕྱིར་རང་གི་དཔུང་དམག་རྣམས་བསྡུ་བཀོང་བྱས་པ་དང་། ཨ་ཀིཤི་ཀྱིས་དཱ་བིད་ལ། ཁྱོད་དང་ཁྱོད་ཀྱི་མི་རྣམས་ནི་ངའི་ཕྱོགས་གཏོགས་བྱས་ནས་དམག་བརྒྱབ་དགོས་རྒྱུ་ཡིན་པ་དེ་ཁྱོད་ཀྱིས་ཤེས་གསལ་རེད་ཅེས་སྨྲས་སོ།

² དཱ་བིད་ཀྱིས་ལན་དུ། དེ་ནི་ཡིན་དགོས་བྱུང་། ང་ནི་ཁྱེད་ཀྱི་ཞབས་ཕྱི་ཡིན་པས། ངས་ག་རེ་བྱེད་ཐུབ་པ་དེ་སྐུ་ཉིད་རང་གིས་གཟིགས་ཐུབ་པ་ཡོད་ཅེས་སྨྲས་སོ། ཨ་ཀིཤི་ཀྱི་དེ་ལྟར་ཡིན་ན་ལེགས་སོ། ད་ངས་ཁྱོད་ལ་རང་གི་སྐུ་སྲུང་བར་གཏན་འཇགས་སུ་བསྐོ་གཞག་བྱེད་རྒྱུ་ཡིན་ཞེས་སྨྲས་སོ།

ས་ཨུལ་གྱིས་མན་ངག་མཁན་དང་གྲོས་བསྟུན་བྱེད་པ།

³ ཤ་མུ་ཨེལ་གྲོངས་ཟིན་པ་ཡིན་པས། ཨིསི་རཱཨེལ་པ་ཚང་མས་ཁོའི་དོན་དུ་མྱ་ངན་བྱས་ཏེ། ཁོའི་སྐུ་ཕུང་དེའང་རང་གི་གྲོང་ཁྱེར་ར་མཱ་རུ་དུར་སར་སྦས་ཟིན་པའི་རྗེས་སུ། ས་ཨུལ་གྱིས་གཤིན་པོའི་རྣམ་ཤེས་འགུག་མཁན་དང་ལྷ་པ་ཐམས་ཅད་ཨིསི་རཱཨེལ་ནས་བཏོན་ཟིན་ཡོད་པ་ཡིན་ནོ།

⁴ ཕེ་ལེ་ཤེད་པའི་དམག་མི་རྣམས་འཛོམས་ནས་ཤུ་ནེམ་གྲོང་ཁྱེར་གྱི་ཉེ་འགྲམ་དུ་སྒར་བརྒྱབ་པ་དང་། ས་ཨུལ་གྱིས་ཨིསི་རཱཨེལ་པ་རྣམས་བསྡུ་བསྐོང་བྱས་ནས་རི་བོ་གྷིལ་བོ་རུ་སྒར་བརྒྱབ་ནས་བསྡད་ཡོད་དོ།

⁵ ས་ཨུལ་གྱིས་ཕེ་ལེ་ཤེད་པའི་དམག་མི་རྣམས་མཐོང་ནས་ཧ་ཅང་འཇིགས་ཤིང་།

⁶ ཅི་བྱ་གཏོལ་མེད་དུ་འགྱུར་ནས་གཙོ་བོ་དཀོན་མཆོག་ལ་དགོངས་སྐོར་ཞུས་མོད། འོན་ཀྱང་གཙོ་བོ་དཀོན་མཆོག་གིས་ཁོ་ལ་རྨི་ལམ་དང་། ཡང་ན་ཨུ་རིམ་དང་ཐུམ་མིམ་གྱི་བརྒྱུད་དང་། དེ་བཞིན་ལུང་སྟོན་པ་རྣམས་ཀྱི་བརྒྱུད་ནས་ཀྱང་བཀའ་ལན་གང་ཡང་མ་གནང་ངོ་།

⁷ དེ་ནས་ས་ཨུལ་གྱིས་རང་གི་ལས་བྱེད་པ་ཚོར། ངའི་དོན་དུ་རྣམ་ཤེས་འགུག་མཁན་བུད་མེད་ཅིག་འཚོལ་ཞིག་དང་། ངས་མོ་ལ་གྲོས་བསྟུན་བྱེད་རྒྱུ་ཡིན་ཞེས་སྨྲས་པ་དང་། ཁོ་ཚོས་ལན་དུ། ཨེན་ཌོར་ལ་དེ་ལྟ་བུའི་བུད་མེད་ཅིག་འདུག་ཅེས་སྨྲས་སོ།

⁸ དེར་བརྟེན་ས་ཨུལ་གྱིས་ངོ་གདོང་བསྒྱུར་ནས་གོས་གཞན་ཞིག་གྱོན་ནས། ནག་ཁུང་ཆགས་པའི་རྗེས་སུ་རང་གི་མི་གཉིས་མཉམ་དུ་འཁྲིད་ནས་བུད་མེད་དེ་ཐུག་པར་ཕྱིན་པ་དང་། ཁོས་མོ་ལ། ངའི་ཆེད་དུ་རྣམ་ཤེས་དག་དང་གྲོས་བསྟུན་བྱས་ཏེ། མ་འོངས་པར་གང་འབྱུང་རྒྱུ་ཡིན་པའི་སྐོར་ང་ལ་ཤོད་ཅིག ངས་མིང་འབོད་བྱེད་པའི་མི་དེའི་རྣམ་ཤེས་བསྐོང་ཞིག་ཅེས་སྨྲས་སོ།

⁹ བུད་མེད་དེས་ལན་དུ། རྒྱལ་པོ་ས་ཨུལ་གྱིས་ག་རེ་གནང་བའི་སྐོར་དང་། གཤིན་པོའི་རྣམ་ཤེས་འགུག་མཁན་དང་ལྷ་པ་རྣམས་ཇི་ལྟར་ཨིསི་རཱཨེལ་ནས་ཕྱིར་སྐྲོད་གནང་བའི་སྐོར་ཁྱེད་ཀྱི་ངེས་གཏན་མཁྱེན་གསལ་རེད། དེ་བས་ན་ཁྱེད་ཀྱིས་ང་རྙི་ཐག་གི་ནང་བཅུག་སྟེ། གསོད་ཐབས་གནང་དགོས་པ་དེ་གང་ཡིན་ནམ་ཞེས་སྨྲས་སོ།

¹⁰ དེ་ནས་ས་ཨུལ་གྱིས་དམ་བཅའ་རྩ་ཆེན་ཞིག་བཞག་ནས་མོ་ལ་སྨྲས་པ། སྐུ་གསོན་པོར་བཞུགས་པའི་གཙོ་བོ་དཀོན་མཆོག་གི་མཚན་གྱི་ངང་དུ་ངས་དམ་བཅའ་བྱེད་དེ་བརྗོད་རྒྱུར། ཁྱོད་ཀྱིས་གང་བྱས་པའི་ཉེས་ལན་དུ་ཁྱོད་ལ་ཆད་པ་ཕོག་མི་ཡོང་།

¹¹ བུད་མེད་དེས། ཁྱེད་ཀྱི་དོན་དུ་ངས་སུའི་རྣམ་ཤེས་དེ་འགུག་པ་བྱའམ་ཞེས་དྲིས་པའི་ལན་དུ། ཁོང་གིས། ཤ་མུ་ཨེལ་གྱི་རྣམ་ཤེས་དེ་འགུག་དགོས་ཤེས་སྨྲས་སོ།

¹² བུད་མེད་དེས་ཤ་མུ་ཨེལ་མཐོང་བ་དང་སྐད་ཅོར་འདོན་ཏེ་ས་ཨུལ་ལ། ཁྱེད་ཀྱིས་ང་ལ་མགོ་བསྐོར་གཏོང་དགོས་པ་དེ་གང་ཡིན་ནམ། ཁྱེད་ནི་རྒྱལ་པོ་ས་ཨུལ་རེད་བཞག་ཅེས་སྨྲས་སོ།

¹³ རྒྱལ་པོས་མོ་ལ། མ་འཇིགས་ཤིག། ཁྱོད་ཀྱིས་ག་རེ་མཐོང་གི་འདུག་གམ་ཞེས་སྨྲས་པས། མོས་ལན་དུ། ངས་རྣམ་ཤེས་ཤིག་ས་གཞི་ནས་ཡར་ཡོང་བཞིན་པ་མཐོང་གི་འདུག་ཅེས་སྨྲས་པས།

¹⁴ ཁོས། དེའི་གཟུགས་དབྱིབས་དེ་གང་འདྲ་ཞིག་འདུག་གམ་ཞེས་སྨྲས་པས། དེའི་ལན་དུ་མོས། ལུས་ལ་གྱོན་གོས་རིང་པོ་གྱོན་པའི་མི་རྒན་ཞིག་ཚུར་ཡོང་གིན་འདུག་ཅེས་སྨྲས་པས། དེ་ནི་ཤ་མུ་ཨེལ་ཡིན་པ་ཤེས་ནས། ས་ཨུལ་གྱིས་གུས་ཞབས་དང་བཅས་མགོ་བོ་ས་ལ་སྒུར་ནས་ཕྱག་འཚལ་ལོ།

¹⁵ དེ་ནས་ཤ་མུ་ཨེལ་གྱིས་ས་ཨུལ་ལ་ཁྱོད་ཀྱིས་ང་ལ་ཅིའི་ཕྱིར་སུན་པོ་བྱས་སམ། ག་རེའི་དོན་དུ་ང་ལ་ཕྱིར་བཀུག་བྱས་པ་ཡིན་ནམ་ཞེས་སྨྲས་པས། ས་ཨུལ་གྱིས། ང་ནི་ཧ་ཅང་དཀའ་ངལ་ནང་ཚུད་ཡོད། ཕེ་ལེ་ཤེད་པ་ཚོས་ངའི་ཐོག་ཏུ་དམག་འཐབ་བྱེད་བཞིན་ཡོད་པ་དང་། དཀོན་མཆོག་གིས་ང་དོར་བ་གནང་བྱུང་། ད་ཁོང་གིས་ང་ལ་ལུང་སྟོན་པའམ་རྨི་ལམ་གྱི་སྒོ་ནས་བཀའ་ལན་གང་ཡང་གནང་གི་མི་འདུག དེ་བས་ན། ངས་ག་རེ་བྱེད་དགོས་སྐོར་ཁྱེད་ཀྱིས་ང་ལ་བཀའ་སློབ་གནང་བའི་ཕྱིར་ངས་ཁྱེད་ལ་འབོད་པ་ཡིན་ཞེས་སྨྲས་པས།

¹⁶ ཤ་མུ་ཨེལ་གྱིས། གཙོ་བོ་དཀོན་མཆོག་གིས་ཁྱོད་རང་སྤངས་ནས་དགྲ་རུ་འགྱུར་ཟིན་པ་ཡིན་པས། ད་ཁྱོད་ཀྱིས་ང་ལ་ག་རེའི་དོན་དུ་འབོད་པ་ཡིན་ནམ།

¹⁷ སྔར་གཙོ་བོ་དཀོན་མཆོག་གིས་ངའི་བརྒྱུད་ནས་ཁྱོད་ལ་གང་གནང་གི་ཡིན་གསུངས་པ་དེ་ཁོང་གིས་ད་ལྟ་སྒྲུབ་པར་མཛད་པ་ཡིན་པས། ཁོང་གིས་ཁྱོད་ཀྱི་རྒྱལ་སྲིད་དེ་ཁྱོད་ཀྱི་ལག་ནས་བཞེས་ཏེ་དཱ་བིད་ལ་གནང་ཡོད་པ་ཡིན།

¹⁸ ཁྱོད་ཀྱིས་གཙོ་བོ་དཀོན་མཆོག་གི་བཀའ་ལ་བརྩི་སྲུང་མ་ཞུས་པར། ཨ་མ་ལེག་པ་རྣམས་དང་ཁོ་ཚོའི་ཕྱུགས་ཟོག་དང་རྒྱུ་དངོས་རྣམས་ཆ་ཚང་མེད་པར་མ་བཟོས་པ་ཡིན་པས། ད་གཙོ་བོ་དཀོན་མཆོག་གིས་ཁྱོད་ལ་ཉེས་ཆད་འདི་བཞིན་གནང་བ་ཡིན་ནོ།

¹⁹ དེ་ཙམ་མ་ཟད་ཁོང་གིས་ཁྱོད་དང་ཨིསི་རཱཨེལ་པ་ཡོངས་རྫོགས་ཕེ་ལེ་ཤེད་པ་རྣམས་ཀྱི་ལག་པར་རྩིས་སྤྲོད་གནང་རྒྱུ་ཡིན་པ་དང་། སང་ཉིན་ཁྱོད་དང་ཁྱོད་ཀྱི་བུ་རྣམས་ཀྱང་ང་དང་མཉམ་དུ་གཤིན་ཡུལ་དུ་སླེབས་པར་འགྱུར། དེ་རྗེས་གཙོ་བོ་དཀོན་མཆོག་གིས་ཨིསི་རཱཨེལ་གྱི་དམག་དཔུང་རྣམས་ཀྱང་ཕེ་ལེ་ཤེད་པ་ཆོའི་ལག་ཏུ་རྩིས་སྤྲོད་གནང་ཡོང་། ཅེས་སྨྲས་སོ།

²⁰ ཤ་མུ་ཨེལ་གྱིས་གང་སྨྲས་པ་དེ་ས་ཨུལ་གྱིས་ཐོས་མ་ཐག་ཏུ། ཁོའི་སེམས་ནང་ཧ་ཅང་འཇིགས་སྣང་ཆེན་པོ་སྐྱེས་ནས་ས་ཁར་འགྱེལ་ལོ། ཁོས་ཉེན་མཚན་གཉིས་ཀའི་རིང་དུ་ཁ་ཟས་གང་ཡང་མ་ཟས་པས་ལུས་སྟོབས་ཡོངས་སུ་ཉམས་ཡོད་པ་དང་།

²¹ དེ་ནས་བུད་མེད་དེ་ཁོའི་ཉེ་འགྲམ་དུ་ཕྱིན་ཏེ། ཁོ་ཧ་ཅང་འཇིགས་ནས་བསྡད་ཡོད་པ་མཐོང་བ་དང་། མོས་ཀྱེ་མི་དབང་ཆེན་པོ། ཁྱེད་ཀྱིས་བཀའ་གང་གནང་བ་བཞིན་ངས་བྱས་ཏེ་རང་སྲོག་འབེན་ལ་བཙུགས་པ་ཡིན་ནོ།

²² ད་ངས་ཁྱེད་ལ་གང་ཞུས་པ་ལྟར་གནང་རོགས་གནང་། ཁྱེད་ཀྱི་དོན་དུ་ང་ལ་གསོལ་ཚིག་ཞིག་གྲ་སྒྲིགས་བྱེད་བཅུག་རོགས་གནང་། སྐུ་ཉིད་ཕེབས་སྐྱོད་གནང་ཐུབ་པའི་ནུས་པ་སྐྱེད་པའི་ཕྱིར་གསོལ་ཚིག་དེ་བཞེས་དགོས་ཅེས་སྨྲས་སོ།

²³ ས་ཨུལ་གྱིས་ཁ་ཟས་གང་ཡང་ཟ་འདོད་མ་བྱས་མོད། འོན་ཀྱང་ཁོའི་ལས་བྱེད་པ་ཚོས་ཀྱང་ནན་ཏན་ཆེན་པོས་ཨུ་ཚུག་བྱས་པས། མཐར་ཁོ་ཚོས་ལབ་པར་ཉན་ཏེ་ཁོ་ཡར་ལངས་ཤིང་ཉལ་ཁྲི་སྟེང་དུ་བསྡད་དོ།

²⁴ དེ་ནས་བུད་མེད་དེ་གསོས་ནས་བཞག་པའི་རང་གི་བེའུ་རྒྱག་པ་དེ་འཕྲལ་དུ་བསད་དེ། མོས་གྲོ་ཞིབ་ཕྲན་བུའི་ཞིག་བླངས་ནས་ཆི་མན་མེད་པའི་བག་ལེབ་བཟོས་ཏེ།

²⁵ མོས་ཁ་ཟས་དེ་དག་ས་ཨུལ་དང་ལས་བྱེད་པ་དེ་ཆོའི་མདུན་དུ་བཤམས་པས། དེ་ཚོས་ཁ་ཟས་དེ་དག་བཟས་ནས་མཚན་མོ་དེ་རང་ལ་ཕྱོགས་ཐོན་བྱས་སོ༎