ཤ་མུ་ཨེལ་དང་པོ། 27 - Tibetan Old Testament 2011

དཱ་བིད་ཕེ་ལེ་ཤེད་པ་རྣམས་ཀྱི་ཁྲོད་དུ་གནས་པ།

¹ དེ་ནས་དཱ་བིད་ཀྱིས་རང་གི་སེམས་ལ། ནམ་ཞིག་ས་ཨུལ་གྱིས་ང་ལ་བསད་ངེས་པས། དེ་བས་ང་ནི་ཕེ་ལེ་ཤེད་པའི་ཡུལ་དུ་བྲོས་ཕྱིན་པ་ཡིན་ན། དེ་ནི་ཐབས་ལམ་ལེགས་ཤོས་ཤིག་ཡོང་ངེས་ཡིན་ནོ། ས་ཨུལ་གྱིས་ཀྱང་ང་ལ་ཨིསི་རཱཨེལ་ནང་དུ་འཚོལ་རྒྱུ་སྤངས་ཤིང་། ང་ཐར་ཏེ་ཉེན་མེད་དུ་གནས་ཐུབ་ཀྱི་རེད་ཅེས་བསམ་མོ།

² དེ་ནས་དཱ་བིད་ཀྱིས་རང་གི་མི་གྲངས་ ༦༠༠ བཅས་འཁྲིད་དེ། མ་ཨོག་ཀྱི་བུ་གྷད་ཀྱི་རྒྱལ་པོ་ཨ་ཀིཤི་ཀྱི་རྩར་འཕྲལ་དུ་ཕྱིན་ནོ།

³ དཱ་བིད་དང་ཁོའི་མི་རྣམས་རང་གི་ནང་མི་དང་བཅས་པ་གྷད་དུ་གཞིས་ཆགས་ནས་བསྡད་པ་དང་། དཱ་བིད་དང་མཉམ་དུ་ཡེཛ་རིལ་ནས་ཡིན་པ་ཨ་ཧི་ནོ་ཨམ་དང་ཀར་མེལ་ནས་ཡིན་པ་ན་བྷལ་གྱི་ཡུགས་མོ་ཨ་བྷི་གེལ་བཅས་ཁོའི་ཆུང་མ་གཉིས་ཀྱང་དེར་ཡོད་པ་ཡིན་ནོ།

⁴ ས་ཨུལ་གྱིས་དཱ་བིད་གྷད་དུ་བྲོས་ཕྱིན་པའི་སྐོར་ཐོས་ནས། ཁོ་ལ་འཚོལ་རྒྱུ་དེ་འཚམས་འཇོགས་བྱས་སོ།

⁵ དེ་ནས་དཱ་བིད་ཀྱིས་ཨ་ཀིཤི་ལ། ཁྱེད་རང་ངའི་གྲོགས་པོ་ཡིན་ན། ང་སྡོད་ས་གྲོང་ཆུང་ཞིག་སྤྲོད་རོགས་གནང་། ང་ཁྱེད་དང་མཉམ་དུ་རྒྱལ་སར་སྡོད་དགོས་དོན་མི་འདུག་ཅེས་སྨྲས་པས།

⁶ ཨ་ཀིཤི་ཀྱིས་དཱ་བིད་ལ། ཛིག་ལག་གི་གྲོང་དེ་སྤྲད་པ་ཡིན་པས། དུས་སྐབས་དེ་ནས་བཟུང་སྟེ། ཛིག་ལག་གི་གྲོང་དེ་ཡ་ཧུ་དཱ་པའི་རྒྱལ་པོ་རྣམས་ལ་བདག་གི་ཡོད་པ་ཡིན་ནོ།

⁷ དཱ་བིད་ཕེ་ལེ་ཤེད་ཡུལ་དུ་ཟླ་བ་བཅུ་དྲུག་བར་དུ་བསྡད་དོ།

⁸ དུས་ཡུན་དེའི་རིང་ལ་དཱ་བིད་དང་ཁོའི་མི་ཚོས་ས་ཁུལ་དེར་དུས་ཡུན་རིང་པོ་ནས་གནས་སྡོད་བྱེད་མཁན་གྷེ་ཤུར་པ་དང་གྷིར་ཛི་པ་དང་ཨ་མ་ལེག་བཅས་ལ་འཐབ་རྒོལ་བྱས་ཏེ། ཤུར་ནས་ཨི་ཇིབ་ཀྱི་ས་མཚམས་བར་དུ་དམག་དྲངས་ཤིང་།

⁹ སྐྱེ་ཕོ་མོ་ཚང་མ་བསད་དེ། དེ་ཚོའི་ལུག་དང་། བ་ཕྱུགས། བོང་བུ་རྔ་མོང་དང་གྱོན་གོས་སོགས་ཀྱང་འཕྲོག་གི་ཡོད་དོ། དེ་ནས་ཁོ་ཨ་ཀིཤི་ཀྱི་རྩར་ལོག་ཡོང་སྐབས།

¹⁰ ཁོས་དཱ་བིད་ལ་དེ་རིང་ཁྱོད་དམག་དྲངས་ཕྱིར་གང་དུ་སོང་བ་ཡིན་ནམ་ཞེས་དྲིས་པ་དང་། དཱ་བིད་ཀྱིས་ཁོ་ཡ་ཧུ་དཱའི་ལྷོ་ཕྱོགས་སུའམ་ཡང་ན་ཡེ་རཱ་མིལ་རིགས་བརྒྱུད་ཀྱི་ས་ཁུལ་ཁག་དང་ཡང་ན་ཀེ་ནེ་པའི་སྡོད་ཡུལ་ས་ཁུལ་ཁག་ཏུ་ཕྱིན་པ་ཡིན་ཞེས་བརྗོད་ཀྱི་ཡོད་དོ།

¹¹ མི་སུའང་གསོན་པོར་ཐར་ནས་ཁོ་དང་ཁོའི་མི་ཚོས་དོན་དམ་དུ་གང་བྱས་པའི་སྐོར་གྷད་ལ་ཕྱིན་ཏེ་གནས་ཚུལ་བཤད་མ་ཐུབ་པའི་ཕྱིར། དཱ་བིད་ཀྱིས་སྐྱེ་ཕོ་མོ་གཅིག་ཀྱང་མ་ལུས་པར་ཡོངས་སུ་བསད་ཀྱི་ཡོད་དོ། དཱ་བིད་ཕེ་ལེ་ཤེད་དུ་གནས་ཡུན་རིང་ལ་ཁོས་རྒྱུན་དུ་དེ་ལྟར་བྱེད་མོད།

¹² འོན་ཀྱང་ཨ་ཀིཤི་ཀྱིས་དཱ་བིད་ལ་ཡིད་ཆེས་བྱས་པ་དང་། ཁོའི་སེམས་ལ། དཱ་བིད་ཀྱི་རང་རིགས་གཅིག་པ་ཨིསི་རཱཨེལ་པ་ཚོས་ཁོ་ལ་ཧ་ཅང་སྡང་པོ་བྱེད་ཀྱི་ཡོད་པའི་རྐྱེན་གྱིས་ཁོ་ནི་མི་ཚེ་ཧྲིལ་པོར་ངའི་ཞབས་ཞུ་བྱེད་དགོས་པ་འདུག་ཅེས་བསམ་མོ༎