ཤ་མུ་ཨེལ་དང་པོ། 26 - Tibetan Old Testament 2011

དཱ་བིད་ཀྱིས་སླར་ཡང་ས་ཨུལ་ཚེ་ཐར་བཏང་བ།

¹ ཛིཕ་ནས་མི་འགའ་ཤས་གྷི་བིི་ཨཱ་རུ་ས་ཨུལ་གྱི་རྩར་ཡོང་ནས། དཱ་བིད་ནི་ཡ་ཧུ་དཱའི་འབྲོག་སྟོང་གི་མཐའ་མཚམས་སུ་ཡོད་པའི་རི་བོ་ཧ་ཀི་ལཱ་རུ་གབ་ནས་བསྡ་ཡོད་པའི་སྐོར་བཤད་པས།

² ས་ཨུལ་གྱིས་དེ་མ་ཉིད་དུ་ཡིསི་རཱཨེལ་གྱི་དམག་མི་ལེགས་ཤོས་ ༣,༠༠༠ འཁྲིད་དེ་དཱ་བིད་འཆོལ་ཕྱིར་ཛིཕ་ཀྱི་འབྲོག་སྟོང་དུ་ཕྱིན་ཏེ།

³ རི་བོ་ཧ་ཀི་ལཱའི་ལམ་གྱི་འགྲམ་དུ་སྒར་བརྒྱབས་ནས་བསྡད་དོ། དཱ་བིད་ནི་ད་དུང་འབྲོག་སྟོང་རང་དུ་བསྡད་ཡོད་པ་ཡིན་ཏེ། ས་ཨུལ་གྱིས་ཁོ་ལ་འཚོལ་ཕྱིར་སླེབས་ཡོད་པ་དེ་ཐོས་སོ།

⁴ ཁོས་གསོ་ཉུལ་བཏང་བས། ས་ཨུལ་དངོས་གནས་དེར་སླེབས་ཡོད་པ་དེ་ཤེས་རྟོགས་བྱུང་ངོ་།

⁵ ཁོ་དེ་མ་ཐག་ཏུ་ཕྱིན་ཏེ། ས་ཨུལ་དང་ཁོའི་དམག་སྤྱི་ཨབ་ནེར་གཉིས་ས་ཕྱོགས་གང་དུ་ཉལ་གྱི་ཡོད་པ་དེ་ཤེས་རྟོགས་བྱས་སོ། ཨབ་ནེར་ནི་ནེར་གྱི་བུ་ཡིན་ནོ། ས་ཨུལ་ནི་སྒར་གྱི་ནང་དུ་ཉལ་གྱི་ཡོད་པ་དང་ཁོའི་མི་རྣམས་ཁོའི་མཐའ་འཁོར་དུ་སྒར་བརྒྱབ་ནས་བསྡད་ཀྱི་ཡོད་པ་ཡིན་ནོ།

⁶ དེ་ནས་དཱ་བིད་ཀྱིས་ཧི་ཏི་པ་ཨ་ཧི་མེ་ལེག་དང་ཡོ་ཨབ་ཀྱི་སྤུན་ཨ་བྷི་ཤེེ་(དེ་གཉིས་ཀྱི་ཨ་མ་ཛེ་རུ་ཡཱ་ཡིན་ཅིང་།) དེ་གཉིས་ལ། ད་ཁྱོད་གཉིས་ཀྱི་ནང་ནས་སུ་ང་དང་མཉམ་དུ་ས་ཨུལ་གྱི་སྒར་སར་འགྲོའམ་ཞེས་དྲིས་པའི་ལན་དུ། ཨ་བྷི་ཤེས་ང་འགྲོ་གི་ཡིན་ཞེས་སྨྲས་པས།

⁷ མཚན་མོ་དེར་དཱ་བིད་དང་ཨ་བྷི་ཤེ་གཉིས་ས་ཨུལ་གྱི་སྒར་གི་ནང་དུ་འཛུལ་བ་དང་། ས་ཨུལ་ནི་སྒར་གྱི་དབུས་སུ་ཉལ་ཡོད་ཅིང་། ཁོའི་མདུང་ནི་ཁོའི་ཉེ་འགྲམ་དུ་ས་ལ་བཙུགས་ཡོད་པ་དང་། ཨབ་ནེར་དང་དམག་མི་གཞན་རྣམས་ཁོའི་མཐར་འཁོར་དུ་ཉལ་ཡོད་དོ།

⁸ དེ་ནས་ཨ་བྷི་ཤེས་དཱ་བིད་ལ། དོ་དགོང་གཙོ་བོ་དཀོན་མཆོག་གིས་ཁྱེད་ཀྱི་དགྲ་བོ་དེ་ཁྱེད་ཀྱི་ཕྱག་འོག་ཏུ་གནང་བཞག། དེ་བས་ན་ང་ལ་ཁོའི་མདུང་དེས་ཞུས་ཐེངས་གཅིག་རང་དུ་ཁོ་དང་ཆབས་ཅིག་ས་ཁར་བཙུགས་བཅུག་པ་གནང་རོགས་གནང་། ངས་ཐེངས་གཉིས་ཞུས་དགོས་པ་མེད་ཅེས་སྨྲས་མོད།

⁹ འོན་ཀྱང་དཱ་བིད་ཀྱིས། ཁྱོད་ཀྱིས་ཁོང་ལ་གནོད་འཚེ་གང་ཡང་བྱེད་མི་ཆོག གཙོ་བོ་དཀོན་མཆོག་གིས་འདེམས་བསྐོས་མཛད་པའི་རྒྱལ་པོར་སུས་གནོད་འཚེ་བྱས་པ་ཡིན་ན། དེ་ལ་ཁོང་གིས་ཉེས་ཆད་གཏོང་བར་ངེས་སོ།

¹⁰ དཱ་བིད་ཀྱིས་མུ་མཐུད་ནས་སྨྲས་པ། སྐུ་གསོན་པོར་བཞུགས་པའི་གཙོ་བོ་དཀོན་མཆོག་གི་མཚན་གྱི་ངང་དུ་ངས་བརྗོད་རྒྱུར། གཙོ་བོ་དཀོན་མཆོག་རང་ཉིད་ཀྱིས་ཁོང་ལ་དཀྲོང་པ་གནང་རྒྱུ་དང་། དེ་མིན་ཁོང་གི་འདས་དུས་རན་ཏེ། རང་བཞིན་གྱིས་འདས་རྒྱུ་ཡིན་པ་དང་། ཡང་ན་དམག་སར་འདས་གྲོངས་སུ་འགྱུར་རྒྱུ་ཡིན་ནོ།

¹¹ གཙོ་བོ་དཀོན་མཆོག་གིས་འདེམས་བསྐོས་མཛད་པའི་རྒྱལ་པོར་ངས་གནོད་འཚེ་ཞུ་རྒྱུ་ལས་ཁོང་གིས་ང་ལ་བཀག་བྱ་གནང་བར་ཤོག ད་ང་ཚོ་ཁོང་གི་མདུང་དང་ཆུ་སྣོད་དེ་འཁྱེར་ནས་འགྲོའོ།

¹² དེ་རྗེས་དཱ་བིད་ཀྱིས་ས་ཨུལ་གྱི་མགོའི་འཁྲིས་ནས་མདུང་དང་ཆུ་སྣོད་དེ་བླངས་ནས། ཁོ་དང་ཨ་བྷི་ཤེ་གཉིས་དེ་ནས་ཕྱིན་པས། དེར་གནས་ཚུལ་གང་བྱུང་སྐོར་སུས་ཀྱང་མཐོང་ཐོས་བྱས་མ་ཐུབ་བོ། གང་ལགས་ཟེར་ན། དེ་ཚོ་ཚང་མ་གཉིད་ལྗིད་པོ་ཁུག་ཡོད་ཅིང་། གཙོ་བོ་དཀོན་མཆོག་གིས་དེ་ཚོ་ཚང་མ་གཉིད་ལྗིད་པོ་ཁུག་བཅུག་གནང་ཡོད་པ་ཡིན་ནོ།

¹³ དེ་ནས་དཱ་བིད་ཀྱིས་ལུང་གཤོང་ཕར་ཕྱོགས་ཀྱི་རི་རྩེ་ཞིག་ཏུ་འཛེགས་ཏེ་རྒྱང་ཚད་རིང་པོ་ཞིག་ནས་སྐད་འབོད་ཆེན་པོས།

¹⁴ ས་ཨུལ་གྱི་དམག་མི་དང་ཨབ་ནེར་ལ། ཀྱེ་ཨབ་ནེར། ངས་སྐད་འབོད་བྱས་པ་དེ་གོ་གིན་འདུག་གམ་ཞེས་དྲིས་པ་དང་། ཨབ་ནེར་གྱིས། དེ་བཞིན་སྐད་འབོད་བརྒྱབ་ནས་རྒྱལ་པོའི་མནལ་དཀྲོག་ཐབས་བྱེད་མཁན་དེ་སུ་ཡིན་ནམ་ཞེས་སྨྲས་པར།

¹⁵ དཱ་བིད་ཀྱིས་ལན་དུ། ཀྱེ་ཨབ་ནེར་ཁྱོད་ནི་ཨིསི་རཱཨེལ་གྱི་ནང་ནས་སྐྱེ་བོ་མངའ་ཐང་ཆེ་ཤོས་དེ་མ་ཡིན་ནམ། དེ་ལྟར་ཡིན་ན་ཁྱོད་ཀྱིས་རང་གི་སྦྱིན་བདག་གམ་རྒྱལ་པོར་སྲུང་སྐྱོབ་མ་བྱས་པ་དེ་གང་ཡིན་ནམ། ད་ལྟ་རང་ཁྱོད་ཀྱི་སྦྱིན་བདག་ལ་སྲོག་སྐྱོན་གཏོང་ཕྱིར་མི་ཞིག་སྒར་གྱི་ནང་དུ་འཛུལ་ཕྱིན་པ་ཡིན་པས།

¹⁶ ཨབ་ནེར་ཁྱོད་ཀྱིས་རང་གི་ལས་འགན་དེ་སྒྲུབ་མ་ཐུབ་པ་ཡིན་ནོ། ངས་སྐུ་གསོན་པོར་བཞུགས་པའི་གཙོ་བོ་དཀོན་མཆོག་གི་མཚན་གྱི་ངང་མནའ་བསྐྱེལ་ནས་བརྗོད་རྒྱུར། ཁྱོད་ཚོ་ཚང་མ་ཉེས་པ་སྲོག་ཐོག་ཏུ་གཏོང་འོས་པ་ཡིན། གང་ལགས་ཟེར་ན། གཙོ་བོ་དཀོན་མཆོག་གིས་འདེམ་བསྐོས་མཛད་པའི་རྒྱལ་པོར་ཁྱོད་ཚོས་སྲུང་སྐྱོབ་བྱས་མ་ཐུབ་པས་ཕྱིར་རོ། ད་རྒྱལ་པོའི་མདུང་དང་ཁོང་གི་དབུའི་འགྲམ་དུ་ཡོད་པའི་ཆུ་སྣོད་དེ་ག་པར་ཡོད་དམ་ཞེས་སྨྲས་སོ།

¹⁷ ས་ཨུལ་གྱིས་དཱ་བིད་ཀྱི་སྐད་ངོ་ཤེས་ནས། ཀྱེ་དཱ་བིད་ངའི་བུ། དེ་ཁྱོད་རང་ཡིན་ནམ་ཞེས་སྨྲས་པས། དཱ་བིད་ཀྱིས་ལན་དུ། ཀྱེ་མི་དབང་ཆེན་པོ་ང་ཡིན།

¹⁸ ང་སྐུ་ཉིད་ཀྱི་ཞབས་ཏོག་པར་ད་དུང་ཅིའི་ཕྱིར་རྗེས་དེད་གནང་གི་ཡོད་དམ། ངས་ཁྱེད་ལ་ཁྲིམས་འགལ་ག་རེ་བྱས་བྱུང་ངམ།

¹⁹ ཀྱེ་མི་དབང་ཆེན་པོ། ངས་གང་ཞུས་པར་གསན་དུ་གསོལ། གལ་སྲིད་གཙོ་བོ་དཀོན་མཆོག་གིས་ཁྱེད་ལ་ངའི་རྒྱབ་འགལ་གནང་དུ་བཅུག་པ་ཡིན་ན། ཁོང་ལ་མཆོད་པ་ཞིག་འབུལ་ནས་ཁོང་གིས་ཐུགས་འགྱུར་བར་སྲིད་མོད། འོན་ཀྱང་མིས་ཁྱེད་ལ་དེ་ལྟར་གནང་བཅུག་པ་ཡིན་ན། གཙོ་བོ་དཀོན་མཆོག་གི་དམོད་པ་དེ་ཁོ་ཚོའི་ཐོག་ཏུ་འབབ་པར་ཤོག གང་ལགས་ཟེར་ན། ཁོ་ཚོས་གཙོ་བོ་དཀོན་མཆོག་བཞུགས་ཡོད་པའི་ཡུལ་ནས་ང་ལ་ཕྱིར་བཏོན་བྱས་ཏེ། ཕྱི་པའི་ལྷ་རྟེན་ལ་མཆོད་པའི་ཡུལ་ཞིག་ཏུ་ཕྱིར་འདེད་བྱས་བྱུང་།

²⁰ ང་ལ་གཙོ་བོ་དཀོན་མཆོག་གི་སྤྱན་སྔ་ནས་ཐག་རིང་ཕྱི་རྒྱལ་བའི་ས་ཁུལ་ཞིག་ཏུ་གསོད་མ་བཅུག་རོགས་གནང་། ཨིསི་རཱཨེལ་གྱི་རྒྱལ་པོས་ང་ལྟ་བུའི་ཁྱི་ཤིག་དང་མཚུངས་པའི་སྐྱེ་བོ་ཞིག་གསོད་ཕྱིར་ཕེབས་དགོས་པ་དང་། ཁོང་གིས་ང་ལ་ནགས་ཀྱི་འདབ་ཆགས་སོགས་ལ་ཁྱི་ར་བརྒྱབ་པ་བཞིན་ངའི་རྗེས་འདེད་གནང་དགོས་པ་དེ་གང་ཡིན་ནམ་ཞེས་ཞུས་པས།

²¹ ས་ཨུལ་གྱི་ལན་དུ། ངས་ནོར་འཁྲུལ་བྱས་བཞག། ངའི་བུ་དཱ་བིད་ད་ཚུར་ཤོག་དང་། ངས་ཁྱོད་ལ་ཡང་སྐྱར་གནོད་འཚེ་བྱེད་མི་ཡོང་། གང་ལགས་ཟེར་ན། དོ་དགོང་ཁྱོད་ཀྱིས་ངའི་སྲོག་སྐྱབས་ནས་ཚེ་ཐར་བཏང་ཡོད། ངས་ནི་མི་ལྐུག་པའི་ལས་ཀ་ཐབས་སྡུག་ཞིག་བྱས་ཏེ་ནོར་འཁྲུལ་ཆེན་པོ་བྱས་བཞག་ཅེས་སྨྲས་པ་དང་།

²² དེའི་ལན་དུ་དཱ་བིད་ཀྱིས། ཀྱེ་མི་དབང་ཆེན་པོ་ཁྱེད་ཀྱི་མདུང་དེ་འདིར་ཡོད། འདི་ལེན་པའི་ཕྱིར་མི་ཞིག་གཏོང་རོགས་གནང་།

²³ གཙོ་བོ་དཀོན་མཆོག་གིས་དྲང་བདེན་ཚུལ་མཐུན་རྣམས་ལ་བྱ་དགའ་གནང་ངེས་ཤིང་། དེ་རིང་ཁོང་གིས་ཁྱེད་ངའི་དབང་འོག་ཏུ་བཅུག་པ་གནང་བ་ཡིན་ནའང་། སྐུ་ཉིད་གཙོ་བོ་དཀོན་མཆོག་གིས་བསྐོས་གནང་མཛད་པའི་རྒྱལ་པོ་ཡིན་པས། ངས་ཁྱེད་ལ་གནོད་འཚེ་མ་ཞུས་པ་ཡིན།

²⁴ དེ་རིང་ངས་ཁྱེད་ལ་ཚེ་ཐར་བཏང་བ་བཞིན། གཙོ་བོ་དཀོན་མཆོག་གིས་ཀྱང་ང་ལ་དེ་བཞིན་གནང་ནས་དཀའ་ངལ་ཀུན་ལས་གྲོལ་བར་མཛད་པར་ཤོག་ཅེས་སྨྲས་སོ།

²⁵ ས་ཨུལ་གྱིས་དཱ་བིད་ལ། ཀྱེ་ངའི་བུ་དཀོན་མཆོག་གིས་ཁྱོད་ལ་བྱིན་གྱིས་རློབས་པར་ཤོག ཁྱོད་ཀྱི་བྱ་བ་ལས་དོན་ཀུན་ལ་ལམ་འགྲོ་བཟང་པོ་ཡོང་གི་རེད་ཅེས་སྨྲས་སོ། དེ་རྫེས་དཱ་བིད་རང་གི་ལམ་དུ་ཕྱིན་པ་དང་། ས་ཨུལ་ཡང་རང་གི་ཁང་ཁྱིམ་དུ་ཕྱིར་ལོག་བྱས་སོ༎