ཤ་མུ་ཨེལ་དང་པོ། 24 - Tibetan Old Testament 2011

དཱ་བིད་ཀྱིས་ས་ཨུལ་ཚེ་ཐར་བཏང་བ།

¹ ས་ཨུལ་ནི་ཕེ་ལེ་ཤེད་པ་རྣམས་དང་དམག་འཐབ་ནས་ཕྱིར་ལོག་ཡོང་བ་དང་། དཱ་བིད་ནི་ས་གནས་ཨེན་གྷེ་ཌིའི་ཉེ་འགྲམ་གྱི་འབྲོག་སྟོང་དུ་ཡོད་པའི་སྐོར་ཐོས་སོ།

² ས་ཨུལ་གྱིས་ཨིསི་རཱཨེལ་གྱི་དམག་མི་ལེགས་ཤོས་ ༣,༠༠༠ འཁྲིད་ནས་དཱ་བིད་དང་ཁོའི་མི་རྣམས་འཚོལ་ཕྱིར་ར་རྒོད་བྲག་རིའི་ཤར་ཕྱོགས་སུ་ཕྱིན་པ་དང་།

³ ས་ཨུལ་ལམ་གྱི་ཟུར་དུ་ཡོད་པའི་ལུག་རའི་ཉེ་འགྲམ་གྱི་བྲག་ཕུག་ཞིག་གི་ནང་དུ་གསང་སྤྱོད་བྱེད་ཕྱིར་སོང་སོ། དཱ་བིད་དང་ཁོའི་མི་རྣམས་ཀྱང་བྲག་ཕུག་དེ་གའི་ནང་ལོགས་སུ་གབ་ནས་བསྡད་ཡོད་དོ།

⁴ དེ་ཚོས་དཱ་བིད་ལ། ད་ལན་ཁྱེད་རང་ལ་གོ་སྐབས་ཡག་པོ་ཞིག་རྙེད་བཞག། ཁྱེད་ལ་གཙོ་བོ་དཀོན་མཆོག་གིས་ཉིད་ཀྱི་དགྲ་བོ་དེ་ཉིད་ཀྱི་དབང་འོག་ཏུ་གནང་གི་ཡིན་ཞེས་གསུངས་ཡོད་པ་ཡིན་ནོ། ད་ཁོ་ལ་ཉིད་ཀྱི་ཐུགས་འདོད་བཞིན་དུ་གནང་ཆོག་པ་ཡིན་ནོ་ ཞེས་ཞུས་པ་དང་། དཱ་བིད་རྒྱབ་སྒུར་ནས་ཕྱིན་ཏེ། ས་ཨུལ་གྱིས་མ་ཤེས་པར་ཁོའི་གོས་ཀྱི་སྣེ་མོ་ཞིག་བྲེག་མོད།

⁵ འོན་ཀྱང་སྐབས་དེར་དཱ་བིད་ཀྱིས་སེམས་མ་སྐྱིད་པར་བྱུང་སྟེ།

⁶ ཁོས་རང་གི་མི་རྣམས་ལ། ས་ཨུལ་ནི་དཀོན་མཆོག་གིས་རྒྱལ་པོར་བསྐོས་གནང་མཛད་པ་ཡིན་པ་དང་། ཁོང་ནི་ངའི་སྦྱིན་བདག་ཀྱང་ཡིན་པས། ངས་ཁོང་ལ་གནོད་འཚེ་བྱེད་པ་ལས་གཙོ་བོ་དཀོན་མཆོག་གིས་ང་ལ་སྐྱོབ་པར་ཤོག ཁོང་ནི་གཙོ་བོ་དཀོན་མཆོག་གིས་འདེམས་བསྐོས་གནང་བའི་རྒྱལ་པོ་ཡིན་པས། ངས་ཁོང་ལ་རྩ་བ་ནས་གནོད་འཚེ་བྱེད་མི་རུང་ཞེས་བརྗོད་དོ།

⁷ དེར་བརྟེན་རང་གི་མི་རྣམས་ཀྱིས་ས་ཨུལ་ལ་འཐབ་རྒོལ་མི་བྱེད་པའི་སློབ་གསོ་བྱས་པ་དང་། ས་ཨུལ་ཡར་ལངས་ནས་བྲག་ཕུག་ནས་ཐོན་ཏེ་རང་གི་ལམ་དུ་ཕྱིན་ནོ།

⁸ དེ་ནས་དཱ་བིད་ཀྱང་ཁོའི་རྗེས་སུ་ཕྱིན་ནས། ཀྱེ་མི་དབང་ཆེན་པོ་ཞེས་སྐད་འབོད་བྱས་པས། ས་ཨུལ་གྱིས་རྒྱབ་འགྱུར་ནས་བལྟས་པས། དཱ་བིད་ཀྱིས་གུས་ཞབས་ཆེན་པོས་ས་ལ་མགོ་སྒུར་ཞིང་སྨྲས་པ།

⁹ ངས་ཁྱེད་ལ་གནོད་འཚེ་བྱེད་ཀྱི་འདུག་ཅེས་ཟེར་མཁན་མི་ཚོའི་གཏམ་ལ་ཅིའི་ཕྱིར་གསན་ནམ།

¹⁰ གཙོ་བོ་དཀོན་མཆོག་གིས་ཁྱེད་ནི་ངའི་དབང་འོག་ཏུ་གནང་ཡོད་པ་དེ་ད་ལྟ་ཁྱེད་ཀྱིས་མཁྱེན་པ་ཡོད། ངའི་མི་འགའ་ཤས་ཀྱིས་ཁྱེད་རང་གསོད་དགོས་ཅེས་ལབ་མོད། འོན་ཀྱང་ངས་ཁྱེད་ལ་སྙིང་རྗེ་བསྐྱེད་ནས་ཁྱེད་ལ་གནོད་འཚེ་རྩ་བ་ནས་བྱེད་མ་བཅུག་པ་དང་། ཁྱེད་ནི་གཙོ་བོ་དཀོན་མཆོག་གིས་བསྐོས་གནང་མཛད་པའི་རྒྱལ་པོ་ཞིག་རེད་ཅེས་ལབ་པ་ཡིན།

¹¹ ཀྱེ་ངའི་ཡབ་ལགས། ངའི་ལག་པར་ཡོད་པའི་ཁྱེད་ཀྱི་ན་བཟའི་དུམ་བུ་འདི་ལ་གཟིགས་དང་། སྐབས་དེར་ངས་ཁྱེད་ལ་བཀྲོང་ཐུབ་པ་ཡོད། འོན་ཀྱང་ངས་དེ་ལྟར་མ་བྱས་པར་ཁྱེད་ཀྱི་ན་བཟའི་སྣེ་མོ་འདི་བྲེག་པ་ཡིན། ངས་དེ་ལྟར་བྱས་དགོས་དོན་ནི། ཁྱེད་ལ་ངོ་ལོག་དང་གནོད་འཚེ་ཞུ་རྒྱུའི་བསམ་བློ་མེད་པ་དེར། སྐུ་ཉིད་ཀྱི་ཐུགས་ཡིད་དངས་དགོས་པ་ཞུ་བའི་ཕྱིར་ཡིན་ནོ། ངས་ཁྱེད་ལ་ནོར་འཁྲུལ་གང་ཡང་ཞུས་མེད། འོན་ཀྱང་ཁྱེད་ཀྱིས་ང་ལ་གསོད་ཕྱིར་རྒྱུན་དུ་འཚོལ་ཞིབ་གནང་མུས་ཡིན།

¹² ཁྱེད་དང་ང་གཉིས་སུ་ལ་ནོར་འཁྲུལ་ཡོད་མེད་སྐོར་གཙོ་བོ་དཀོན་མཆོག་རང་གིས་ཁྲིམས་གཅོད་གནང་བར་ཤོག ཁྱེད་ཀྱིས་ང་ལ་རྒྱབ་འགལ་གང་གནང་བའི་སྐོར་ལའང་ཁོང་གིས་ཉེས་ཆད་གནང་བར་ཤོག ངས་ཁྱེད་ལ་ངན་ལན་འཇལ་ཏེ་གནོད་འཚེ་རྩ་བ་ནས་ཞུ་མི་ཡོང།

¹³ སྔར་གྱི་ཁ་རྒྱུན་རྙིང་པ་ལྟར། མི་ངན་རྒྱུད་ནས་ལས་ངན་སྐྱེས་ཞེས་པ་དེ་ཁྱེད་ཀྱིས་མཁྱེན་གསལ་ལྟར། ངས་ཁྱེད་ལ་ནམ་ཡང་གནོད་འཚེ་ཞུ་མི་ཡོང་།

¹⁴ གཟིགས་དང་། ཨིསི་རཱཨེལ་གྱི་རྒྱལ་པོས་གསོད་ཐབས་གནང་ཕྱིར་རྗེས་དེད་གནང་བཞིན་པ་དེ་སུ་ཡིན་ནམ། འཆི་བའི་ཁྱི་ཞིག་གམ་ཁྱི་ཤིག་ལྟ་བུའི་མ་ཡིན་ནམ།

¹⁵ ང་གཉིས་སུ་ལ་ནོར་འཁྲུལ་ཡོད་མེད་དེ་གཙོ་བོ་དཀོན་མཆོག་རང་གིས་ཁྲིམས་གཅོད་དང་ཐག་གཅོད་གནང་ཡོང་། ཁོང་གིས་དོན་གནད་འདིའི་སྐོར་དགོངས་བཞེས་ཀྱིས་ང་ལ་རྒྱབ་སྐྱོར་གནང་ཞིང་། ང་ཁྱེད་ཀྱི་ལག་ནས་སྲུང་སྐྱོབ་མཛད་པར་ཤོག་ཅེས་སྨྲས་སོ།

¹⁶ དེ་ནས་དཱ་བིད་ཀྱིས་གཏམ་གླེང་བྱས་ཟིན་མ་ཐག་ཏུ་ས་ཨུལ་གྱིས། ཀྱེ་དཱ་བིད་ངའི་བུ། ང་དང་གཏམ་གླེང་བྱེད་མཁན་དེ་ནི་དངོས་གནས་ཁྱེད་རང་ཡིན་ནམ་ཞེས་སྨྲས་ནས། ངུ་རྒྱུ་འགོ་ཚུགས་པ་དང་།

¹⁷ དེ་ནས་ཁོས་དཱ་བིད་ལ། ཁྱོད་ནི་དྲང་ཞིང་བདེན་ཏེ་ངས་ནོར་འཁྲུལ་ཁོ་ན་བྱས་བཞག། ངས་ཁྱོད་ལ་ཚུལ་མིན་དེ་ལྟར་བྱས་ནའང་ཁྱོད་ཀྱིས་ང་ལ་བཟང་པོ་ཤ་ལྟག་བྱས་བྱུང་།

¹⁸ ཁྱོད་ཀྱིས་ང་ལ་བཟང་པོ་ཇི་ཙམ་བྱེད་ཀྱི་ཡོད་པ་དེ། དེ་རིང་ཁྱོད་ཀྱིས་དངོས་སུ་བསྟན་བྱུང་། གང་ལགས་ཟེར་ན། གཙོ་བོ་དཀོན་མཆོག་གིས་ང་ཁྱོད་ཀྱི་དབང་འོག་ཏུ་གནང་བ་ཡིན་ནའང་ཁྱོད་ཀྱིས་ང་བསད་མ་བྱུང་།

¹⁹ མི་ཞིག་གིས་རང་གི་དགྲ་བོར་ལག་པར་འཐེབ་ནས་ཁོས་ལ་གནོད་འཚེ་གང་ཡང་མ་བྱས་པར་དེ་མུར་གཏོང་སྲིད་དམ། དེ་རིང་ཁྱོད་ཀྱིས་ང་ལ་སྤྱོད་བཟང་གང་བསྟན་པ་དེ་ལ་གཙོ་བོ་དཀོན་མཆོག་གིས་བྱིན་རླབས་གནང་བར་ཤོག

²⁰ ད་ཁྱོད་ཨིསི་རཱཨེལ་གྱི་རྒྱལ་པོར་འཁོད་དེ། ཁྱོད་ཀྱི་སྲིད་སྐྱོང་འོག་ཏུ་རྒྱལ་ཁབ་འདི་མུ་མཐུད་ཀྱིས་གནས་རྒྱུ་ཡིན་པ་དེ་ང་ལ་ཡིད་ཆེས་གཙང་མ་ཡོད།

²¹ འོན་ཀྱང་ངའི་ཁྱིམ་ཚང་གི་མིང་བཤུལ་དེ་རྩ་བ་ནས་མ་བརླག་པའི་ཕྱིར། ཁྱོད་ཀྱིས་ངའི་མི་བརྒྱུད་རྣམས་ལ་ཚེ་ཐར་གཏོང་གི་ཡིན་ཞེས་གཙོ་བོ་དཀོན་མཆོག་གི་མཚན་གྱི་ངང་དུ་དམ་བཅའ་བྱེད་དགོས་ཅེས་སྨྲས་པ་དང་།

²² དཱ་བིད་ཀྱིས་དེ་ལྟར་བྱེད་རྒྱུའི་དམ་བཅའ་བྱས་སོ། དེ་རྗེས་ས་ཨུལ་ནི་རང་གི་ཁང་ཁྱིམ་དུ་ལོག་ཕྱིན་པ་དང་། དེ་བཞིན་དཱ་བིད་དང་ཁོའི་མི་རྣམས་ཀྱང་སོ་སོའི་གབ་སའི་གནས་དེར་ཕྱིན་ནོ༎