ཤ་མུ་ཨེལ་དང་པོ། 23 - Tibetan Old Testament 2011

དཱ་བིད་ཀྱིས་གྲོང་ཁྱེར་ཀི་ལཱ་སྐྱབས་པ།

¹ ཕེ་ལེ་ཤེད་པ་ཚོས་ཀི་ལཱའི་གྲོང་ཁྱེར་ལ་འཐབ་རྒོལ་བྱས་ཤིང་། གསར་དུ་རྔས་པའི་སྟོན་ཐོག་རྣམས་འཕྲོག་བཅོམ་བྱེད་བཞིན་ཡོད་པའི་སྐོར་དཱ་བིད་ཀྱིས་ཐོས་སོ།

² དེར་བརྟེན་གཙོ་བོ་དཀོན་མཆོག་ལ། ངས་ཕེ་ལེ་ཤེད་པ་ཚོར་ཕར་རྒོལ་བྱས་པར་འགྲོ་ཆོག་གམ་ཞེས་བཀའ་འདྲི་ཞུས་པའི་ལན་དུ། གཙོ་བོ་དཀོན་མཆོག་གིས། ཁྱོད་ཀྱིས་དེ་ཚོ་ཕར་རྒོལ་བྱས་ཏེ་ཀི་ལཱའི་གྲོང་ཁྱེར་དེ་སྐྱབས་པར་བྱོས་ཤིག་ཅེས་གསུངས་སོ།

³ འོན་ཀྱང་དཱ་བིད་ཀྱི་མི་ཚོས་ཁོ་ལ། ང་ཚོ་འདིར་ཡ་ཧུ་དཱ་རང་དུ་འཇིགས་ནས་སྡོད་དགོས་ཀྱི་འདུག་པས། དེའི་ཁར་ང་ཚོ་ཀི་ལཱར་ཕྱིན་ནས་ཕེ་ལེ་ཤེད་པའི་དམག་དཔུང་ལ་ཕར་རྒོལ་བྱེད་དགོས་བྱུང་ན། ང་ཚོས་གནས་སྟངས་དེ་སྔར་ལས་སྡུག་ཏུ་འགྲོ་གི་རེད་ཅེས་སྨྲས་སོ།

⁴ དེ་ནས་དཱ་བིད་ཀྱིས་གཙོ་བོ་དཀོན་མཆོག་ལ་ཡང་སྐྱར་བཀའ་འདྲི་ཞུས་པ་དང་། གཙོ་བོ་དཀོན་མཆོག་གིས་ཁོ་ལ། ཀི་ལཱར་འཐབ་རྒོལ་བྱེད་ཕྱིར་སོང་ཞིག་དང་། ངས་ཁྱོད་ལ་ཕེ་ལེ་ཤེད་པའི་ཐོག་ཏུ་རྒྱལ་ཁ་སྤྲོད་རྒྱུ་ཡིན་ཞེས་གསུངས་པ་བཞིན།

⁵ དཱ་བིད་དང་ཁོའི་མི་ཚོས་ཀི་ལཱ་རུ་ཕྱིན་ནས་ཕེ་ལེ་ཤེད་པ་རྣམས་དང་ཕར་རྒོལ་བྱས་ཏེ་མི་ཚོགས་མང་པོ་བསད་ཅིང་། དེ་ཚོའི་ཕྱུགས་ཟོག་ཀྱང་འཕྲོག་གོ། དེ་བཞིན་དཱ་བིད་ཀྱིས་གྲོང་ཁྱེར་དེ་སྐྱབས་སོ།

⁶ སྐབས་དེར་ཨ་ཧི་མེ་ལེག་གི་བུ་ཨ་བྷི་ཡ་ཐར་བྲོས་ནས་ཀི་ལཱ་རུ་དཱ་བིད་ཀྱི་ཁོངས་སུ་འགྲོ་སྐབས། ཁོས་རང་དང་མཉམ་དུ་ཨེ་ཕོད་ཀྱང་འཁྱེར་ནས་ཕྱིན་ནོ།

⁷ དེ་ནས་དཱ་བིད་ཀི་ལཱར་ཕྱིན་པའི་སྐོར་ས་ཨུལ་ལ་སྨྲས་པས། ཁོས་བརྫོད་གསལ། ད་དཀོན་མཆོག་གིས་ཁོ་ངའི་དབང་འོག་ཏུ་གནང་བཞག། དཱ་བིད་ནི་ལྕགས་རིས་ལྡན་པའི་གྲོང་ཁྱེར་དང་། སྲུང་ཆ་བརྟན་པོར་བྱས་པའི་རྒྱལ་སྒོའི་ནང་ཕྱིན་ནས་རང་ཉིད་རྙི་ཐག་ནང་ཚུད་པ་ལྟ་བུ་ཞིག་བྱུང་བཞག།

⁸ དེ་བས་ན། ས་ཨུལ་གྱིས་རང་གི་དམག་མི་རྣམས་བཀོང་སྟེ། དཱ་བིད་དང་ཁོའི་མི་རྣམས་འཛིན་བཟུང་བྱེད་ཕྱིར་ཀི་ལཱ་རུ་བཏང་ངོ་།

⁹ ས་ཨུལ་གྱིས་དཱ་བིད་ལ་འཐབ་རྒོལ་བྱེད་རྩིས་བྱས་པའི་སྐོར་དཱ་བིད་ཀྱིས་ཤེས་མ་ཐག་ཁོས་བླ་མ་ཨ་བྷི་ཡ་ཐར་ལ་ཨེ་ཕོད་འདིར་འཁྱེར་ཤོག་ཅེས་སྨྲས་སོ།

¹⁰ དེ་ནས་ཡང་དཱ་བིད་ཀྱིས། ཀྱེ་ཨིསི་རཱཨེལ་གྱི་གཙོ་བོ་དཀོན་མཆོག། ས་ཨུལ་ཀི་ལཱར་ཡོང་ནས་ང་ཁྱེད་ཀྱི་ཞབས་ཏོག་པའི་རྐྱེན་གྱིས་གྲོང་ཁྱེར་འདི་མེད་པར་བཟོ་རྒྱུའི་འཆར་གཞི་གཏིང་ཡོད་པའི་སྐོར་ལ་ངས་གོ་ཐོས་བྱུང་བས།

¹¹ ད་ཀི་ལཱའི་ཡུལ་མི་རྣམས་ཀྱིས་ང་ས་ཨུལ་གྱི་ལག་ཏུ་རྩིས་སྤྲོད་བྱེད་དམ། ངས་ཐོས་པ་བཞིན་ས་ཨུལ་དོན་དམ་དུ་འདིར་ཡོང་རྒྱུ་ཡིན་ནམ། ཀྱེ་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་ཁྱེད་ཀྱིས་ང་ལ་བཀའ་གསལ་ངེས་པར་གནང་རོགས་གནང་ཞེས་ཞུས་པ་དང་། གཙོ་བོ་དཀོན་མཆོག་གིས་བཀའ་ལན་དུ། ས་ཨུལ་ཡོང་གི་རེད་ཅེས་བཀའ་གནང་བས།

¹² སླར་ཡང་དཱ་བིད་ཀྱིས། ཀི་ལཱའི་ཡུལ་མི་ཚོས་ང་དང་ངའི་མི་རྣམས་ས་ཨུལ་གྱི་ལག་ཏུ་རྩིས་སྤྲོད་བྱེད་དམ་ཞེས་བཀའ་འདྲི་ཞུས་པ་དང་། དེར་གཙོ་བོ་དཀོན་མཆོག་གིས་དེ་ཚོས་རྩིས་སྤྲོད་བྱེད་པར་འགྱུར་ཞེས་བཀའ་ལན་གནང་ངོ་།

¹³ དེ་ནས་དཱ་བིད་དང་ཁོའི་ཁོངས་ཀྱི་མི་གྲངས་ ༦༠༠ ཙམ་ཡོད་པ་རྣམས་དེ་མ་ཐག་ཏུ་གྲོང་ཁྱེར་ཀི་ལ་སྤངས་ཏེ་བྲོས་ཕྱིན་ནོ། དེ་རྗེས་ཤ་ཨུལ་གྱིས་དཱ་བིད་ཀི་ལ་ནས་བྲོས་ཟིན་པའི་སྐོར་ཐོས་ནས་རང་གི་འཆར་གཞི་དེ་ངང་འཐེན་བྱས་སོ༎

དཱ་བིད་རི་བརྒྱུད་ཁག་ཏུ་གནས་པ།

¹⁴ དེ་ནས་དཱ་བིད་ཛིཕ་ཀྱི་ཉེ་འགྲམ་དུ་ཡོད་པའི་འབྲོག་སྟོང་ཁུལ་གྱི་རི་བརྒྱུད་དུ་གབ་ནས་བསྡད་པ་དང་། ས་ཨུལ་གྱིས་དཱ་བིད་ལ་མུ་མཐུད་ཀྱིས་འཚོལ་ཐབས་བྱས་མོད། འོན་ཀྱང་དཀོན་མཆོག་གིས་དཱ་བིད་ཁོའི་ལག་ཏུ་རྩིས་སྤྲོད་མ་གནང་ངོ་།

¹⁵ ས་ཨུལ་གྱིས་དཱ་བིད་ལ་གསོད་རྒྱུ་ཉག་ཅིག་ཡིན་པ་དེ་དཱ་བིད་ཀྱིས་ཤེས་སོ། སྐབས་དེར་དཱ་བིད་ནི་ཛིཕ་ཀྱི་ཉེ་འགྲམ་གྱི་འབྲོག་སྟོང་དུ་ཡོད་པའི་ས་གནས་ཧོ་རེཤེ་ཞེས་པར་ཡོད་པ་དང་།

¹⁶ ཡོ་ན་ཐན་ཁོའི་རྩར་ཕྱིན་ནས་ཁོ་ལ་དཀོན་མཆོག་གི་སྲུང་སྐྱོབ་གནང་རྒྱུའི་ཞལ་བཞེས་ཁག་གི་སྐོར་བཤད་དེ་ཁོ་ལ་སེམས་ཤུགས་སྦྱིན་ཏེ་སྨྲས་པ།

¹⁷ མ་འཇིགས་ཤིག། ངའི་ཡབ་ས་ཨུལ་གྱིས་ཁྱོད་ལ་གནོད་འཚེ་གང་ཡང་བྱེད་མི་ཐུབ། ཁྱེད་རང་ཨིསི་རཱཨེལ་གྱི་རྒྱལ་པོར་འཁོད་རྒྱུ་ཡིན་པ་དང་། ང་ནི་ཁྱེད་ཀྱི་འོག་ཏུ་གོ་གནས་གཉིས་པར་འཁོད་རྒྱུ་ཡིན་པ་དེ་ཁོང་གིས་གསལ་པོར་མཁྱེན་གྱི་ཡོད།

¹⁸ ཁོ་གཉིས་ཀྱི་བར་ལ་ཕན་ཚུན་མཐུན་འབྲེལ་དམ་གཙང་གི་དམ་བཅའ་ཞིག་བཞག་ནས། དཱ་བིད་ཧོ་རེཤེ་ལ་བསྡད་པ་དང་། དེ་བཞིན་ཡོ་ན་ཐན་རང་ཁྱིམ་དུ་ལོག་གོ།

¹⁹ དེ་ནས་མི་འགའ་ཤས་ཛིཕ་ནས་གྲོང་ཁྱེར་གྷི་བི་ཨཱ་རུ་ས་ཨུལ་གྱི་རྩར་ཕྱིན་ཏེ། དཱ་བིད་ནི་ཡ་ཧུ་དཱའི་ལྷོ་ཕྱོགས་ཀྱི་འབྲོག་སྟོང་དུ་རི་བོ་ཧ་ཀི་ལཱའི་སྒང་དུ་ཡོད་པའི་ང་ཚོའི་ས་ཁུལ་ཧོ་རེཤེ་ཞེས་པར་གབ་ནས་བསྡད་ཡོད་པས།

²⁰ མི་དབང་ཁྱེད་ཀྱིས་ཁོ་ལ་ཇི་ལྟར་འཛིན་བཟུང་གནང་རྒྱུའི་ཐུགས་འདོད་ཡོད་པ་དེ་ང་ཚོས་ཤེས་ཀྱི་ཡོད། དེ་བས་ན་ཁྱེད་རང་ང་ཚོའི་ས་ཁུལ་དུ་ཕེབས་རོགས་གནང་། ང་ཚོས་ཁོ་བཟུང་ནས་ཁྱེད་ཀྱི་ཕྱག་ལ་ངེས་པར་བརྩི་འབུལ་ཞུ་གི་ཡིན་ཞེས་ཞུས་པ་དང་།

²¹ དེའི་ལན་དུ་ས་ཨུལ་གྱིས། ཁྱོད་ཚོས་ང་ལ་ཧ་ཅང་བརྩེ་སེམས་བྱས་ཀྱི་ཡོད་པས། གཙོ་བོ་དཀོན་མཆོག་གིས་ཁྱོད་ཚོར་བྱིན་རླབས་གནང་བར་ཤོག

²² ད་སོང་ལ་ཁྱོད་ཚོས་ད་དུང་ཏན་ཏན་བྱས་ནས་ཁོ་ག་པར་བསྡད་ཀྱི་ཡོད་པ་དང་། དེར་སུས་ཁོ་ལ་མཐོང་བའི་སྐོར་འདྲི་རྩད་ཞིབ་པར་བྱོས་ཤིག ཁོ་ནི་ཧ་ཅང་གཡོ་སྒྱུ་ཅན་ཞིག་ཡིན་པའི་སྐོར་ངས་ཐོས་བྱུང་།

²³ ཁོ་ག་པར་གབ་ནས་བསྡད་ཀྱི་ཡོད་པ་དེ་ཏན་ཏན་འཚོལ་ནས། དེའི་སྐོར་ང་ལ་ཐད་ཀར་ལན་གཏོང་རྒྱུ་ཡོད་པ་བྱོས་ཤིག དེ་རྗེས་ང་ཁྱོད་ཚོ་དང་མཉམ་དུ་ཕྱིན་ནས། གལ་སྲིད་ཁོ་ས་ཁུལ་དེ་གར་ཡོད་པ་ཡིན་ན། ངས་ཡ་ཧུ་དཱའི་གནས་ཚང་མར་འཚོལ་དགོས་བྱུང་ནའང་། ངས་ཁོ་འཚོལ་ཏེ་རྙེད་པར་བྱེད་རྒྱུ་ཡིན་ཞེས་སྨྲས་སོ།

²⁴ དེར་བརྟེན་ཁོ་ཚོ་ཐོན་ཏེ་ས་ཨུལ་གྱི་སྔོན་དུ་ཛིཕ་ལ་ཕྱིར་ལོག་གོ དཱ་བིད་དང་ཁོའི་མི་རྣམས་ནི་ཡ་ཧུ་དཱའི་འབྲོག་སྟོང་གི་ལྷོ་ཕྱོགས་ཁུལ་དུ་ཡོད་པའི་མི་མེད་ལུང་གཤོང་ནང་མ་ཨོན་ཞེས་པའི་འབྲོག་སྟོང་ནང་དུ་བསྡད་དོ།

²⁵ ས་ཨུལ་དང་ཁོའི་མི་རྣམས་དཱ་བིད་འཚོལ་དུ་ཕྱིན་ནོ། འོན་ཀྱང་ཁོས་དེའི་སྐོར་ཤེས་ནས་མ་ཨོན་འབྲོག་སྟོང་དུ་ཡོད་པའི་བྲག་རི་ཞིག་གི་སྟེང་དུ་ཕྱིན་ཏེ་དེར་གནས་སོ། ས་ཨུལ་གྱིས་དེའི་སྐོར་ལ་ཐོས་མ་ཐག་ཏུ་དཱ་བིད་ལ་རྗེས་དེད་བྱས་ཏེ་ཕྱིན་ནོ།

²⁶ ས་ཨུལ་དང་ཁོའི་མི་རྣམས་རི་བོའི་ཕྱོགས་གཅིག་ཏུ་ཡོད་ཅིང་། དེ་བཞིན་དཱ་བིད་དང་ཁོའི་མི་རྣམས་རི་བོའི་ཕྱོགས་གཞན་དུ་ཡོད་དོ། ས་ཨུལ་དང་ཁོའི་མི་ཚོས་རྗེས་དེད་བྱས་ཏེ་འཛིན་བཟུང་བྱེད་གྲབ་ཡོད་པས། ཁོ་ཚོ་དེ་ནས་མྱུར་དུ་བྲོས་ཐབས་བྱས་སོ།

²⁷ སྐབས་དེར་བང་ཆེན་ཞིག་སླེབས་ནས་ས་ཨུལ་ལ། ཕེ་ལེ་ཤེད་པ་ཚོས་ང་ཚོའི་ཡུལ་དུ་བཙན་འཛུལ་བྱེད་ཀྱི་འདུག་པས། ཁྱེད་རང་འཕྲལ་དུ་ཕྱིར་ཕེབས་གནང་རོགས་གནང་ཞེས་སྨྲས་སོ།

²⁸ དེ་བས་ན་ས་ཨུལ་གྱིས་དཱ་བིད་ལ་རྗེས་དེད་བྱེད་རྒྱུ་དེ་མཚམས་འཇོགས་བྱས་ཏེ་ཕེ་ལེ་ཤེད་པ་ཚོར་དམག་འཐབ་བྱེད་ཕྱིར་ཕྱིན་པས། ས་གནས་དེའི་མིང་ལ་ཁ་བྲལ་རི་བོ་ཞེས་གྲགས་སོ།

²⁹ དེ་རྗེས་དཱ་བིད་ས་གནས་དེ་ནས་ཐོན་ཏེ། ཨེན་གྷེ་ཌིི་ཞེས་པའི་ས་ཁུལ་ཁག་ཏུ་ཕྱིན་ནས་དེར་གབ་ནས་བསྡད་དོ༎