ཤ་མུ་ཨེལ་དང་པོ། 22 - Tibetan Old Testament 2011

བླ་མ་རྣམས་སྡེབ་གསོད་གཏོང་བ།

¹ དཱ་བིད་གྷད་གྲོང་ཁྱེར་ནས་བྲོས་ཏེ་ཨ་དུལ་ལམ་ཞེས་པའི་གྲོང་གི་ཉེ་འགྲམ་དུ་བྲག་ཕུག་ཞིག་གི་ནང་དུ་ཕྱིན་པ་དང་། ཁོའི་སྤུན་རྣམས་དང་ནང་མི་གཞན་ཚོས་ཁོ་དེར་ཡོད་པ་ཐོས་ནས། དེ་ཚོའང་ཁོའི་རྩར་ཕྱིན་ཏེ། ཕྱོགས་སྒྲིལ་བྱས་སོ།

² དེ་བཞིན་མནར་གཅོད་ནང་དུ་ཚུད་པ་དང་བུ་ལོན་ཟུག་པ་རྣམས་དང་བློ་ཁ་མ་ཚིམས་པའི་མི་རྣམས་ཁོའི་རྩར་ཕྱིན་པས། ཁོ་ཚོ་ཁྱོན་བསྡོམས་པས་མི་གྲངས་ ༤༠༠ ཙམ་འཛོམས་པ་དང་། ཁོ་ནི་དེ་ཚོའི་འགོ་དཔོན་དུ་འགྱུར་རོ།

³ དེ་ནས་དཱ་བིད་མོ་ཨབ་ཡུལ་གྱི་ས་གནས་མིཛ་པཱ་ཞེས་པར་ཕྱིན་ནས་མོ་ཨབ་ཀྱི་རྒྱལ་པོ་ལ། དཀོན་མཆོག་གིས་ངའི་དོན་དུ་ག་རེ་གནང་རྒྱུ་ཡིན་པ་དེ་ངས་མ་ཤེས་བར་དུ། ངའི་ཕ་མ་གཉིས་འདིར་སྡོད་བཅུག་རོགས་གནང་ཞེས་ཞུས་སོ།

⁴ རང་གི་ཕ་མ་གཉིས་མོ་ཨབ་ཀྱི་རྒྱལ་པོའི་རྩར་བཞག་གོ དཱ་བིད་བྲག་ཕུག་ནང་གབ་ནས་སྡོད་ཡུན་རིང་དུ་ཁོ་ཚོ་དེར་གནས་སྡོད་བྱས་སོ།

⁵ དེ་ནས་ལུང་སྟོན་པ་གྷཌ་ནི་དཱ་བིད་ཀྱི་རྩར་སླེབས་ནས། ཁྱོད་འདིར་མ་སྡོད་པར་ཡ་ཧུ་དཱའི་ཡུལ་དུ་ལམ་སང་འགྲོ་དགོས་ཤེས་སྨྲས་པ་དང་། དཱ་བིད་དེ་ནས་ཐོན་ཏེ་ཧེ་རེད་ཀྱི་ཤིང་ནགས་ཀྱི་ཁུལ་དུ་ཕྱིན་ནོ།

⁶ ཉིན་ཅིག་ས་ཨུལ་གྷི་བི་ཨཱ་རུ་རི་ཞིག་གི་སྟེང་དུ་ཡོད་པའི་འོམ་བུའི་ཤིང་ཞིག་གི་འོག་ཏུ་ལག་པར་རང་གི་མདུང་འཁྱེར་ནས་བསྡད་ཡོད་པ་དང་། ལས་སྣེ་པ་རྣམས་ཁོའི་འཐའ་འཁོར་དུ་ལངས་ནས་བསྡད་ཡོད་པའི་སྐབས་སུ་དཱ་བིད་དང་ཁོའི་མི་རྣམས་རྙེད་པའི་སྐོར་ཞུས་སོ།

⁷ དེ་ནས་ཁོས་རང་གི་ལས་བྱེད་པ་རྣམས་ལ། ཀྱེ་བྷེན་ཡ་མིན་གྱི་མི་རྣམས་ཉོན་ཞིག། ཁྱོད་ཚོའི་སེམས་ལ་དཱ་བིད་ཀྱིས་ཁྱོད་ཚོ་ཚང་མར་ཞིང་དང་རྒུན་ཚལ་སོགས་སྤྲད་དེ་ཁྱོད་ཚོ་དམག་དཔོན་དུ་བསྐོ་གཞག་བྱེད་ཡོང་ཞེས་བསམ་གྱི་འདུག་གམ།

⁸ དེར་བརྟེན་པས་ཁྱོད་ཚོས་ང་ལ་བྱུས་ངན་བརྩོམས་ཀྱི་ཡོད་དམ། ངའི་བུས་དཱ་བིད་མཉམ་དུ་ལག་འབྲེལ་བྱས་པའི་སྐོར་ཁྱོད་ཚོ་སུས་ཀྱང་ང་ལ་ལབ་མ་བྱུང་ཁྱོད་ཚོའི་ནང་ནས་སུས་ཀྱང་ང་ལ་ཞེན་སེམས་མི་བྱེད་དོ། སོ་སོའི་མི་ཁོངས་ནས་ཡིན་པའི་དཱ་བིད་ཀྱིས་ད་ལྟ་ང་གསོད་རྒྱུའི་གོ་སྐབས་འཚོལ་བཞིན་ཡོད་པ་དང་། ངའི་བུས་ཁོ་ལ་རྒྱབ་སྐྱོར་བྱེད་ཀྱི་ཡོད་སྐོར་སུས་ཀྱང་ང་ལ་དེའི་སྐོར་ལབ་མ་བྱུང་ཞེས་སྨྲས་སོ།

⁹ ས་ཨུལ་གྱི་དཔོན་རིགས་རྣམས་དང་མཉམ་དུ་དེར་ལངས་ནས་བསྡད་ཡོད་པའི་དྷོ་ཨེག་གིས། ངས་དཱ་བིད་ལ་ས་གནས་ནོབ་ཏུ་ཨ་ཧི་ཏུབ་ཀྱི་བུ་ཨ་ཧི་མེ་ལེག་གི་རྩར་འགྲོ་གིན་ཡོད་པ་མཐོང་བྱུང་།

¹⁰ ཨ་ཧི་མེ་ལེག་གིས་གཙོ་བོ་དཀོན་མཆོག་ལ་དཱ་བིད་ཀྱིས་ག་རེ་བྱེད་དགོས་སྐོར་བཀའ་འདྲི་ཞུས་ཏེ། ཁོ་ལ་ཁ་ཟས་ཕྲན་བུ་ཞིག་དང་ཕ་ལེ་ཤེད་པ་གྷོ་ལི་ཡད་ཀྱི་རལ་གྲི་དེ་སྤྲད་སོང་ཞེས་སྨྲས་སོ།

¹¹ དེ་ནས་རྒྱལ་པོ་ས་ཨུལ་གྱིས་བླ་མ་ཨ་ཧི་མེ་ལེག་དང་ནོབ་ཏུ་བླ་མ་བྱེད་བཞིན་པའི་ཁོའི་གཉེན་མཚན་ཚང་མ་འབོད་དུ་བཏང་བས། དེ་ཚོ་ཁོའི་རྩར་ཕྱིན་ནོ།

¹² ས་ཨུལ་གྱིས་ཨ་ཧི་མེ་ལེག་ལ། ཀྱེ་ཨ་ཧི་མེ་ལེག་ཚུར་ཉོན་ཞིག་ཅེས་སྨྲས་པས། ཁོས་ང་ཁྱེད་ཀྱི་ཞབས་ཞུར་ཡོད་ཅེས་སྨྲས་སོ།

¹³ ས་ཨུལ་གྱིས་ཁོ་ལ། ཁྱོད་དང་དཱ་བིད་གཉིས་ཀྱིས་ང་ལ་བྱུས་ངན་བརྩམ་དགོས་པ་དེ་གང་ཡིན་ནམ། ཁྱོད་ཀྱིས་ཁོ་ལ་ཁ་ཟས་དང་རལ་གྲི་སྤྲད་པ་དང་། ཁོའི་དོན་དུ་དཀོན་མཆོག་ལ་བཀའ་གྲོས་ཞུ་དགོས་པ་དེ་གང་ཡིན་ནམ། ད་ཆ་ཁོས་ང་དང་རྒྱབ་འགལ་བྱས་ནས་ང་གསོད་རྒྱུའི་གོ་སྐབས་འཚོལ་བཞིན་ཡོད་ཅེས་སྨྲས་སོ།

¹⁴ དེའི་ལན་དུ་ཨ་ཧི་མེ་ལེག་གིས། དཱ་བིད་ནི་སྐུ་ཉིད་ཀྱི་ལས་དཔོན་རྣམས་ཀྱི་ཁོངས་ནས་ཀུན་ལས་ཐུགས་བློས་འཁེལ་བ་ཞིག་ཡིན་པ་དང་། ཁོང་ནི་ཁྱེད་ཀྱི་མག་པ་དང་། སྐུ་སྲུང་སྡེ་ཚོགས་ཀྱི་དམག་དཔོན་ཞིག་ཡིན་པ་དང་། ཕོ་བྲང་གི་བློན་ཚོགས་ཚང་མས་ཁོང་ལ་བརྩི་གུས་ཆེན་པོ་ཞུ་གི་ཡོད་དོ།

¹⁵ ངས་ཁོའི་དོན་དུ་དཀོན་མཆོག་ལ་བཀའ་གྲོས་ངེས་པར་ཞུས་པ་ཡིན། དེ་བཞིན་བཀའ་གྲོས་ཞུས་པ་དེ་ནི་ད་རེ་ལན་ཐེངས་དང་པོ་མ་ཡིན་མོད། ཁྱེད་ལ་བྱུས་ངན་བརྩོམ་བཞག་གསུངས་པའི་སྐོར་ལ་ཡིན་ན། མི་དབང་ཆེན་པོས་ང་དང་ངའི་ནང་མི་སུ་ལའང་སྐྱོན་བརྗོད་མ་གནང་རོགས་གནང་། དོན་གནད་དེའི་སྐོར་ངས་གང་ཡང་ཤེས་ཀྱི་མེད་ཅེས་ཞུས་པས།

¹⁶ རྒྱལ་པོས། ཨ་ཧི་མེ་ལེག་ཁྱོད་དང་ཁྱོད་ཀྱི་གཉེན་མཚན་ཚང་མ་ངེས་པར་དུ་འཆི་དགོས་ཅེས་སྨྲས་ནས།

¹⁷ རང་གི་འགྲམ་དུ་ཡོད་པའི་སྐུ་སྲུང་བ་རྣམས་ལ། གཙོ་བོ་དཀོན་མཆོག་གི་བླ་མ་རྣམས་གསོད་ཅིག གང་ལགས་ཟེར་ན། དེ་ཚོས་དཱ་བིད་དང་ངན་པ་ལག་འབྲེལ་གྱིས་བྱུས་ངན་བརྩོམ་སྟེ། ཁོ་བྲོས་ཕྱིན་པའི་སྐོར་དེ་ཚོས་ཤེས་བཞིན་དུ་ང་ལ་ལབ་མ་བྱུང་ཞེས་བརྗོད་མོད། འོན་ཀྱང་སྐུ་སྲུང་པ་ཚོས་གཙོ་བོ་དཀོན་མཆོག་གི་བླ་མ་རྣམས་གསོད་རྒྱུར་ལག་པ་མ་བརྐྱངས་སོ།

¹⁸ དེ་བས་ན་རྒྱལ་པོས་དྷོ་ཨེག་ལ་ཁོ་ཚོ་གསོད་ཅིག་སྨྲས་པ་དང་། དྷོ་ཨེག་གིས་དེ་ཚོ་ཚང་མ་བསད་དོ། དེ་ཉིན་ཁོས་ཨེ་ཕོད་འཁྱེར་འོས་པའི་བླ་མ་བརྒྱད་ཅུ་གྱ་ལྔ་བསད་དོ།

¹⁹ ས་ཨུལ་གྱིས་བླ་མའི་གྲོང་ཁྱེར་ནོབ་ཀྱི་ཡུལ་མི་སྐྱེ་ཕོ་མོ་ཚང་མ་དང་། ཕྲུ་གུ་ཆེ་ཆུང་ཀུན་དང་ཕྱུགས་ཟོག་བོང་བུ་ར་ལུག་དང་བཅས་པ་ཚང་མ་གསོད་དགོས་པའི་བཀའ་བསྒོས་བྱས་པ་བཞིན་དེ་དག་ཡོངས་སུ་སྡེབ་གསོད་བཏང་ངོ་།

²⁰ འོན་ཀྱང་ཨ་ཧི་མེ་ལེག་གི་བུའི་ཁོངས་ནས་ཨ་བྷི་ཡ་ཐར་ཞེས་པ་དེ་བྲོས་ཐར་ཏེ་དཱ་བིད་ཀྱི་ཁོངས་གཏོགས་སུ་ཕྱིན་ནོ།

²¹ དེ་ནས་ཁོས་དཱ་བིད་ལ། ས་ཨུལ་གྱིས་གཙོ་བོ་དཀོན་མཆོག་གི་བླ་མ་རྣམས་ཇི་ལྟར་བསད་པའི་སྐོར་བཤད་པས།

²² དཱ་བིད་ཀྱིས་ཁོ་ལ། དེ་ཉིན་དྷོ་ཨེག་དེར་ཡོད་པ་མཐོང་མ་ཐག་ཏུ་ངའི་སེམས་ལ། ཁོའི་གཏམ་དེ་ས་ཨུལ་ལ་ངེས་པར་ལབ་ཀྱི་རེད་ཅེས་ངས་ཤེས་བྱུང་བས། ཁྱོད་ཀྱི་གཉེན་མཚན་ཚང་མ་འཆི་དགོས་པའི་རྐྱེན་དེ་ང་རང་ཡིན།

²³ དེ་བས་ན་ཁྱོད་ང་དང་མཉམ་དུ་གནས་པར་བྱོས་ཤིག ཁྱོད་རང་འཇིགས་མི་དགོས། ས་ཨུལ་གྱིས་ང་ཚོ་གཉིས་ཀར་གསོད་འདོད་བྱེད་ནའང་ཁྱོད་རང་ང་དང་མཉམ་དུ་བསྡད་པ་ཡིན་ན། ཁྱོད་ལ་ཉེན་ཁ་གང་ཡང་བྱུང་མི་ཡོང་ཞེས་སྨྲས་སོ༎