ཤ་མུ་ཨེལ་དང་པོ། 21 - Tibetan Old Testament 2011

དཱ་བིད་ས་ཨུལ་གྱི་རྩ་ནས་བྲོས་པ།

¹ དཱ་བིད་གྲོང་ཁྱེར་ནོབ་ཏུ་བླ་མ་ཨ་ཧི་མེ་ལེག་གི་རྩར་ཕྱིན་པ་དང་། ཨ་ཧི་མེ་ལེག་ནི་ལུས་པོ་འདར་བཞིན་དཱ་བིད་ལ་ཐུག་འཕྲད་བྱེད་ཕྱིར་ཡོང་ནས་ཁོས། ཁྱེད་རང་གཅིག་པུར་འདིར་ཡོང་དགོས་དོན་གང་ཡིན་ནམ་ཞེས་དྲིས་པ་དང་།

² དཱ་བིད་ཀྱིས། ང་འདིར་རྒྱལ་པོའི་སྐུ་དོན་ཞིག་གི་ཕྱིར་ཡོང་བ་ཡིན། ཁོང་གིས་ང་འདིར་བཏང་གནང་བའི་གནད་དོན་དེ་སུ་ཞིག་ལའང་མ་ལབ་ཅེས་བཀའ་གནང་ཡོད་པ་དང་། ངས་རང་གི་མི་ཚོར་ས་ཆ་ཞིག་ཏུ་ཐུག་རྒྱུ་བྱས་ཡོད་པས།

³ ད་ཁྱེད་དང་མཉམ་དུ་ག་རེ་ཡོད་དམ། ང་ལ་བག་ལེབ་ལྔའམ་ཡང་ན་ཁྱེད་ལ་གང་ཡོད་པ་དེ་ང་ལ་གནང་རོགས་གནང་ཞེས་སྨྲས་སོ།

⁴ བླ་མས་ལན་དུ། བག་ལེབ་དམ་པ་དེ་མ་གཏོགས་བག་ལེབ་དཀྱུས་མ་ཞིག་ང་ལ་མེད། ཁྱོད་ཀྱི་མི་ཚོས་ཉེ་དུས་བུད་མེད་དང་ཆགས་སྤྱོད་བྱས་མེད་པ་ཡིན་ན་བག་ལེབ་དེ་ལས་འཁྱེར་ཆོག་པ་ཡིན་ཞེས་སྨྲས་སོ།

⁵ དཱ་བིད་ཀྱིས་ལན་དུ། ཁོ་ཚོས་དེ་འདྲ་ཏན་ཏན་བྱས་མེད། ངའི་མི་ཚོས་ལས་དོན་དཀྱུས་མ་ཞིག་གི་ཆེད་དུ་ཕྱོགས་ཐོན་བྱེད་སྐབས་ཀྱང་། རང་ཉིད་ལ་སྲོལ་བཞིན་དག་འབྱངས་བྱས་ཏེ་གཙང་མར་གནས་ཀྱི་ཡོད་པ་ཡིན་པས། ད་ལན་ང་ཚོ་དམིགས་བསལ་གྱི་ལས་དོན་ཞིག་གི་ཆེད་དུ་ཡོང་བ་ཡིན་ན། དུས་རྒྱུན་ལས་ལྷག་པར་གཙང་བར་གནས་མི་དགོས་སམ་ཞེས་སྨྲས་པ་དང་།

⁶ བླ་མས་དཱ་བིད་ལ་བག་ལེབ་དམ་པ་དེ་སྤྲད་དོ། གང་ལགས་ཟེར་ན། ཁོའི་རྩར་དཀོན་མཆོག་ལ་མཆོད་འབུལ་བྱས་པའི་བག་ལེབ་དེ་མ་གཏོགས་གཞན་ཞིག་མེད་དོ། དེ་ནི་དམ་པའི་གསོལ་ལྕོག་སྒང་དུ་བག་ལེབ་སོས་པ་ཞིག་བཞག་ནས་རྙིང་པ་མར་ཞུས་པའི་བག་ལེབ་དེ་ཁོ་ན་ཡོད་པ་ཡིན་ནོ།

⁷ (ཉིན་དེར་ས་ཨུལ་གྱི་ཕྱུགས་རྫི་གཙོ་བོ་ཨེ་དྷོམ་པ་དྷོ་ཨེག་ཟེར་བ་དེའང་དེར་ཡོད་དོ། ཁོ་ནི་མཆོད་འབུལ་ཞིག་གིས་སྐོར་ལ་དེར་སླེབས་ཡོད་པ་ཡིན་ནོ།)

⁸ དཱ་བིད་ཀྱིས་ཨ་ཧི་མེ་ལེག་ལ། ཁྱེད་ཀྱིས་ང་ལ་མདུང་ངམ་རལ་གྲི་ཞིག་གནང་རྒྱུ་མེད་དམ། རྒྱལ་པོའི་བཀའ་ཕེབས་མ་ཐག་ཏུ་ང་ཐོན་དགོས་བྱུང་བར་བརྟེན། ངས་གོ་མཚོན་སོགས་གང་ཡང་འཁྱེར་ལོང་མ་བྱུང་ཞེས་སྨྲས་པ་དང་།

⁹ ཨ་ཧི་མེ་ལེག་གིས་ལན་དུ། སྔར་ཁྱོད་ཀྱིས་ཨེ་ལཱའི་ལུང་གཤོང་དུ་བསད་པའི་ཕེ་ལེ་ཤེད་པའི་གྷོ་ལི་ཡད་ཀྱི་རལ་གྲི་དེ་ཡོད། དེ་ནི་ཨེ་ཕོད་ཀྱི་རྒྱབ་ལ་རས་ཤིག་གིས་བཏུམ་ནས་བཞག་ཡོད། འདིར་མཚོན་ཆ་དེ་མ་གཏོགས་གཞན་མེད་པས། དེ་ཁྱོད་ལ་དགོས་ན་འཁྱེར་ཞིག་ཅེས་སྨྲས་པས། དཱ་བིད་ཀྱིས། རལ་གྲི་དེ་ལས་ཡག་པ་ཞིག་གང་དུའང་མེད་པས། དེ་ང་ལ་གནང་རོགས་གནང་ཞེས་སྨྲས་སོ།

¹⁰ དེ་ནས་དཱ་བིད་ས་ཨུལ་གྱི་རྩ་ནས་བྲོས་ཏེ། གྷད་ཀྱི་རྒྱལ་པོ་ཨ་ཀིཤི་ཀྱི་རྩར་ཕྱིན་ནོ།

¹¹ རྒྱལ་པོའི་ལས་བྱེད་པ་ཚོས་ཨ་ཀིཤི་ལ། སྐྱེ་བོ་འདི་ནི་དཱ་བིད་ཟེར་བ་རང་གི་ཡུལ་གྱི་རྒྱལ་པོ་དེ་མ་ཡིན་ནམ། སྐྱེ་བོ་འདི་རང་གི་སྐོར་ལ་བུད་མེད་ཚོས་བྲོ་གར་འཁྲབ་དུས་གླུ་ཚིག་ནང་། ས་ཨུལ་གྱིས་སྟོང་ཕྲག་མང་པོ་བསད་མོད། འོན་ཀྱང་དཱ་བིད་ཀྱིས་ནི་ཁྲི་ཁྲག་མང་པོ་བསད་ཅེས་བརྗོད་དེ་གཞས་བཏང་བ་ཡིན་ནོ།

¹² ཁོ་ཚོའི་གཏམ་དེ་དཱ་བིད་ལ་སེམས་འགུལ་ཆེན་པོ་ཐེབས་ནས། ཁོ་རྒྱལ་པོ་ཨ་ཀིཤི་ལ་ཧ་ཅང་འཇིགས་སོ།

¹³ ཁོ་ཚོ་ཉེ་འཁོར་དུ་ཡོད་སྐབས་དཱ་བིད་ཀྱིས་རང་ཉིད་སེམས་པ་ཐང་པོ་མེད་ཚུལ་སྟོན་པ་དང་། དེ་ཚོས་ཁོ་ལ་བཀག་འགོག་བྱེད་སྐབས་ཁོས་སྨྱོ་ཚུལ་བྱས་ཏེ། གྲོང་ཁྱེར་གྱི་རྒྱལ་སྒོར་གང་བྱུང་མང་བྱུང་བྲིས་ཤིང་། རང་གི་རྒྱ་དང་རྨ་ར་ནས་ཁ་ཆུ་འཛག་ཅིང་བསྡད་ཀྱི་ཡོད་དོ།

¹⁴ དེར་བརྟེན་ཨ་ཀིཤི་ཀྱིས་རང་གི་ལས་བྱེད་པ་ཚོར་ལྟོས་དང་མི་འདི་ནི་སྨྱོན་པ་ཡིན་པས། ཁྱོད་ཚོས་ཅིའི་ཕྱིར་ཁོ་ངའི་རྩར་འཁྲིད་ཡོང་བ་ཡིན་ནམ།

¹⁵ ང་ལ་མི་སྨྱོན་པ་ཉུང་ཞིང་དཀོན་པ་ཡིན་ནམ། ང་ལ་ཁོང་ཁྲོ་བླང་ཕྱིར་ང་རང་གི་ཁང་པའི་ནང་ད་དུང་སྨྱོན་པ་གཞན་ཞིག་འཁྲིད་ཡོང་དགོས་པ་དེ་གང་ཡིན་ནམ་ཞེས་སྨྲས་སོ༎