ཤ་མུ་ཨེལ་དང་པོ། 2 - Tibetan Old Testament 2011

ཧན་ནཱའི་སྨོན་ལམ།

¹ ཧན་ནཱས་འདི་ལྟར་སྨོན་ལམ་འདེབས་སོ། ང་ཡི་སེམས་ནང་གཙོ་བོ་དཀོན་མཆོག་གིས། དགའ་སྤྲོས་ཡོངས་སུ་ཁྱབ་པར་མཛད་ལགས་སོ། གུས་མོར་ཉིད་ཀྱིས་བཀའ་དྲིན་མཛད་པར་བརྟེན། ང་ཡི་སེམས་ནི་དགའ་བས་ཡོངས་སུ་ཁྱབ། དགྲ་བོ་རྣམས་ཀྱི་ཐོག་ཏུ་ང་ནི་གད། གཙོ་བོས་ང་ལ་སྐྱབས་གྲོགས་མཛད་པར་བརྟེན། ང་ནི་དགའ་སྤྲོའི་ངང་དུ་ཡོངས་སུ་རོལ།

² གཙོ་བོ་དཀོན་མཆོག་ལྟ་བུའི་དམ་པ་སུའང་མེད། ཁོང་དང་འདྲ་མཚུངས་གཞན་ནི་སུའང་མེད། སྲུང་སྐྱོབ་མཛད་མཁན་ཁོང་འདྲ་སུའང་མེད།

³ ང་རྒྱལ་ལྡན་པའི་སྐད་ཤུགས་མ་འདོན་ཞིག། རང་མཐོང་ཆེ་བའི་གཏམ་ངན་མ་འདོན་ཞིག གང་ལགས་ཟེར་ན་གཙོ་བོ་དཀོན་མཆོག་ཐམས་ཅད་མཁྱེན་པ་དཀོན་མཆོག་ཡིན། ཀུན་གྱི་ལས་ལ་གཟིགས་ཏེ་ཁྲིམས་གཅོད་གནང།

⁴ དམག་མི་སྟོབས་ཤུགས་ཆེ་བའི་གཞུ་རྣམས་བཅག་པར་འགྱུར། འོན་ཀྱང་ཉམ་ཐག་རྣམས་སྟོབས་ཤུགས་རྒྱས།

⁵ སྔོན་དུ་གྲོད་པ་ཡོངས་སུ་རྒྱག་པའི་སྐྱེ་བོ་རྣམས། ད་ནི་ཁ་ཟས་འཚོལ་ཕྱིར་གླ་པར་རང་ཉིད་སྤྲད། དེ་སྔོན་བཀྲེས་པ་རྣམས་ནི་ད་མི་ལྟོགས། བུད་མེད་མོ་གཤམ་ལ་ནི་ཕྲུ་གུ་བདུན་ཡང་སྐྱེས། ཕྲུ་གུ་མང་པོའི་མ་ལ་གཅིག་ཀྱང་མ་ལུས་སོ།

⁶ གཙོ་བོ་དཀོན་མཆོག་གིས་ནི་སྲོག་ཀྱང་ལེན། དེ་བཞིན་ཁོང་གིས་གསོན་པོར་མཛད་ཀྱང་ནུས། ཁོང་གིས་མི་རྣམས་གཤིན་པོའི་གནས་སུ་བཏང་། གཤིན་ཁམས་གནས་ནས་ཕྱིར་ལོག་མཛད་ཀྱང་ནུས།

⁷ ཁོང་གིས་འགའ་རེར་དབུལ་ཞིང་ཕོངས་བར་མཛད། ཁོང་གིས་འགའ་རེར་ཕྱུག་པོ་བཟོ་བར་མཛད། འགའ་ཤས་དུལ་ཞིང་ཉམ་ཆུང་ཁོང་གིས་མཛད། འགའ་ཤས་མངའ་ཐང་ཆེ་བའི་གནས་སུ་བཀོད།

⁸ དབུལ་ཕོངས་ཐལ་བའི་ནང་ནས་ཁོང་གིས་སླང་། ཉམས་ཐག་སྡུག་བསྔལ་གནས་ལས་སླངས་མཛད་དེ། དེ་དག་རྒྱལ་སྲས་རྣམས་ཀྱི་ཁྲོད་དུ་བཞག། མིང་དང་གྲགས་པ་ཆེ་བའི་གནས་སུ་བཀོད། ས་ཡི་རྨངས་གཞི་ཀུན་ནི་གཙོ་བོ་དཀོན་མཆོག་ཁོང་གི་ཡིན། དེའི་ཁར་ཁོང་གིས་འཛམ་གླིང་བཟོས་པར་མཛད།

⁹ ཁོང་གིས་མི་འབངས་དམ་ཚིག་ཅན་ལ་སྐྱབས། འོན་ཀྱང་མི་ངན་མུན་པའི་ནང་དུ་བརླག། མི་ནི་རང་སྟོབས་བསྟེན་ནས་རྒྱལ་མི་ཐུབ།

¹⁰ གཙོ་བོ་དཀོན་མཆོག་ཁོང་གི་དགྲ་བོ་རྣམས་ནི་འཇིག། དེ་ཚོར་ཁོང་གིས་གནམ་ནས་འབྲུག་སྐད་ལྡིར། གཙོ་བོ་དཀོན་མཆོག་ཁོང་གིས་འཛམ་གླིང་ཡོངས་ལ་ཁྲིམས་གཅོད་གནང། ཁོང་གིས་ཉིད་ཀྱི་རྒྱལ་པོར་དབང་བསྐུར་ཞིང་། ཉིད་ཀྱིས་འདམས་པའི་རྒྱལ་པོར་རྒྱལ་ཁ་གནང་།

¹¹ དེ་རྗེས་ཨེལ་ཀ་ནཱ་ར་མཱ་རུ་རང་གི་ཁང་པར་ཕྱིར་ལོག་བྱས་ཀྱང་། བུ་ཤ་མུ་ཨེལ་ནི་ཤི་ལོ་རུ་བླ་མ་ཨེ་ལིསི་མངའ་འོག་ཏུ་གནས་ཏེ་གཙོ་བོ་དཀོན་མཆོག་གི་ཞབས་ཏོག་ཞུས་སོ༎

ཨེ་ལིའི་བུ་རྣམས།

¹² ཨེ་ལིའི་བུ་རྣམས་ངན་པ་ཡིན་པས། གཙོ་བོ་དཀོན་མཆོག་ལ་དད་གུས་གང་ཡང་མ་ཞུས་པ་དང་།

¹³ མི་མང་གི་ལག་ནས་ཐོབ་འོས་པའི་བླ་མའི་ཐོབ་ཐང་སྐོར་གྱི་ཁྲིམས་ལའང་རྩིས་མེད་བྱས་ཀྱི་ཡོད་པ་དང་། མི་ཞིག་འབུལ་བ་འབུལ་བཞིན་པའི་སྐབས་སུ་མཆོད་གཡོག་རྣམས་ལག་ཏུ་ཤ་འཛིན་རྩེ་གསུམ་བྱེད་པ་ཞིག་འཁྱེར་ཡོང་སྟེ། འབུལ་བའི་ཤ་དེ་བཅོས་བཞིན་པའི་སྐབས་སུ།

¹⁴ སྣོད་ཀྱི་ནང་དུ་ཤ་འཛིན་དེ་བཙུག་ནས། དེས་བཏོན་པའི་ཤ་དེ་བླ་མའི་དོན་དུ་འཁྱེར་འགྲོ་གི་ཡོད་དོ། ཤི་ལཱོ་རུ་དམར་མཆོད་འབུལ་ཕྱིར་ཡོང་བའི་ཨིསི་རཱཨེལ་པ་ཚང་མར་ཁོ་ཚོས་གོང་བཞིན་བྱེད་ཀྱི་ཡོད་དོ།

¹⁵ དེ་ཙམ་མ་ཟད་ལུགས་སྲོལ་བཞིན་དུ་ཤ་ནས་ཚིལ་ལུ་སོ་སོར་དབྱེ་སྟེ། མེར་སྲེག་མ་གཏོང་སྔོན་དུ་མཆོད་གཡོག་རྣམས་ཡོང་ནས་མཆོད་འབུལ་བྱེད་མཁན་མི་དེ་ལ། ཤ་མེར་སྲེག་བཏང་ནས་བླ་མ་ལ་འབུལ་བའི་ཕྱིར་ང་ལ་ཤ་ཏོག་ཙམ་དགོས་སོ། ཁོང་གིས་ཤ་རྗེན་པ་མ་གཏོགས་ཁྱོད་ཚོས་ཤ་བཙོས་ནས་ཕུལ་བ་དེ་བཞེས་མི་ཡོང་ཞེས་སྨྲས་ཀྱི་ཡོད་དོ།

¹⁶ གལ་ཏེ་མི་དེས་ལན་དུ། ཐོག་མར་ཚིལ་ལུ་མེར་སྲེག་བཏང་སྟེ་སྲོལ་བཞིན་གང་རིགས་པ་ཡིན་པ་དེ་བྱེད་དགོས། དེ་རྗེས་ཁྱོད་ཚོས་གང་དགོས་པ་དེ་འཁྱེར་ནའང་ཆོག་ཅེས་སྨྲས་པ་ཡིན་ན། མཆོད་གཡོག་དེས། དེ་ལྟར་མི་སྒྲིག། ཤ་དེ་ད་ལྟ་རང་དགོས་ཡོད། དེ་མིན་ངས་བཙན་འཕྲོག་བྱེད་ནས་འཁྱེར་འགྲོ་གི་ཡིན་ཞེས་བརྗོད་ཉེན་ཡོད།

¹⁷ ཨེ་ལིའི་བུ་ཚོས་གཙོ་བོ་དཀོན་མཆོག་གི་འབུལ་བར་སྣང་ཆུང་རྩིས་པས་དེ་ཚོས་ཉེས་དམིགས་དེ་ནི་གཙོ་བོ་དཀོན་མཆོག་གི་སྤྱན་སྔར་ཉེན་ཚབས་ཆེ་བའི་རྒྱུ་ཞིག་ཏུ་ཆགས་ཡོད་དོ༎

ཤ་མུ་ཨེལ་ཤི་ལཱོ་རུ།

¹⁸ སྐབས་དེར་ཤ་མུ་ཨེལ་ནི་རས་ཀྱི་ཆོས་གོས་ཤིག་གྱོན་ནས་གཙོ་བོ་དཀོན་མཆོག་ལ་བསྙེན་བཀུར་ཞུས་ཤིང་གནས་སོ།

¹⁹ ལོ་ལྟར་རེ་བཞིན་ཁོའི་ཨ་མས་ཁོའི་དོན་ལ་ཆོས་གོས་ཆུང་ངུ་རེ་བཟོས་ནས། རང་གི་ཁྱོ་དང་མཉམ་དུ་ལོ་རེའི་དམར་མཆོད་འབུལ་ཕྱིར་འགྲོ་སྐབས་ཆོས་གོས་དེ་འཁྱེར་འགྲོ་གི་ཡོད་དོ།

²⁰ ཨེ་ལིས་ཨེལ་ཀ་ནཱ་བཟའ་མི་གཉིས་ལ་བྱིན་རླབས་གནང་ནས། ཨེལ་ཀ་ནཱ་ལ། ཁྱོད་ཚོས་གཙོ་བོ་དཀོན་མཆོག་ལ་བསྔོ་འབུལ་བྱས་པའི་བུ་དེའི་ཚབ་ལ་ཁོང་གིས་ཁྱོད་ལ་བུད་མེད་འདིའི་བརྒྱུད་ནས་ཕྲུ་གུ་གཞན་དག་ཀྱང་གནང་བར་ཤོག་ཅེས་སྨྲས་སོ། དེ་རྗེས་ཁོ་ཚོ་རང་གི་སྡོད་གནས་སུ་ཕྱིར་ལོག་བྱས་སོ།

²¹ གཙོ་བོ་དཀོན་མཆོག་གི་བྱིན་མཐུས་དབང་གིས་ཧན་ནཱ་ལ་གཞན་བུ་གསུམ་དང་བུ་མོ་གཉིས་བྱུང་ངོ་། བུ་ཤ་མུ་ཨེལ་ནི་གཙོ་བོ་དཀོན་མཆོག་གི་ཞབས་ཏོག་ཞུ་བཞིན་ཡར་འཚར་སྐྱེད་བྱུང་ངོ་༎

ཨེ་ལི་དང་ཁོའི་བུ་རྣམས།

²² ད་ཨེ་ལི་ནི་ལོ་ན་རྒས་ཡོད་པ་དང་། ཁོའི་བུ་ཚོས་ཨིསི་རཱཨེལ་པ་རྣམས་ལ་བྱས་པའི་བྱ་སྤྱོད་ངན་པའི་སྐོར་གྱི་གནས་ཚུལ་ཁག་མུ་མཐུད་ཀྱིས་གོ་ཐོས་བྱུང་བ་དང་། དེ་ཚོས་གཙོ་བོ་དཀོན་མཆོག་གནས་པའི་དབུ་གུར་དམ་པའི་གཟིམ་སྒོའི་འགྲམ་དུ་ཞབས་ཏོག་ཞུ་མཁན་བུད་མེད་ཚོ་དང་མཉམ་དུ་ལུས་འབྲེལ་བྱས་པའི་སྐོར་གྱི་གནས་ཚུལ་ཡང་ཐོས་སོ།

²³ ཁོས་དེ་དག་ལ། ཁྱོད་ཚོས་འདི་འདྲ་བྱེད་དགོས་དོན་གང་ཡིན་ནམ། ཁྱོད་ཚོས་བྱས་པའི་ལས་ངན་རྣམས་ཀྱི་སྐོར་ལ་མི་ཚང་མས་ང་ལ་བཤད་ཀྱི་འདུག

²⁴ དེ་བས་ན་ཀྱེ་ངའི་བུ་རྣམས་ཁྱོད་ཚོས་དེ་དག་མཚམས་འཇོགས་བྱེད་དགོས། དེའི་སྐོར་ལ་གཙོ་བོ་དཀོན་མཆོག་གི་མི་ཚོས་གཏམ་གླེང་བྱེད་བཞིན་པ་དེ་ནི་ཧ་ཅང་ཐབས་སྡུག་པོ་ཞིག་ཡིན་ནོ།

²⁵ མི་ཕན་ཚུན་གཅིག་གིས་གཅིག་ལ་བྱས་པའི་སྡིག་པའི་སྐོར་ལ་དཀོན་མཆོག་གིས་མགོན་སྐྱབས་གནང་ཐུབ་མོད། འོན་ཀྱང་གཙོ་བོ་དཀོན་མཆོག་གི་བཀའ་དང་འགལ་བའི་ཉེས་དམིགས་ཀྱི་སྐོར་ལ་སུས་སྐྱབས་ཐུབ་བམ་ཞེས་སྨྲས་སོ། འོན་ཀྱང་དེ་ཚོས་རང་གི་ཕའི་ཁ་ལ་མ་ཉན་པར་བརྟེན། གཙོ་བོ་དཀོན་མཆོག་གིས་དེ་ཚོ་བསད་རྒྱུའི་ཐུགས་ཐག་བཅད་པ་གནང་ངོ་།

²⁶ བུ་ཤ་མུ་ཨེལ་ནི་རིམ་བཞིན་ཡར་འཚར་སྐྱེད་བྱུང་བ་དང་། དཀོན་མཆོག་དང་མིའི་ངོས་ནས་ཐུགས་རྗེའི་ཐོབ་བོ༎

ཨེ་ལིའི་ནང་མི་རྣམས་ཀྱི་སྐོར་ལ་ལུང་བསྟན།

²⁷ ལུང་སྟོན་པ་ཞིག་གཙོ་བོ་དཀོན་མཆོག་གི་ཕྲིན་འདི་འཁྱེར་ནས་ཨེ་ལིའི་རྩར་སླེབས་ཏེ། སྔར་ཁྱོད་ཀྱི་མེས་པོ་ཨ་རོན་དང་ཁོའི་ནང་མི་བཅས་པ་ཨི་ཇིབ་ཀྱི་རྒྱལ་པོའི་བྲན་འཁོལ་དུ་གནས་སྐབས། ང་ནི་ཨ་རོན་གྱི་མདུན་དུ་མངོན་ནོ།

²⁸ ངས་ཨིསི་རཱཨེལ་གྱི་སྡེ་རིགས་ཚང་མའི་ནང་ནས་ཁོའི་ནང་མི་དེ་ངའི་བླ་མ་བྱེད་རྒྱུ་དང་། མཆོད་ཁྲིའི་མདུན་དུ་ཞབས་ཏོག་ཞུ་རྒྱུ་དང་། བདུག་སྤོས་བདུག་རྒྱུ་དང་། གཞན་ཡང་ཨེ་ཕོད་གྱོན་ཏེ་ང་ལ་གྲོས་འདྲི་མཁན་གྱི་ཚུལ་དུ་འདེམས་བསྐོས་བྱས་པ་དང་། མཆོད་ཁྲིའི་ཁར་སྲེག་པའི་དམར་མཆོད་ཀྱི་ཆ་ཤས་ཤིག་རང་གི་དོན་དུ་བདག་ཉར་བྱེད་ཆོག་པའི་དབང་ཆ་སྤྲད་པ་ཡིན་ནོ།

²⁹ འོན་ཀྱང་ངའི་མི་འབངས་ནས་ངས་འདོད་པའི་དམར་མཆོད་དང་འབུལ་བ་རྣམས་ལ་ཁྱོད་ཀྱིས་འདོད་བརྔམས་ཆེན་པོས་བལྟ་དགོས་པ་དེ་གང་ཡིན་ནམ། ཀྱེ་ཨེ་ལི། ངའི་མི་འབངས་ཚོས་ང་ལ་ཕུལ་བའི་དམར་མཆོད་ཚང་མའི་ཁོང་ནས་ཆ་ཤས་བཟང་ཤོས་དེ་དག་ཁྱོད་ཀྱིས་རང་གི་བུ་རྣམས་ལ་བཟའ་བཅུག་སྟེ། དེ་ཚོ་ལུས་རྒྱགས་པར་བྱས་པ་དང་། དེ་ལྟར་བྱས་པའི་སྒོ་ནས་ཁྱོད་ཀྱིས་ང་ལས་ལྷག་པར་རང་གི་བུ་རྣམས་ལ་ཆེ་བསྟོད་ཆེ་བ་བྱས་པ་དེ་ཅི་ཡིན་ནམ།

³⁰ ཁྱོད་ཀྱི་ནང་མི་དང་ཁྱོད་ཀྱི་རིགས་རུས་ཀྱི་ཁོངས་ནས་བླ་མ་གྱི་ཚུལ་དུ་དུས་རྒྱུན་དུ་ངའི་ཞབས་ཏོག་ཞུ་རྒྱུ་ཡིན་ཞེས་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་ལ་ངས་སྔར་དམ་བཅའ་བྱས་མོད། འོན་ཀྱང་ད་ནི་དེ་ལྟར་མ་ཡིན་གྱིས། དེ་བས་སུས་ང་ལ་གུས་བཀུར་བྱེད་པ་དེ་ལ་ངས་ཀྱང་དེ་བཞིན་བརྩི་བཀུར་བྱེད་རྒྱུ་དང་། སུས་ང་ལ་སྨད་པ་དེ་ལ་ངས་ཀྱང་དེ་བཞིན་སྨད་སྒྲ་གཏོང་རྒྱུ་ཡིན།

³¹ ད་ཚུར་ཉོན་ཞིག། ཁྱོད་ཀྱི་ནང་མི་དང་རིགས་རུས་ཀྱི་ཁོངས་ནས་སྐྱེས་པ་ན་གཞོན་གཅིག་ཀྱང་ལོ་ན་མ་རྒས་གོང་དུ་ངས་ཚར་གཅོད་གཏོང་བའི་དུས་དེ་ཉེ་བར་རན་པ་ཡིན་ནོ།

³² ངས་ཨིསི་རཱཨེལ་གྱི་མི་རིགས་གཞན་ལ་སྟེར་བའི་བྱིན་རླབས་དེ་ཚོ་མཐོང་ནས་ཁྱོད་ཀྱི་སེམས་འཁྲུག་ཅིང་ཕྲག་དོག་སྐྱེད་མོད། འོན་ཀྱང་ཁྱོད་ཀྱི་ནང་མིའི་ཁོངས་ནས་ད་ཕྱིན་སུའང་ལོ་ན་རྒས་པའི་བར་དུ་འཚོ་བར་མི་འགྱུར་རོ།

³³ དེ་ལྟར་ཡིན་ན་ཡང་ཁྱོད་ཀྱི་བུ་བརྒྱུད་ཀྱི་ཁོངས་ནས་མི་གཅིག་གསོན་པོར་བཞག་ཅིང་། དེས་ང་ལ་བླ་མའི་ཚུལ་དུ་ཞབས་ཏོག་ཞུ་རྒྱུ་ཡིན་ནོ། མི་དེའང་རྗེས་སུ་མིག་ལོང་ཞིང་རེ་ཐབས་བྲལ་བའི་གནས་ལྟངས་སུ་སླེབས་དགོས་རྒྱུ་ཡིན་པ་དང་། ཁྱོད་ཀྱི་བུ་བརྒྱུད་གཞན་རྣམས་ནི་ཤི་སྟངས་དྲག་པོའི་ངང་དུ་འཆི་བར་འགྱུར་རོ།

³⁴ ངས་གང་སྨྲས་པ་ཚང་མ་དངོས་སུ་སྒྲུབ་རྒྱུ་ཡིན་པའི་རྟགས་ཚན་དུ། ཁྱོད་ཀྱི་བུ་ཧོཕ་ནི་དང་ཕིན་ཧསི་གཉིས་ནི་ཉིན་ཞག་གཅིག་རང་དུ་ཤི་བར་འགྱུར།

³⁵ ངས་བླ་མ་དམ་ཚིག་ལྡན་པ་ཞིག་འདེམས་བསྐོས་བྱེད་ཅིང་། དེས་ངས་གང་སྨྲས་པ་ཚང་མ་སྒྲུབ་པར་འགྱུར། ངས་ཁོ་ལ་བུ་རྒྱུད་མང་པོ་སྟེར་ཞིང་། དེ་ཚོས་ངས་འདེམས་བསྐོས་བྱས་པའི་རྒྱལ་པོའི་དྲུང་དུ་དུས་རྒྱུན་དུ་ཞབས་ཏོག་ཞུ་བར་འགྱུར།

³⁶ སྐབས་དེར་ཁྱོད་ཀྱི་བུ་བརྒྱུད་ལྷག་འཕྲོས་ལུས་པ་ཚོས་བླ་མ་དེའི་རྩར་ཕྱིན་ནས་དངུལ་དང་ཁ་ཟས་སློང་རྒྱུ་ཡིན་པ་དང་། ཁ་ཟས་ཐོབ་པའི་ཕྱིར་དེ་ཚོས་བླ་མ་རྣམས་ལ་རོགས་བྱེད་དུ་བཅུག་རོགས་གནང་ཞེས་ཞུ་བར་འགྱུར་རོ༎