སྔོན་རབས་དང་པོ། 29 - Tibetan Old Testament 2011

མཆོད་ཁང་བཞེངས་རྒྱུ་ཆེད་དུ་འཁྱེར་ཡོང་བའི་འབུལ་བ་རྣམས།

¹ རྒྱལ་པོ་དཱ་བིད་ཀྱིས་འདུས་ཚོགས་ཡོངས་ལ་གསལ་སྒྲགས་གནང་བ་ནི། ངའི་བུ་སོ་ལོ་མོན་ནི་དཀོན་མཆོག་གི་འདམས་གནང་བ་ཞིག་ཡིན་ནོ། འོན་ཀྱང་ཁོ་ལོ་ན་ཆུང་བ་དང་ཉམས་མྱོང་མེད་པས། ལས་འགན་དེ་ནི་ཧ་ཅང་རྒྱ་ཆེན་པོ་ཞིག་ཡིན་ནོ། གང་ལ་ཟེར་ན། དེ་ནི་མིའི་ཕོ་བྲང་ཞིག་མིན་པར་དཀོན་མཆོག་གཙོ་བོ་དཀོན་མཆོག་གི་ཆེད་དུ་མཆོད་ཁང་ཞིག་ཡིན་ནོ།

² ངས་མཆོད་ཁང་གི་རྒྱུ་ཆའི་ཆེད་གསེར་དངུལ་དང་ལི་གན་དང་ལྕགས་དང་ཤིང་དང་རིན་ཆེན་ནོར་བུའི་རྡོ་དང་། རྡོ་བཟོ་བའི་ཆེད་རྡོ་ཀ་མ་རུ་པ་ལྡང་ངེས་བཅས་གྲ་སྒྲིགས་བྱ་རྒྱུར་ཐབས་གང་ཡོད་བྱས་ཡོད།

³ དེ་ཚོ་ཚང་མ་སྒྲུབ་པའི་ཐོག་ང་རང་གི་རྒྱུ་དངོས་ནས་གསེར་དངུལ་ཡང་ཕུལ་ཡོད། གང་ལ་ཟེར་ན། ངས་དཀོན་མཆོག་གི་མཆོད་ཁང་ལ་མོས་གུས་བྱེད་ཀྱི་ཡོད།

⁴ མཆོད་ཁང་གི་རྩིག་པར་རྒྱན་སྤྲོད་བྱེད་པར་ངས་གསེར་སྤུས་ཁ་ལེགས་ཤོས་མི་ཀྲིག་ཀྲོན་ ༡༠༠ ལྷག་དང་། དངུལ་སྤུས་ལེགས་མི་ཀྲིག་རིག་ཀྲོན་ ༢༤༠ ཙམ་ཕུལ་ཡོད།

⁵ ད་གཙོ་བོ་དཀོན་མཆོག་ལ་སུ་ཞིག་གིས་ལྷག་བསམ་རྣམ་དག་གི་འབུལ་བ་འབུལ་འདོད་ཡོད་དམ་ཞེས་འདྲིས་སོ།

⁶ དེ་ནས་རིགས་རུས་ཀྱི་འགོ་པ་དང་སྡེ་རིགས་ཚོའི་ལས་བྱེད་པ་ཚོ་དང་དམག་མིའི་དམག་སྤྱི་ཚོ་དང་རྒྱལ་པོའི་རྒྱུ་དངོས་ཀྱི་འཛིན་སྐྱོངས་པ་ཚོས་དང་བླངས་ཀྱིས།

⁷ མཆོད་ཁང་གི་ལས་དོན་ཆེད་དུ་གསེར་མི་ཀྲིག་རིག་ཀྲོན་ ༡༧༠ ལྷག་དང་། དངུལ་མི་ཀྲིག་རིག་ཀྲོན་ ༣༤༠ ལྷག་དང་ལི་མི་ཀྲིག་རིག་ཀྲོན་ ༦༢༠ ཙམ་དང་། ལྕགས་མི་ཀྲིག་རིག་ཀྲོན་ ༣,༤༠༠ ལྷག་ཙམ་རང་གི་དང་བླངས་ཀྱི་ཕུལ་ལོ།

⁸ རིན་པོ་ཆེའི་རྡོ་རིགས་ཡོད་མཁན་ཚོས་མཆོད་ཁང་གི་དཀོར་མཛོད་དུ་ཕུལ་ལོ། དེའི་འཛིན་སྐྱོངས་པ་ནི་གྷེར་ཤོན་གྱི་ལེ་ཝི་པའི་རིགས་རུས་ཀྱི་ཡེ་ཧི་ཨེལ་ཡིན་ནོ།

⁹ མི་མང་ནས་རང་འདོད་བཞིན་དུ་གཙོ་བོ་དཀོན་མཆོག་ལ་དེ་ལྟར་ཕུལ་ཡོད་པ་དང་། དེ་ཚོ་ཚང་མས་དེ་ལྟར་འབུལ་ཐུབ་པར་དགའ་པོ་བྱུང་ངོ་། རྒྱལ་པོ་དཱ་བིད་ཀྱང་ཧ་ཅང་ཐུགས་དགྱེས་ཡོད་དོ༎

དཱ་བིད་ཀྱིས་དཀོན་མཆོག་ལ་བསྟོད་པ་ཕུལ་བ།

¹⁰ མི་མང་འདུས་ཚོགས་སར་རྒྱལ་པོ་དཱ་བིད་ཀྱིས་དཀོན་མཆོག་ལ་བསྟོད་པ་ཕུལ་བ་ནི། ཁོང་གིས། ང་ཚོའི་ཕ་མེས་ཡ་ཀོབ་ཀྱི་དཀོན་མཆོག་གཙོ་བོ་དཀོན་མཆོག་ཁྱེད་ལ་རྒྱུན་ནས་རྒྱུན་དུ་བསྟོད་པ་ཕུལ་ལོ།

¹¹ ཁྱེད་ནི་རླབས་ཆེན་དང་མཐུ་སྟོབས་ཅན་དང་གཟི་བརྗིད་ཅན་དང་ཡ་ཆན་ཅན་དང་དཔའ་འོ་བཅས་ཡིན་པ་མ་ཟད། མཐོ་རིས་དང་ས་གཞིར་ཡོད་པ་ཚང་མ་ཁྱེད་ཀྱི་ཡིན་པ་དང་། ཁྱེད་ནི་རྒྱལ་པོ་དང་མི་རིགས་ཚང་མའི་ཆེས་མཐོའི་སྲིད་སྐྱོངས་པ་ཡིན་ནོ།

¹² རྒྱུ་ནོར་ཚང་མ་ཁྱེད་ནས་ཡོང་བ་ཡིན། ཁྱེད་ཀྱིས་ནུས་ཤུགས་དང་མཐུ་སྟོབས་ཀྱིས་ཚང་མར་དབང་བསྒྱུར་གནང་བ་དང་། ཁྱེད་ཀྱིས་ཚང་མ་ཆེན་པོ་དང་ནུས་ཤུགས་ཅན་བཟོ་གནང་ཐུབ་བོ།

¹³ ད་ང་ཚོའི་དཀོན་མཆོག། ང་ཚོས་ཁྱེད་ལ་ཐུགས་རྗེ་ཆེ་ཞུ་རྒྱུ་དང་། ཁྱེད་ཀྱི་གཟི་བརྗིད་ཅན་གྱི་མཚན་ལ་བསྟོད་པ་འབུལ་རྒྱུ་ཡིན་ནོ།

¹⁴ འོན་ཀྱང་ང་དང་ངའི་མི་མང་ནས་ཁྱེད་ལ་གང་ཡང་འབུལ་མི་ཐུབ་བོ། གང་ལ་ཟེར་ན། ཚང་མ་ཁྱེད་ཀྱི་གསོལ་རས་ཡིན་པ་དང་། སྔོན་དུ་ཁྱེད་ཀྱི་གང་ཡིན་པ་རྣམས་ང་ཚོས་ཕྱིར་འབུལ་གྱིས་ཡོད།

¹⁵ ཀྱེ་གཙོ་བོ་དཀོན་མཆོག་ཁྱེད་ཀྱིས་མཁྱེན་གསལ་ལྟར་ང་ཚོའི་ཕ་མེས་ཚོས་མྱོང་བ་ལྟར་ང་ཚོས་ཀྱང་བཙན་བྱོལ་དང་འགྲུལ་པའི་མི་ཚེ་མྱོང་ཡོད་དོ། ང་ཚོའི་མི་ཚེ་ཡལ་བའི་གྲིབ་ནག་ལྟར་ཡིན་པ་དང་ང་ཚོ་འཆི་བ་ནས་ཐར་མི་ཐུབ་བོ།

¹⁶ ཀྱེ་གཙོ་བོ་དཀོན་མཆོག་ང་ཚོའི་དཀོན་མཆོག། ང་ཚོས་ཁྱེད་ཀྱི་མཚན་དམ་པར་གུས་ཞབས་སུ་ཕྱིར་མཆོད་ཁང་བཞེངས་པའི་ཆེད་ནོར་འདི་རྣམས་བསྡུས་པ་ཡིན། འོན་ཀྱང་འདི་ཚོ་ཚང་མ་ཁྱེད་རང་ནས་ཡོང་བ་ཡིན་པས་ཁྱེད་ལ་བདག་པ་ཡིན་ནོ།

¹⁷ ཁྱེད་ཀྱིས་མི་མང་ཚང་མའི་སེམས་ལ་རྟགས་དཔྱད་གནང་བ་དང་། མི་མང་གི་དྲང་པོའི་རིགས་གང་བྱེད་པ་ལ་ཁྱེད་ཐུགས་མཉེས་པོ་ཡོད་པ་དེ་ངས་ཤེས་ཀྱི་ཡོད། ངས་དྲང་པོ་དང་དད་གུས་ཐོག་ནས་རང་འདོད་བཞིན་དུ་འདི་ཚོ་ཁྱེད་ལ་ཕུལ་བ་ཡིན་ནོ། འདིར་འདུས་ཡོད་པའི་ཁྱེད་ཀྱི་མི་མང་རྣམས་ནས་ཁྱེད་ལ་འབུལ་བ་འཁྱེར་ཡོང་རྒྱུར་དགའ་སྤྲོ་ཇི་ལྟར་ཡོད་པ་ངས་མཐོང་བྱུང་།

¹⁸ གཙོ་བོ་དཀོན་མཆོག་ང་ཚོའི་ཕ་མེས་ཨབ་ར་ཧམ་དང་ཨི་སཱག་དང་ཡ་ཀོབ་ཀྱི་དཀོན་མཆོག་ཁྱེད་ཀྱི་མི་མང་གི་སེམས་ནང་མོས་གུས་དེ་ལྟར་ཧ་ཅང་ཆེན་པོ་འཇོག་གནང་བ་དང་། དེ་ཚོ་ཚང་མས་རྟག་ཏུ་ཁྱེད་ལ་དམ་ཚིག་དང་ལྡན་པ་བཟོས་གནང་བར་མཛོད།

¹⁹ ངའི་བུ་སོ་ལོ་མོན་ལ་ཁྱེད་ཀྱིས་བཀའ་ཇི་ལྟར་གནང་བ་ཚང་མ་སྒྲུབ་རྒྱུ་དང་། ངས་གྲ་སྒྲིགས་འདི་ལྟར་གྱིས་ནས་ཁྱེད་ཀྱི་ཆེད་དུ་མཆོད་ཁང་བཞེངས་རྒྱུར་སེམས་ཀྱི་གཏིང་ནས་འདོད་པ་དྲག་པོ་ཞིག་གནང་རོགས་གནང་ཞེས་བསྟོད་པ་ཕུལ་ལོ།

²⁰ དེ་ནས་དཱ་བིད་ཀྱིས་མི་མང་ལ། གཙོ་བོ་དཀོན་མཆོག་ལ་བསྟོད་པ་ཕུལ་ཞིག་ཅེས་བཀའ་གནང་ངོ་། འདུས་ཚོགས་ཡོངས་ནས་དེ་ཚོའི་ཕ་མེས་ཀྱི་དཀོན་མཆོག་གཙོ་བོ་དཀོན་མཆོག་ལ་བསྟོད་པ་ཕུལ་བ་དང་། དེ་ཚོ་ཧ་ཅང་མགོ་སྒུར་ནས་གཙོ་བོ་དཀོན་མཆོག་དང་རྒྱལ་པོ་ལ་ཡང་གུས་བཀུར་ཞུས་སོ།

²¹ སང་ཉིན་དེར་དེ་ཚོས་དམར་མཆོད་ཆེད་དུ་སེམས་ཅན་བསད་ནས། དེ་ཚོ་གཙོ་བོ་དཀོན་མཆོག་ལ་བསྔོ་བར་བྱས་པ་དང་། དེ་ནས་དེ་ཚོ་མི་མང་ལ་ཟ་བའི་ཕྱིར་སྤྲད་དོ། དེའི་ཐོག་དེ་ཆོས་གླང་གོག་ ༡,༠༠༠ དང་ལུག་ཐུག་ ༡,༠༠༠ དང་ལུ་གུ་ ༡,༠༠༠ བཅས་དམར་མཆོད་ཕུལ་ནས། དེ་ཚོ་ཆ་ཚང་མཆོད་ཁྲིའི་སྟེང་དུ་བསྲེགས་སོ། དེ་ཚོས་རྒུན་ཆང་གི་མཆོད་པ་ཡང་འཁྱེར་ཡོད་དོ།

²² དེ་འདྲ་སོང་ཙང་ཉིན་དེར་དེ་ཚོས་གཙོ་བོ་དཀོན་མཆོག་གི་དྲུང་དུ་ཟ་འཐུང་བྱས་སྟབས་ཧ་ཅང་དགའ་སྤྲོ་ཐོབ་བོ། དེ་ཚོས་ཐེངས་གཉིས་པར་སོ་ལོ་མོན་རྒྱལ་པོ་ཡིན་པར་གསལ་སྒྲགས་གྱིས་སོ། གཙོ་བོ་དཀོན་མཆོག་གི་མཚན་ལ་དེ་ཚོས་ཁོང་ལ་རང་གི་རྒྱལ་པོར་དང་ཛེ་དཱོག་ལ་བླ་མ་ལྟར་བསྔོས་འབུལ་བྱས་སོ།

²³ དེ་ལྟར་སོ་ལོ་མོན་གཙོ་བོ་དཀོན་མཆོག་གིས་བཟོས་གནང་བའི་རང་གི་ཡབ་དཱ་བིད་ཀྱི་རྒྱལ་ཁྲིའི་ཤུལ་འཛིན་དུ་འགྱུར་རོ། ཁོང་ནི་རྒྱལ་པོ་ལམ་ལྷོང་ཅན་ཞིག་ཡིན་པས། ཨིསི་རཱཨེལ་གྱི་རྒྱལ་ཁབ་ཡོངས་ནས་ཁོང་གི་བཀའ་ལ་བརྩི་བཀུར་ཞུས་སོ།

²⁴ ལས་བྱེད་པ་ཡོངས་དང་དམག་མི་ཡོངས་དང་དཱ་བིད་ཀྱི་སྲས་གཞན་ཚོ་བཅས་པས་སོ་ལོ་མོན་ལ་རྒྱལ་པོ་ཡིན་པར་དམ་ཚིག་སྲུང་རྒྱུའི་ཁས་ལེན་གྱིས་སོ།

²⁵ གཙོ་བོ་དཀོན་མཆོག་གིས་མི་མང་ཡོངས་ལ་སོ་ལོ་མོན་གྱི་གཟི་བརྗིད་ཅན་དང་ཨིསི་རཱཨེལ་ལ་རྒྱལ་སྲིད་སྐྱོངས་བའི་རྒྱལ་པོ་ཡོངས་ལས་ལྷག་པའི་ཡར་རྒྱས་ཅན་བཟོས་གནང་ངོ་༎

དཱ་བིད་ཀྱི་རྒྱལ་སྲིད་སྐྱོང་བའི་ལོ་རྒྱུས་མདོར་བསྡུས།

²⁶ ཡི་ཤེའི་སྲས་དཱ་བིད་ཀྱིས་ཨིསི་རཱཨེལ་ཡོངས་སུ།

²⁷ ལོ་བཞི་བཅུའི་རིང་རྒྱལ་སྲིད་བསྐྱངས་སོ། ཁོང་གིས་ཧེབ་རོན་དུ་ལོ་བདུན་དང་ཡེ་རུ་ཤ་ལེམ་དུ་ལོ་སུམ་ཅུ་སོ་གསུམ་རྒྱལ་སྲིད་བསྐྱངས་སོ།

²⁸ ཁོང་སྐུ་ན་བགྲེས་ནས་ལོངས་སྤྱོད་ཅན་དང་གུས་བརྩི་ཅན་ཐོག་གྲོངས་པ་དང་། ཁོང་གི་སྲས་སོ་ལོ་མོན་ཁོང་གི་ཤུལ་འཛིན་དུ་རྒྱལ་པོར་འགྱུར་རོ།

²⁹ རྒྱལ་པོ་དཱ་བིད་ཀྱི་རྒྱལ་རབས་མགོ་ནས་འཇུག་བར་ལུང་སྟོན་པ་ཤ་མུ་ཨེལ་དང་ན་ཐན་དང་གྷཌ་བཅས་གསུམ་གྱི་ལོ་རྒྱུས་ནང་བཀོད་ཡོད་དོ།

³⁰ ལོ་རྒྱུས་དེ་ཚོ་ཚང་མའི་ནང་ཁོང་གི་ཇི་ལྟར་རྒྱལ་སྲིད་སྐྱོངས་བ་དང་ཁོང་གི་སྟོབས་ཤུགས་ཇི་ལྟར་ཡོད་པ་དང་། ཁོང་དང་ཨིསི་རཱཨེལ་དང་ཉེ་འཁོར་གྱི་རྒྱལ་ཁབ་ཚང་མར་གང་བྱུང་བ་ཁག་བཀོད་ཡོད་དོ༎