སྔོན་རབས་དང་པོ། 28 - Tibetan Old Testament 2011

མཆོད་ཁང་གི་ཆད་དུ་དཱ་བིད་ཀྱི་སློབ་སྟོན་རྣམས།

¹ རྒྱལ་པོ་དཱ་བིད་ཀྱིས་ཨིསི་རཱཨེལ་གྱི་ལས་བྱེད་པ་རྣམས་ཡེ་རུ་ཤ་ལེམ་དུ་འཛོམས་དགོས་པའི་བཀའ་གནང་ངོ་། དེ་འདྲ་སོང་ཙང་སྡེ་རིགས་ཚོའིི་ལས་བྱེད་པ་ཚང་མ་དང་། རྒྱལ་ཁབ་ཀྱི་ལས་དོན་ཐོག་འཛིན་སྐྱོངས་གནང་མཁན་ལས་བྱེད་པ་ཚོ་དང་། རིགས་རུས་ཀྱིི་འགོ་པ་ཚོ་དང་། རྒྱལ་པོ་དང་སྲས་ཚོར་བདག་པའི་རྒྱུ་དངོས་དང་། ཕྱུགས་ཚོའི་བཀོད་ཁྱབ་པ་དང་། ཕོ་བྲང་གི་ལས་བྱེད་པ་ཚོ་དང་། དམག་མི་གལ་ཆེ་ཁག་དང་། མི་སྣ་གལ་ཆེ་བཅས་པ་ཡེ་རུ་ཤ་ལེམ་དུ་འཛོམས་སོ།

² དཱ་བིད་ཀྱིས་དེ་ཚོའི་མདུན་དུ་བཞེངས་ནས་གསུངས་བཤད་གནང་བ་ནི། ངའི་ཡུལ་མི་ཚོ་ང་ལ་ཉོན་ཞིག་དང་། ངས་དམ་བཅའི་སྒྲོམ་དེ་ང་ཚོའི་དཀོན་མཆོག་གཙོ་བོ་དཀོན་མཆོག་གི་ཞབས་སྟེགས་ཞིག་བཞེངས་འདོད་ཡོད་པ་དང་། ངས་ཁོང་ལ་གུས་ཞབས་ཞུ་བའི་ཆེད་མཆོད་ཁང་ཞིག་བཞེངས་པའི་གྲ་སྒྲིགས་གྱིས་པ་ཡིན་ནོ།

³ འོན་ཀྱང་ཁོང་གིས་དེ་ལྟར་བྱེད་པར་འགག་བྱ་གནང་བྱུང་། གང་ལ་ཟེར་ན། ང་དམག་མི་ཞིག་ཡིན་པས་མི་མང་པོ་བསད་ཡོད་པའི་རྐྱེན་གྱིས་ཡིན་ནོ།

⁴ གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་ང་དང་ངའི་རིགས་བརྒྱུད་ཀྱིས་ཨིསི་རཱཨེལ་གྱི་སྟེང་ཇི་སྲིད་ནམ་གནས་བར་རྒྱལ་སྲིད་སྐྱོངས་བར་འདམས་གནང་ཡོད། ཁོང་གི་ཡ་ཧུ་དཱའི་སྡེ་རིགས་ལ་དེད་དཔོན་དུ་འདམས་གནང་བ་དང་། ཡ་ཧུ་དཱ་པའི་ནང་ནས་ངའི་ཡབ་ཀྱི་ཁྱིམ་ཚང་ལ་འདམས་གནང་ཡོད། ཁྱིམ་ཚང་དེ་ཚོའི་ནང་ནས་ཁོང་གིས་ང་ལ་འདམས་གནང་ནས། ཨིསི་རཱཨེལ་ཡོངས་ཀྱི་རྒྱལ་པོར་བསྐོས་གནང་བར་ཐུགས་མཉེས་ཡོད།

⁵ ཁོང་གིས་ང་ལ་བུ་མང་པོ་གནང་བ་དང་། དེ་ཚོའི་ཁོངས་ནས་ཁོང་གིས་སོ་ལོ་མོན་ལ་ཨིསི་རཱཨེལ་གྱི་གཙོ་བོ་དཀོན་མཆོག་གི་རྒྱལ་ཁབ་དེའི་སྟེང་རྒྱལ་སྲིད་སྐྱོངས་བར་འདམས་གནང་ཡོད་དོ།

⁶ གཙོ་བོ་དཀོན་མཆོག་གིས་ཁྱོད་ཀྱི་བུ་སོ་ལོ་མོན་ནི་ངའི་མཆོད་ཁང་བཞེངས་མཁན་ཡིན། ངས་ཁོ་ལ་ངའི་བུ་འདམས་ཡོད་པ་དང་ང་ནི་ཁོའི་ཕ་ཡིན་ནོ།

⁷ ཁོས་ད་ལྟ་བྱས་པ་བཞིན་ངའི་བཀའ་ཁྲིམས་རྣམས་ཟབ་ཟབ་བྱས་ནས་སྲུང་བརྩི་ཞུས་པ་ཡིན་ན། ངས་ཁོའི་རྒྱལ་སྲིད་དུས་རྒྱུན་གྱི་ཆེད་དུ་གནས་པར་བྱ་རྒྱུ་ཡིན་ཞེས་ང་ལ་བཀའ་གནང་བྱུང་ངོ་།

⁸ དེ་འདྲ་སོང་ཙང་ངའི་མི་མང་ཚོ་ང་ཚོའི་དཀོན་མཆོག་དང་ཁོང་གི་མི་མང་ཨིསི་རཱཨེལ་པའི་འདུས་ཚོགས་འདིར་ཁྱོད་ཚོར་ས་ཆ་བཟང་པོ་མུ་མཐུས་བདག་པ་དང་། ཁྱོད་ཚོའི་མི་བརྒྱུད་རྗེས་མ་རྗེས་འཛིན་ཚོར་རྟག་ཏུ་རྩིས་སྤྲོད་ཐུབ་པའི་ཕྱིར་ང་ཚོའི་དཀོན་མཆོག་གི་ཇི་ལྟར་བཀའ་གནང་བ་བཞིན་ཟབ་ཟབ་ཀྱིས་སྲུང་བར་བྱོས་ཤིག་ཅེས་བསྐུལ་བར་བྱ་ཞེས་སོ།

⁹ ཁོང་གིས་སོ་ལོ་མོན་ལ་ངའི་བུ་ངས་ཁྱོད་ཀྱིས་ཕའི་དཀོན་མཆོག་ལ་ངོས་ལེན་བྱས་ནས་ཐེ་ཚོམ་མེད་པར་འདོད་བཞིན་དུ། ཁོང་གི་ཞབས་ཞུ་བྱོས་ཤིག་ཅེས་ནན་བསྐུལ་བྱ་རྒྱུ་ཡིན། ཁོང་གིས་ང་ཚོའི་བསམ་བློ་དང་འདོད་པ་ཚང་མ་མཁྱེན་པ་དང་། ཁྱོད་ཁོང་སར་བཅར་ན་ཁོང་གིས་ཁྱོད་ལ་ངོས་ལེན་གནང་ཡོང་། འོན་ཀྱང་ཁྱོད་ཀྱིས་ཁོང་ནས་ཁ་བསྒྱུར་བ་ཡིན་ན་ཁོང་གིས་ཁྱོད་ལ་རྟག་ཏུ་འདོར་བ་གནང་བ་དང་།

¹⁰ ཁྱོད་ཀྱིས་གཙོ་བོ་དཀོན་མཆོག་གིས་དམ་པའི་མཆོད་ཁང་བཞེངས་བར་ཁྱོད་ལ་འདམས་གནང་བར་ཤེས་དགོས་སོ། ད་སེམས་ཐག་གཙང་མ་བཅད་ནས་དེ་ལྟར་བྱོས་ཤིག་ཅེས་བཀའ་གནང་ངོ་།

¹¹ དཱ་བིད་ཀྱིས་སོ་ལོ་མོན་ལ་མཆོད་ཁང་གི་ཁང་པ་ཡོངས་དང་མཛོད་ཁང་ཁག་དང་གཞན་ཁང་མིག་ཁག་དང་སྡིག་པ་སེལ་བའི་ཤིན་ཏུ་དམ་པའི་གནས་མཆོག་བཅས་པའི་འཆར་གཞི་ཚང་མ་གནང་ངོ་།

¹² ཁོང་གིས་ཐུགས་ནང་ཡོད་པའི་སྡེ་ཡངས་དང་དེའི་མཐའ་འཁོར་གྱི་ཁང་མིག་ཁག་དང་མཛོད་ཁང་དང་མཆོད་ཁང་གི་ཡོ་བྱད་དང་གཙོ་བོ་དཀོན་མཆོག་ལ་བསྔོ་བའི་འབུལ་བ་བཅས་ཀྱི་འཆར་གཞི་རྣམས་ཁོང་ལ་གནང་ངོ་།

¹³ དཱ་བིད་ཀྱི་བླ་མ་དང་ལེ་ཝི་པ་རྣམས་ཀྱིས་རང་གི་ལས་འགན་ཁག་དང་། མཆོད་ཁང་གི་ལས་ཀ་ཁག་གནང་རྒྱུ་དང་། མཆོད་ཁང་གི་ཡོ་བྱད་རྣམས་བདག་ཉར་བྱ་རྒྱུ་བཅས་གོ་སྒྲིགས་བྱ་རྒྱུའི་འཆར་གཞི་ཡང་ཁོང་ལ་གནང་ངོ་།

¹⁴ ཁོང་གིས་མཆོད་ཁང་གི་ཡོ་བྱད་བཟོ་བར་གསེར་དངུལ་ཇི་ལྟར་བེད་སྤྱོད་བྱེད་དགོས་པ་དང་།

¹⁵ ཞུ་མར་དང་ཞུ་མར་གྱི་སྟེགས་བུ་དང་།

¹⁶ དངུལ་གྱི་རྒྱ་ལྕོག་དང་དཀོན་མཆོག་ལ་ཕུལ་བའི་བཞེས་བག་འཇོག་པའི་གསེར་གྱི་རྒྱ་ལྕོག་རེར་གསེར་དང་དངུལ་ཇི་དགོས་བེད་སྤྱོད་བྱེད་དགོས་པའི་སློབ་སྟོན་གནང་ཡོད་དོ།

¹⁷ ཤ་འཛིན་དང་མཆོད་ཞལ་དང་བུམ་པ་བཅས་བཟོ་བར་གསེར་ལྷད་མེད་ཇི་དགོས་པ་དང་། གསོལ་སྡེར་བཟོ་བར་གསེར་དངུལ་ཇི་དགོས་པ་དང་།

¹⁸ བདུག་སྤོས་འབུལ་སའི་མཆོད་ཁྲི་དང་གཙོ་བོ་དཀོན་མཆོག་གི་ཞལ་ཆད་ཀྱི་སྒྲོམ་སྟེང་ཀེ་རུབ་ཀྱི་ཤིང་རྟ་འཁོར་ལོ་བཟོ་བར་གསེར་ལྷད་མེད་ཇི་དགོས་སོགས་ཡང་སློབ་སྟོན་གནང་ཡོད་དོ།

¹⁹ རྒྱལ་པོ་དཱ་བིད་ཀྱིས། འདི་ཚོ་ཚང་མ་འབྲི་བཀོད་གྱིས་པའི་འཆར་གཞི་རྣམས་གཙོ་བོ་དཀོན་མཆོག་སྐུ་ཉིད་ནས་ང་ལ་དེ་ལྟར་བྱེད་དགོས་པའི་བཀའ་གནང་བའི་ནང་དུ་གསལ་ཡོད་ཅེས་གསུངས་སོ།

²⁰ རྒྱལ་པོ་དཱ་བིད་ཀྱིས། རང་གི་སྲས་སོ་ལོ་མོན་ལ་བློས་གདེངས་དང་སེམས་ཐག་ཆོད་པོ་བྱོས་ཤིག་དང་། ལས་འགོ་འཚུགས་ལ་གང་གིས་ཀྱང་འགག་ཆ་མེད་པ་བྱོས་ཤིག་དང་། ངས་ཞབས་ཕྱི་ཞུ་བའི་དཀོན་མཆོག་གཙོ་བོ་དཀོན་མཆོག་ཁྱོད་དང་མཉམ་དུ་ཡོད། ཁོང་གིས་ཁྱོད་ལ་སྤངས་མ་གནང་བར་ཁྱོད་ཀྱིས་ཁོང་གི་མཆོད་ཁང་བཞེངས་རྒྱུའི་ལས་ཀ་མ་ཚར་བར་ཁོང་ཁྱོད་དང་མཉམ་དུ་བཞུགས་པར་འགྱུར་རོ།

²¹ བླ་མ་ཚོ་དང་ལེ་ཝི་པ་ཚོར་མཆོད་ཁང་འདི་ལ་བྱེད་དགོས་པའི་ལས་འགན་ཁག་སྤྲད་ཡོད་དོ། རྩལ་འདྲ་མིན་དང་ལྡན་ཡོད་པའི་ལས་མི་རྣམས་ཁྱོད་ལ་རོགས་བྱ་རྒྱུ་འདོད་པ་ཆེན་པོ་ཡོད་པ་དང་། མི་མང་ཡོངས་དང་དེ་ཚོའི་འགོ་པ་རྣམས་ཁྱོད་ཀྱི་མངའ་འོག་ཏུ་ཡོད་ཅེས་གསུངས་སོ༎