སྔོན་རབས་དང་པོ། 16 - Tibetan Old Testament 2011

¹ དེ་ཚོས་དམ་བཅའི་སྒྲོམ་དེ་དྷ་བེད་ཀྱིས་ཕུབ་གནང་བའི་གུར་བར་འཁུར་ནས་དེའི་ནང་དུ་བཞག་གོ དེ་ཚོས་དཀོན་མཆོག་ལ་སྦྱིན་སྲེག་དང་མཐུན་འབྲེལ་ཀྱི་དམར་མཆོད་རྣམས་ཕུལ་ལོ།

² དཱ་བིད་ཀྱིས་དམར་མཆོད་ཕུལ་ཟིན་པ་དང་། ཁོང་གིས་གཙོ་བོ་དཀོན་མཆོག་གི་མཚན་ཐོག་མི་མང་ལ་བྱིན་རླབས་གནང་ངོ་།

³ དེ་ཚོ་ཚང་མར་ཁ་ཟས་བགོས་འགྲེམས་གནང་བ་དང་། ཁོང་གི་ཨིསི་རཱཨེལ་གྱི་ཁྱོ་ག་དང་སྐྱེ་དམན་རེ་རེར་བག་ལེབ་རེ་རེ་དང་ཤ་མེར་སྲེག་བཏང་བ་དུམ་བུ་རེ་དང་རྒུན་འབྲུམ་སྐམ་པོ་ཕྲན་བུ་བཅས་གནང་ངོ་།

⁴ དཱ་བིད་ཀྱིས་ལེ་ཝི་པ་འགའ་ཞིག་ལ་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་ལ་དམ་བཅའི་སྒྲོམ་གྱི་མདུན་དུ་མགུར་མ་དང་བསྟོད་དབྱངས་ཀྱི་སྒོ་ནས་མཆོད་པ་འབུལ་རྒྱུའི་སྣེ་འཁྲིད་བྱེད་པར་བསྐོ་བཞག་གནང་ངོ་།

⁵ འགོ་འཛིན་ཨ་སཕེ་དང་ཁོང་གི་ལས་རོགས་ཛ་ཀར་ཡཱ་དང་ཡི་ཨེལ་དང་ཤེ་མི་ར་མོད་དང་ཡེ་ཧི་ཨེལ་དང་མ་ཏི་ཐི་ཡཱ་དང་ཨེ་ལི་ཨབ་དང་བྷེ་ན་ཡཱ་དང་ཨོ་བེད་ཨེ་དྷོམ་དང་ཡི་ཨེལ་དང་བཅས་པ་ལ་སྒྲ་སྙན་གྱི་རོལ་མོ་གཏོང་མཁན་ལ་བསྐོ་བཞག་གནང་ངོ་། ཨ་སཕེ་ཀྱིས་སྦུག་ཆལ་ཁྲོལ་དགོས་པ་དང་།

⁶ བླ་མ་བྷེ་ན་ཡཱ་དང་ཡ་ཧ་ཛི་ཨེལ་གཉིས་ནས་དམ་བཅའི་སྒྲོམ་གྱི་མདུན་ལ་རྒྱུན་དུ་དུང་ཆེན་འབུད་དགོས་སོ།

⁷ དེ་ནས་དཱ་བིད་ཀྱིས་ཨ་སབ་དང་ཁོང་གི་རོགས་པ་ལེ་ཝི་པ་ཚོར་ཐོག་མར་དཀོན་མཆོག་ལ་བསྟོད་པའི་མགུར་མ་གཏོང་རྒྱུའི་ལས་འགན་གནང་ངོ་༎

བསྟོད་པའི་མགུར་མ་ཞིག།

⁸ གཙོ་བོ་དཀོན་མཆོག་ཁོང་ལ་ཐུགས་རྗེ་ཞུས། ཁོང་གི་མཛད་འཕྲིན་ཆེན་པོར་གསལ་སྒྲགས་བྱོས།

⁹ གཙོ་བོ་དཀོན་མཆོག་མཆོག་ལ་བསྟོད་མགུར་ཕུལ། ཁོང་གིས་ངོ་མཚར་མཛད་པ་རྣམས་བརྗོད་ཅིག།

¹⁰ ང་ཚོ་ཁོང་ལ་བདག་པར་དགའ་ངོམ་གྱི། ཁོང་ལ་མཆོད་མཁན་དགའ་བ་བྱེད་བཅུག་ཅིག།

¹¹ སྐྱབས་ཞུའི་ཆེད་དུ་གཙོ་བོ་དཀོན་མཆོག་སར་རྒྱུགས་ཤིག། མུ་མཐུད་བྱས་ནས་ཁོང་ལ་མཆོད་པ་ཕུལ།

^12-13 ཁྱོད་ཚོ་དཀོན་མཆོག་གི་ཞབས་ཕྱི་ཡ་ཀོབ་མི་བརྒྱུད་རྣམས། དཀོན་མཆོག་གིས་འདམས་པའི་ཨིསི་རཱཨེལ་པ་ཡི་མི་བརྒྱུད་རྣམས། དཀོན་མཆོག་གིས་གནང་བའི་ཡ་མཚན་གྱི་མཛད་པ་དང། ཁོང་གིས་ཁྲིམས་དཔྱོད་གཏོང་གནང་དྲན་པར་གྱིས།

¹⁴ གཙོ་བོ་དཀོན་མཆོག་ང་ཚོའི་དཀོན་མཆོག་ཡིན། ཁོང་གི་བཀའ་རྣམས་འཛམ་གླིང་ཡོངས་ཆེད་ཡིན།

¹⁵ དཀོན་མཆོག་ཁོང་གི་དམ་བཅའ་ནམ་ཡང་མ་བརྗེད་ཅིག། རྟག་་ཏུ་གནས་ཕྱིར་ཁོང་གིས་བཟོས་གནང་བ།

¹⁶ ཨབ་ར་ཧམ་ལ་མཛད་པའི་དམ་བཅའ་དང་། ཁོང་གིས་ཨི་སཱག་ལ་ནི་ཞལ་བཞེས་གནང་།

¹⁷ གཙོ་བོ་དཀོན་མཆོག་ཁོང་གིས་དམ་བཅའ་ཡ་ཀོབ་ལ་གནང་། དེ་ནི་ཇི་སྲིད་ནམ་གནས་བར་དུ་གནས།

¹⁸ ང་ཡི་ཁྱོད་ལ་ཀ་ནན་ཡུལ་སྤྲོད་རྒྱུ། དེ་ནི་ཁྱོད་ཀྱི་བདག་དབང་དུ་འགྱུར་གསུངས།

¹⁹ ཁོང་གི་མི་མང་གྲངས་ཀ་ཉུང་ཉུང་དང་། ཀ་ནན་ཡུལ་དུ་རྒྱུས་མེད་གནས་ཡོད་དོ།

²⁰ དེ་ཚོ་ཡུལ་ནི་གཅིག་ནས་གཞན་བར་དང་། རྒྱལ་ཁབ་གཅིག་ནས་རྒྱལ་ཁབ་གཞན་དབར་འཁྱམས།

²¹ ཁོང་གིས་དེ་ཚོར་བཙན་གནོན་བྱེད་བཅུག་མེད། དེ་ཚོ་སྐྱོབས་ཕྱིར་རྒྱལ་པོར་ཉེན་བརྡ་བཏང་།

²² ང་ཡིས་འདམས་པའི་ཞབས་ཕྱིར་གནོད་མ་བྱེད། ང་ཡི་ལུང་སྟོན་པ་ཚོར་མ་རེག་གསུངས།

²³ འཇམ་གླིང་ཡོངས་ཀྱི་གཙོ་བོར་བསྟོད་དབྱངས་ཕུལ། ཉིན་ལྟར་ང་ཚོ་སྐྱོབས་པའི་འཕྲིན་བཟང་སྒྲོགས།

²⁴ རྒྱལ་ཁབ་ཡོངས་ལ་ཁོང་གི་བཟི་བརྗིད་དང་། སྨད་འབྱུང་མཛད་བཟང་འབངས་ལ་གནང་བ་སྒྲོགས།

²⁵ ཤིན་ཏུ་མངགས་འོས་སྟོབས་ཆེན་གཙོ་བོ་ཁོང་། དཀོན་མཆོག་གཞན་ལྷག་གུས་བཀུར་ཞུ་བར་འོས།

²⁶ རྒྱལ་ཁབ་གཞན་གྱི་ལྷ་རྣམས་འདྲ་སྐུ་ཡིན། འོན་ཀྱང་གཙོ་བོས་མཐོ་རིས་བསྐྲུན་གནང་ངོ་།

²⁷ དཔལ་དང་གཟི་བརྗིད་ཁོང་ལ་མཐའ་བསྐོར་རོ། སྟོབས་དང་དགའ་བས་ཁོང་གི་མཆོད་ཁང་ཁེངས།

²⁸ ས་གཞིའི་འབངས་ཡོངས་གཙོ་བོར་བསྟོད་པར་ཕུལ། ཁོང་གི་གཟི་བརྗིད་ནུས་མཐུར་བསྟོད་པར་ཕུལ།

²⁹ གཙོ་བོ་དཀོན་མཆོག་གི་མཚན་གཟི་བརྗིད་ཅན་ལ་བསྟོད་པ་ཕུལ། འབུལ་བ་འཁྱེར་ནས་ཁོང་གི་མཆོད་ཁང་དུ་ཤོག། དམ་པ་མཆོག་མཇལ་དུས་ཁོང་ལ་ཕྱག་འཚོལ་ཞིག།

³⁰ ས་གཞི་ཡོངས་ནི་ཁོང་སར་འཇིགས་ཤིང་འདར། ས་གཞི་བརྟན་པོར་མཛད་པས་གཡོ་མི་ཐུབ།

³¹ ས་གཞི་དང་ནི་ནམ་མཁའ་དགའ་ངོམ་གྱི། རྒྱལ་ཁབ་ཀུན་ལ་གཙོ་བོར་རྒྱལ་པོར་སྨྲོས།

³² རྒྱ་མཚོ་དང་ནི་སེམས་ཅན་འུར་སྒྲ་འདོན། ཞིང་དང་དེར་ཡོད་ཚང་མས་དགའ་ངོམས་བྱོས།

³³ ས་གཞིར་རྒྱལ་སྲིད་སྐྱོངས་བར་ཁོང་ཕེབས་སྐབས། ནགས་ཀུན་གཙོ་བོའི་དྲུང་དུ་དབྱངས་ལེན་ཞིག།

³⁴ ཁོང་ནི་བཟང་པོ་ཡིན་སྟབས་གཙོ་བོ་དཀོན་མཆོག་ལ་ཐུགས་རྗེ་ཞུས། ཁོང་གི་བྱམས་རྩེ་དེ་ནི་མཐའ་མེད་ཡིན།

³⁵ ཁོང་ལ་དེ་ལྟར་ཞུས་ཞིག། ཀྱེ་དཀོན་མཆོག། ང་ཚོའི་སྐྱབས་དགོན། ང་ཚོར་སྐྱབས་རོགས་གནང་། ང་ཚོར་མཉམ་དུ་བསྡུས་འཛོམས་གནང་རོགས་གནང་། མི་རིགས་གཞན་ལས་སྐྱབས་རོགས་གནང། དེ་བས་ཁྱེད་ལ་ཐུགས་རྗེ་ཆེ་ཞུ་ཐུབ་ཤོག། ཁྱེད་ཀྱི་དམ་པའི་མཚན་ལ་བསྟོད་པ་ཕུལ།

³⁶ ཨིསི་རཱཨེལ་པ་ཡི་དཀོན་མཆོག་གཙོ་བོ་དཀོན་མཆོག་ལ། གཙོ་བོ་དཀོན་མཆོག་ཁོང་ལ་བསྟོད་པ་ཕུལ། ད་ལྟ་དང་ནི་རྟག་ཏུ་ཁོང་ལ་བསྟོད། དེ་ནས་མི་མང་རྣམས་ནས་ཨ་མེན་ཞེས་ཞུས་ནས་གཙོ་བོ་དཀོན་མཆོག་ལ་བསྟོད་པ་ཕུལ་ལོ།

ཡེ་རུ་ཤ་ལེམ་དང་གྷི་བི་ཨོན་དུ་མཆོད་པ་འབུལ་བ།

³⁷ རྒྱལ་པོ་དཱ་བིད་ཀྱིས་ཨ་སཕེ་དང་ཁོང་གི་མཆེད་གྲོགས་ལེ་ཝི་པ་ཚོ་དམ་བཅའི་སྒྲོམ་འཇོག་ཡུལ་གྱི་མཆོད་པ་འབུལ་བའི་འགོ་འཛིན་དུ་གཏན་འཇགས་བཞག་གནང་ངོ་། དེ་ཚོས་ཉིན་རེ་བཞིན་དེར་ལས་འགན་སྒྲུབ་དགོས་སོ།

³⁸ ཡེ་དུ་ཐུན་གྱི་བུ་ཨོ་བེད་ཨེ་དྷོམ་དང་དེའི་རིགས་རུས་ཀྱི་མི་དྲུག་ཅུ་རེ་བརྒྱད་ཀྱིས་དེ་ཚོ་ལ་རོགས་བྱེད་དགོས་སོ། ཧོ་སཱ་དང་ཨོ་བེད་ཨེ་དྷོམ་གཉིས་རྒྱལ་སྒོ་སྲུང་རྒྱུའི་འགོ་འཛིན་ཡིན་ནོ།

³⁹ བླ་མ་ཛ་དཱོག་དང་ཁོང་གི་མཆེད་གྲོགས་བླ་མ་རྣམས་གྷི་བི་ཨོན་དུ་གཙོ་བོ་དཀོན་མཆོག་ལ་མཆོད་པ་འབུལ་ཡུལ་གྱི་ས་གནས་སུ་གཙོ་བོ་དཀོན་མཆོག་ལ་མཆོད་པ་འབུལ་རྒྱུའི་འགོ་འཛིན་ཡིན་ནོ།

⁴⁰ གཙོ་བོ་དཀོན་མཆོག་གིས་ཨིསི་རཱཨེལ་པ་ཚོར་གནང་བའི་བཀའ་ཁྲིམས་ནང་ཇི་ལྟར་བྲིས་ཡོད་པ་ལྟར་ཉིན་ལྟར་སྔ་དགོང་གཉིས་ལ་སྦྱིན་སྲེག་གི་དམར་མཆོད་ཆ་ཚང་འབུལ་དགོས་སོ།

⁴¹ དེར་དེ་ཚོ་དང་མཉམ་དུ་ཧེ་མན་དང་ཡེ་དུ་ཐུན་དང་གཞན་ཚོས་གཙོ་བོ་དཀོན་མཆོག་གི་མཐའ་མེད་པའི་བྱམས་བརྩེའི་ཆེད་ཁོང་ལ་བསྟོད་དབྱངས་ལེན་མཁན་དམིགས་བསལ་གྱི་འདམས་པ་ཚོ་ཡོད་དོ།

⁴² ཧེ་མན་དང་ཡེ་དུ་ཐུན་གཉིས་ནི་བསྟོད་པའི་མགུར་མ་ལེན་སྐབས་སུ། དུང་དང་སྦུག་ཆོལ་དང་གཞན་རོལ་ཆས་གཏོང་མཁན་ཚོའི་འགོ་འཛིན་ཡང་ཡིན། ཡེ་དུ་ཐུན་གྱི་རིགས་རུས་ཀྱི་མི་རྣམས་རྒྱལ་སྒོ་སྲུང་རྒྱུའི་འགོ་འཛིན་ཡིན་ནོ།

⁴³ དེ་ནས་ཚང་མ་ཁྱིམ་དུ་ལོག་པ་དང་དཱ་བིད་ཡང་ཁྱིམ་དུ་ནང་མི་ཚོ་མཉམ་དུ་དུས་ཡུན་ཐུང་ངུ་ཞིག་བཞུགས་པར་ཕེབས་སོ༎