སྔོན་རབས་དང་པོ། 14 - Tibetan Old Testament 2011

ཡེ་རུ་ཤ་ལེམ་དུ་དཱ་བིད་ཀྱི་མཛད་པ་རྣམས།

¹ ཊ་ཡར་གྱི་རྒྱལ་པོ་ཧི་རམ་གྱིས་དཱ་བིད་ཀྱི་སར་ཚོང་དོན་གྱི་ཚོགས་ཤིག་བཏང་ཞིང་། ཕོ་བྲང་བཞེངས་བྱད་འགྱམ་ཤིང་དང་རྡོ་རྩིག་མཁན་དང་ཤིང་བཟོ་བ་བཅས་བརྫངས་སོ།

² དེ་ནས་དཱ་བིད་ཀྱི་སེམས་ལ། གཙོ་བོ་དཀོན་མཆོག་གིས་ང་ལ་ཨིསི་རཱཨེལ་གྱི་རྒྱལ་པོར་བསྐོས་གནང་བ་དང། ཉིད་ཀྱི་མི་འབངས་ཚོའི་ཆེད་དུ་ཉིད་ཀྱི་རྒྱལ་སྲིད་ཡར་རྒྱས་གོང་འཕེལ་དུ་གཏོང་བ་གནང་བཞིན་པའི་སྐོར་ལ་ཤེས་རྟོགས་བྱུང་ངོ་།

³ ཡེ་རུ་ཤ་ལེམ་དུ་དཱ་བིད་ཀྱིས་ཆུང་མ་མང་པོ་དང་ཆང་ས་རྒྱབ་ནས་བུ་དང་བུ་མོ་མང་པོ་བྱུང་ངོ་།

⁴ གཤམ་གསལ་བུ་ཕྲུག་རྣམས་ཡེ་རུ་ཤ་ལེམ་དུ་སྐྱེས་སོ། ཤ་མུ་ཨ་དང་ཤོ་བྷབ་དང་ན་ཐན་དང་སོ་ལོ་མོན་དང་།

⁵ ཨི་བར་དང་ཨེ་ལི་ཤུ་ཨ་དང་ཨེལ་པེ་ལེད་དང་།

⁶ ནོ་གཱ་དང་ནེ་ཕེག་དང་ཡ་ཕི་ཨ་དང་།

⁷ ཨེ་ལི་ཤ་མ་དང་བི་ལི་ཨ་ད་དང་ཨེ་ལི་ཕེ་ལེད་བཅས་ཡིན་ནོ༎

ཕེ་ལེ་ཤེད་པ་ཚོ་ལས་རྒྱལ་ཁ་ཐོབ་པ།

⁸ ཕེ་ལེ་ཤེད་པ་ཚོས་དཱ་བིད་ཨིསི་རཱཨེལ་ཡུལ་ཁམས་ཡོངས་རྫོགས་ཀྱི་རྒྱལ་པོར་བསྐོས་པའི་སྐོར་ཐོས་པ་དང་། དེ་ཚོའི་དམག་མིས་ཁོང་བཟུང་བར་ཕྱིན་ནོ།

⁹ ཕེ་ལེ་ཤེད་པ་ཚོ་རེ་ཕ་ཨིམ་གྱི་ལུང་གཤོང་དུ་འབྱོར་བ་དང་། དེ་ཚོས་འཕྲོག་བཅོམ་བྱེད་འགོ་འཚུགས་སོ།

¹⁰ དཱ་བིད་ཀྱིས་གཙོ་བོ་དཀོན་ནཆོག་ལ། ངས་ཕེ་ལེ་ཤེད་པ་ཚོ་དང་འཐབ་རྒོལ་བྱེད་དམ། ཁྱེད་ཀྱིས་ང་ལ་རྒྱལ་ཁ་གནང་གི་ཡིན་ནམ་ཞེས་བཀའ་འདྲི་ཞུས་པས། གཙོ་བོ་དཀོན་མཆོག་གིས། ཕར་རྒོལ་བྱོས་ཤིག་དང་ངས་ཁྱོད་ལ་རྒྱལ་ཁ་སྤྲོད་རྒྱུ་ཡིན་ཞེས་བཀའ་གནང་ངོ་།

¹¹ དེ་འདྲ་སོང་ཙང་དཱ་བིད་ཀྱིས་དེ་ཚོ་ལ་བྷལ་པེ་ར་ཛིམ་དུ་ཕར་རྒོལ་གནང་ནས་ཁོ་ཚོ་ཕམ་པར་མཛད་དོ། ཁོང་གིས། དཀོན་མཆོག་གིས་ཆུ་ལོག་བཞིན་དགྲ་བོའི་དམག་མི་རྣམས་མེད་པར་བཟོ་རྒྱུའི་བེད་སྤྱོད་གནང་བྱུང་ཞེས་གསུངས་སོ། དེ་འདྲ་སོང་ཙང་ས་ཆ་དེར་བྷལ་པེ་ར་ཛིམ་ཞེས་མིང་བཏགས་སོ།

¹² ཕེ་ལེ་ཤེད་པ་ཚོ་བྲོས་སྐབས་དེ་ཚོའི་སྐུ་འདྲ་ཁག་དེར་ལུས་པ་དང་། དཱ་བིད་ཀྱིས་དེ་ཚོ་མེར་སྲེག་གཏོང་དགོས་པའི་བཀའ་གནང་ངོ་།

¹³ ཕེ་ལེ་ཤེད་པ་ཚོ་ལུང་གཤོང་དུ་མགྱོགས་པོར་ཕྱིར་ལོག་ཡོང་བ་དང་ཡང་སྐྱར་འཕྲོག་བཅོམ་བྱེད་འགོ་འཚུགས་སོ།

¹⁴ ཡང་སྐྱར་དཱ་བིད་ཀྱིས་དཀོན་མཆོག་ལ་བཀའ་བསྡུར་ཞུས་པ་དང་། ཁོང་གིས་འདི་ནས་ཁོ་ཚོར་འཐབ་རྒོལ་མ་བྱེད་ཅིག མཐའ་བསྐོར་སྟེ་སོང་ལ་ཨོ་སེ་ཤིང་གི་ཉེ་འགྲམ་གྱི་ཕྱོགས་གཞན་དེ་ནས་འཐབ་རྒོལ་བྱ་རྒྱུར་གྲ་སྒྲིགས་བྱོས་ཤིག

¹⁵ ཁྱོད་ཅག་གིས་ཤིང་སྡོང་སྟེང་ནས་ཁོ་ཚོ་ཡོང་བའི་སྒྲ་ཐོས་པ་དང་དེ་ཚོར་འཐབ་རྒོལ་བྱོས་ཤིག གང་ལ་ཟེར་ན། ཕེ་ལེ་ཤེད་པའི་དམག་དཔུང་ཕམ་པར་བྱ་རྒྱུར་ང་ནི་ཁྱོད་ཚོའི་སྔོན་དུ་ཡོང་རྒྱུ་ཡིན་ཞེས་བཀའ་ལན་གནང་ངོ་།

¹⁶ དཱ་བིད་ཀྱིས་དཀོན་མཆོག་གིས་བཀའ་གནང་བ་ལྟར་བྱས་པ་དང་། ཁོང་གིས་ཕེ་ལེ་ཤེད་པ་ཚོ་གྷི་བི་ཨོན་ནས་གྷེ་ཛེར་བར་ཕྱིར་འབུད་གནང་ངོ་།

¹⁷ དཱ་བིད་ཀྱི་སྙན་གྲགས་ཕྱོགས་ཐམས་ཅད་ལ་ཁྱབ་པ་དང་། གཙོ་བོ་དཀོན་མཆོག་གིས་རྒྱལ་ཁབ་ཚང་མས་ཁོང་ལ་འཇིགས་དགོས་པ་བཟོས་གནང་ངོ་༎